“Come unto Him,” For the Strength of Youth, Mar. 2023.
ຂ່າວສານປະຈຳເດືອນ For the Strength of Youth, ເດືອນມີນາ 2023
ຈົ່ງມາຫາພຣະອົງ
ພຣະຜູ້ຊ່ວຍໃຫ້ລອດເຊື້ອເຊີນເຮົາໃຫ້ວາງພາລະຂອງເຮົາໄວ້ກັບພຣະອົງ.
ຮູບພາບປະກອບ ໂດຍ ແອນນີ ເຮັນຣີ ເນເດີ
ຈົ່ງມາຫາເຮົາ
ເຮົາສາມາດມາຫາພຣະຜູ້ຊ່ວຍໃຫ້ລອດໂດຍການຮຽນຮູ້ພຣະກິດຕິຄຸນຂອງພຣະອົງ, ການມີສັດທາໃນພຣະອົງ, ການກັບໃຈ, ການເຮັດ ແລະ ການຮັກສາພັນທະສັນຍາ, ແລະ ການເຮັດຕາມຕົວຢ່າງຂອງພຣະອົງ.
ເຮັດການໜັກໜ່ວງ … ພາລະໜັກ
ການແບກຫາບພາລະ ແລະ ການເຮັດວຽກໜັກທາງດ້ານຮ່າງກາຍ ບໍ່ພຽງແຕ່ເຮັດໃຫ້ເຮົາອິດເມື່ອຍທາງດ້ານຮ່າງກາຍເທົ່ານັ້ນ, ແຕ່ອິດເມື່ອຍທາງດ້ານຈິດໃຈ, ຄວາມຮູ້ສຶກ, ແລະ ວິນຍານນຳອີກ. ພຣະຜູ້ຊ່ວຍໃຫ້ລອດສະເໜີມອບສັນຕິສຸກຂອງພຣະອົງໃຫ້ແກ່ເຮົາ, ບໍ່ວ່າເຮົາຈະແບກຫາບພາລະແບບໃດກໍຕາມ.
ແອກ
ແອກເປັນເຄື່ອງມືຢ່າງໜຶ່ງທີ່ໃຊ້ໃນການທຽມສັດສອງໂຕໃຫ້ເຂົ້າກັນເພື່ອພວກມັນຈະສາມາດລາກສິ່ງຂອງໜັກ, ເຊັ່ນວ່າຄັນໄຖ ຫລື ກວຽນ. ແອກມັກຈະມີຄານໄມ້ວາງຢູ່ເທິງໂໜກຄໍຂອງສັດແຕ່ລະໂຕ, ເພື່ອກະຈາຍນ້ຳໜັກ.
ຮຽນຮູ້
ເຮົາສາມາດຮຽນຮູ້ຈາກພຣະເຢຊູຄຣິດໂດຍການສຶກສາຄຳສອນ ແລະ ຕົວຢ່າງຂອງພຣະອົງ—ແລະ ພະຍາຍາມເຮັດຕາມ.
ຄວາມເຊົາເມື່ອຍ
ຄວາມເຊົາເມື່ອຍຂອງພຣະຜູ້ຊ່ວຍໃຫ້ລອດຄືສັນຕິສຸກຂອງພຣະອົງ, ຊຶ່ງເຮັດໃຫ້ຈິດໃຈ ແລະ ວິນຍານຂອງເຮົາສະຫງົບ. ພຣະອົງຊ່ວຍໃຫ້ເຮົາເອົາຊະນະຄວາມກັງວົນທາງໂລກ ແລະ ປະທານຄວາມເຂັ້ມແຂງທາງວິນຍານໃຫ້ແກ່ເຮົາ ເມື່ອເຮົາຮູ້ສຶກອ່ອນແອ.
ກໍພໍເໝາະ … ເບົາ
ການຮັບເອົາແອກຂອງພຣະຜູ້ຊ່ວຍໃຫ້ລອດແບກໄວ້ກັບເຮົາ ໝາຍເຖິງການຜູກມັດຕົວເຮົາເອງໄວ້ກັບພຣະອົງຜ່ານທາງພັນທະສັນຍາ. ມັນໝາຍເຖິງການມອບຫົວໃຈຂອງເຮົາໃຫ້ກັບພຣະອົງ ແລະ ວຽກງານຂອງພຣະອົງ. ເມື່ອເຮົາເຮັດສິ່ງນີ້, ເຮົາຈະຮູ້ສຶກວ່າ ພາລະຂອງເຮົາເບົາບາງລົງ ຍ້ອນວ່າພຣະອົງກຳລັງຊ່ວຍເຫລືອເຮົາຢູ່.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly For the Strength of Youth Message, March 2023. Language. 18905 331