Mesaj Mansyèl Lyawona , Avril 2023

Lafwa nan Jezikri

pwofil Jezi

Jezikri , pa Harry Anderson

Gen lafwa nan Jezikri se premye prensip levanjil la (gade Atik Lafwa 1:4). Lafwa nou ap ede nou fè chwa k ap fè nou tounen al jwenn Papa nou ki nan Syèl la. Nou kapab travay pou nou ranfòse lafwa nou pandan tout vi nou.

timoun ak jèn ki ransanble toutotou yon liv

Kisa Lafwa Ye?

Lafwa se yon kwayans oswa yon konfyans fèm nan yon bagay. Pou gen lafwa sa gen ladann esperans ak kwayans nan bagay ki se verite, menm lè nou pa kapab wè yo oswa nou pa kapab konprann yo konplètman (gade Ebre 11:1; Alma 32:21).

pòtrè Jezikri

Detay ki soti nan Kris la ak Jèn Chèf Rich la, pa Heinrich Hofmann.

Lafwa Santre nan Jezikri

Pou l mennen nan sali, lafwa nou dwe santre nan Jezikri kòm Sovè ak Redanmtè nou. Gen lafwa nan Kris vle di genyen konfyans nan Li. Sa vle di lage w nèt nan men Li—kwè nan pouvwa, entèlijans ak lanmou Li. Sa gen ladann tou kwè ak suiv ansèyman Li yo.

koup k ap etidye ekriti yo

Ogmante lafwa nou

Lafwa se yon kado ki soti nan Bondye, men nou dwe chache li epi travay pou nou kenbe li fèm. Nou kapab ogmante lafwa nou lè nou priye ak etidye ekriti ak ansèyman pwofèt dènye jou yo. Nou ranfòse lafwa nou tou lè n ap viv nan lajistis ak lè nou respekte alyans nou yo.

Viv pa lafwa

Lafwa se plis pase yon senp kwayans. Li gen ladann aji an fonksyon kwayans sa a. Nou montre lafwa nou nan fason n ap viv. Lafwa nan Jezikri motive nou pou nou suiv egzanp pafè Li. Lafwa nou pouse nou pou nou obeyi kòmandman yo, repanti pou peche nou yo epi fè ak respekte alyans.

Jezi k ap geri yon mesye ki avèg

Lafwa Kapab Pote Mirak

Vrè lafwa a pote mirak ki ka gen ladann vizyon, rèv, gerizon ak lòt don ki soti nan Bondye. Ekriti yo genyen plizyè istwa moun ki te resevwa mirak nan men Senyè a akoz lafwa yo nan Li. Gade “Mirak” nan Gid Ekriti yo pou kèk egzanp.

Lafwa Kapab Pote Lapè

Gen lafwa nan Bondye ak nan plan sali Li a kapab rann nou fò nan eprèv n ap travèse yo. Lafwa kapab ban nou fòs pou n avanse ak fè fas ak eprèv nou yo avèk kouraj. Menm lè avni a parèt pa sèten, lafwa nou nan Sovè a kapab ban nou lapè.

yon papa ki kenbe pitit li pandan y ap gade yon tablo sou Jezi

Lafwa nan Jezikri Mennen nan Sali

Egzèse lafwa nan Kris la ap mennen nou nan sali. Kris la te prepare chemen an pou nou ka resevwa lavi etènèl. Lè nou viv lafwa nou nan Li, nou kapab jwenn padon pou peche nou yo epi retounen viv avèk Bondye ankò.

Nan Ekriti yo

Lafwa soti nan koute pawòl Bondye a (gade Women 10:17).

Lafwa san zèv se yon lafwa ki mouri (gade Jak 2:17–18).

Senyè a kapab fè tout bagay pou nou si nou genyen lafwa (gade 1 Nefi 7:12).

Pawòl pou nou Sonje

Alyans: yon pwomès sakre nou fè avèk Bondye. Nou fè alyans pandan òdonans tankou batèm ak dotasyon nan tanp lan.

Mirak: yon evènman ekstrawòdinè pouvwa Bondye lakoz. Nou wè mirak akoz lafwa nou nan Senyè a.

Plan sali: plan Bondye pou ede pitit Li yo simonte peche ak lanmò pou yo ka retounen vin jwenn Li. Lafwa nan Jezikri enpòtan nan plan sa a paske se sèlman gras ak Ekspyasyon L la nou kapab sove.

Dekouvri Plis

Si w gen kesyon sou lafwa, ou kapab pale avèk frè ak sè sèvis pastoral ou yo, ak dirijan pawas oswa branch ou yo, oswa misyonè yo. Ou kapab jwenn tou ansèyman ak lòt resous sou lafwa nan ChurchofJesusChrist.org oswa nan aplikasyon Libreri/Medyatèk Levanjil la.

© 2023 pa Intellectual Reserve, Inc.All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Lyawona Message, April 2023.Language. 19006 036