Binulan a Mensahe iti Liahona , Abril 2023

Pammati ken ni Jesucristo

profile ni Jesus

Jesucristo, ni Harry Anderson

Ti kaadda ti pammati ken ni Jesucristo ti umuna a pagbatayan ti ebanghelio (kitaen iti Pagannurotan ti Pammati 1:4). Tulongannatayo ti pammatitayo nga agpili a mangiturongto kadatayo nga agsubli iti Nailangitan nga Amatayo. Makapagtrabahotayo a mangpapigsa iti pammatitayo iti unos ti panagbiagtayo.

naguummong dagiti ubbing ken agtutubo iti aglawlaw ti maysa a libro

Ania ti Pammati?

Ti pammati ket maysa a natibker a panamati wenno panagtalek iti maysa a banag. Ti kaadda ti pammati iramanna ti panangnamnama ken panamati kadagiti banag a pudno, uray no ditayo makita dagitoy wenno naan-anay a maawatan dagitoy (kitaen iti Hebreo 11:1; Alma 32:21).

ladawan ni Jesucristo

Detalye manipud iti Ni Cristo ken ti Nabaknang nga Agtutubo nga Agturay, ni Heinrich Hofmann

Pammati a Naisentro ken ni Jesucristo

Tapno mangiturong iti pannakaisalakan, nasken a maisentro ti pammatitayo ken ni Jesucristo kas Mangisalakan ken Mannubbottayo. Ti kaadda ti pammati ken Cristo ket kayatna a sawen ti kaadda ti panagtalek Kenkuana. Kayatna a sawen ti panagpannuray a naan-anay Kenkuana—panagtalek iti bileg, saririt, ken ayatna. Iramanna ti panamati ken panagsurot kadagiti pannursurona.

agassawa nga agad-adal kadagiti nasantuan a kasuratan

Panangpapigsa iti Pammatitayo

Ti pammati ket maysa a sagut manipud iti Dios, ngem nasken a kalikagumantayo a gun-oden daytoy ken itrabahotayo tapno agtalinaed daytoy a napigsa. Mapapigsatayo ti pammatitayo babaen ti panagkararag, ken panagadal kadagiti nasantuan a kasuratan ken pannursuro dagiti propeta iti ud-udina nga aldaw. Mapapigsatayo pay ti pammatitayo no agbiagtayo a sililinteg ken agtungpaltayo kadagiti katulagantayo.

Panagbiag babaen ti Pammati

Ti pammati ket ad-adda pay nga amang ngem iti panamati. Kayatna a sawen ti panagtignay iti dayta a panamati. Ipakitatayo ti pammatitayo iti wagas ti panagbiagtayo. Ti pammati ken ni Jesucristo ti mangguyugoy kadatayo a mangsurot iti naan-anay a pagwadanna. Ti pammatitayo ti mangiturong kadatayo nga agtulnog kadagiti bilin, agbabawi kadagiti basoltayo, ken agaramid ken agtungpal kadagiti katulagan.

Ni Cristo a mangag-agas iti maysa a bulsek a lalaki

Makaiturong ti Pammati kadagiti Milagro

Mangisangbay ti pudno a pammati kadagiti milagro, a mabalin a pakairamanan dagiti parmata, tagtagainep, panagagas, ken dadduma pay a sagut nga aggapu iti Dios. Naglaon dagiti nasantuan a kasuratan iti adu nga estoria dagiti tao a nakaawat kadagiti milagro manipud iti Apo gapu iti pammatida Kenkuana. Kitaen iti “Milagro” iti Pangiwanwan iti Nasantuan a Kasuratan para iti sumagmamano a pagarigan.

Makaisangbay ti Pammati iti Talna

Ti pammati iti Dios ken iti plano ti pannakaisalakan mapapigsanatayo kabayatan dagiti karittayo. Ti pammati ti makaited kadatayo iti pigsa nga agtultuloy ken mangsango kadagiti pagrigatantayo nga addaan iti tured. Nupay kasla mapagduaduaan ti masakbayan, ti pammatitayo iti Mangisalakan ti makaited kadatayo iti talna.

ama a mangig-iggem iti anakna bayat ti panangkitada iti naipinta a ladawan ni Jesus

Mangiturong ti Pammati ken ni Jesucristo iti Pannakaisalakan

Ti panangaramat iti pammati ken ni Cristo ti mangiturongto iti pannakaisalakan. Insagana ni Cristo ti dalan para kadatayo nga umawat iti agnanayon a biag. Bayat ti panagbiagtayo babaen ti pammatitayo Kenkuana, mapakawantayo kadagiti basoltayo ken makapagsublitayo a makidenna manen iti Dios.

Manipud kadagiti Nasantuan a Kasuratan

Agtaud ti pammati iti panagdengngeg iti balikas ti Dios (kitaen iti Taga Roma 10:17).

Ti pammati nga awan ti aramid ket eppes (kitaen iti Santiago 2:17–18).

Maaramid ti Apo amin a banag para kadatayo no adda pammatitayo (kitaen iti 1 Nephi 7:12).

Dagiti Balikas a Laglagipen

Katulagan: maysa a sagrado a kari nga aramidentayo iti Dios. Agaramidtayo kadagiti katulagan bayat dagiti ordinansa kas iti panagbuniag ken ti endowment iti templo.

Milagro: maysa a naisangsangayan a pasamak a gapuanan ti pannakabalin ti Dios. Makitatayo dagiti milagro gapu iti pammatitayo iti Apo.

Plano ti pannakaisalakan: plano ti Dios a tumulong kadagiti annakna a mangparmek iti basol ken ipapatay tapno makasubli Kenkuana. Napateg ti pammati ken ni Jesucristo iti daytoy a plano gapu ta babaen laeng iti Pannubbotna a maisalakantayo.

Ammuen ti Ad-adu Pay

No adda dagiti saludsodyo maipapan iti pammati, mabalinyo a kasarita dagiti ministering brother wenno sisteryo, dagiti lideryo iti ward wenno branch, wenno dagiti missionary. Masarakanyo pay dagiti pannursuro ken dadduma pay a resources maipapan iti pammati iti ChurchofJesusChrist.org ken iti Gospel Library app.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, April 2023. Language. 19006 864