Molaetsa wa Liahona wa Kgwedi le kgwedi, Moranang 2023

Tumelo mo go Jeso Keresete

porofaele ya ga Jeso

Jeso Keresete, ka Harry Anderson

Go nna le tumelo mo go Jeso Keresete ke molawana wa ntlha wa efangele (bona Articles of Faith 1:4). Tumelo ya rona e tlaa re thusa go dira ditshwetso tse di tlaa re isang kwa go Rara wa rona wa Legodimo. Re ka dira go nonotsha tumelo ya rona matshelo otlhe a rona.

bana le banana ba phuthegile go dikologa buka

Tumelo ke eng?

Tumelo ke tumelo e e tiileng kgotsa go tshepa sengwe. Go nna le tumelo go akaretsa go solofela le go dumela mo dilong tse di boammaaruri, le fa re sa di bone kgotsa re sa di tlhaloganye gotlhelele (bona Bahebera 11:1; Alema 32:21).

setshwantsho sa ga Jeso Keresete

Dintlha go tswa go Christ and the Rich Young Ruler, ka Heinrich Hoffmann

Tumelo e e remeletseng mo go Jeso Keresete

Go re isa polokong, tumelo ya rona e tshwanetse go remelela mo go Jeso Keresete jaaka Mmoloki le Morekolodi wa rona. Go nna le tumelo mo go Keresete go raya go nna le tshepo mo go Ene. Go raya go ikaega ka Ene gotlhelele—go tshepa thata ya Gagwe, tlhalefo, le lorato. Go akaretsa gape go dumela le go sala morago dithuto tsa Gagwe.

banyalani ba ithuta dikwalo tse di boitshepo

Go oketsa Tumelo ya Rona

Tumelo ke mpho go tswa mo Modimong, mme re tshwanetse go e batla le go dira go e tshegetsa e nonofile. Re ka oketsa tumelo ya rona ka go rapela le go ithuta dikwalo tse di boitshepo le dithuto tsa baporofeti ba malatsi a bofelo. Gape re nonotsha tumelo ya rona jaaka re tshela ka tshiamo le go tshegetsa dikgolagano tsa rona.

Go tshela ka Tumelo

Tumelo e kgolo go feta le gone go dumela. E akaretsa go dira tumalanong le seo. Re supa tumelo ya rona ka fa re tshelang ka teng. Tumelo mo go Jeso Keresete e re kgothaletsa go sala morago sekao sa Gagwe se se itekanetseng. Tumelo ya rona e re gogela go obamela ditaelo, go ikhwaatlhaela dibe tsa rona, le go dira le go tshegetsa dikgolagano.

Jeso a fodisa monna wa sefofu

Tumelo e Ka Isa mo Dikgakgamatsong

Tumelo ya boammaaruri e tlisa dikgakgamatso, tse di ka akaretsang dipono, ditoro, diphodiso, le dimpho tse dingwe tse di tswang kwa Modimong. Dikwalo tse di boitshepo di na le dipolelo tse dintsi tsa batho ba ba amogetseng dikgakgamatso go tswa mo Moreneng ka ntlha ya tumelo ya bone mo go Ene. Bona “Dikgakgamatso” mo Kaelong ya Dikwalo tse di Boitshepo go bona dikai dingwe.

Tumelo e Ka Tlisa Kagiso

Go nna le tumelo mo Modimong le togamaano ya Gagwe ya poloko go ka re nonotsha ka nako ya dikgwetlho tsa rona. Tumelo e ka re neela nonofo go gatela pele le go lebagana le mathata ka bopelokgale. Le fa isago e lebega e sa tlhomama, tumelo ya rona mo go Mmoloki e ka re neela kagiso.

rre a tshotse ngwana wa gagwe jaaka ba lebeletse setshwantsho sa ga Jeso

Tumelo mo go Jeso Keresete e Isa Polokong

Go diragatsa tumelo mo go Keresete go tlaa re isa polokong ya rona. Keresete o re baakanyeditse tsela go amogela botshelo jo bosakhutleng. Jaaka re tshela ka tumelo ya rona mo go Ene, re ka itshwarelwa dibe tsa rona le go boela go tshela le Modimo gape.

Go tswa mo Dikwalong tse di boitshepo

Tumelo e tla ka go reetsa lefoko la Modimo (bona Baroma 10:17).

Tumelo e e senang ditiro e sule (bona Jakobe 2:17–18).

Morena o ka re direla dilo tsotlhe fa re na le tumelo (bona 1 Nefi 7:12).

Mafoko a go a Gakologelwa

Dikgolagano: ditsholofetso tse di boitshepo tse re di dirang le Modimo. Re dira dikgolagano ka nako ya ditao jaaka kolobetso le endaomente ya tempele.

Dikgakgamatso: tiragalo e e sa tlwaelesegang e dirwa ke thata ya Modimo. Re bona dikgakgamatso ka ntlha ya tumelo ya rona mo Moreneng.

Togamaano ya poloko: Togamaano ya Modimo go thusa bana ba Gagwe go fenya sebe le loso go boela kwa go Ene. Tumelo mo go Jeso Keresete e botlhokwa mo togamaanong e gonne fela ka Tetlanyo ya Gagwe re ka bolokwa.

Batlisisa Go Feta

Fa o na le dipotso ka ga tumelo, o ka bua le badiredi ba bakaulengwe kgotsa bokgaitsadi, baeteledipele ba wate ya gago kgotsa ba lekalana la gago, kgotsa baanamisa efangele. Gape o ka bona dithuto le didirisiwa tse dingwe ka ga tumelo kwa ChurchofJesusChrist.org kgotsa mo Gospel Library app.

© 2023 ka Intellectual Reserve, Inc. All rights reserved. Printed in USA. Tetla ya Sekgoa: 6/19. Tetla ya thanolo: 6/19. Thanolo ya Molaetsa wa Liahona wa Kgwedi le kgwedi, Moranang 2023. Language. 19006 763