UMyalezo waNyanga zonke we Liyahona yango-Ephreli 2023

Ukholo kuJesu Kristu

Umdwebo kaJesu

Jesus Christ [UJesu Kristu], nguHarrry Anderson

Ukuba nokholo kuJesu Kristu kungumgomo wokuqala wevangeli (bheka ImiBhalo yoKholo 1:4). Ukholo lwethu luzosisiza ukuba senze izinqumo ezizosiholela emuva kuBaba wethu oseZulwini. Singasebenzela ukuluqinisa ukholo lwethu izimpilo zethu zonke.

abantwana nentsha bebuthene bezungeze incwadi

Luyini Ukholo?

Ukholo lusho ukukholelwa okuqinile noma ukwethembela kokuthile. Ukuba nokholo kusho ukuba nethemba nokukholelwa ezintweni eziyiqiniso, ngisho nalapho singakwazi ukuzibona noma ukuziqonda ngokuphelele (bheka KumaHeberu 11:1; Alima 32:21).

isithombe sikaJesu Kristu

umdwebo osuselwe ku Christ and the Rich Young Ruler [Kristu noMbusi Osemusha oNothileyo ], nguHeinrich Hofmann

Ukholo Olugxile KuJesu Kristu

Ukholo lwethu kufanele lugxile kuJesu Kristu njengoMsindisi noMhlengi wethu ukuze luholele ensindisweni. Ukuba nokholo kuKristu kusho ukwethembela Kuye. Kusho ukubheka Kuye ngokuphelele—ukwethembela emandleni Akhe, ukukhalipha, nothando . Kusho futhi nokukholelwa kanye nokulandela izimfundiso Zakhe.

izithandani zifunda imibhalo engcwele

Ukukhulisa Ukholo Lwethu

Ukholo luyisipho esivela kuNkulunkulu, kodwa kufanele silufune futhi sisebenzele ukulugcina luqinile. Singalukhulisa ukholo lwethu ngokukhuleka kanye nokufunda imibhalo engcwele kanye nezimfundiso zabaprofethi bezinsuku zokugcina. Siphinde siluqinise ukholo lwethu lapho siphila ngokulunga futhi sizigcina izivumelwano zethu.

Ukuphila ngokuKholwa

Ukholo lungaphezulu kwenkolelo nje. Lusho ukwenza ngokuvumelana naleyo nkolelo. Sikhombisa ukholo lwethu ngendlela esiphila ngayo. Ukholo kuJesu Kristu lusifaka ugqozi lokuba silandele isibonelo Sakhe esingenaphutha. Ukholo lwethu lusiholela ekutheni siyihloniphe imiyalelo, siphenduke ezonweni zethu, nokuthi senze futhi sigcine izivumelwano.

uJesu elapha indoda eyimpumputhe

Ukholo Lungaholela ekutheni Sibone Izimangaliso

Ukholo lwangempela luletha izimangaliso, okungaba yimibono, amaphupho, ukuphiliswa, nezinye izipho ezivela kuNkulunkulu. Imibhalo engcwele iqukethe izindaba eziningi zabantu abathola izimangaliso ezivela eNkosini ngenxa yokholo lwabo Kuyo. Bheka isihloko esithi “Isimangaliso” kwiziHloko zemiBhalo eNgcwele ukuze uthole ezinye zezibonelo .

Ukholo Lungaletha Ukuthula

Ukuba nokholo kuNkulunkulu kanye nesu Lakhe lensindiso kungasiqinisa uma sibhekene nobunzima. Ukholo lungasinika amandla okuphikelela nokuthi sibhekane nobunzima bethu ngesibindi. Ngisho noma ikusasa libonakala lingacacile, ukholo lwethu kuMsindisi lungasinika ukuthula.

ubaba ephethe umntwana wakhe bebuka umdwebo kaJesu

Ukholo kuJesu Kristu Luholela Ensindisweni

Ukuba nokholo kuKristu kuzoholela ekusindisweni kwethu. UKristu usilungiselele indlela yokuba sithole ukuphila okuphakade. Lapho siphila ngokukholwa kwethu Kuye, singathethelelwa izono zethu futhi sibuyele ukuyohlala noNkulunkulu futhi.

Okuvela Emibhalweni Engcwele

Ukukholwa kuvela ngokuzwa izwi likaNkulunkulu (bheka kwabaseRoma 10:17).

Ukholo ngaphandle kwemisebenzi lufile (bheka EkaJakobe 2:17–18).

INkosi ingasenzela zonke izinto uma sinokholo (bheka ku 1 Nefi 7:12).

Amagama okufanele Uwakhumbule

Isivumelwano: yisethembiso esingcwele esisenza noNkulunkulu. Senza izivumelwano ngesikhathi sezimiso ezifana nokubhabhadiswa kanye nezipho zasethempelini.

Isimangaliso: isigameko esingajwayelekile esidalwa ngamandla kaNkulunkulu. Sibona izimangaliso ngenxa yokholo lwethu eNkosini.

Isu lensindiso: Yisu likaNkulunkulu lokusiza abantwana Bakhe banqobe isono nokufa ukuze babuyele Kuye. Ukholo kuJesu Kristu lubalulekile kulelisu ngoba singasindiswa kuphela ngenxa yeNhlawulo Yakhe.

Thola Olunye Ulwazi

Uma unemibuzo mayelana nokholo, ungakhuluma nabafowenu noma odadewenu abasizayo, abaholi besigceme noma begatsha lakho, noma abefundisi. Ungazithola futhi izimfundiso namanye amasu mayelana nokholo kuChurchofJesusChrist.org noma kwi-app yoMtapo woLwazi wezincwadi zeVangeli.

© 2023 by Intellectual Reserve, Inc. All rights reserved. Ishicilelwe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, April 2023. Language. 19006 783