Binulan a Mensahe ti Liahona , Mayo 2023
Kasapulan dagiti Mamagkappia
Adda karbenganyo a mangpili iti panagsusupiat wenno pannakikappia. Allukoyenkayo a pilienyo ti agbalin a mamagkappia, ita ken iti agnanayon.
Patpatgek a kakabsatko, naragsak a makaduadakayo. Kabayatan dagitoy napalabas nga innem a bulan, kanayon nga addakayo iti panunotko ken kadagiti kararagko. Ikararagko nga ipakaammonto ti Espiritu Santo ti kayat ti Apo a mangngeganyo bayat ti pannakisaritak kadakayo ita.
Kabayatan ti surgical internship-ko adu a tawenen ti napalabas, tinulongak ti maysa a siruhano (surgeon) a mangputputed iti maysa a luppo a malunglungsoten gapu iti impeksion a gapuanan ti kaawan nga agtaray a dara. Narigat ti operasion. Kalpasanna, tapno makanayon pay iti tension, saan a naaramid a nasayaat ti maysa iti team ti trabahona, ket naggil-ayab ti pungtot ti siruhano (surgeon). Gapu iti pungtotna, impuruakna ti scalpelna a napno iti mikrobio. Nagdisso daytoy iti takiagko!
Amin nga adda iti operating room—malaksid iti di makapagteppel a siruhano—ket napabutngan iti daytoy a panaglabsing kadagiti umno a wagas ken annuroten no agipatpatungpal iti operasion. Agyamanak gapu ta saanak ketdi a naakaran. Ngem daytoy a padas ti nangibati iti napaut nga impresion kaniak. Iti dayta mismo nga oras, inkarik iti bagik nga ania man a mapasamak iti mismo nga operating room-ko, diakto kaano man mapukawan iti kontrol ti emosion. Insapatak pay iti dayta nga aldaw a diakto kaano man mangipuruak iti ania man a banag gapu iti pungtot—scalpel man daytoy wenno balikas.
Uray ita, kalpasan ti adu a dekada, pinampampanunotko no napegpeggad ti kontaminado a scalpel a nagdisso iti takiagko ngem iti makasabidong a panagsusupiat a makaapekto iti nailian a panagsasaritatayo ken iti nakaad-adun a personal a panaglilinnangen iti agdama. Kasla napukawen ti kinamanagdayaw ken kinasayaat iti ugali kabayatan daytoy a panawen ti pannakarakrak ken nalaus a panagsisinnupiat.
Gagangay unayen ti kinabulgar, panagsapul iti biddut, ken panagsasao iti dakes iti dadduma. Nakaad-adun dagiti eksperto, politiko, entertainer, ken dadduma pay a mangimpluensia ti kanayon a manginsulto. Maseknanak unay a nakaad-adun dagiti tao ti kasla mamati a naan-anay a maakseptar a mangikondena, mangperdi, ken mangpadakes iti asino man a saan nga umanamong kadakuada. Adu dagiti kasla aggagar a mangdadael iti reputasion ti sabali nga usarenda dagiti napalaus ken nasasakit a panag-insulto!
Di kaano man makaallukoy ti pungtot. Saan a mangpapigsa iti asino man ti pannakilaban. Di kaano man mangiturong ti panagsusupiat kadagiti naparegta a pangrisut. Ti nakalidliday, makakitatayo no dadduma iti panagsusupiat uray kadagiti miembro ti Simbaantayo. Madamagtayo ti maipapan kadagidiay mangtagibassit kadagiti assawa ken annakda, dagidiay agus-usar iti pungtotda tapno makontrol dagiti sabali, ken dagidiay mangdusa kadagiti miembro ti pamilia babaen ti “naulimek a panangtrato.” Madamagtayo dagiti agtutubo ken ubbing a mangbulbuli ken dagiti empleado a mangpabasol kadagiti katrabahoda.
Patpatgek a kakabsatko, saan koma a kastoy ti mapaspasamak. Kas disipulo ni Jesucristo, masapul nga agbalintayo a pagwadan ti no kasano ti makilangen kadagiti sabali—nangnangruna no agduduma dagiti kapanunotantayo. Maysa kadagiti kalakaan a wagas a pangbigbig iti maysa a pudno a pasurot ni Jesucristo ket no kasano ti panangtrato dayta a tao ti dadduma a tao.
South Africa
Inlawlawag ti Mangisalakan daytoy kadagiti sermonna kadagiti pasurot iti agsumbangir a paset ti lubong. “Nagasat dagiti natarnaw iti pusoda,” Kinunana.1 “Siasino man a mangtungpa kenka iti kannawan a pingpingmo, ipatungpam pay ta maysa a pingpingmo.”2 Ket kalpasanna, siempre, nangted iti balakad a karit iti tunggal maysa kadatayo: “Ayatenyo dagiti kabusoryo, ket bendisionanyo ti mangilunod kadakayo, agaramidkayo iti nasayaat kadagiti gumura kadakayo, ket ikararaganyo dagiti manguy-uyaw, ken mangidadanes kadakayo.”3
Sakbay ti ipapatayna, binilin ti Mangisalakan dagiti Sangapulo-ket-dua nga Apostolna nga aggiinnayatda kas iti panagayatna kadakuada.4 Ket kalpasanna innayonna, “Gapu itoy mailasindanto a dakayo ti adalak, no adda ayatyo iti maysa ken maysa.”5
Nalawag ti mensahe ti Mangisalakan: Dagiti pudno a disipulona ti mangbangon, mangitag-ay, mangallukoy, manggutugot, ken mangparegta—uray kasano ti kinarigat ti kasasaad. Dagiti pudno a disipulo ni Jesucristo ket mamagkappia.6
Ita ti Domingo Ramos. Agsagsaganatayo a mangrambak iti kapatgan ken kaindaklanan a pasamak a nairekord ditoy daga, nga isu ti Pannubbot ken Panagungar ni Apo Jesucristo. Maysa kadagiti kapintasan a wagas a madayawtayo ti Mangisalakan ket ti panagbalintayo a mamagkappia.7
Gapu iti Pannubbot ti Mangisalakan maparmektayo ti amin a dakes—agraman ti panagsusupiat. Saantayo koma a maallilaw: dakes ti panagsusupiat! Impakdaar ni Jesucristo a dagiti addaan iti “espiritu ti panagsusupiat” ket saan a nagtaud Kenkuana no di ket “nagtaud iti diablo, nga isu ti ama ti panagsusupiat, ket [ti diablo] gutugotenna ti puso dagiti tao a makisuppiat iti pungtot, iti maysa ken maysa.”8 Dagidiay mangyallukoy iti panagsusupiat ket ar-armidenda met ti ar-aramiden ni Satanas, inggagarada man wenno saan. “Awan ti tao a makapagserbi iti dua nga appo.”9 Ditay masuportaran ni Satanas babaen kadagiti pananglalaistayo ket kalpasanna panunotentayo a makapagserbitayo pay laeng iti Dios.
Patpatgek a kakabsatko, napateg unay no kasano ti panangtratotayo iti tunggal maysa! Napateg unay no kasano a kasaritatayo ken pagsasaritaan maipapan kadagiti dadduma iti pagtaengan, iti simbaan, iti trabaho, ken iti online. Ita nga aldaw, idawdawatmi kadatayo a makilangen kadagiti dadduma iti nangatngato, nasansantuan a wagas. Dumngegkayo koma a naimbag. “No adda ania man a naimbag, makaay-ayo, wenno nasayaat ti damag wenno maidaydayaw”10 a maibagatayo maipapan iti sabali a tao—iti man sangona wenno iti likudanna—dayta koma ti pagalagadantayo iti pannakisarsarita.
No agdiborsio ti agassawa iti wardyo, wenno nasapa nga agawid ti maysa nga agtutubo a misionario, wenno agduadua ti maysa a tin-edyer iti pammaneknekna, saanda a kasapulan ti pananghusgayo. Kasapulanda a padasen ti natarnaw nga ayat ni Jesucristo a maipakita kadagiti balikas ken aramidyo.
No ti maysa a gayyem iti social media ket addaan iti natibker nga opinion maipapan iti politika wenno kagimongan a manglabsing iti amin a patpatienyo, pungtot, ken ti nasakit a sungbatyo ket saanto a makatulong. Ad-adunto ti nasken nga aramidenyo iti panangbukel iti panagkikinnaawatan, ngem dayta mismo ti kasapulan ti gayyemyo.
Ti panagsusupiat ti mangpapanaw iti Espiritu—iti tunggal kanito. Ti panagsusupiat ti mangpatibker iti ulbod a kapanunotan a ti komprontasion ket isu ti pamay-an a mangrisut kadagiti saan a pagkikinnaawatan, ngem pulos a saan a kasta. Maysa a pili ti pannakisinnuppiat. Maysa a pili ti agbalin a mamagkappia. Adda karbenganyo a mangpili iti panagsusupiat wenno pannakikappia. Allukoyenkayo a pilienyo ti agbalin a mamagkappia, ita ken kanayon.11
Kakabsat, literal a mabalbaliwantayo ti lubong—maysa a tao ken maysa a pannakilangen iti tunggal gundaway. Kasano? Babaen ti panangipakita no kasano a maimatonan ti napudno a panagduduma iti opinion nga addaan iti panagraem iti tunggal maysa ken panagsasarita nga addaan iti dignidad.
Paset ti biag ti panagduduma iti opinion. Inaldaw a makipagtrabahoak kadagiti napasnek a katulongan ti Apo a saan a kanayon a makakita iti agpada a pannirigan iti maysa nga isyu. Ammoda a kayatko a mangngeg dagiti kapanunotanda ken napudno a riknada maipapan iti amin a pagsasaritaanmi—nangnangruna dagiti sensitibo nga isyu.
Dagiti dua a natan-ok a mamagbagak, da Presidente Dallin H. Oaks ken Presidente Henry B. Eyring, ket isuda ti pagwadan iti wagas a panangipeksada iti riknada —nangruna no agduma dagitoy. Aramidenda daytoy nga addaan iti natarnaw nga ayat para iti tunggal maysa. Awan kadakuada ti mangisingasing nga isu ti kalaingan ket ngarud nasken a naiget a mangidepensa iti saadna. Awan kadakuada ti makikompetensia iti tunggal maysa. Gapu ta napno iti panagayat iti pada a tao ti tunggal maysa, “ti natarnaw nga ayat ni Cristo,”12 matarabay dagiti deliberasiontayo babaen ti Espiritu ti Apo. Patpatgek ken daydayawek dagitoy dua a naindaklan a lallaki.
Ti panagayat iti pada a tao [charity] ket pangagas iti panagsusupiat. Ti panagayat iti pada a tao ket isu ti naespirituan a sagut a tumulong kadatayo a mangpaksiat iti nailubongan a tao, a managimbubukod, managdepensa, napannakkel, ken naapal. Ti panagayat iti pada a tao ti kangrunaan a kababalin ti pudno a pasurot ni Jesucristo.13 Ti panagayat iti pada a tao ket makita iti maysa a mamagkappia.
No agpakumbabatayo iti sanguanan ti Dios ken agkararagtayo iti amin a pigsa ti pusotayo, ipaayannatayonto ti Dios iti panagayat iti pada a tao.14
Dagiti naparaburan iti daytoy nasagraduan a sagut ket naunday a managitured ken naasida. Saanda a naapal kadagiti dadduma ken saanda a nakatalimudok iti no kasano ti kinapategda. Saanda a nalaka nga agpungtot ken saanda nga agpanunot iti dakes kadagiti dadduma.15
Kakabsat, ti natarnaw nga ayat ni Cristo ti sungbat iti panagsusuppiat a mangburibor kadatayo iti agdama. Ti panagayat iti pada a tao ti mangallukoy kadatayo a “mangibaklay iti dagensen ti tunggal maysa”16 imbes a mangparigat iti tunggal maysa. Ti natarnaw nga ayat ni Cristo ti mangpalugod kadatayo nga, “agtakder a kas saksi ti Dios iti amin a panawen ken iti amin a banag, ken iti amin a lugar”17—nangnangruna kadagiti nariribuk a panawen. Ti panangayat iti pada a tao ti mangipalubos kadatayo a mangipakita no kasano nga agsao ken agtignay dagiti lallaki ken babbai ni Cristo—nangnangruna no nakaro a madillaw.
Ita, diak sarsaritaen maipapan iti “kappia ania man ti kasukat daytoy.”18 Sarsaritaek maipapan iti panangtrato iti dadduma kadagiti wagas a maitunos iti panagtungpal iti katulagan nga aramidenyo no makiranudkayo iti sakramento. Makitulagkayo a kanayon a manglaglagip iti Mangisalakan. Kadagiti situasion a nakaro ti riribuk ken napnuan iti panagsusupiat, awisenkayo a manglagip ken ni Jesucristo. Agkararag tapno maaddaan iti tured ken sirib a mangisao wenno mangaramid iti ibaga ken aramidenna. Bayat ti panangsurottayo iti Prinsipe ti Kappia, agbalintayo a mamagkappiana.
Iti daytoy a punto mabalin a pampanunotenyo a daytoy a mensahe ti talaga a makatulong iti maysa a tao nga am-ammoyo. Nalabit a namnamaenyo a makatulongto daytoy kenkuana nga agbalin a nasaysayaat kenka. Namnamaek a mapasamakto daytoy.” Ngem namnamaek pay nga amirisenyonto a nasayaat ti kaungganyo tapno makitayo no adda dagiti babassit a pirsay ti kinatangig wenno kinaapal a manglapped kadakayo manipud iti panagbalin a mamagkappia.19
No napasnekkayo maipapan iti panagtulong a mangummong iti Israel ken maipapan iti panangbangon kadagiti panaglilinnangen nga agpaut agingga iti kinaagnanayon, itan ti panawen tapno iwalinyo ti gura wenno pungtot. Itan ti panawen a mangisardeng iti panangipapilit a dakayo laeng ti matungpal. Itan ti panawen a mangisardeng iti panangaramid kadagiti banag a pakaigapuan tapno liklikandakayo dagiti dadduma gapu iti butengda a mapaguradakayo. itan ti panawen a mangikali kadagiti igam ti gubat.20 No ti panagsasaoyo ket napnuan iti pananglalais ken pammabasol, itan ti panawen a mangiwaksi kadagitoy.21 Bumangonkayonto a kas lalaki ken babai ni Cristo nga addaan iti napigsa nga espiritualidad.
Makatulong kadatayo ti templo iti panagsapsapultayo. Sadiay a naparaburantayo iti pannakabalin ti Dios, a mangmangted kadatayo iti abilidad a mangparmek ken ni Satanas, ti pasimuno ti amin a panagsusupiat.22 Pagtalawenyo ni Satanas iti amin a pannakilangenyo! Tandaanan a matallikudantayo pay ti kabusor tunggal marisuttayo ti maysa a di panagkikinnaawatan wenno agkedkedtayo a makapasakit. Ketdi, maipakitatayo ti nadungngo nga asi a kababalin dagiti pudno a disipulo ni Jesucristo. Malapdan dagiti mamagkappia ti kabusor.
Agbalintayo koma kas tattao a pudno a silaw iti rabaw ti turod—silaw a “di mailemmeng.”23 Ipakitatayo koma nga adda natalna, nadayaw a wagas a mangrisut kadagiti narikut nga isyu ken maysa a nalawag a wagas a mangrisut kadagiti saan a panagtutunos. Bayat ti panangipakitayo iti ayat iti pada a tao nga iparangarang dagiti pudno a pasurot ni Jesucristo, padakkelento ti Apo dagiti panagkagumaanyo a nalablabes pay ngem iti kangatuan nga arapaapyo.
Uruguay
Ti iket ti ebanghelio ti kadakkelan nga iket iti lubong. Inawis ti Dios ti amin nga umasideg Kenkuana, “nangisit ken puraw, adipen ken nawaya, lalaki ken babai.”24 Adda lugar para iti tunggal maysa. Nupay kasta, awan ti lugar para iti panangidumduma, panangkondena, wenno panagsusuppiat iti ania man a kita.
Patpatgek a kakabsatko, umay pay laeng ti kasayaatan para kadagiti mangbubos iti biagda a mangpatpatibker kadagiti dadduma. Ita awisenkayo a mangamiris iti kinadisipuloyo a mayannurot iti wagas a panagtratoyo iti dadduma. Bendisionankayo nga aramidenyo ti ania man a panagbalbaliw a mabalin a kasapulan tapno ti ugaliyo ket agbalin a natan-ok, nadayaw, ken mangibagi iti maysa a pudno a pasurot ni Jesucristo.
Bendisionankayo a sukatanyo ti kinaulpit iti kinaannayas, panagpungtot iti pannakaawat, ken panagsusuppiat iti kappia.
Sibibiag ti Dios! Ni Jesus ti Cristo. Agtaktakder ti Mangisalakan iti ulo daytoy a Simbaan. Datayo dagiti annakna. Tulongannatayonto nga agbalin a mamagkappiana. Paneknekak iti sagrado a nagan ni Jesucristo, amen.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, May 2023.. Language. 19025 864