Mukenji wa ku Ngondu wa Liahona Ngondu Muitanu 2023
Bafidi ba Ditalala Badi Bajingibua
Nudi ne budisuila bua kusungula dikokangana anyi diumvuangana. Ndi nnukankamika bua nusungula bua kuikala bafidi ba ditalala, mpindiewu ne diba dionsu.
Bana betu baluma ne bakaji, bidi bia disanka bua kuikala nenu. Mu ngondu isambombo mishala eyi, nuvua bikala misangu yonsu mu meji anyi ne mu masambila anyi. Ndi nsambila bua Nyuma wa Tshijila amba tshidi Mukalenga musua bua numvua pandi ngakula kunudi mpindiewu.
Mu stage wa mudimu wanyi wa dipanda kukadi bidimu bipita bungi, mvua ngambuluisha mupandi uvua upempa mukolu uvua ne dibola dinena. Dipanda divua dikola. Nanku, bua kukumbaja ku disumpakana, umua wa mu tshisumbu kukumbajaye mudimu wenda kakesa, ne mupandi kupeta tshiji. Munkatshi mua dishikila dia mutshima edi , wakakupa kela kenda kuula ntenta ne tuishi. Koku kunkuata pa mpala pa diboku dianyi!
Yonsu uvua munda mua tshibambalu tshia dipandila—uvua ne bowa bua tshienzelu tshia njiwu tshia ngikadilu ya dipanda—pakumusha mupandi uvua kayi mu dikenketa. Diakalenga, tshivua muikala mupeta tuishi to. Kadi tshienzedi etshi tshia kashala nanyi mutantshi mula. Mu diba adi, ngakadilaya bua ne nansha tshinyi tshidi mua kumfikila mu tshibambalu tshianyi tshia dipandila, tshiena mua kujimija didikanda dia tshiji tshianyi nansha. Mema kuditshipa kabidi dituku adi ne tshiena mua kukupa tshintu kampanda mu tshiji—anyi kela anyi mêyi to.
Nansha mpindiewu, bidimu makumi dikumi bipita, ndi ndikonka bua ne bu kela kavua ne tuishi kankuata mu diboku dianyi kavua kikala kabi kapita dikokangana didi dinyanga muyuki wetu ne malanda etu lelu. Bukalanga ne dimanya dia malu mbimueneka bu bikadi bijimina mu tshikondu etshi tshia dipangilangana ne dikabululangana.
Busenji, bijanu, ne biakuidi bibi bia bakuabu kibidi bitua ntanga tshibu. Bamanyi bapiluke babunyi, bena tshididi, bena mamanya, ne bakoki bakuabu badi bakupangana bipendu misangu yonsu. Ndi ne dipampakana dikola bualu bantu babungi mbamueneka bu badi bitabuija ne bidi bikumbana bua kupisha, kudingila, ne kupenda yonsu udi kayi witaba bidibu bamba . Babungi badi basua kunyanga lumu lua bakuabu ne biakuidi bia pa buabi!
Tshiji katshitu tshisuisha nansha. Diluishangana kadiena dibaka muntu nansha umua to. Dikokangana kadiena dilombola ku bipeta bia nyuma nansha. Bia dikema, tudi tumona misangu mikuabu bikadilu bia dikokangana nansha munkatshi mua nsombelu yetu. Tudi tumvua ne bakuabu badi bapuekesha bakaji babu ne bana milongo, bakuabu badi bangata tshiji bua kumuenena bakuabu, ne bakuabu badi banyoka bidimba bia mêku abu ne “ngikadilu wa dipuwa.” Tudi tumvua malu bitangila bansonga ne bana badi batshingisha ne bena mudimu badi bashiminyina binabu malu.
Bana betu baluma ne bakaji, ebi kabiena mua kuikala nanku to. Bu bayidi ba Yezu Kilisto, tudi ne tshia bua kuikala tshilejelu tshia dipetangana ne bakuabu—nangananga patudi ne muenenu mishilangana. Umua wa ku mishindu mipepela ya kumanya mulondi mulelela wa Yezu Kilisto udi mushindu udi muntu ewu utangila muntu nenda ne lusa.
Afrique du Sud
Mupandishi wakaleja patoka mu kuamba kuenda kudi balondi mu nseka yonsu ibidi. “Bafidi ba ditalala badi babeneshibua,” muakambaye.1 “Ewu yonsu wakutûta ku ditama dia baluma, umupeshe dikuabu kabidi bua atuta.”2 Ne nanku, bia bushuwa, wakafila didimuishadidi ditutangila bonsu: “Nangayi bena lukuna benu, beneshayi badi banuela milawu, enzelayi badi banukina bimpa, ne sambilayi bua aba badi banukisa ne banuluisha.”3
Kumpala kua lufu luenda, Mupandishi wakambila bapostolo benda dikumi ne babidi ne, banangangana umue ne umue bu muvuaye mubananga.4 Ne pashisha wakakumbaja, “Nunku bantu bonso ne bamanye ne nudi bayidi banyi, panuikala ne dinanga bua umue ne umue”5
Mukenji wa Mupandishi udi mutoka: Muyidi wenda mulelela udi wibaka, ubandisha, ukankamika, usengelela ne ufila lungenyi—nansha mu mushindu kayi wa dikola dia bualu. Bayidi balelela ba Yezu Kilisto badi benji ba ditalala.6
Lelu udi Dialumingu dia Malala. Tudi tudilongolola bua kusekelela bualu bua mushinga ne bulenga be butu kabuyi buanji kuenzeka kabidi pa buloba , budi buikala Bupikudi ne Dibika dia ku Lufu dia Mukalenga Yezu Kilisto. Umue wa ku mishindu ya kunemeka Mupandishi udi kuikala mufidi wa ditalala.7
Bupikudi bua Mupandishi budi butupepejela ditshimuna dia bubibonsu —nansha makokangana. Kanudidingi to: dikokangana didi bubi! Yezu Kilisto wakamba ne aba bonsu badi ne “nyuma wa dikokangana” kabena banyi to kadi badi “ba diabulu, udi muikala tatuenda wa dikokangana, ne [diabulu] udi usonsola mitshima ya bantu bua kutandangana ne tshiji.”8 Aba badi bakankamika dikokangana badi batentula Satana, bikala batuishibua ku tshiotshi anyi to. “Muntu nansha umue kena mua kusadila mfumu ibidi.”9 Katuena mua kutua Satana mpanda ku buakulavi buetu ne kuela meji ne tudi mua kusadila Nzambi.
Bana betu baluma ne bakaji, mushindu utudi tuenzelangana umue ne mukuabu udi bushuwa ne mushinga! Mushindu utudi tuakula ne bakuabu kumbelu, ne ku ekelezia, ne ku mudimu, ne pa nshingaudi ne mushinga wabungi. Lelu ndi ndomba ku tudi bua kuyukidishangana ne bakuabu mu mushindu mutantamana ne wa tshijila. Suayi nuteyayi ntema bimpa. “Koku kuikala bualu bonsu budi buimpe, bua dinanga, anyi mulubu muimpa anyi mukumbanyina butumbi”10 bitudi mua kuamba bua muntu mukuabu—kumpala kuenda anyi panyima penda—bidi ne bua kuikala ngikadilu wetu wa diyukidishangana.
Pikala baselangana babidi ba mu tshikongu tshienu badi bashipa dibaka, nsonga muena bukenji udi mualuja ku mbelu pa lukasa, nsonga udi ne mpata pa bujadiki buenda, kabena dijinga ne dilumbuluisha dieba to. Badi dijinga ne kupeta dinanga dikezuka dia Kilisto didi dimueneka mu mêyi ne mu bienzedi bieba.
Pikala mulunda mu mianda ya pa nshinga muikala ne muenenu wa tshididi anyi wa nsombelu muikala ubengangana ne biudi witabuija, diandamuna dia tshinji dieba kadiakuambuluisha nansha. Dilengeja lumvu didi dikulomba biabungi, kadi tshiotshi etshi ki tshidi mulunda weba ujinga menamena.
Dikokangana didi dipata Nyuma—diba dionsu. Dikokangana didi didiundisha dimanya dia ne kuelangana kakuena kuikala mushindu wa kusolakaja dipangilangana to; kadi katshiena nanku. Dikokangana diidi ku disua dia muntu. Dienza dia ditalala didi ku disua dia muntu. Nudi ne budisuila bua kusungula dikokangana anyi diumvuangana. Ndi nnukankamika bua kusungula bua kuikala bafidi ba ditalala, mpindiewu ne diba dionsu.11
Bana betu baluma ne bakaji, tudi mua kukudimuna ba pa buloba—muntu ne muyuki ku diba. Mushindu kayi? Ku dileja mushindu wa dilombola diakana dia dishilangana dia muenenu ne kanemu ne muyuki muakana.
Mashilangana a muenenu adi mikala tshitupa tshia nsombelu. Ndi ngenza mudimu matuku onsu ne basadidi badifila ba Mukalenga badi kabayi bamona malu mushindu wa momumue to. Mbamanya ne ndi musua kumvua ngenyi yabu ne ngumvuilu miakana pa bionsu bitudi tuyukilangana—nangananga biena bualu bia mushinga.
Babedi banyi banema babidi, Mulombodi Mukulu Dallin H.Oasks ne Mulombodi Mukulu Henry B. Eyring, badi bikala tshilejelu mu diakula dia ngumvuilu yabu—nangananga yoyi mishilangana. Badi babienza mu dinanga dilelela bua umua ne umua. Nansha umua wa kudibu kena uleja ne mmumanya mupita ne bua nanku udi ne bua kuakuila muenenu wenda bikola. Nansha umua wa kudibu kena uleja dijinga dia kuikala mu ditembangana ne mukuabu to. Bualu yonsu muujibua ne bunangi, “dinanga dikezuka dia Kilisto,”12 mapangadika etu adi mua kulombodibua kudi Nyuma wa Mukalenga. Mushindu kayi undi munanga ne nnemeka bantu banena aba babidi!
Bunangi budi buanga bua dikokangana Bunangi budi dipa dia nyuma didi dituambuluisha bua tuetu kuvula muntu wa panu, udi muikala ne buiminyi, lonji, didieyemena, ne mukawu. Bunangi ki ngikadilu munena wa mulondi mulelela wa Yezu Kilisto.13 Bunangi ki budi buleja mufidi wa ditalala.
Patudi tudipuekesha kumpala kua Nzambi ne tusambila ne makanda etu onsu a mutshima wetu, Nzambi neatupesha bunangi.14
Aba badi babeneshibua ne dipa edi dia bunzambi badi ne lutulu ne nsombelu wa kalolu. Kabena bakumina bakuabu mitshima ne kabena badiumvua mu bulenga buabu. Kabena babala malu mabi ne kabena bela meji ku bubi bua bakuabu.15
Bana betu baluma ne bakaji, dinanga dilelela dia Kilisto didi diandamuna ku dikokangana ditudi tusama lelu. Bunangi budi butusaka bua “kuambuilangana majitu etu”16 kabiyi bua kutapuluilangana majitu umua ne mukuabu. Dinanga dikezuka dia Kilisto didi dituanyishila bua “kuikala bajadiki ba Nzambi pa meba onsu ne mu malu onsu”17—nangananga mu diba dia malu makola. Bunangi budi butuanyishila bua kuleja mushindu udi baluma ne bakaji ba Kilisto bakula ne benza malu—nangananga padiku mudilu.
Mpindiewu, ntshiena ngakula bua “ditalala mu mishindu yonsu.”18 Ndi ngakula bua kuenzela bakuabu mu mushindu wa kanemu mu kulama tshipungidi tshiudi wenza pawudi wangata biadidia bia tshijila. Udi mupunga bua diba dionsu kuvuluka Mupandishi. Mu malu makola adi muujibua ne dikokangana, ndi nnubikila bua kuvuluka Yezu Kilisto. Nusambila bua kuikala ne makanda ne lungenyi bua kuamba anyi kuenza tshivuaye mua kuenza. Patudi tulonda Mukalenga wa Ditalala, tudi tulua bafidi ba ditalala benda.
Mu tshitupa etshi nudi mua kuela meji ne mukenji ewu mukumbana bua kuambuluisha muntu kampanda uudi mumanya. Mpukampuka udi mutekemena ne bidi muakumuambuluisha bua kuikala bimpa neba. Ndi tshitekemena! Kadi ndi ntekemena ne neukenketa mu ndondu wa mutshima weba bua kumona ne mudi mua kuikala didisua ne mukawu bidi bikupangisha wewa bua kulua mufidii wa ditalala.19
Nuenu bikala bashindama pa kuambuluisha mu kusangisha Isalele ne pa kuibaka malanda adi ashala tshiendelela, mpindiewu diba ndikumbana bua kuteka ku luseka malu mabi onso. Mpindiewu diba ndikumbana bua kulomba diumvuangana. Mpindiewu diba ndikumbana bua kulekela bintu bidi bienza ne bakuabu kabendedi pa mâyi bua kutshina ne bua kukufikisha munda. Mpindiewu diba ndikumbana bua kujîka biamu bia mvita bienu.20 Pikala mukana mueba muula ne bipendu ne difundangana, Mpindiewu diba ndikumbana bua kulekela.21 Nenulua bakaji anyi baluma ba Yezu Kilisto bakolakana mu nyuma.
Ntempelo udi mua kutuambuluisha mu dikeba dietu. Koku tudi bambikibua ne bukola bua Nzambi, budi butupesha dikumbana bua kutshimuna Satana, muenzeji wa dikokangana dionsu.22 Muipatayi mu malanda enu! Nufunda ne tudi tukanyina muena lukuna musangu yonsu utudi tondopa ngumvuilu mubi anyi tubenga bua kulenduka. Pa mutu patshi, tudi mua kuleja lusa ludi luikala ngikadilu wa bayidi balelela ba Yezu Kilisto. Benji ba ditalala badi bapangisha muena lukuna.
Bu bantu tudi tulua bukenka bulelela budi pa mukuna—bukenka budi “kabuyi mua kusokokibua to.”23 Tuleja ne kudi mushindu wa ditalala ne wa kanemu bua kusolakaja malu makola ne mushindu mutokesha wa kusolakaja dipangilangana. Panudi nuleja bunangi budi balondi ba Yezu Kilisto bamuenesha, Mukalenga neadiundisha didienzeja dienu bipita difuanyikija dienu bunena.
Uruguay
Bukondu bua lumu luimpa budi bukondubunena bua pa buloba. Nzambi udi ubikila bonsu bua kulua kudiye, “bafîka ne batoka, bapika ne badikadila, baluma ne bakaji.”24 Kudi muaba bua muntu yonsu. Nansha nanku, kakuena muaba bua beledianganyi ba meji mabi, dipisha, ne dikokangana dia mushindu onsu.
Bana betu baluma ne bakaji, biabungi bilenga bitshilualua bua aba badi bapitshisha nsombelu wabu mu dikolesha dia bakuabu. Lelu ndi nnubikila bua kukenketa buyidi buenu bilondeshila dienzela dienu dia bakuabu. Ndi nnubenesha bua nuenza makumbaja adi alombibua bua ngezelu yenu yikala muimpa, munemekibua, ne wa dimanyina dia mulondi mulelela wa Yezu Kilisto.
Ndi nnubenesha bua kupingaja buluishi kudi disengelela, lukuna kudi diumvuangana, ne dikokangana kudi ditalala.
Nzambi udi ne moyo! Yezu udi Kilisto. Udi ku mutu kua Ekelezia wenda. Tudi basadidi benda. Neatuambuluisha bua tulua bafidi ba ditalala benda. Ndi njadika nunku mu dina dia Yezu Kilisto, amena.
© 2023 by Intellectual Reserve, Inc. All rights reserved. Bipatula pa mabeji mu USA Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2023. Language. 19025 760