Luglugar manipud kadagiti Nasantuan a Kasuratan

Getsemani

Ammuem ti ad-adu pay maipapan iti lugar a nangrugian dagiti panagsagaba ti Mangisalakan iti biangtayo.

Sadino Daytoy?

Iti bakras ti Bantay dagiti Olibo, iti daya ti Jerusalem (iti kannawan iti ladawan, a namarkaan iti nalabes ti kadakkelna a kayo).

ladawan ti mapa ti Jerusalem ni Jim Madsen

Ania ti Adda Sadiay?

Maysa a kabakiran dagiti kayo nga olibo ken nalabit a maysa a pagpespes wenno pagrumek (press) a pagalaan iti lana manipud kadagiti olibo.

Ania ti Napasamak Ditoy?

Kalpasan ti Maudi a Pangrabii, napan ni Jesucristo a kaduana ti sangapulo ket maysa nga Apostolna idiay Getsemani. Kalpasanna, napan nagkararag ket inkuyogna da Pedro, Santiago, ken Juan.

Isu ket “nangrugi a masmasdaaw unay, ken nadagsenan unay.” Idiay a kinunana, “Ti kararuak silaladingit unay agingga iti ipapatay” (Mateo 14:33–34).

Inkararagna: “Ama, no pagayatam, yadayum kadi daytoy a kopa kaniak: nupay kasta saan koma a maaramid ti pagayatak, no di ti pagayatam.

“Ket nagparang ti maysa nga anghel kenkuana manipud iti langit, a nangpabileg kenkuana.

“Ket idi agsagsagaba ad-adda a sipapasnek a nagkararag: ket ti ling-etna kasla dadakkel a tedted ti dara nga agtinnag iti daga” (Lucas 22:42–44).

Kalpasan daytoy nakaro a panagsagaba ti Mangisalakan, Isu ket liniputan ni Judas ken inaresto dagiti opisial a Judio ken maysa a bunggoy dagiti soldado a Romano.

Ammoyo Kadi?

Daytoy a minuyongan idiay Bantay dagiti Olibo ket maysa a lugar a masansan a papanan ni Jesus (kitaen iti Lucas 22:39; Juan 18:2).

“Iti Aramiko, ti balikas a getsemani kayatna a sawen ti ‘olive press.’”¹

No umuna a marumek dagiti olibo iti olive press, nalabaga ti lana nga agayus, kas iti dara.

Idi panawen ti Mangisalakan, ti panagpataud iti lana ti olibo ket maysa a proseso ti panagpaadu iti presion iti tunggal addang tapno maipis-it ti adu a lana agingga a mabalin:

1. Rumeken dagiti olibo iti dakkel a bato.

2. Ikabil dagiti narumek nga olibo iti nalaga a basket, ket pagtitinnuonen dagiti basket.

3. Ikabil ti dakkel a beam wenno tabla iti rabaw dagiti naurnong a basket.

4. Ikabil dagiti bato iti maysa a murdong ti beam.²

Maus-usar ti lana ti olibo idi un-unana kas lana ti lampara, lana a pagluto, taraon, sabon, seremonia iti relihion, ken sapsapo a pangagas kadagiti sugat.

Adu a tawen sakbay ti yaay ni Cristo, imbaga ti maysa nga anghel ken ni Ari Benjamin maipapan iti panagsagaba ni Cristo idiay Getsemani, a kunkunana, “Ti dara rummuarto manipud iti tunggal puon ti dutdot, napalalonto unay ti panagtuokna” (Mosiah 3:7).

Ti panagsagaba ti Mangisalakan iti biangtayo iramanna ti panagsagabana idiay Getsemani ken iti krus, a nakatayanna. Inakona iti Bagina ti amin dagiti basol, ut-ot, rigat, sulisog, saksakit, ken kinakapsuttayo (kitaen iti Alma 7:11–12).

Getsemani, ni Michael Malm.

Laglagipen ti Getsemani

“Laglagipenyo, no kasano a ti bagi ti olibo, a napespes para iti lana a nangted iti lawag, kasta met a napespes ti Mangisalakan. Manipud iti tunggal teterreman nagruar ti dara ti Mannubbottayo. … Inton agtaray ti kopa ti ragsakmo, laglagipem ti kopana a kinapait a namagbalin a posible. Ket inton dumteng kenka dagiti nasakit a pannubok, laglagipem ti Getsemani.”

Presidente Russell M. Nelson, “Why This Holy Land?” Ensign, Dis. 1989, 18.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, June 2023. Language. 19026 864

Dagiti Nagadawan

1. Pangiwanwan iti Nasantuan a Kasuratan, “Getsemani.”

2. Kitaen iti D. Todd Christofferson, Oct. 2016 general conference (Ensign wenno Liahona, Nob. 2016, 50).