Binulan a Mensahe iti Liahona , Hunio 2023

Matulongannatayo ti Espiritu Santo

Ti Espiritu Santo ti maikatlo a kameng ti Kinadios. Tukoyen pay dagiti nasantuan a kasuratan Isuna a kas ti Espiritu, ti Espiritu Santo, wenno ti Mangliwliwa. Bayat ti panagsursurotayo a dumngeg iti timekna, paneknekannatayo maipapan ken ni Jesucristo ken tulongannatayo a mangammo kadagiti kinapudno ti ebanghelio.

Kameng ti Kinadios

Ti Nailangitan nga Ama, ni Jesucristo, ken ti Espiritu Santo ket isuda ti Kinadios. Ay-ayatendatayo ken agtitinnulongda iti kaykaysa a mangipatungpal iti plano ti pannakaisalakan. Nupay addaan ti Nailangitan nga Ama ken ni Jesucristo iti bagi ti lasag ken tulang, awanan ti Espiritu Santo. Isu ket maysa nga espiritu.

Saksi ti Ama ken ti Anak

Ti Espiritu Santo ti “saksi ti Ama ken ti Anak” (2 Nephi 31:18). Kayatna a sawen a makaawattayo iti pammaneknek ti Nailangitan nga Ama ken ni Jesucristo babaen ti Espiritu Santo.

Mangipaneknek iti Kinapudno

Ti Espiritu Santo ti mangipaneknek iti amin a kinapudno. Tulongannatayo a mangammo a pudno ti ebanghelio—a pakairamanan ti plano ti pannakaisalakan, dagiti bilin ti Dios, ti Pannakaisubli, ken ti Pannubbot ni Jesucristo—ket pudno. Papigsaenna ti pammaneknektayo no agtultuloytayo nga agkararag, agtungpal kadagiti bilin, ken agadal iti ebanghelio.

Mangtarabay ken Mangsaluad Kadatayo

Matarabaynaka ti Espiritu Santo Kadagiti pangngeddengmo ken masaluadannaka manipud iti pisikal ken naespirituan a pagpeggadan. Tulongannatayo a mangbirok kadagiti sungbat kadagiti saludsodtayo no agkararag ken ikagumaantayo nga aramiden ti umisu. Kanayon nga iturongnatayo “nga agaramid iti naimbag” (Doktrina ken Katulagan 11:12).

Mangliwliwa Kadatayo

Ti Espiritu Santo ket matukoy no dadduma kas “ti Mangliwliwa” (Juan 14:26). Mapnonatayo “iti namnama ken naan-anay nga ayat” (Moroni 8:26) no madanagan, malidayan, wenno mabutengtayo. Bayat ti panangtulongna kadatayo a makarikna iti ayat ti Dios, maparmektayo ti pannakaupay ken mapabilegtayo kadagiti pannuboktayo.

Ti Sagut ti Espiritu Santo

Kalpasan ti pannakabuniagtayo, awatentayo ti sagut ti Espiritu Santo iti maysa nga ordinansa a maawagan iti kumpirmasion. Apaman a maawattayo daytoy a sagut, mabalintayo ti maaddaan iti kanayon a pannakikadkadua ti Espiritu Santo no la ketdi agbibiagtayo a nalinteg.

Panangiladawan ni J. Kirk Richards

No Kasano a Denggentayo ti Espiritu Santo

Makisarita ti Espiritu Santo kadagiti tao iti nadumaduma a wagas. Mabalin a pakairamanan dagitoy dagiti natalna, makaliwliwa a rikna wenno pannakaawat maipapan iti no ania ti sawen wenno aramiden. Bayat ti panagkararagtayo iti pannarabay ken panagdengngeg kadagiti pannignayna, masursurotayo no kasano a makisao Isuna kadatayo.

Manipud kadagiti Nasantuan a Kasuratan

“Isuronto kadatayo ti Espiritu Santo … ti amin a banag” (kitaen iti Juan 14:26).

Maammuanyo ti kinapudno babaen ti Espiritu Santo (kitaen iti Moroni 10:5).

Makisao kenka ti Espiritu Santo iti panunotmo ken iti pusom (kitaen iti Doktrina ken Katulagan 8:2).

Dagiti Balikas a Laglagipen

Plano ti pannakaisalakan: plano ti Dios a tumulong kadagiti annakna a mangparmek iti basol ken ipapatay tapno makasubli Kenkuana.

Pammaneknek: maysa a naespirituan a panagsaksi a pudno ti maysa a banag.

Ordinansa: maysa a sagrado nga aramid nga annongen ti turay wenno awtoridad ti priesthood.

Ammuen ti Ad-adu Pay

No adda saludsodmo maipapan iti Espiritu Santo, mabalinmo nga adalen dagiti nasantuan a kasuratan, dagiti bitla iti sapasap a komperensia, ken dadduma pay a resources iti Gospel Library (iti ChurchofJesusChrist.org wenno iti mobile app). Mabalinyo pay a kasarita dagiti ministering brother wenno sisteryo, dagiti lideryo iti ward wenno branch, wenno dagiti missionary.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, April 2023. Language. 19006 864