Nzvimbo kubva muMagwaro Matsvene

Getsemani

Dzidza zvakawanda pamusoro penzvimbo iyo kutambura kweMuponesi pachinzvimbo chedu pakwakatanga.

Iri Kupi?

Pamateru eGomo reMiorivhi, kumabvazuva kweJerusarema (kurudyi mumufananidzo, kwakamakwa nemuti wakakurisa).

Mufananidzo wemepu yeJerusarema naJim Madsen

Chii Chaiva Ikoko?

Munda wemiti yemiorivhi uye pamwe nechisviniro chekuwana mafuta kubva mumaorivhi.

Chii Chakaitika Apa?

Mushure meChidyo Chokupedzisira, Jesu Kristu akaenda nevaApositora Vake gumi nemumwechete kuGetsemani. Zvino Iye akaenda parutivi kundonyengetera uye akatora Petro, Jakobo naJohane Naye.

“Akatanga kuvhunduka kwazvo, nokudumbirwa.” Akati, “Mweya wangu uneshungu kwazvo kusvikira pakufa” (Marko 14:33–34).

Akanamata achiti, “Baba, kana muchida, bvisai mukombe uyu kwandiri: asi kuda kwangu kurege kuitwa, asi kwenyu.

“Ipapo mutumwa akaonekwa naye wakabva kudenga, akamusimbisa.

“Zvino ari pakutambudzika kukuru wakanyanya kunyengetera: ziya rake rikaita samadonhwe eropa akadonhera pasi” (Ruka 22:42–44).

Mushure mekutambura zvikurusa uku kwakaitwa neMuponesi, akatengeswa naJudasi uye akasungwa nemakurukota echiJuda uye nechikwata chemauto echiRoma.

Waiziva Here?

Bindu iri paGomo reMiorivhi raiva nzvimbo yaienda Jesu nguva zhinji (ona Ruka 22:39; Johane 18:2).

“MuchiAramaiki, shoko rokuti getsemani rinoreva ‘chisviniro chemaorivhi.’”¹

Maorivhi paanotanga kutswanywa muchisviniro chemaorivhi, mafuta anoyerera achibuda akatsvuka, seropa.

Munguva yeMuponesi, kugadzira mafuta emaorivhi kwaiva nzira yekuwedzera simba padanho rega rega kuitira kusvina mafuta akawanda sezvinobvira zvose:

1. Pwanya maorivhi pasi pedombo guru.

2. Isa maorivhi apwanywa mumatengu akarukwa, uye woronga matengu acho rimwe pamusoro perimwe.

3. Isa bango kana danda guru pamusoro pematengu akaturikidzana.

4. Isa matombo kune mumwe mucheto wedanda.²

Chinyakare mafuta emaorivhi aishandiswa semafuta emarambi, mafuta okubikisa, zvokudya, sipo, mitambo yezvechitendero, uye semafuta ekurapa maronda.

Makore mazhinji Kristu asati auya, ngirozi yakaudza Mambo Benjamini pamusoro pekutambura kwaKristu muGetsemani, ichiti, “Ropa rinobuda muburi roga roga reganda, kurwadziwa kwake kuchava kukuru” (Mosaya 3:7).

Kutambura kweMuponesi pachinzvimbo chedu kunosanganisira kutambura Kwake paGetsemani uye pamuchinjikwa, apo paAkafira. Akatora paAri zvitadzo zvedu zvose, marwadzo edu ose, matambudziko edu ose, zviedzo zvedu zvose, hurwere hwedu hwose, neutera hwedu hwose (ona Aruma 7:11–12).

Getsemani, naMichael Malm

Rangarira Getsemani

“Rangarira kuti, sezvakangoita muviri weorivhi, uyo wakasvinwa kuitira mafuta akapa chiedza, saizvozvowo Muponesi akasvinwa. Kubva muburi roga roga reganda ropa reupenyu reMununuri wedu rakayerera. … Apo mukombe wako wemufaro paunopfachukira, rangarira mukombe Wake weruvavo uyo wakaita kuti zvigoneke. Uye apo miedzo inorwadza painouya pamusoro pako, rangarira Getsemani.”

Mutungamiri Russell M. Nelson, “Why This Holy Land?” Ensign, Zvita 1989, 18.

© 2023 ne Intellectual Reserve, Inc. All rights reserved. Chakadhindwa muUSA. Mvumo yemuChirungu: 6/19. Mvumo yeDudziro: 6/19. Dudziro yeMonthly For the Strength of Youth Message, June 2023. Language. 19026 731

Manotsi

1. Nhungamiro kuMagwaro Matsvene, “Getsemani.”

2. Ona D. Todd Christofferson, Oct. 2016 general conference (Ensign kana Liahona, Mbudzi. 2016, 50).