Libaka ho tsoa Mangolong a Halalelang

Gethesemane

Ithute haholoanyane ka sebaka seo ts´otleho ea Mopholosi e qalileng ho sona ka lebaka la rona.

lifate tsa mehloare

E hokae?

Mosikong oa Thaba ea Mehloare, ka bochabela ho Jerusalema (ka ho le letona sets´oants´ong, e ts´ahiloeng ka sefate se seholohali).

´mapa oa Jerusalema oa khalekhale

Sets´oants´o sa ´mapa oa Jerusalema ka Jim Madsen

Ho Ne ho Ena le Eng Moo?

Sehlopha sa lifate tsa mohloare le mohlomong sehatelo bakeng sa ho fumana oli mohloareng.

khatello ea mohloare

Ho Etsahetseng Mo?

Kamora Lijo tsa Mantsiboea tsa ho qetela, Jesu Kreste o ile a ea Gethesemane le Barutuoa ba Hae ba leshome le motso o mong. Eaba o ea thoko mane ho ea rapela ´me a tsamaea le Petrose, Jakobo le Johanne.

A “qala ho ts´oha haholo le ho tsieleha.” A re, “Moea oa ka o ts´oeroe ke masoabi a isang lefung” (Mareka 14:33–34).

A rapela, “Ntate, hoja u ka rata, tlosa senoelo sena pela ka: empa ho se ke ha etsoa ho ea ka thato ea ka, ho etsoe thato ea hao.

“´Me ha hlaha lenyeloi pela hae le tsoa leholimong, la mo matlafatsa.

“Eitse ha a le mahlokong a maholo, a eketsa ho rapela ka matla; ´me mofufutso oa hae oa eba joaloka marotholi a mali a rothelang fats´e” (Luka 22:42–44).

Kamor´a ts´otleho ena e matla ea Mopholosi, O ile a ekoa ke Judase ´me a ts´oaroa ke liofisiri tsa Majuda le sehlopha sa masole a Roma.

Na U Ne U Tseba?

Ts´imong ena e neng e le Thabeng ea Mehloare e ne e le sebaka seo Jesu a neng a lula a e ea ho sona (sheba Luka 22:39; Johanne 18:2).

“Ka se-Aramaike, lentsoe lena Gethsemane le bolela ‘sehatelo sa mohloare.’”¹

Ha mehloare e pshatloa pele moo ho hatelloang mehloare, oli e tsoang moo e khubelu, joaloka mali.

Linakong tsa Mopholosi, ho hlahisa oli ea mehloare e ne e le ts´ebetso ea ho eketsa khatello mohatong ka mong ele hore ho monyoe oli e ngata kamoo ho ka khonehang:

1. Pshatla mehloare ka tlasa lejoe le leholo.

2. Ts´ela mehloare e choatliloeng ka hara liroto tse lohiloeng, ´me o pake liroto tseo li palamane.

3. Bea sekoqo se seholo ka holim´a liroto tse pakiloeng.

4. Ts´oarisa majoe mahlakoreng a mabeli a sekoqo.²

Oli ea mehloare e ne e sebelisoa khalekhale bakeng sa oli ea lilampi, oli ea ho pheha, lijo, sesepa, mekete ea selumeli, le setlolo sa maqeba.

Lilemo tse ngata pele ho ho tla ha Kreste, lenyeloi le ile la bolella Morena Benjamine ka ho sotleha ha Kreste Gethesemane, la re, “Mali a tsoa lesobeng le leng le le leng, bohloko ba hae bo tla ba boholo joalo” (Mosaia 3:7).

Ho sotleha ha Mopholosi sebakeng sa rona ho kenyeletsa ts´otleho ea Hae Gethesemane le sefapanong, moo a ileng a shoa. O ile a inkela libe tsa rona bohle, mahloko, likotlo, meleko, ho kula, le mafu (sheba Alma 7:11–12).

Jesu Kreste Gethesemane

Gethesemane, ka Michael Malm

Hopola Gethesemane

“Hopola, joalo feela ka ´mele oa mohloare, o hatelletsoeng hore ho tsoe oli e fanang ka khanya, Mopholosi le eena o ile a hatelloa joalo. Ho tsoa lesobeng le leng le le leng ke mali a bophelo a Mopholosi oa rona. … Ha senoelo sa hao sa thabo se khaphatseha , hopola hore senoelo sa Hae sa mahloko se ileng sa etsa hore sena se khonahale. ´Me ha mathata a bohloko a o tlela, hopola Gethesemane.”

Presidente Russell M. Nelson, “Hobaneng Naha Ena e Halalelang?” Ensign, Ts´itoe. 1989, 18.

© 2023 by Intellectual Reserve, Inc. All rights reserved. E hatisitsoe USA. Tumello ea Sekhooa: 6/19. Tumello ea Phetolelo: 6/19. Phetholelo ea Monthly For the Strength of Youth Message, June 2023. Language. 19026 739

Lintlha

1. Tataiso ho ea mangolong a halalelang, “Gethesemane.”

2. Sheba D. Todd Christofferson, Mphalane. 2016, seboka se akaretsang (Ensign kapa Liahona, Pulungoana. 2016, 50).