Molaetsa oa khoeli oa Liahona Phuptjane 2023

Moea o Halalelang A ka Re Thusa

Moea o Halalelang ke setho sa boraro sa Bomolimo. Mangolo a halalelang le ona a mobitsa Moea, Moea o Halalelang, kapa Moemeli. Ha re ntse re ithuta ho mamela lentsoe la Hae, O tla re pakela ka Jesu Kreste ´me a re thuse ho ithuta linnete tsa evangeli.

Setho sa Bomolimo

Molimo Ntate, Jesu Kreste, le Moea o Halalelang ke Bomolimo. Ba ea re rata ´me ba sebetsa ´moho ho phethahatsa morero oa pholoso. Le ha Ntate ea Maholimong le Jesu Kreste ba na le ´mele le nama le masapo, Moea o Halalelang ha a na tsona. Ke moea.

Paki ea Ntate le Mora

Moea o Halalelang “o paka Ntate le Mora” (2 Nefi 31:18). Sena se bolela hore re ka fumana bopaki ba Ntate ea Maholimong le Jesu Kreste ka Moea o Halalelang.

O Paka ´Nete

Moea o Halalelang o paka ´nete eohle. O tla re thusa ho tseba hore evangeli—e kenyelletsang morero oa pholoho, Melao ea Molimo, le Tsosoloso, le Topollo ea Jesu Kreste—ke ´nete. O tla matlafatsa bopaki ba rona ha re tsoela pele ho rapela, ho boloka melao le ho ithuta ka evangeli.

O ea re Tataisa le ho Re Sireletsa

Moea o Halalelang o ka re tataisa liqetong tsa rona ´me oa re sireletsa kotsing e ka bang ea ´meleng kapa moeeng. O tla re thusa ho fumana likarabo tsa lipotso tsa rona haeba re rapela ´me re leka ho etsa se nepahetseng. Kamehla o tla re tataisa “ho etsa tse ntle” (Lithuto tsa Tumelo le Lilekane 11:12).

O a re khothatsa

Ka nako tse ling Moea o Halalelang o bitsoa “Mots´elisi” (Johanne 14:26). A ka re tlatsa ka “ts´epo le lerato le phethahetseng” (Moroni 8:26) ha re ts´oenyehile, re hloname, kapa re ts´aba. Joaloka ha a re thusa ho utloa lerato la Molimo, re ka hlola ho lahleheloa ke Ts´epo ´me re matlafatsoe ke liteko tseo re kopanang le tsona.

Mpho ea Moea o Halalelang

Kamor´a hora re kolobetsoe, re fumana mpho ea Moea o Halalelang e le ts´ebeletso e bitsoang tiiseletso. Hang ha re fumana mpho ena, re ka ba le selekane sa nako tsohle le Moea o Halalelang ha feela re phela ka tsela e lokileng.

Sets´oants´o ka J. Kirk Richards

Kamoo re Utloang Moea o Halalelang

Moea o Halalelang o bua le batho ka litsela tse fapaneng. Tsona li ka kenyeletsa maikutlo a khotso, a khothatsang kapa bohlale ba ho tseba seo u ka se buang kapa oa se etsa. Ha re rapella tataiso ´me re mamela ts´usumetso tsa Hae, re ka ithuta kamoo a buang le rona ka teng.

Ho tsoa Mangolong a Halalelang

Moea o Halalelang o tla o ruta lintho tsohle (sheba Johanne 14:26).

O ka tseba ´nete ka Moea o Halalelang (sheba Moroni 10:5).

Moea o Halalenag o ka bua le uena ka kelellong ea hao le ka pelong ea hao (sheba Lithuto tsa Tumelo le Lilekane 8:2).

Mantsoe ao u ka a Hopolang

Morero oa pholoho: Morero oa Molimo ho thusa bana ba hae ho hlola sebe le lefu ´me ba khutlela ho eena.

Bopaki: paki ea semoea ea hore ntho e nepahetse.

Ts´ebeletso: ketsahalo e halalelang, e hlophisitsoeng e etsoang ka tumello ea matla a boprista.

Fumana tse Ling

Haeba o ena le lipotso mabapi le Moea o Halalelang, o ka ithuta mangolo a halalelang, lipuo tse akaretsang tsa seboka se akaretsang, le mehloli e meng ho Pokello ea Libuka tsa Evangeli (ho ChurchofJesusChrist.org kapa ho app ea mohala oa letsoho). O ka bua le baena kapa le likhaitseli ba bosebeletsi, baetapele ba lekala kapa ba lekalana, kapa barumuoa ba boruti lichabeng.

© 2023 by Intellectual Reserve, Inc. All rights reserved. E hatisitsoe USA. Tumello ea Sekhooa: 6/19. Tumello ea Phetolelo: 6/19. Phetolelo ea Monthly Liahona Message, April 2023. Language. 19026 739