“The Holy Ghost Can Help Us,” Liahona, June 2023.
ຂ່າວສານປະຈຳເດືອນ Liahona, ເດືອນມິຖຸນາ 2023
ພຣະວິນຍານບໍລິສຸດສາມາດຊ່ວຍເຮົາໄດ້
ພຣະວິນຍານບໍລິສຸດເປັນສະມາຊິກອົງທີສາມຢູ່ໃນຝ່າຍພຣະເຈົ້າ. ພຣະຄຳພີຍັງໄດ້ອ້າງອີງເຖິງພຣະອົງວ່າເປັນພຣະວິນຍານ, ພຣະວິນຍານສັກສິດ, ຫລື ພຣະຜູ້ປອບໂຍນ. ຂະນະທີ່ເຮົາຮຽນຮູ້ທີ່ຈະຟັງສຸລະສຽງຂອງພຣະອົງ, ພຣະອົງຈະເປັນພະຍານແກ່ເຮົາເຖິງພຣະເຢຊູຄຣິດ ແລະ ຈະຊ່ວຍເຮົາໃຫ້ຮຽນຮູ້ເຖິງຄວາມຈິງຂອງພຣະກິດຕິຄຸນ.
ສະມາຊິກໃນຝ່າຍພຣະເຈົ້າ
ພຣະບິດາເທິງສະຫວັນ, ພຣະເຢຊູຄຣິດ, ແລະ ພຣະວິນຍານບໍລິສຸດ ຄືຝ່າຍພຣະເຈົ້າ. ພວກພຣະອົງຮັກເຮົາ ແລະ ເຮັດວຽກງານຮ່ວມກັນເປັນໜຶ່ງດຽວ ເພື່ອເຮັດໃຫ້ເກີດມີ ແຜນແຫ່ງຄວາມລອດ. ເຖິງແມ່ນວ່າ ພຣະບິດາເທິງສະຫວັນ ແລະ ພຣະເຢຊູຄຣິດຈະມີພຣະກາຍທີ່ເປັນເນື້ອໜັງ ແລະ ກະດູກ, ແຕ່ພຣະວິນຍານບໍລິສຸດນັ້ນບໍ່ມີ. ພຣະອົງເປັນວິນຍານ.
ພະຍານເຖິງພຣະບິດາ ແລະ ພຣະບຸດ
ພຣະວິນຍານບໍລິສຸດ “ເປັນພະຍານເຖິງພຣະບິດາ ແລະ ພຣະບຸດ” (2 ນີໄຟ 31:18). ນີ້ໝາຍຄວາມວ່າ ເຮົາສາມາດຮັບ ປະຈັກພະຍານ ເຖິງພຣະບິດາເທິງສະຫວັນ ແລະ ພຣະເຢຊູຄຣິດ ຜ່ານທາງພຣະວິນຍານບໍລິສຸດ.
ເປັນພະຍານເຖິງຄວາມຈິງ
ພຣະວິນຍານບໍລິສຸດເປັນພະຍານເຖິງຄວາມຈິງທຸກປະການ. ພຣະອົງຈະຊ່ວຍໃຫ້ເຮົາຮູ້ວ່າ ພຣະກິດຕິຄຸນ—ລວມທັງແຜນແຫ່ງຄວາມລອດ, ພຣະບັນຍັດຂອງພຣະເຈົ້າ, ການຟື້ນຟູ, ແລະ ການຊົດໃຊ້ຂອງພຣະເຢຊູຄຣິດ—ຄືຄວາມຈິງ. ພຣະອົງຈະເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງເຮົາ ຂະນະທີ່ເຮົາສືບຕໍ່ອະທິຖານ, ຮັກສາພຣະບັນຍັດ, ແລະ ສຶກສາພຣະກິດຕິຄຸນ.
ນຳພາ ແລະ ປົກປ້ອງເຮົາ
ພຣະວິນຍານບໍລິສຸດສາມາດນຳພາເຮົາໃນການຕັດສິນໃຈຂອງເຮົາ ແລະ ປົກປ້ອງເຮົາຈາກໄພອັນຕະລາຍທາງຮ່າງກາຍ ແລະ ທາງວິນຍານໄດ້. ພຣະອົງຈະຊ່ວຍເຮົາໃຫ້ພົບເຫັນຄຳຕອບຕໍ່ຄຳຖາມຕ່າງໆຂອງເຮົາ ຖ້າເຮົາອະທິຖານ ແລະ ພະຍາຍາມເຮັດໃນສິ່ງທີ່ຖືກຕ້ອງ. ພຣະອົງຈະນໍາພາເຮົາໃຫ້ “ເຮັດຄວາມດີ” ຢູ່ສະເໝີ (ຄຳສອນ ແລະ ພັນທະສັນຍາ 11:12).
ປອບໂຍນເຮົາ
ບາງຄັ້ງພຣະວິນຍານບໍລິສຸດກໍຖືກກ່າວເຖິງວ່າເປັນ “ພຣະຜູ້ປອບໂຍນ” (ໂຢຮັນ 14:26). ພຣະອົງສາມາດເຕີມເຕັມເຮົາ “ດ້ວຍຄວາມຫວັງ ແລະ ຄວາມຮັກທີ່ສົມບູນ” (ໂມໂຣໄນ 8:26) ເມື່ອເຮົາມີຄວາມກັງວົນ, ໂສກເສົ້າ, ຫລື ຢ້ານກົວ. ຂະນະທີ່ພຣະອົງຊ່ວຍເຫລືອເຮົາໃຫ້ຮູ້ສຶກເຖິງຄວາມຮັກຂອງພຣະເຈົ້າ, ເຮົາຈະສາມາດເອົາຊະນະຄວາມທໍ້ແທ້ ແລະ ໄດ້ຮັບຄວາມເຂັ້ມແຂງໃນການທົດລອງຂອງເຮົາ.
ຂອງປະທານແຫ່ງພຣະວິນຍານບໍລິສຸດ
ຫລັງຈາກທີ່ເຮົາໄດ້ຮັບບັບຕິສະມາແລ້ວ, ເຮົາກໍໄດ້ຮັບຂອງປະທານແຫ່ງພຣະວິນຍານບໍລິສຸດໃນ ພິທີການ ທີ່ເອີ້ນວ່າ ການຢືນຢັນ. ເມື່ອເຮົາໄດ້ຮັບຂອງປະທານນີ້ແລ້ວ, ເຮົາສາມາດມີພຣະວິນຍານບໍລິສຸດເປັນເພື່ອນຕະຫລອດເວລາ ຕາບໃດທີ່ເຮົາດຳລົງຊີວິດຢ່າງຊອບທຳ.
ຮູບພາບປະກອບໂດຍ ເຈ ເຄີກ ຣິເຈີດສ໌
ວິທີທີ່ເຮົາໄດ້ຍິນພຣະວິນຍານບໍລິສຸດ
ພຣະວິນຍານບໍລິສຸດ ສື່ສານກັບຜູ້ຄົນດ້ວຍວິທີທີ່ແຕກຕ່າງກັນໄປ. ນີ້ອາດຈະລວມທັງຄວາມຮູ້ສຶກທີ່ສະຫງົບສຸກ ແລະ ປອບໂຍນ ຫລື ຄວາມເຂົ້າໃຈເລິກເຊິ່ງກ່ຽວກັບສິ່ງທີ່ຄວນເວົ້າ ຫລື ເຮັດ. ຂະນະທີ່ເຮົາອະທິຖານເພື່ອຂໍການນຳພາ ແລະ ຟັງການກະຕຸ້ນຂອງພຣະອົງ, ເຮົາຈະສາມາດຮຽນຮູ້ວິທີທີ່ພຣະອົງເວົ້າກັບເຮົາໄດ້.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, June 2023. Language. 19026 331