Etinda ya Sanza ya Liahona Sanza ya motoba 2023

Molimo Mosantu Akoki Kosalisa Biso

Molimo Mosantu azali moto ya misato ya Bonzambe. Makomi elobeli Ye lisusu lokola Molimo, Molimo Mosantu, to Mobondisi. Ntango toyekoli koyoka mongongo na Ye, Akotatola epai na biso na ntina ya Yesu Klisto mpe akosalisa biso toyekola babosolo ya nsango malamu.

Moto ya Bonzambe

Tata na Lola, Yesu Klisto, mpe Molimo Mosantu bazali Bonzambe. Balingaka biso mpe basalaka na bomoko mpo na kokokisa mwango ya libiki. Atako Tata na Lola mpe Yesu Klisto bazali na nzoto ya mosuni mpe mikuwa, Molimo Mosantu azali na yango te. Azali molimo.

Nzeneneke ya Tata mpe Mwana

Molimo Mosantu “nzeneneke ya Tata mpe Mwana” (2 Nefi 31:18). Yango elimboli ete tokoki kozwa litatoli ya Tata na Lola mpe Yesu Klisto na nzela ya Molimo Mosantu.

Atatolaka Bosolo

Molimo Mosantu atatolaka babosolo nyonso. Akosalisa biso toyeba ete nsango malamu—kobakisa mwango ya libiki, mitindo ya Nzambe, Bozongisi, mpe Bomikabi ya Yesu Klisto—ezali solo. Akolendisa litatoli na biso ntango tokobi kosambela, kobatela mitindo, mpe koyekola nsango malamu.

Akambaka mpe Abatelaka Biso

Molimo Mosantu akoki kokamba biso na bikateli na biso mpe kobatela biso uta na makama ya nzoto mpe ya molimo. Akosalisa biso tozwa biyano na mituna na biso soki tosambeli mpe tomeki kosala maye mazali malamu. Akokamba biso ntango nyonso “mpo na kosala malamu” (Malongi mpe Mayokani 11:12).

Abondisaka Biso

Molimo Mosantu alobelami ntango mosusu lokola “Mobondisi” (Yoane 14:26). Akoki kotondisa biso “na elikya mpe bolingo ebonga nie” (Moroni 8:26) ntango totungisami, na mawa, to na bobangi. Ntango Asalisi biso toyoka bolingo ya Nzambe, tokoki kolonga bolembisi nzoto mpe kolendisama na mikakatano na biso.

Likabo ya Molimo Mosantu

Nsima ya libatisi na biso, tozwaka likabo ya Molimo Mosantu na bokuli ebengami nkotisa. Ntango kaka tozwaka likabo oyo, tokoki kozwa kimoninga ya ntango nyonso ya Molimo Mosantu ntango tozali kobika na boyengebene.

Liyemi na J. Kirk Richards

Lolenge nini Toyokaka Molimo Mosantu

Molimo Mosantu alobelaka bato na ndenge ebele. Yango ekoki kozala na kimia, mayoki ya bolendisi to mamoni na ntina ya maye ya koloba to kosala. Ntango tosambelaka mpo na bokambi mpe toyokaka banungunungu na Ye, tokoki koyekola lolenge nini Ye alobelaka biso.

Uta na Makomi

Molimo Mosantu akoteya yo makambo manso (tala Yoane 14:26).

Okoki koyeba bosolo na nzela ya Molimo Mosantu (tala Moroni 10:5).

Molimo Mosantu akoki kolobela yo na makanisi mpe na motema (tala Malongi mpe Mayokani 8:2).

Maloba ya Komikundola

Mwango ya libiki: mwango ya Nzambe mpo na kosalisa bana na Ye bakoma lokola mpe bozonga epai na Ye.

Litatoli: litatoli ya molimo ete eloko songolo ezali solo.

Bokuli: likambo ya bule esalami na likoki ya bonganganzambe.

Kozwa ya Mingi Koleka

Soki bozali na mituna etali Molimo Mosantu, bokoki koyekola makomi, masukulu ya likita linene, mpe mikanda misusu na kati ya Gospel Library (na ChurchofJesusChrist.org or in the mobile app). Bokoki lisusu kosolola na bandeko mibali to basi ya lisalisi, bakambi na bino ya palwasi to ya etape, to bamisionele.

©2023 na Intellectual Reserve, Inc. Makoki manso mabatelami. Ebetami na Etazini. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, April 2023. Language. 19026 639