Mesaj Mansyèl Lyawona, Jiyè 2023

Pataje Levanjil Jezikri a

yon jènfi ki gen ekriti yo ouvri sou jenou l

Lè nou panse ak benediksyon nou resevwa paske nou se manm Legliz Jezikri pou Sen Dènye Jou, nou vle pataje levanjil la avèk moun nou renmen yo. Nou ka pataje temwanyaj laverite nou atravè pawòl nou ak egzanp nou. Nou kapab priye pou nou jwenn enspirasyon pou n konnen ak kimoun pou n pataje yo epi kisa pou nou di.

Jezi k ap lonje men l bay yon mesye ki andikape

Renmen Lòt Moun

Yon pati enpòtan nan pataje levanjil la se renmen lòt moun. Lè nou montre lòt moun yo lanmou nou atravè aksyon ki sanble ak pa Jezi yo, n ap pataje levanjil Jezi a—pafwa san nou pa menm di yon mo. Epi lè lòt moun konnen kijan yo tèlman enpòtan pou nou, yo gendwa plis dispoze pou yo tande refleksyon nou sou levanjil la. (Gade Gary E. Stevenson, “Renmen, Pataje, Envite,” Lyawona, Me 2022, 84–87.)

Pataje nan Fason ki Nòmal ak Natirèl

Nou kapab pataje sa nou renmen konsènan levanjil la. Lè nou fè sa nan kad lavi toulejou nou, li p ap yon bagay ki fè nou santi nou pa alèz oswa pa konfòtab. Pa egzanp, nou ka pale avèk fanmi nou ak zanmi nou sou sa nou fè nan jou Dimanch. Oswa nou ka rakonte yo sou kontatman nou santi lè nou sèvi lòt moun. (Gade Dieter F. Uchtdorf, “Travay Misyonè: Pataje Sa Ki nan Kè Nou,” Lyawona, Me 2019, 15–18.)

Envite Lòt Moun pou yo Patisipe Avèk Nou

Nou kapab envite lòt moun pou yo aprann plis sou levanjil la. Pa egzanp, nou kapab envite yo pou yo vin nan yon reyinyon oswa yon aktivite Legliz la, li Liv Mòmon an, gade yon videyo Legliz la oswa fè vizit avèk misyonè yo. Eksperyans sa yo kapab ede yo santi Lespri a epi fè yo vle aprann plis.

de tigranmoun fi ki chita epi k ap pale

Poze kesyon sou Eksperyans Yo

Apre zanmi ak manm fanmi yo fin vini legliz la oswa yo fin fè yon leson avèk misyonè yo, nou ka poze yo kesyon sou eksperyans yo. Gen kèk ansèyman levanjil la ki gendwa nouvo pou yo, alòs, nou kapab reponn kesyon yo genyen yo. Nou kapab montre yo lanmou nou ak sipòte yo pou efò yo fè pou yo vin jwenn Kris la.

Ajoute sou Kwayans Yo

Nou respekte kwayans lòt moun epi nou ba yo valè, epi nou eseye ajoute sou lafwa yo deja genyen an. Pa egzanp, yon zanmi ki te jwenn rekonfò nan ekriti Bib la kapab jwenn rekonfò tou nan ansèyman nou pataje ki soti nan Liv Mòmon an.

yon jèn fi k ap ede yon tigranmoun fi travèse lari a

Èd Nouvo Manm Legliz la

Lè moun vin antre nan Legliz la, nou kapab ede yo ranfòse lafwa yo. Nou ka zanmi yo, reponn kesyon yo genyen epi sipòte yo lè yo resevwa apèl. Nou ka ankouraje yo pou yo kontinye suiv Jezikri ak pou yo aprann sou levanjil Li a.

de misyonè tigranmoun ak yon mesye k ap gade yon telefòn ansanm

Sèvi yon Misyon Aplentan

Anplis de pataje levanjil la nan lavi toulejou nou, manm Legliz yo kapab aple pou yo sèvi kòm misyonè aplentan. Si yo prepare, jèn gason yo ka sèvi apati laj 18 lane. Jèn fi ak granmoun aje yo kapab sèvi tou. Ou kapab jwenn plis enfòmasyon nan ChurchofJesusChrist.org/callings/missionary.

Nan Ekriti yo

Jezikri te kòmande disip Li yo pou yo pataje levanjil la avèk tout moun (gade Mak 16:15).

Moun ki aple pou yo sèvi yo ta dwe fè sa ak tout “kè yo, pouvwa yo, lespri yo ak fòs yo” (gade Doktrin ak Alyans 4).

N ap gen gwo lajwa lè nou ede mennen lòt moun nan levanjil la (gade Doktrin ak Alyans 18:15–16).

Resous Sou Entènèt

“Kijan mwen ka pataje Liv Mòmon an avèk yon zanmi?” “Kijan mwen ka konekte zanmi m avèk misyonè yo?” Yo reponn kesyon sa yo ansanm ak lòt kesyon nan ChurchofJesusChrist.org/share.

Bibliyotèk Levanjil la (nan ChurchofJesusChrist.org oswa itilize aplikasyon mobil la) gen yon koleksyon resous tou, ki gen ladan kwayans debaz nou yo. Seleksyone “Pataje Levanjil la” pou w aprann plis sou kisa pou w pataje ak kijan pou w pataje l.

Pou w aprann plis sou fòtifye nouvo manm yo, gade nan Bibliyotèk levanjil la anba seksyon “Manyèl ak Apèl” epi apresa “Apèl Pawas oswa Branch.”

Dekouvri Plis

Si w gen kesyon sou pataj levanjil la, ou ka pale avèk frè ak sè sèvis pastoral ou yo, ak dirijan pawas oswa branch ou yo, oswa misyonè yo.

© 2023 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Lyawona Message, July 2023. 19026 036 Language. 19045 036