Binulan a Mensahe ti Liahona , Hulio 2023

Panangibinglay iti Ebanghelio ni Jesucristo

balasitang nga addaan iti nasantuan a kasuratan iti saklotna

No panunotentayo dagiti bendision a maawattayo gapu ta miembrotayo ti Ti Simbaan ni Jesucristo dagiti Santo iti Ud-udina nga Aldaw, kayattayo nga ibinglay ti ebanghelio kadagiti ay-ayatentayo. Mabalintayo nga ibinglay dagiti pammaneknektayo iti kinapudno babaen kadagiti balikastayo ken pagwadantayo. Mabalintayo ti agkararag para iti inspirasion tapno maammuantayo no asino ti ibinglayan ken no ania ti isaotayo.

Ni Jesus a mangtultulong iti baldado a lalaki

Ayaten dagiti Dadduma

Ti napateg a paset ti panangibinglay iti ebanghelio ket ti panagayat kadagiti dadduma. No ipakitatayo ti ayattayo kadagiti dadduma babaen kadagiti aramid a kas ken Cristo, ibinglaytayo ti ebanghelio ni Jesucristo—no dadduma uray pay saantayo nga ibalikas. Ket no ammo dagiti dadduma a pudno a maseknantayo kadakuada, mabalin nga ad-adda a nakasaganada a dumngeg kadagiti kapanunotantayo maipapan iti ebanghelio. (Kitaen iti Gary E. Stevenson, “Love, Share, Invite,” Liahona, Mayo 2022, 84–87.)

Mangibinglay iti Gagangay ken Natural a Wagas

Mabalintayo nga ibinglay no ania ti kayattayo maipapan ti ebanghelio? No aramidentayo daytoy kas paset ti inaldaw a panagbiagtayo, saan a makauma wenno saan a komportable daytoy. Kas pagarigan, mabalintayo ti makisarita iti pamilia ken gagayyemtayo maipapan iti ar-aramidentayo iti Domingo. Wenno mabalintayo nga ibaga kadakuada ti ragsak a mariknatayo no agserbitayo iti dadduma. (Kitaen iti Dieter F. Uchtdorf, “Missionary Work: Sharing What Is in Your Heart,” Liahona, Mayo 2019, 15–18.)

Awisenyo dagiti Dadduma a Makikadua Kadatayo

Mabalintayo nga awisen dagiti dadduma a mangammo iti ad-adu pay maipapan iti ebanghelio. Kas pagarigan, mabalintayo nga awisen ida nga umay iti miting wenno aktibidad ti Simbaan, agbasa iti Libro ni Mormon, agbuya iti video ti Simbaan, wenno sumarungkar a kadua dagiti misionario. Makatulong dagitoy a padas kadakuada a makarikna iti Espiritu ken kayatda ti agsursuro iti ad-adu pay.

Dua a nataengan a babbai a nakatugaw ken agsasarita

Agdamag maipapan iti Padasda

Kalpasan nga umay dagiti gagayyem ken miembro ti pamilia iti simbaan wenno adda leksionda kadagiti misionario, mabalintayo a damagen kadakuada ti maipapan iti padasda. Mabalin a baro kadakuada ti sumagmamano a pannursuro ti ebanghelio, isu a masungbatantayo dagiti saludsod nga adda kadakuada. Mabalintayo nga ipakita ti ayat ken suportatayo kadagiti panagreggetda nga umasideg ken Cristo.

Mangnayon iti Panamatida

Ipateg ken raementayo dagiti panamati ti dadduma, ken padasentayo ti mangnayon iti panamati nga addan kadakuada. Kas pagarigan, ti maysa a gayyem a nakasarak iti liwliwa kadagiti nasantuan a kasuratan ti Biblia ket mabalin met a makasarak iti liwliwa kadagiti pannursuro nga ibinglaytayo manipud iti Libro ni Mormon.

agtutubo a babbai a tumultulong iti maysa a nataengan a babai a bumallasiw iti maysa a kalsada

Tulongan dagiti Baro a Miembro ti Simbaan

No makikadua dagiti tao iti Simbaan, makatulongtayo a mangpapigsa iti pammatida. Makapagbalintayo a gayyemda, makasungbat kadagiti saludsodda, ken makasuporta kadakuada no umawatda kadagiti calling. Mabalintayo a paregtaen ida nga agtultuloy a sumurot ken ni Jesucristo ken agsursuro maipapan iti ebangheliona.

dua nga elder a misionario ken maysa a lalaki a kumitkita iti telepono

Agserbi iti Full-Time Mission

Malaksid iti panangibinglay iti ebanghelio iti inaldaw a panagbiagtayo, mabalin a maawagan dagiti miembro ti Simbaan nga agserbi kas full-time a missionario No nakasaganadan, mabalin nga agserbi dagiti agtutubo a lallaki iti nasapa nga edad a 18. Mabalin pay nga agserbi dagiti agtutubo a babbai ken natataengan. Masarakanyo ti ad-adu pay nga impormasion iti ChurchofJesusChrist.org/callings/missionary.

Manipud kadagiti Nasantuan a Kasuratan

Binilin ni Jesucristo dagiti disipulona nga ibinglayda ti ebanghelio iti tunggal maysa (kitaen iti Marcos 16:15).

Dagiti naawagan nga agserbi nasken nga aramidenda iti amin a “puso, kabaelan, panunot ken pigsada” (kitaen iti Doktrina ken Katulagan 4).

Maaddaantayo iti dakkel a rag-o no tumulongtayo a mangyeg kadagiti dadduma iti ebanghelio (kitaen iti Doktrina ken Katulagan 18:15–16).

Dagiti Online Resources

“Kasano a maibinglayko ti Libro ni Mormon iti maysa a gayyem?” “Kasano a maikonektak ti gayyemko kadagiti misionario?” Dagitoy ken dadduma pay a saludsod ket masungbatan iti ChurchofJesusChrist.org/share.

Ti Gospel Library (iti ChurchofJesusChrist.org wenno us-usaren ti mobile app) ket addaan pay iti koleksion dagiti resources, agraman dagiti kangrunaan a panamatitayo. Pilien ti “Panangibinglay iti Ebanghelio” tapno maammuan ti ad-adu pay maipapan iti no ania ken kasano ti mangibinglay.

Tapno maammuan ti ad-adu pay maipapan iti panangpapigsa kadagiti baro a miembro, kitaen iti Gospel Library iti baba ti “Dagiti Handbook ken Calling” ken kalpasanna ti “Dagiti Calling iti Ward wenno Branch.”

Ammuen ti Ad-adu Pay

No adda dagiti saludsodyo maipapan iti panangibinglay iti ebanghelio, mabalinyo a kasarita dagiti ministering brother wenno sisteryo, dagiti lideryo iti ward wenno branch, wenno dagiti missionary.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, July 2023. Language. 19045 864