“Sharing the Gospel of Jesus Christ,” Liahona, July 2023.
ຂ່າວສານປະຈຳເດືອນ Liahona, ເດືອນກໍລະກົດ 2023
ການແບ່ງປັນພຣະກິດຕິຄຸນຂອງພຣະເຢຊູຄຣິດ
ເມື່ອເຮົາຄິດເຖິງພອນທີ່ເຮົາໄດ້ຮັບຍ້ອນວ່າເຮົາເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາກໍຢາກແບ່ງປັນພຣະກິດຕິຄຸນກັບຄົນທີ່ເຮົາຮັກ. ເຮົາສາມາດແບ່ງປັນປະຈັກພະຍານຂອງເຮົາກ່ຽວກັບຄວາມຈິງ ຜ່ານທາງຖ້ອຍຄໍາ ແລະ ຕົວຢ່າງຂອງເຮົາ. ເຮົາສາມາດອະທິຖານຂໍການດົນໃຈ ເພື່ອໃຫ້ເຮົາຮູ້ວ່າ ເຮົາຄວນແບ່ງປັນກັບໃຜ ແລະ ຄວນເວົ້າຫຍັງ.
ຮັກຄົນອື່ນ
ສ່ວນໜຶ່ງທີ່ສໍາຄັນຂອງການແບ່ງປັນພຣະກິດຕິຄຸນ ແມ່ນການຮັກຄົນອື່ນ. ເມື່ອເຮົາສະແດງຄວາມຮັກຂອງເຮົາຕໍ່ຄົນອື່ນ ຜ່ານທາງການກະທໍາທີ່ເໝືອນດັ່ງພຣະຄຣິດ, ເຮົາກໍກໍາລັງແບ່ງປັນພຣະກິດຕິຄຸນຂອງພຣະເຢຊູຄຣິດ—ບາງຄັ້ງໂດຍທີ່ບໍ່ເວົ້າຫຍັງຈັກຄຳ. ແລະ ເມື່ອຄົນອື່ນຮູ້ວ່າ ເຮົາຫ່ວງໃຍເຂົາເຈົ້າແທ້ໆ, ເຂົາເຈົ້າອາດເປີດໃຈຮັບຟັງຄວາມຄິດຂອງເຮົາກ່ຽວກັບພຣະກິດຕິຄຸນຫລາຍຍິ່ງຂຶ້ນ. (ເບິ່ງ Gary E. Stevenson, “Love, Share, Invite,” Liahona, May 2022, 84–87.)
ແບ່ງປັນໃນວິທີທີ່ປົກກະຕິ ແລະ ເປັນທໍາມະຊາດ
ເຮົາສາມາດແບ່ງປັນສິ່ງທີ່ເຮົາຮັກກ່ຽວກັບພຣະກິດຕິຄຸນໄດ້. ຖ້າເຮົາເຮັດສິ່ງນີ້ໃຫ້ເປັນສ່ວນໜຶ່ງຂອງຊີວິດປະຈໍາວັນຂອງເຮົາແລ້ວ, ມັນກໍຈະບໍ່ເປັນເລື່ອງທີ່ໜ້າອຶດອັດ ຫລື ບໍ່ສະບາຍໃຈ. ຍົກຕົວຢ່າງ, ເຮົາສາມາດເວົ້າລົມກັບຄອບຄົວ ແລະ ໝູ່ເພື່ອນຂອງເຮົາ ກ່ຽວກັບສິ່ງທີ່ເຮົາເຮັດໃນວັນອາທິດ. ຫລື ເຮົາສາມາດບອກເຂົາເຈົ້າກ່ຽວກັບຄວາມສຸກທີ່ເຮົາຮູ້ສຶກ ເມື່ອເຮົາຮັບໃຊ້ຄົນອື່ນ. (ເບິ່ງ Dieter F. Uchtdorf, “Missionary Work: Sharing What Is in Your Heart,” Liahona, May 2019, 15–18.)
ເຊື້ອເຊີນຄົນອື່ນໃຫ້ມາຮ່ວມກັບເຮົາ
ເຮົາສາມາດເຊື້ອເຊີນຄົນອື່ນໃຫ້ຮຽນຮູ້ເພີ່ມເຕີມກ່ຽວກັບພຣະກິດຕິຄຸນໄດ້. ຍົກຕົວຢ່າງ, ເຮົາສາມາດເຊື້ອເຊີນເຂົາເຈົ້າໃຫ້ມາຮ່ວມກອງປະຊຸມ ຫລື ກິດຈະກໍາຂອງສາດສະໜາຈັກ, ອ່ານພຣະຄໍາພີມໍມອນ, ເບິ່ງວິດີໂອຂອງສາດສະໜາຈັກ, ຫລື ຮັບການຢ້ຽມຢາມຈາກຜູ້ສອນສາດສະໜາ. ປະສົບການເຫລົ່ານີ້ ສາມາດຊ່ວຍໃຫ້ເຂົາເຈົ້າຮູ້ສຶກເຖິງພຣະວິນຍານ ແລະ ຢາກຮຽນຮູ້ເພີ່ມເຕີມ.
ຖາມກ່ຽວກັບປະສົບການຂອງເຂົາເຈົ້າ
ຫລັງຈາກທີ່ໝູ່ເພື່ອນ ແລະ ສະມາຊິກໃນຄອບຄົວມາໂບດ ຫລື ຮຽນບົດຮຽນກັບຜູ້ສອນສາດສະໜາ, ເຮົາສາມາດຖາມເຂົາເຈົ້າກ່ຽວກັບປະສົບການຂອງເຂົາເຈົ້າໄດ້. ບາງຄຳສອນຂອງພຣະກິດຕິຄຸນອາດເປັນສິ່ງທີ່ໃໝ່ສຳລັບເຂົາເຈົ້າ, ດັ່ງນັ້ນ ເຮົາຈຶ່ງສາມາດຕອບຄຳຖາມທີ່ເຂົາເຈົ້າມີໄດ້. ເຮົາສາມາດສະແດງຄວາມຮັກ ແລະ ການສະໜັບສະໜູນຂອງເຮົາຕໍ່ຄວາມພະຍາຍາມຂອງເຂົາເຈົ້າໃນການເຂົ້າມາຫາພຣະຄຣິດ.
ເພີ່ມເຕີມໃສ່ຄວາມເຊື່ອຂອງເຂົາເຈົ້າ
ເຮົາໃຫ້ຄຸນຄ່າ ແລະ ເຄົາລົບຄວາມເຊື່ອຂອງຄົນອື່ນ, ແລະ ເຮົາພະຍາຍາມທີ່ຈະເພີ່ມເຕີມໃສ່ສັດທາທີ່ເຂົາເຈົ້າມີຢູ່ແລ້ວ. ຍົກຕົວຢ່າງ, ໝູ່ຄົນໜຶ່ງທີ່ໄດ້ພົບການປອບໂຍນໃນຂໍ້ພຣະຄຳພີໃນພຣະຄຣິສຕະທຳຄຳພີ ອາດພົບການປອບໂຍນໃນຄຳສອນທີ່ເຮົາແບ່ງປັນຈາກພຣະຄຳພີມໍມອນໄດ້ເຊັ່ນກັນ.
ຊ່ວຍເຫລືອສະມາຊິກໃໝ່ຂອງສາດສະໜາຈັກ
ເມື່ອຜູ້ຄົນເຂົ້າຮ່ວມສາດສະໜາຈັກ, ເຮົາສາມາດຊ່ວຍເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າໄດ້. ເຮົາສາມາດເປັນໝູ່ຂອງເຂົາເຈົ້າ, ຕອບຄຳຖາມເຂົາເຈົ້າ, ແລະ ສະໜັບສະໜູນເຂົາເຈົ້າ ເມື່ອເຂົາເຈົ້າຮັບການເອີ້ນ. ເຮົາສາມາດຊຸກຍູ້ເຂົາເຈົ້າໃຫ້ສືບຕໍ່ຕິດຕາມພຣະເຢຊູຄຣິດ ແລະ ຮຽນຮູ້ກ່ຽວກັບພຣະກິດຕິຄຸນຂອງພຣະອົງ.
ຮັບໃຊ້ເຜີຍແຜ່ເຕັມເວລາ
ນອກເໜືອຈາກການແບ່ງປັນພຣະກິດຕິຄຸນໃນຊີວິດປະຈຳວັນຂອງເຮົາແລ້ວ, ສະມາຊິກຂອງສາດສະໜາຈັກສາມາດຖືກເອີ້ນໃຫ້ໄປຮັບໃຊ້ໃນຖານະຜູ້ສອນສາດສະໜາເຕັມເວລາ. ຖ້າພວກເຂົາກຽມພ້ອມແລ້ວ, ຊາຍໜຸ່ມສາມາດຮັບໃຊ້ໄດ້ ຕັ້ງແຕ່ອາຍຸ 18 ປີ. ຍິງໜຸ່ມ ແລະ ຜູ້ໃຫຍ່ອາວຸໂສ ກໍສາມາດຮັບໃຊ້ໄດ້ເຊັ່ນກັນ. ທ່ານສາມາດພົບຂໍ້ມູນເພີ່ມເຕີມໄດ້ທີ່ ChurchofJesusChrist.org/callings/missionary.
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, July 2023. Language. 19045 331