Umyalezo Wanyanga Zonke we Liyahona ngoJulayi 2023

UKwabelana ngeVangeli likaJesu Kristu

Lapho sicabanga ngezibusiso esizitholayo ngenxa yokuba ngamalungu eBandla likaJesu Kristu labaNgcwele beziNsuku zokuGcina, sifuna ukwabelana ngevangeli nalabo esibathandayo. Singabelana ngobufakazi bethu beqiniso ngesikushoyo nangezibonelo zethu. Singayikhulekela intshisekelo ukuze sazi ukuthi ngubani esingabelana naye nokuthi yikuphi esingakusho.

Bathande Abanye

Ingxenye ebalulekile yokwabelana ngevangeli likaJesu Kristu ukuthanda abanye. Lapho sikhombisa uthando kwabanye ngezenzo ezifana nezika Kristu, sabelana ngevangeli lika Jesu Kristu––kwesinye isikhathi ngaphandle kokusho okuthile. Futhi lapho abanye bazi ukuthi sibakhathalela ngempela, kungenzeka bafune ukuzwa ngemicabango yethu ngevangeli. (Bheka inkulumo kaGary E. Stevenson ethi, “Love, Share, Invite,”kwi LiyahonayangoMeyi 2022, 84–87.)

Yabelana Ngevangeli Ngezindlela Ezejwayelekileyo

Singabelana ngalokho esikuthandayo ngevangeli. Lapho sikwenza lokhu nsukuzonke, ngeke kube nzima noma kusikhathaze. Isibonelo, singakhuluma nabomndeni wethu noma abangani mayelana nokuthi senzani ngeSonto. Noma-ke singabatshela ngokuthi sizizwa kanjani lapho sisiza abanye abantu. (Bheka inkulumo ka Dieter F. Uchtdorf ethi, “Missionary Work: Sharing What Is in Your Heart,”kwi LiyahonayangoMeyi 2019, 15–18.)

Mema Abanye ukuba bazoHlanganyela Nathi

Singabamema abanye ukuba bazofunda kabanzi ngevangeli. Isibonelo, singabamema ukuba beze enkonzweni noma bazohlanganyela nathi kwesikwenzayo, ukuzofunda iNcwadi kaMormoni, ukuzobuka ividiyo yaseBandleni, noma ukuba bavakashelwe ngabefundisi. Konke lokhu kungabasiza ukuthi bawuzwe uMoya bafune nokufunda kabanzi.

Babuze Ngabakuzwile Nabakubonile

Emva kokuthi abangani nabomndeni bezile esontweni noma bebambe iqhaza esifundweni nabefundisi, singababuza ngabakuzwile nabakubonile. Ezinye izimfundiso zevangeli kungenzeka zibe zintsha kubo, ngakho-ke singayiphendula imibuzo abanayo. Singakhombisa uthando nokubaxhasa emizamweni yabo yokuza ku Kristu.

Engeza Okholweni Lwabo

Siyazazisa futhi sizihloniphe izinkolo zabanye, futhi sizama ukwengeza okholweni asebevele benalo. Isibonelo, umngani othole induduzo emibhalweni yeBhayibheli kungenzeka athole induduzo ezimfundisweni zeNcwadi kaMormoni esimtshela ngazo.

Siza Amalungu Ebandla Asemasha

Lapho abantu bejoyina iBandla, singabasiza baqine okholweni lwabo. Singaba ngabangani babo, siphendule imibuzo yabo, futhi sibasekele lapho bemukela ubizo. Singabakhuthaza ukuba baqhubeke nokulandela uJesu Kristu nokufunda ngevangeli Lakhe.

Ukufeza Umsebenzi Wokuthunywa

Ngaphezu kokwabelana ngevangeli nsuku zonke, amalungu eBandla angabizwa ukuyosebenza njengabefundisi. Uma bezilungiselele, abafana bangaqala ukusebenza beneminyaka eyi–18. Amantombazane nabadala nabo bangasebenza. Ungathola olunye ulwazi ku ChurchofJesusChrist.org/callings/missionary.

Okuvela emibhalweni engcwele

UJesu Kristu wayala abafundi Bakhe ukuba babelane ngevangeli nabo bonke abantu (bheka ku Marku 16:15).

Labo ababizelwe emsebenzini kufanele bakwenze lokho ngayo yonke “inhliziyo yabo, nangamandla, nangomqondo, nangomfutho” (bheka IMfundiso neziVumelwano 4).

Sizoba nenjabulo enkulu lapho sisiza ukuletha abanye evangelini (bheka IMfundiso neziVumelwano 18:15–16).

Amasu Okufunda atholakala ku-inthanethi

“Ngingabelana kanjani ngeNcwadi kaMormoni nomngani na?” “Ngingamxhumanisa kanjani umngani wami nabefundisi na?” Lena neminye imibuzo iyaphendulwa ku ChurchofJesusChrist.org/share.

UMthombo woLwazi lweVangeli (ku ChurchofJesusChrist.org noma usebenzise i-app kamakhalekhukhwini) nawo uneqoqo lwezinsiza, kuhlanganisa nezinkolelo zethu eziyisisekelo. Khetha okuthi “Sharing the Gospel” ukuze ufunde kabanzi mayelana nokuthi ungabelana ngani futhi kanjani.

Ukuze ufunde kabanzi ngokuqinisa amalungu amasha, bheka kuMthombo woLwazi lweVangeli ngaphansi kwesihloko esithi “Handbooks and Callings” nesithi “Ward or Branch Callings.”

Thola Olunye Ulwazi

Uma unemibuzo ngokwabelana ngevangeli, ungakhuluma nabafowenu noma odade abasizanayo, abaholi bewadi noma begatsha lakho, noma abefundisi.

© 2023 by Intellectual Reserve, Inc. All rights reserved. Ishicilelwe eMelika. Usuku okuvunywe ngalo ukuba lesi sifundo sikhishwe ngesiNgisi: 6/19. Usuku okuvunywe ngalo ukuba lesi sifundo sihunyushwe: 6/19. Ukuhunyushwa kwe Monthly Liahona Message, July 2023. Language. 19045 783