Ang Pagsandig-sa-Kaugalingon Nagapabakod sa Aton

duha ka tawo nga nagapanghugas sang mga kinan-an

Ang pagsandig-sa-kaugalingon nagakahulugan nga makasarang kita sa pagtatap sang aton mga panginahanglan kag sang iya sang aton mga pamilya. Kon kita makasandig-sa-kaugalingon, makaalagad kita sing mas maayo sa Ginuo kag makatatap sang iban. Pero ang pagsandig-sa-kaugalingon wala nagakahulugan nga kinahanglan naton atubangon ang aton mga kabudlayan sing isahanon. Makapangayo kita sang bulig sa mga abyan, pamilya, mga miyembro sang ward ukon branch, kag mga propesyonal kon kinahanglan naton ini.

Mga Prinsipyo sang Pagsandig-sa-Kaugalingon

Ang pagsandig-sa-kaugalingon nagakinahanglan sang edukasyon, pagkamatinumanon, kag pagpangabudlay. Ginahimo naton ang aton masarangan nga tatapon ang aton mga kaugalingon, kag makapangayo man kita sang bulig sa iban kon kinahanglanon. Pero agud mangin tunay nga makasandig-sa-kaugalingon, dapat tinguhaan man naton nga mag-angkon sang pagtuo kay Jesucristo. Dayon, sa aton pagtinguha nga buligan ang aton mga kaugalingon, pabakuron Niya kita.

Espirituhanon nga Pagsandig-sa-Kaugalingon

Mahimo naton mapabaskog ang aton espirituhanon nga pagsandig-sa-kaugalingon paagi sa pagtinguha nga pabakuron ang aton testimonya parte kay Jesucristo. Ginahimo naton ini paagi sa pagpangamuyo, pagtuon sang balaan nga mga kasulatan, pagsimba, pagtuman sang mga kasugoan, kag paghimo sang iban pa nga mga butang nga mas nagapalapit sa aton kay Cristo. Ang ihibalo nga handa Sia magbulig sa aton magahatag sa aton sang pagtuo nga magpadayon nga mabakod bisan pa nga mabudlay ang pangabuhi.

Temporal nga Pagsandig-sa-Kaugalingon.

Ang temporal nga pagsandig-sa-kaugalingon nagalakip sang ikasarang nga magtatap sang pisikal naton nga mga panginahanglan kag sang iya sang aton pamilya. Dala diri ang pagkaon, ilistaran, ikaayong lawas, kag iban pa nga mga panginahanglan. Ginahimo naton ini paagi sa pag-angkon sang maayo nga edukasyon, pagtuon ukon pagpasangkad sang kinahanglanon nga mga abilidad, kapisan sa pag-obra, maalam nga paggamit sang aton oras, kag maayo nga pagdumala sang aton kuwarta.

Emosyonal nga Pagsandig-sa-Kaugalingon

Ang emosyonal nga pagsandig-sa-kaugalingon amo ang ikasarang nga makigbagay sa emosyonal nga mga kabudlayan nga may kaisog kag pagtuo. Tanan kita may mga hangkat kag mga kabudlayan. Salamat sa ebanghelyo, nahibal-an naton nga makapili kita kon paano naton atubangon ang mga ini. Ang pagresponde nga may pagtuo sa Ginuo nagadugang sang aton ikasarang nga atubangon ang aton mga kabudlayan nga may mas dako nga paglaum.

Edukasyon

Dapat wala untat ang aton pagtuon. Gusto sang Dios nga edukaron naton ang aton mga hunahuna kag pauswagon ang aton mga abilidad sa bilog naton nga kabuhi kag sa madason. Kon mas nagatuon kita, mas mangin maayo kita nga impluwensya para sa kaayohan kag makatigana para sa aton mga kaugalingon, sa aton pamilya, kag sa mga nagakinahanglan.

Mga Bugay sang Pagsandig-sa-Kaugalingon

Ang mga propeta nagtudlo nga kon pauswagon naton ang aton pagsandig-sa-kaugalingon, bugayan kita sing mas dako nga paglaum kag kalinong. Mabuligan naton ang aton mga pamilya kag ang iban nga nagakinahanglan. Kag mabugayan kita sang mas madamo nga mga oportunidad kag sang ikasarang nga magpadayon sa pag-uswag.

Mga Bulig nga Matigayon sa Simbahan

Ang inyo stake mahimo magpahamtang sang mga grupo sa pagsandig-sa-kaugalingon. Ang mga ini makatudlo sa inyo sang mga prinsipyo sang pagsandig-sa-kaugalingon kag mga abilidad pareho sang pagdumala sang inyo kuwarta ukon pagpangita sang mas maayo nga obra. Makakita kamo sang kaangot nga mga bulig sa Librarya sang Ebanghelyo. Pilia ang “Books and Lessons” kag dayon “Self-Reliance.”

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly Liahona Message, August 2023. Language. 19046 861