Porous ren Liaona Iteiten Maram, September 2023

Tumunu Ekkewe mi Osupwang

A Achikara Chommong ren Sokopaten Semwen, seni J. Kirk Richards, esapw kapi

Kich chon Ewe Mwichefenin Jises Kraist ren Aramas mi Pin Non Fansoun Soponon, sia eti asukunen ach ewe Samon ren tumwunu ekkewe mi osupwang. Sia tumwunu ekkewe mi osupwang ren ach angang ngeni, anisir ar repwe anongonong won pwisin winikaper, me nounou fengen pisekich.

An Jises Kraist nenien appiru

Jises Kraist a tongei, etipa, me iotek faniten chon nomw arun. I “a fein fetan ekis meinisin, a fori an angang mi murinno” (Foffor 10:38). Sia tongeni fiti An nenien appiru ren ach tongei, etipa, angang ngeni, me ioteki chon nomw aruch. sia tongeni pwan kuta ekkoch anen ach sipwe anisi aramas.

Iamwiri

Ewe kapas iamwiri sia nounou non pukefel me non an ewe Samon Mwichefen ren awewen ifa usun ach sipwe tumwunu fengen nefinach. Chon amwochu ewe pristut ir repwe chon iamwiri mwan ngeni iteiten aramas ika famini non ewe wartika pranch. Mi kawor fefin chon iamwir ra ewis ngeni iteiten fefin meinisin. Chon iamwir mwan me fefin repwe tumunochu pwe Chon ewe Mwichefen resap monnukuno me repwe tumunun.

Anisi Ekkoch ar Repwe Anongonong won Pwisin Winikaper

Sia tongeni anisi chon non ach famini me chiechiach ar repwe anongonong won pusin winikaper ren ach pesei ngenir aninisir nesor me ponon ren ar osukosuk. Sia tongeni anisir non ar angang won met ochun manawer. Kutta sopwosopwen porousen anongonong won pusin winikapomw non ewe August 2023 Liaona Gospel Basics article.

Angang ngeni Ekoch

Mi wor chommong anen ach sipwe angang ngeni chon aruch me anisir ren met mi auchea ngeni pekin inis, nguunir, me netiper. Sipwe kaeo porousen ekoch pwun sipwe sinei ifa usun ach sipwe anisir ren ochun manawer. Sia pwan tongeni iotekin tingor ren emwenin ach sipwe sinei ifa usun ach sipwe anisir.

Nounou Fengen Met mi Wor Rech

Sia tongeni anisi ekkoch ren ach nounou fengen met Kot a awora ngeni kich. Awewe, sia tongeni fang non kisasou asoren echikipin ika asor ngeni an ewe Mwichefen Monien Aninisin mi Osupwang. Sia pwan tongeni angang ngeni non neeniach me keken seni ach ewe wis.

Wiisen Nouwisin Mwichefen

Ewe pisop a wisen masemas won tumwunun aramas meinisin non an we wart. I a tongeni aia monien asoren echikipin ne anisi ngeni chon ewe mwichefen mi osupwang. Ekkoch nouwis, mi pachonong noun kewe chon aninis me ewe Relief Society me ekewe presetensin mwichen elter, ra anisi chon ewe mwichefen ne kuta ekkewe aninis faniter.

An ewe Mwichefen Angangen Aninisin Aramas

Ewe Mwichefen a anisi aramas non unusen fonufan ren pekin emerchensi, forin angang non neeniach, me ekkoch prokram awewe ren enimenimen konik me apwosun semwen. Ren tichikin, nengeni Dallin H, Oaks, “Helping the Poor and Distressed,” Liaona, Nov. 2022, 6-8.

Seni ekkewe Pukefel

“Kot a tongei chon fangono non pwapwa” (2 Corinth 9:7).

Sia eiti ngeni nouch semirit ar repwe angang ngeni mi osupwang (nengeni Mosaia 4:15–16).

Sia oururu ekkoch me mwarei fengeni ar chou (nengeni Mosaia 18:8–9).

Kapas kopwe Chechemeni

Wis: ew tichikin wiis faniten angangen ewe Mwichefen. Nouwisin Mwichefen ra kutta apochokunen ar repwe sinei io ewe Samon a mochen repwe kekeri.

Asoren echikipin: moni sia ngeni ewe Mwichefen nupwen sia echikipin, epwe mwaren keuk ngeni ewe ukukun sia nounou ren kamon enach mwongo nupwe sia echikipin.

Anongonong won pusin winikapom: omw tongeni kopwe pusin awora met an namot fan itach me ach famini.

Kutta Pwan Ekkoch

Ika a wor ami kapaseis aninisin ekkewe mi osupwang, ouwa tongeni kapas ngeni noumi kewe mwan chon iwmwir ika fefin, noumi kewe souemwenin wart ika pranch, ka ekkewe misineri. Ka pwan tongeni kutta afanafanen mwichenap ren ei itenap me ekoch masowen aninis me non ewe Gospel Library (ren ChurchofJesusChrist.org ika non nouch ena mobile app).

© 2023 seni Intellectual Reserve, Inc. All rights reserved. A för non Merika. Kapungunon non fosun Merika: 6/19. Kapungunon chiakun: 6/19. Chiakun Porousen Iteiten Maram, September 2023. Language. 19047 901