Binulan a Mensahe ti Liahona , Septiembre 2023

Panangaywan Kadagiti Agkasapulan

Inagasanna ti Adu a Nadumaduma a Sakit, ni J. Kirk Richards, saan a mabalin a kopiaen

Kas miembro ti Ti Simbaan ni Jesucristo dagiti Santo iti Ud-udina nga Aldaw, surotentayo ti pannursuro ti Apo a mangaywan kadagiti agkasapulan. Asikasuentayo dagiti dadduma babaen ti panangtulong kadakuada nga agbalin nga agpannuray iti bukodda a kabaelan, ken panangibinglay iti adda kadatayo.

Pagwadan ni Jesucristo

Inayat, liniwliwa, ken inkararagan ni Jesucristo dagiti adda iti aglawlawna. Isu ket ”namagpagna a nagar-aramid iti kinaimbag” (Dagiti Aramid 10:38). Mabalintayo a suroten ti pagwadanna babaen ti panagayat, panangliwliwa, panagserbi, ken panangikararagtayo kadagiti adda iti aglawlawtayo. Mabalintayo a kanayon nga agsapsapul kadagiti wagas a pangtulongantayo kadagiti dadduma.

Ministering

Ti balikas a ministering ket naaramat kadagiti nasantuan a kasuratan ken iti Simbaan ti Apo a mangiladawan no kasano ti panangaywantayo iti tunggal maysa. Madutokan dagiti priesthood holder kas ministering brothers iti tunggal indibidual wenno pamilia iti ward wenno branch. Madutokan dagiti ministering sister iti tunggal nataengan a kabsat a babai. Siguraduen dagiti ministering brother ken sister a malaglagip ken maaywanan dagiti amin a miembro ti Simbaan.

Panangtulong kadagiti Dadduma nga Agbalin a Mapagpannuray iti Bukodda a Kabaelan

Matulongantayo dagiti miembro ti pamilia ken gagayyem nga agbalin nga agpannuray iti bukodda a kabaelan babaen ti panangparegta kadakuada a mangbirok kadagiti napaut a pangrisut kadagiti parikutda. Mabalintayo ngarud a suportaran ida bayat ti panagtrabahoda kadagiti panggepda a tun-oyen. Agsapul iti ad-adu pay nga impormasion maipapan iti panagpannuray iti bukod a kabaelan iti Agosto 2023 Liahona Gospel Basics article.

Panagserbi kadagiti Dadduma

Adu dagiti wagas a makapagserbitayo kadagiti adda iti aglawlawtayo ken makatulongtayo a mangpennek kadagiti temporal, naespirituan, ken emosional a kasapulanda. Ti panangsursuro maipapan kadagiti dadduma ket makatulong kadatayo a mangammo no kasano a nasaysayaat a makapagserbitayo kadakuada. Mabalintayo pay nga ikararag ti panangiwanwan tapno maammuantayo no ania ti maaramidantayo a tumulong.

Panangibinglay No Ania ti Adda Kadatayo

Makapagserbitayo kadagiti dadduma babaen iti panangibinglaytayo no ania ti imparabur ti Dios kadatayo. Kas pagarigan, makaitedtayo iti nawadwad a daton iti panagayuno wenno mangtedtayo iti donasion iti Church’s Humanitarian Aid fund. Mabalin pay nga agserbitayo iti komunidadtayo ken kadagiti takemtayo (calling)iti Simbaan

Dagiti Pagrebbengan dagiti Lider ti Simbaan

Ti bishop ti mangimaton iti panangaywan kadagiti agkasapulan iti wardna. Mabalinna nga usaren ti kuarta manipud kadagiti daton ti panagayuno tapno matulongan dagiti miembro nga addaan iti kasapulan. Dagiti dadduma pay a lider, agraman dagiti mamagbagana ken dagiti panguluen ti Relief Society ken elders quorum, tulonganda dagiti miembro a mangsapul kadagiti resources a mabalinda nga usaren a mangpennek kadagiti kasapulanda.

Dagiti Panagkagumaan ti Simbaan a Panangtulong iti Tao

Tumulong ti Simbaan kadagiti tao iti intero a lubong babaen ti panagsaranay iti emerhensia, proyekto ti komunidad, ken dadduma pay a programa kas iti nadalus a danum ken panagpabakuna. Tapno maammuan ti ad-addu pay, kitaen iti Dallin H. Oaks, “Helping the Poor and Distressed,” Liahona, Nob. 2022, 6–8.

Manipud kadagiti Nasantuan a Kasuratan

“Ti Dios ayatenna ti mangted a siaayat” (2 Taga Corinto 9:7).

Suruantayo dagiti annaktayo nga agserbi kadagiti agkasapulan (kitaen iti Mosiah 4:15–16).

Manglinglingaytayo kadagiti dadduma ken magtulong kadakuada a mangibaklay kadagiti dagensenda (kitaen iti Mosiah 18:8–9).

Dagiti Balikas a Laglagipen

Takem: masinunuo a pagrebbengan tapno agserbi iti Simbaan. Agkararag dagiti lider iti Simbaan para iti inspirasion a mangammo no asino ti kayat ti Apo nga awaganda.

Daton iti panagayuno: kuarta nga itedtayo iti Simbaan no agayunotayo, uray laeng kapada ti gatad a nagastostayo koma iti pannangan bayat ti panagayuno.

Mapagpannuray iti bukod a kabaelan (Self-reliant): ti pannakabael a mangasikaso kadagiti kasapulan ti bagitayo ken dagiti pamiliatayo.

Ammuen ti Ad-adu Pay

No adda dagiti saludsodyo maipapan ti panangaywan kadagiti agkasapulan, mabalinyo a kasarita dagiti ministering brother wenno sisteryo, dagiti lideryo iti ward wenno branch, wenno dagiti missionary. Mabalinyo pay a sapulen dagiti mensahe iti sapasap a komperensia maipapan iti daytoy a topiko ken dadduma pay a resources iti Gospel Library (iti ChurchofJesusChrist.org wenno iti mobile app).

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, September 2023. Language. 19047 864