Panangtulong Kadagiti Napanglaw ken Marigrigatan
Naikumit ti Simbaan ni Jesucristo iti panagserbi kadagiti agkasapulan ken pannakitinnulong iti dadduma iti dayta nga aramid.
Kakabsat, agsaritanto kadatayo ti ay-ayatentayo a Presidente Russell M. Nelson inton madamdama iti daytoy a sesion. Indawatna kaniak a siak ti umuna nga agsarita.
Saritaek ita maipanggep iti ited ken aramiden ti Simbaan ni Jesucristo dagiti Santo iti Ud-udina nga Aldaw ken dagiti miembrona kadagiti napanglaw ken marigrigatan. Saritaek pay ti umasping a panangted ti dadduma a naimbag a tattao. Ti panangted iti agkasapulan ket maysa a prinsipio iti amin a relihion ni Abraham ken iti dadduma pay.
Naglabas ti mano a bulan, inreport ti Simbaan ni Jesucristo dagiti Santo iti Ud-udina nga Aldaw iti umuna a gundaway ti sakup ti aramidtayo a humanitarian iti sangalubongan.1 Ti nabusbostayo idi 2021 kadagiti agkasapulan iti 188 a pagilian iti intero a lubong ket agdagup iti $906 milion—dandani maysa a bilion a doliar. Nagboluntario pay dagiti miembrotayo iti nasurok nga 6 a milion nga oras a panagtrabaho iti dayta met la a panggep.
Siempre, di kompleto a report dagita a bilang maipapan ti panangted ken panangtulongtayo. Dida iraman ti bukod a serbisio dagiti miembrotayo no agministerda iti tunggal maysa kadagiti nayawag a takem ken boluntario a serbisio iti kada miembro. Ket awan ti dakamaten ti reportmi iti 2021 no ania ti aramiden dagiti miembrotayo a saggaysa babaen ti di mabilang a charitable organization a saan a pormal a konektado iti Simbaantayo. Rugiak kadagitoy.
Idi 1831, nakurang a dua a tawen kalpasan a nabuangay ti naisubli a Simbaan, inted ti Apo daytoy a paltiing a mangiwanwan kadagiti miembrona ken, patiek, amin nga annakna, iti sangalubongan:
“Ta adtoy, saan a maikanada nga agbilinak iti amin a banag; ta isu a mapilpilit iti amin a banag, isu met laeng ti, sadut ket saan a masirib a katulongan. …
Pudno kunak, nasken a siaanep a makiraman dagiti tao iti nasayaat nga aramid, ket agaramidda iti adu a banag iti bukodda a pagayatan, ket agipatungpalda iti adu a kinalinteg;
Ta adda kadakuada ti bileg, a nagbalinanda nga agtignay para iti bagbagida. Ket no la ket agaramid dagiti tao iti nasayaat saan a nainkalintegan a mapukawda ti gunggonada.”2
Iti nasurok a 38 a tawen kas Apostol, ken nasurok a 30 a tawen ti propesionko, nakitak ti adu a naparabur nga aramid dagiti organisasion ken tattao a kas iti iladawan daytoy a paltiing a “maysa a nasayaat a panggep” ken “panangyeg iti adu a kinalinteg.” Adda dagiti di mabilang a pagarigan ti kasta a panagserbi iti tao iti intero a lubong, iti labes dagiti bukodtayo a beddeng ken iti labes ti ammotayo. Iti panangutobko iti daytoy, mapanunotko ti propeta ken ari a ni Benjamin ti Libro ni Mormon, nga iti sermonna nairamam daytoy nga agnanayon a kinapudno: “No agserbikayo iti padayo a tao, agserserbikayo laeng iti Diosyo.”3
Adu a serbisio iti welfare ken humanitarian iti padatayo a tattao ti isuro ken ar-aramiden ti Ti Simbaan ni Jesucristo dagiti Santo iti Ud-udina nga Aldaw ken datayo kas miembrona. Kas pagarigan, agayunotayo iti rugi ti kada bulan ken itulongtayo ti gatad ti ditayo nakan a taraon a pangtulong kadagiti agkasapulan iti mismo a kongregasiontayo. Dakkel pay ti maitulong ti Simbaan para iti humanitarian ken dadduma pay a serbisio iti intero a lubong.
Iti baet ti amin nga aramiden ti Simbaantayo, kaaduan a serbisio iti humanitarian kadagiti annak ti Dios iti sangalubongan ket ar-aramiden dagiti tao ken organisasion nga awan ti pormal a koneksionda iti Simbaantayo. Kas napaliiw ti maysa nga Apostoltayo: “Us-usaren ti Dios ti ad-adu ngem maysa a tao iti pannakatungpal ti dakkel ken datdatlag nga aramidna. … Nasakup, ken narigat unay, para iti asino man a tao.”4 Kas miembro ti naisubli a Simbaan, nasken nga ad-adda a mannakaammo ken ad-adda a managyamantayo iti serbisio ti dadduma.
Naikumit ti Simbaan ni Jesucristo iti panagserbi kadagiti agkasapulan ken pannakitinnulong iti dadduma iti dayta nga aramid. Itay nabiit nagaramidkami iti dakkel a sagut iti United Nations World Food Programme. Iti panaglabas dagiti adu a dekada ti panangtulong kadagiti tao, dua a napateg nga organisasion dagiti kangrunaan nga agtunos: dagiti proyeto a kadua dagiti ahensia a Red Cross ken Red Crescent kadagiti nadumaduma a pagilian ket nangipaay kadagiti annak ti Dios iti nasken a tulong kabayatan dagiti didigra ken gubat. Kasta met, adda atiddog a rekordtayo iti tulong iti Catholic Relief Services. Insurodatayo unay dagitoy nga organisasion maipapan ti panagsaranay iti sangalubongan.
Addaantay pay iti nabunga a panagtitinnulong iti dadduma nga organisasion, agraman ti Muslim Aid, Water for People, ken IsraAID, kas panangdakamat iti sumagmamano laeng. Idinto nga adda bukodna a tay-ak ti specialization ti tunggal organisasion a humanitarian, maymaysa ti goal-tayo a mangpagin-awa iti panagsagaba dagiti annak ti Dios. Paset amin daytoy ti plano ti Dios para iti annakna.
Isuro ti moderno a paltiing a ti Mangisalakantayo, a ni Jesucristo, “ti pudno a silaw a manglawag iti tunggal tao nga umay iti lubong.”5 Babaen iti daytoy, malawlawagan amin nga annak ti Dios nga agserbi Kenkuana ken iti tunggal maysa iti kasayaatan a pannakaammo ken kabaelanda.
Isuro ti Libro ni Mormon nga “amin a banag a mangawis ken mangay-ayo nga agaramid iti nasayaat, ken agayat iti Dios, ken agserbi kenkuana, maparegta ti Dios.”6
Panangituloy:
“Ta adtoy, naited ti Espiritu ni Cristo iti tunggal tao, tapno maammuanna ti nasayaat manipud iti dakes; gapuna, iparangko kadakayo ti wagas a mangngeddeng; ta amin a banag a makaawis nga agaramid iti nasayaat, ken mangallukoy iti panamati ken Cristo, maibaon babaen iti pannakabalin ken sagut ni Cristo. …
“Ket ita, kakabsatko, … ammoyo ti silaw a pakaikeddenganyo, a dayta a silaw ti silaw ni Cristo”7.”
Adtoy ti sumagmamano a pagarigan ti annak ti Dios a tumultulong iti dadduma nga annak ti Dios iti kangrunaan a kasapulan, medical care ken panangisuro.
Sangapulo a tawen ti naglabas, dagiti Kandhari, maysa nga agassawa a Sikh idiay United Arab Emirates, ti nangirugi iti napintas nga aramid a mangpakan iti mabisin. Babaen ti templo iti Guru Nanak Darbar Sikh, agdama nga agiserbida iti nasurok a 30,000 a taraon a natnateng iti linawas iti asino man a sumrek iti ridawda, ania man ti relihion wenno pulida. Inlawlawag ni Dr. Kandhari, “Patienmi a maymaysatayo amin; annaknatayo ti maymaysa a Dios, ket addakami ditoy nga agserbi iti sangkataw-an.”8
Ti panangipaay iti medikal ken dental a pannakaaywan iti agkasapulan ti maysa pay a pagarigan. Iti Chicago, naam-ammok ti Syrian-American critical care physician, ni Dr. Zaher Sahloul. Isu ti maysa a nangbangon iti MedGlobal, a mangbukel iti medical professionals nga agboluntario iti panawen, paglaingan, pannakaammo, ken panangidauloda a mangtulong iti dadduma iti krisis, kas iti gubat iti Syria, a nangipeggadan ni Dr. Sahloul ti biagna iti panangtedna iti medikal a pannakaaywan dagiti sibilian. Ipakita ti MedGlobal ken dagiti umasping nga organisasion (agraman ti Latter-day Saint professionals) a tigtignayen ti Dios dagiti propesional ti pammati a mangyeg iti tulong kadagiti napanglaw iti sangalubongan.9
Adu a managparabur nga annak ti Dios ti makiraman iti panangisuro, iti intero pay a lubong. Ti nasayaat a pagarigan, nga ammotayo a babaen iti aramid a humanitarian, ket ti aktibidad ti maysa a tao a maam-ammo a ni Mr. Gabriel, a nagbalin a refugee iti nadumaduma a dangadang iti mano a gundaway Iti nabiit napaliiwna a ginasut a rinibribu nga ubbing a refugee iti East Africa ti agkasapulan iti tulong tapno agtalinaed a sibibiag ti namnamada ken aktibo ti isipda. Binukelna ti dadduma a mannursuro iti populasion dagiti refugee nga inawagan a “tree schools,” a paguummongan dagiti ubbing nga agadal iti linong ti kayo. Dina inuray ti dadduma a mangbukel wenno mangimaton, no di ket indauluanna mismo dagiti aramid a nangipaay iti gundaway a makasursuro ti rinibu nga ubbing iti primaria bayat dagiti makapadanag a tawen ti pannakaidestino.
Siempre, di kayat a sawen a dagitoy tallo a pagarigan nga amin nga imbaga wenno inaramid dagiti organisasion wenno tattao nga agkunkuna a naimbagda wenno makadiosda ket pudno a kasta. Ipakita dagitoy a pagarigan a paregtaen ti Dios ti adu nga organisasion ken tao nga agaramid iti adu a naimbag. Ipakitana pay a ti kaaduan kadatayo ti mangbigbig koma iti naimbag nga inaramid ti dadduma ken mangsuporta no adda panawen ken kuarta a mangaramid iti kasta.
Adtoy ti sumagmamano a pagarigan ti serbisio a suportaran ti Simbaan ken suportaran met dagiti miembrotayo ken dadduma pay a naimbag a tao ken organisasion babaen ti panangted ti tao iti panawen ken kuarta:
Rugiak iti wayawaya iti relihion. Iti panangsuporta nga agserbitayo iti bukodtayo nga interes, kasta met dagiti interes ti dadduma a relihion. Insuro ti umuna a Presidentetayo, ni Joseph Smith, “Itandudomi ti karbengan nga agrukbab iti Mannakabalin a Dios babaen ti panangibagnos ti konsensiami, ken ipalugodmi iti amin a tao ti umasping a karbengan, bay-anmi nga agrukbabda iti wagas no kasano, sadino, ken no ania pay ti mabalinda.”10
Ti dadduma pay a pagarigan ti humanitarian ken dadduma a panagtulong ti naisubli a Simbaan ket boluntario pay a suportaran dagiti miembrotayo ken dagiti nalatak nga eskuelaan, kolehio, ken unibersidadtayo ken dagiti di unay ammo ngem naipablaak itan a dadakkel a donasiontayo para iti pannakagin-awa dagiti agsagsagaba iti pannakadadael ken dislokasion gapu iti didigra kas iti alipugpog ken ginggined.
Adu unay tapno ilista dagiti dadduma a naasian nga aramid dagiti miembrotayo babaen ti boluntario a donasion ken aramidda, ngem ti panangdakamat laeng iti sumagmaman ket mangisingasing iti panagduduma ken pategda: labanan ti rasismo ken dadduma pay a panangidumduma, panangsukisok no kasano a malapdan ken maagasan dagiti sakit, tulongan dagiti baldado, suportaran dagiti organisasion ti musika, ken pasayaaten ti moral ken pisikal nga aglawlaw para iti amin.
Amin nga aramid a humanitarian ti Ti Simbaan ni Jesucristo dagiti Santo iti Ud-udina nga Aldaw ket panagtarigagay a suroten iti pagwadan ti nalinteg a tattao a nailadawan iti Libro ni Mormon: “Ket iti kasta, iti narang-ay a kasasaadda, dida pinapanaw ti asino man a lamulamo, wenno mabisin, wenno mawaw, wenno masakit, … nawaya iti amin, iti nataengan ken ubing, iti adipen ken nawaya, iti lalaki ken babai, iti man ruar ti simbaan wenno iti uneg ti simbaan.”11
Paneknekak ni Jesucristo, nga iturong ti silaw ken Espirituna dagiti amin nga annak ti Dios iti panangtulong kadagiti nakurapay ken agrigrigat iti sangalubongan. Iti nagan ni Jesucristo, amen.