Naimpusuan
Rumbeng nga agbalintayo a pasurot ni Jesus a naragsak ken naimpusuan iti bukodtayo a panagdaliasat iti kinadisipulo.
No dadduma, makatulong a maammuan no ania ti namnamaen.
Idi dandanin maturpos ti ministeriona, imbaga ni Jesus kadagiti Apostolna a dumteng dagiti naririgat a panawen. Ngem kinunana pay, “Kitaenyo a saankayo a mariribukan.”1 Wen, pumanawto, ngem dina baybay-an ida nga agmaymaysa.2 Ibaonna ti Espirituna tapno matulongan ida a manglaglagip, agtalinaed a sititibker ken makasarak iti talna. Tungpalen ti Mangisalakan ti karina a makikadua kadatayo a disipulona, ngem agtultuloytayo a kumita Kenkuana tapno tulongannatayo a mangbigbig ken agragsak iti Kaaddana.
Kanayon a naipasango dagiti disipulo ni Cristo kadagiti naririgat a panawen.
Maysa a gayyemko ti nangted kaniak iti daan nga artikulo manipud iti Nebraska Advertiser, pagiwarnak iti Midwestern Estados Unidos, a napetsaan iti Hulio 9, 1857. Kastoy ti linaonna: “Limmasat ita a bigat ti bunggoy dagiti Mormon bayat ti panagdaliasatda a mapan iti Salt Lake. Guyguyoden dagiti babbai (sigurado a saanda a nakapuy) dagiti kariton a kas ayup, natnag ti maysa [a babai] iti nangisit a pitak a nangpasardeng iti apagbiit iti prosesion, nagna dagiti ubbing a nakakawesda [iti naisangsangayan] ket determinado kas kadagiti innada.”3
Adu ti napanunotko maipapan iti daytoy pitakpitak a babai. Apay nga agmaymaysa nga agguyguyod? Agsolsolo nga ina kadi isuna? Ania ti nangted kenkuana iti pigsa, tured, panagibtur iti kasta unay a nakarit a panagdaliasat iti kapitakan, a guyguyoddenna amin a sanikuana iti kariton a mapan iti di ammo a pagtaengan iti disierto—nga uy-uyawen no dadduma dagiti makakita kadakuada?4
Nagsao ni Presidente Joseph F. Smith maipapan iti makin-uneg a pigsa dagitoy a pioneer a babbai, a kinunana: “Kabaelanyo kadi a pakapsuten ti pammati ti maysa kadagitoy a babbai iti Simbaan ni Jesucristo dagiti Santo iti Ud-udina nga Aldaw? Mapalidemyo kadi ti panunotda no maipapan iti mision ni Propeta Joseph Smith? Maallilawyo kadi ida maipapan iti nadiosan a mision ni Jesucristo, ti Anak ti Dios? Saan, imposible a maaramidyo dayta. Apay? Gapu ta ammoda dayta. Impalgak ti Dios dayta kadakuada, ket naawatanda, ken awan ti pannakabalin ditoy daga a makaallukoy kadakuada a mangtallikud no ania ti ammoda iti dayta a kinapudno.”5
Kakabsat, ti agbalin a kas kadakuada ti kangrunaan a karit iti panawentayo—dagiti disipulo nga agregget iti amin a kabaelanda tapno makasarak iti pigsa no maawaganda a magna iti let-ang, dagiti disipulo nga addaan kadagiti pammati nga impalgak kadatayo ti Dios, dagiti pasurot ni Jesus a narag-o ken naimpusuan iti bukodtayo a panagdaliasat iti kinadisipulo. Kas disipulo ni Jesucristo, patientayo ken agdur-astayo iti tallo a napateg a kinapudno.
Umuna, Matungpaltayo dagiti Katulagantayo, Uray No Narigat
No makarit ti pammatiyo, pamiliayo, wenno ti masakbayanyo—ken no pampanunotenyo no apay a nakarigrigat ti biag uray no ar-aramidenyo ti amin a kabaelanyo nga agbiag iti ebanghelio—laglagipenyo nga imbaga ti Apo kadatayo a namnamaentayonto dagiti riribuk. Paset ti plano dagiti riribuk ken dina kayat a sawen a nabaybay-ankayo; pasetda no ania ti kaipapanan tapno agbalin a kukuana.6 Ta isuna ket, “maysa a tao a naliday, ken naam-ammona ti ladingit.”7
Maad-adalko nga ad-adda nga interesado ti Nailangitan nga Ama iti panagdur-asko kas maysa a disipulo ni Jesucristo ngem iti pannakaliwliwak. Mabalin a diak kayat a kanayon a kasta—ngem talaga a kasta!
Ti panagbiag a nanam-ay dina iyeg ti bileg. Ti bileg ti Apo ket ti bileg a kasapulantayo a sumaranget kadagiti pannubok a mapaspasarantayo, ket agayus ti bilegna babaen kadagiti katulagantayo Kenkuana.8 Ti agsanggir iti pammatitayo no maipasango iti naririgat a karit—ti sipapasnek a panagregget iti inaldaw nga aramiden a naitulagtayo iti Mangisalakan nga aramidentayo, aglalo no nabannog, madanagan, ken marigrigatantayo kadagiti makariribuk a saludsod ken isyu —ket isu ti in-inut a panangawat iti lawagna, pigsana, ayatna, Espirituna, talnana.
Ti umasideg iti Mangisalakan ti rason iti pannagna iti dana ti katulagan. Isuna ti rason, saan a ti naan-anay a a panagdur-astayo. Saan a lumba daytoy, ket nasken a ditay idilig ti panagdaliasattayo iti dadduma. Uray no maitibkoltayo, adda latta Isuna.
Maikadua, Makapagtignaytayo a Buyogen ti Pammati
Kas disipulo ni Jesucristo, maawatantayo a kasapulan iti tignay dayta a pammati Kenkuana—aglalao kadagiti naririgat a panawen.9
Adun a tawen ti napalabas, inkeddeng ti dadakkelko nga alpombraen manen ti balay. Iti rabii sakbay a simmangpet ti baro nga alpombra, kiniddaw ni nanangko kadagiti kabsatko nga ikkatenda dagiti muebles tapno maiplastar ti baro nga alpombra. Nakaturog idin ti pito ti tawenna a kabsatko a ni Emily. Gapuna, bayat a nakaturog, siuulimek nga inikkatda amin a muebles iti kuartona, malaksid iti kama, sada pinigis ti alpombra. Ngarud, kas iti dadduma nga in-inauna a kakabsat, inkeddengda ti mangloko. Inikkatda dagiti nabati a gargaretna iti aparador ken iti diding, imbatida a nawaknitan ti siled. Kalpasanna, nagsuratda ket impanda iti diding: “Patgenmi nga Emily, immakarkami. Agsuratkamto kalpasan iti sumagmamano nga aldaw ket ibagaminto no sadino ti ayanmi. Mangipatpateg, ti pamiliam.”
Kabigatanna di immay ni Emily iti pamigat, napan kinita dagiti kabsatko—adda idiay isuna, naliday ken agmaymaysa iti likud ti nakarikep a ridaw. Pinanunot ni Emily daytoy a padas idi agangay: “Nagsakit ti nakemko. Ngem ania ngata ti napasamak no linukatak ti ridaw? Ania ngata ti nangngegko? Ania ngata ti naangotko? Naammuak koma a diak agmaymaysa. Naammuak koma a talaga a madungdungngoak. Saanko pulos napanunot dayta nga aramiden iti dayta a kasasaadko. Simmukoak ket nagtalinaedak iti kwartok nga agsangsangit. Ket no koma lang ngarud linuktak ti ridaw.”10
Dayta ti impagarup ni adingko kas naibatay iti nakitana, ngem saan a dayta ti iparangarang iti kinapudno. No an-anagen, datayo, kas ken Emily, kasla malapunostayo iti liday, panagdanag, wenno panagpungtot wenno pannakaupay ta saantayo payen a mapanunot nga agaramid iti maysa a banag, kas iti manglukat iti ruangan, agtignay a buyogen ti pammati ken Jesucristo?
Napno dagiti nasantuan a kasurtan kadagiti pagarigan dagiti lalaki ken babai, dagiti disipulo ni Cristo, a nagtignay no maipasangoda kadagiti impossible— nagtignay a buyogen ti pammati.11
Ti agkukutel a mangayat a maagasan, kinuna ni Cristo: “Inkayo agpakita iti papadi. Ket napasamak, a, bayat iti papanda, nadalusanda.”12
Napanda tapno agpakita kadagiti padi a kasla napaimbagdan, ket bayat iti panagtignayda iti pammati, naagasandan.
Kayatko pay nga ibaga a no panunotenyo nga imposible ti agtignay bayat ti panagrigat, dumawatkayo koma iti tulong iti dadduma—iti gayyem, miembro ti pamilia, lider ti Simbaan, iti maysa a propesional. Daytoy ti mabalin nga umuna nga addang iti panangnamnama.
Maikatlo, Mabalin nga Naimpusuan ken Naragsaktayo iti Debosiontayo.13
No dumteng dagiti narigat a panawen, padasek a lagipen a pinilik ti sumurot ken Cristo sakbay nga immayak ditoy daga ket dagiti karit iti pammatik, salun-atko, ken panagibturko, paset amin iti rason nga addaak ditoy. Ket saanko pulos panunoten a ti pannubok ita ket mamagduadua iti panagayat ti Dios kaniak wenno agbalin a panagduadua ti pammatik Kenkuana. Saan a kayat a sawen a mapaay dagiti pannubok ti plano; pasetda ti plano a nairanta a mangtulong kaniak a sapulen ti Dios. Ad-adda nga agbalinak a kas Kenkuana no agibturak a siaanus ken mangnamnama, kas Kenkuana, no agsagabaak, ad-adda a sipapasnek ti panagkararagko.14
Ni Jesucristo ti naan-anay a pagwadan iti panangipateg iti Amatayo iti amin a pusona—ti panangaramid iti pagayatanna, aniaman ti mapasamak.15 Surotek ti pagwadanna babaen ti panangaramidko iti kasta met laeng.
Naparegtaak iti naimpusuan, iti naimpusuan a kinadisipulo ti balo a babai a nangipuruak iti dua a blankas iti pagidulinan iti gameng ti templo. Intedna ti isu amin nga adda kenkuana.16
Nabigbig ni Jesucristo ti kinawadwadna ngem ti pagkuranganna ti nakita laeng ti dadduma. Kasta met iti tunggal maysa kadatayo. Dina kitaen ti pagkurangantayo kas pannakapaay no di ket kas gundaway a panangipakita iti pammati ken panagdur-as.
Panangigibus
Dagiti padak a disipulo ni Jesucristo, iti amin a pusok, piliek ti makipagtakder iti Apo. Piliek ti makipagtakder kadagiti napili a katulonganna—ni Presidente Russell M. Nelson ken dagiti padana nga Apostol—ta agsaoda para Kenkuana ken isuda dagiti mangimatmaton kadagiti ordinansa ken katulagan a mangibegkes kaniak iti Mangisalakan.
No maitibkolak, bumangonnak latta, nga agpannuray iti parabur ken ti makabael a pannakabalin ni Jesucristo. Agtalinaedakto iti katulagak Kenkuana ken risutek dagiti saludsodko babaen ti panagadal iti sao ti Dios, babaen ti pammati, ken tulong ti Espiritu Santo, a pagtalkak ti panangiwanwanna. Sapulekto ti Espirituna iti inaldaw babaen ti panangaramidko kadagiti babassit ken simple a bambanag.
Daytoy ti danak iti kinadisipulo.
Ket agingga iti aldaw a maagasan dagiti inaldaw a sugat ti mortalidad, urayekto ti Apo ket agtalekak Kenkuana—iti panawenna, iti kinasiribna, iti planona.17
Makibinnuligak kadakayo, kayatko ti makipagtakder Kenkuana iti agnanayon. A naimpusuan. Ammotayo a no ayatentayo ni Jesucristo iti amin a pusotayo, itedna kadatayo amin ti kasukatna.18 Iti nagan ni Jesucristo, amen.