Sapasap a Komperensia
Ket Nagsapulda a Mangkita No Asino ni Jesus
Oktubre 2022 sapasap a komperensia
10:29

Ket Nagsapulda a Mangkita No Asino ni Jesus

Ni Elder James W. McConkie III

Ti Pitupulo

Paneknekak a sibibiag ni Jesus, am-ammonatayo, ken adda bilegna a mangagas, mangbalbaliw, ken mamakawan.

Kakabsat ken gagayyem, idi 2013 naawagankami iti asawak, ni Laurel nga agserbi kas lider ti mision iti Czech/ Slovak Mission. Nakipagserbi kadakami ti uppat nga annakmi.1 Naparaburankami kas pamilia iti nalalaing a misionario ken babaen dagiti nakaskasdaaw a Santo iti Czech ken Slovak. Patpatgenmi ida.

Iti iseserrek ti pamiliami iti tay-ak ti mision, naikuyogmi ti maysa a banag nga insuro ni Elder Joseph B. Wirthlin. Iti bitla a napauluan iti “Ti Dakkel a Bilin” dinamag ni Elder Wirthlin, “Patpatgem kadi ti Apo?” Ti balakadna kadatayo a sumungbat iti wen ket simple ken nauneg: “Bubosem ti orasmo Kenkuana. Utobem dagiti balikasna. Alaem ti sangolna kenka. Ikarigatam a maawatan ken agtungpalka.”2 Sa inkari ni Elder Wirthlin dagiti mangbalbaliw a bendision kadagiti naayat a mangted iti oras ken lugar ken ni Jesucristo.3

Impapusomi ti balakad ken kari ni Elder Wirthlin. Kaduami dagiti misionariomi, binubosmi ti napaatiddog nga oras ken Jesus nga agad-adal kada Mateo, Marcos, Lucas, ken Juan manipud iti Baro a Tulag ken 3 Nephi manipud iti Libro ni Mormon. Iti gibus ti tunggal zone conference, leadership council, wenno miting ti distrito, agsublikami iti dinakamatmi a “Lima nga Ebanghelio,”4 panagbasa, panaglilinnawag, panangusig, ken panagsursuro maipapan ken Jesus.

Para kadakami ken Laurel, ken kadagiti misionariomi, ti panangbubos iti oras ken Jesus iti nasantuan a kasuratan ti namagbalbaliw iti amin. Naun-uneg a panangipategmi iti kinasiasinona ken no ania ti napateg Kenkuana. Imbilangmi no kasano a nangisuro, ania ti insurona, dagiti wagas a nangipakitaanna iti ayat, ania ti inaramidna a mangbendision ken agserbi, dagiti milagrona, kasano a sinungbatanna ti panangliput, ania ti inaramidna iti narikut a rikna, dagiti pangawag ken naganna, kasano a dimngeg, kasano a rinisutna ti supiat, ti lubong a nagnaedanna, dagiti pangngarigna, kasano a pinaregtana ti kaykaysa ken kinaimbag, ti kabaelanna a mamakawan ken mangagas, dagiti sermonna, kararagna, pangsubbot a sakripisiona, Panagungarna, ti ebangheliona.

Masansan a nariknami a kas “[ababa] ti katayagna” a Zaqueo nga agtartaray a sumang-at iti kayo a sikamoro idi lumabas ni Jesus iti Jerico gapu ta, kas inladawan ni Lucas, “sinapulmi a mangkita ken ni Jesus iti kinasiasinona.”5 Saan a ni Jesus kas tinarigagayanmi a pagbalinanna, no di ket ni Jesus kas iti pudno a kinasiasinona.6 Kas iti inkari ni Elder Wirthlin, naadalmi iti pudno unay a wagas a “ti ebanghelio ni Jesucristo ti ebanghelio ti panagbalbaliw. Balbaliwan ken muliennatayo nga agbalin a lallaki ken babbai para iti kinaagnanayon.”7

Dagita ti espesial nga aldaw. Namatikami nga “iti Dios awanto ti imposible.”8 Dagiti lagip ti sagrado a malem idiay Prague, Bratislava, wenno Brno, a mangpadpadas iti bileg ken kinapudno ni Jesus, agtultuloy a mangaring iti biagtayo.

Masansan nga inadalmi ti Marcos 2:1–12. Makaawis rikna ti estoria. Basaek ti pasetna iti Marcos ket ibinglayko ti naawatak kalpasan ti napasnek a panagadal ken panaglilinnawag kadagiti misionariomi ken dadduma pay.9

“Ket simrek manen [ni Jesus] idiay Capernaum kalpasan ti mano nga aldaw; ket nagariwawa nga adda iti balay.

“Ket dagus nga adu ti naguummong, iti kasta awan ti siled a mangawat kadakuada, saan, uray pay iti lawlaw ti ridaw: ket kinasabaanna ida iti balikas.

“Ket immayda kenkuana, nga inyegda ti maysa nga agsakit iti palsy, nga addaan iti uppat.

“Ket idi dida makaasideg kenkuana para iti press, inikkatda ti atep a batog ti masakit a lalaki: ket idi naikkatda daytoy, imbabada ti katre a nagiddaan ti tao nga agsakit iti palsy.

“Idi makita ni Jesus ti pammatida, kinunana iti tao nga agsakit iti palsy, Anak, napakawankan iti basbasolmo.”

Kalpasan ti pannakisinnukatna iti ummong,10 kinita ni Jesus ti tao nga agsakit iti palsy ket agasanna daytoy, a kunkunana:

“Kunak kenka, Bumangonka, ket bagkatem ti pagiddaam, ket sumrekka iti balaymo.

“Ket dagus a timmakder, binagkatna ti pagiddaan, ket rimmuar iti sanguananda amin; iti kasta nasdaawda amin, ket indaydayawda ti Dios, a kunkunada, Saanmi a pulos nakita daytoy iti kastoy a wagas.”11

ita daytoy ti estoria a naawatak: Iti nasapa a panagministrona, nagsubli ni Jesus idiay Capernaum, bassit a purok a pagkalapan a masarakan iti amianan nga igid ti Baybay ti Galilea.12 Nabiit pay nga inaramidna ti agsasaruno a milagro babaen ti panangagasna iti masakit ken panangpaksiatna iti dakes nga espiritu.13 Gapu iti danagda a mangngegan iti tao nga agnagan Jesus, naguummong dagiti pumurok iti balay a naipadamag a pagyananna.14 Idi aramidenda, rinugian ni Jesus ti nangisuro.15

Patad ti atepna, maysa ti kadsaaranna, naragupragup dagiti balay iti dayta a tiempo idiay Capernaum.16 Naglaok a bato, troso, damili, ken garami ti atep ken diding, a madanon babaen ti maysa nga asmang dagiti simple nga addang iti sikigan ti balay.17 Nadaras nga immadu ti ummong iti balay, a nangpunno iti siled a pangisuruan ni Jesus, ket nagwarasda iti kalsada.18

Naipamaysa ti estoria iti lalaki nga “agsakit iti palsy” ken ti uppat a gagayyemna.19 Palsy ti maysa a kita ti paralisis, masansan a buyogan ti kapuy ken pigerger.20 Panunotek ti maysa iti uppat a mangibagbaga iti dadduma, “Adda ni Jesus iti purokmi. Ammotayo amin dagiti milagro nga inaramidna ken dagiti inagasanna. No maipantayo laeng ti gayyemtayo ken Jesus, nalabit maagasanna met.”

Ngarud saggaysada a nangiggem iti suli ti ikamen nga idda ti gayyemda ket rinugianda a bagkaten nga iballasiw iti nakillo, akikid, di sementado a kalsada ti Capernaum.21 Agsakit ken nabannog dagiti takiag ken sakada, nagturong ti uppat iti maudi a suli tapno laeng makitada a dakkel ti bunggoy wenno, awagan ti nasantuan a kasuratan iti “press” dagiti naguummong a tao a dumngeg isu nga imposible a makaasidegda ken Jesus.22 Addaan iti ayat ken pammati, saan a sumuko ti uppat. Ketdi, nagdardarasda nga agpangato iti agdan nga agturong iti patad nga atep, siaannad nga ipangatoda ti gayyemda ken ti pagiddaanna, abutanda ti atep ti siled a pangisursuruan ni Jesus, ket ibabada ti gayyemda.23

Panunoten nga iti baet ti napasnek a kanito ti panangisuro, mangngeg ni Jesus ti karasakas, tumangad, ket makitana ti dumakdakkel nga abut iti bobeda ken panagtinnag ti tapok ken garami iti siled. Maipababa ti paralisado a nakaidda a lalaki iti suelo. Nakaskasdaaw ta ammo ni Jesus a saan a panangsinga daytoy ngem maysa a banag a napateg. Kitaenna ti lalaki a nakaidda, pakawanenna dagiti basolna, ket namilagruan nga agasanna ti sakitna.24

Iti panangpanunot iti Marcos 2 , nagbalin a nalawag dagiti napapateg a kinapudno maipapan ken Jesus kas Cristo. Umuna, no tulongantayo ti maysa a patpatgentayo nga umay ken Cristo, maaramidtayo nga addaan panagtalek a kabaelanna nga itag-ay ti dagsen ti basol ken mamakawan. Maikadua, no yegtayo dagiti sakit ti bagi, panunot, ken dadduma pay a sakit ken Cristo, maaramidtayo nga ammotayo nga adda bilegna a mangagas ken mangliwliwa. Maikatlo, no agkagumaantayo a kas iti uppat a mangyeg iti dadduma ken Cristo, maaramidtayo a sigurado a makitana dagiti pudno a panggeptayo ken maitutop a dayawenna ida.

Laglagipen a nasinga ti panangisuro ni Jesus gapu iti nakita nga abut iti atep. Imbes a dusaen wenno papanawenna ti uppat iti panangsingada, ibaga kadatayo ti nasantuan a kasuratan a “ni Jesus nakitana ti pammatida.”25 Dagiti nakasaksi iti milagro ket “nagsiddaawda, ken indaydayawda ti Dios, a nangted iti kasta a bileg [iti] tattao.”26

Kakabsat, bay-andak a gibusak iti dua a nayon a pammaliiw. Kas misionario, ministro, presidente ti Relief Society, bishop, mannursuro, nagannak, kakabsat, wenno gagayyem, makiramramantayo amin kas disipulo a Santo iti Ud-udina nga Aldaw iti aramid a panangyasideg iti dadduma ken Cristo. Ngarud, maitutop nga ibilang ken tuladen dagiti kababalin nga impakita ti uppat a gagayyem.27 Isuda ti natured, mannakibagay, naandur, managpartuat, masirib, mangnamnama, determinado, napudno, matalek, napakumbaba, ken managibtur.

Mainayon pay, ipaganetget ti uppat a gagayyem ti naespirituan a pateg ti komunidad ken sinninged.28 Tapno mayegda ti gayyemda ken Cristo, nasken a bagkaten ti tunggal maysa ti sulida. No umibbet ti maysa, narigrigat dagiti banag. No umibbet ti dua, imposible a maaramid ti trabaho. Adda akem ti tunggal maysa kadatayo iti pagarian ti Dios.29 No awatentayo dayta nga akem, ken aramiden ti pasettayo, bagkatentayo ti sulitayo. Idiay man Argentina wenno Vietnam, Accra wenno Brisbane, sanga wenno ward, pamilia wenno panagkadua kas misionario, addaantayo iti suli a bagkaten. No aramidentayo, bendisionannatayo amin ti Apo. Idi nakitana ti pammatida, makitananto met ti pammatitayo ken bendisionannatayo kas tao.

Iti agduduma a gundaway, binagkatko ti suli ti maysa a kama, ken iti sabali a gundaway siak ti nabagkat. Paset ti bileg daytoy naisangsangayan nga estoria ni Jesus ti mangipalagip kadatayo a kasapulantayo unay ti tunggal maysa kas agkakabsat, tapno umay ken Cristo ken agbalbaliwtayo.

Dagitoy ti mano a banag a nasursurok iti panangbubosko iti orasko ken Jesus iti Marcos 2.

“Sapay koma ta patgan ti Dios a kabaelantayo a [bagkaten ti sulitayo], a ditay mangliklik, a ditay agbuteng, ngem mapapigsatayo iti pammatitayo, ken determinado iti aramidtayo, a mangipatungpal kadagiti panggep ti Apo.”30

Paneknekak a sibibiag ni Jesus, am-ammonatayo, ken adda bilegna a mangagas, mangbalbaliw, ken mamakawan. Iti nagan ni Jesucristo, amen.

Dagiti Nagadawan

  1. Evie, Wilson, Hyrum, ken George.

  2. Joseph B. Wirthlin, “The Great Commandment,” Liahona, Nob. 2007, 30.

  3. Dagiti bendision a nailasin ni Elder Wirthlin iramanna ti immadu a kabaelan para iti ayat, kinatulok nga agbalin a natulnog ken makasungbat kadagiti bilin ti Dios, tarigagay nga agserbi kadagiti dadduma, ken disposision nga agtultuloy nga agaramid iti naimbag.

  4. “Dagiti Ebanghelio … ket uppat a daras a presentasion iti sidong ti nagan ti uppat a nagduduma nga ebanghelista wenno mannurat iti Ebanghelio maipapan iti biag ken pannursuro ni Jesus, ken ti panagsagaba, ipapatay ken panagungarna” (Anders Bergquist, “The Bible: The New Testament,” iti John Bowden, ed., Encyclopedia of Christianity [2005], 141). Inayon ti Bible Dictionary a “ti balikas nga ebanghelio kayatna a sawen ti ‘naimbag a damag.’ Ti naimbag a damag ket inaramid ni Jesucristo ti naan-anay a pannubbot para iti sangkataw-an a mangsubbot iti amin a sangkataw-an. … Dagiti kasuratan ti mortal a biagna ken dagiti pasamak a mainaig iti panagministrona maawagan iti Dagiiti Ebanghelio” (Bible Dictionary, “Gospels”). Ti 3 Nephi, nga insurat ni Nephi, ti apoko ni Helaman, naglaon iti kasuratan ti panagparang ken pannursuro ni nagungar a Jesucristo kadagiti America kalpasan laeng ti Pannakailansana iti Krus ket, ngarud, mabalin met a maawagan a kas maysa nga “Ebanghelio.” Dagiti Ebanghelio ket nangnangruna a makapilit gapu ta isuratda dagiti pasamak ken kasasaad nga aktibo a mangisuro ken makipaset ni Jesus Mismo. Dagitoy ti kritikal a pangrugian para iti pannakaawat ken ni Jesus a kas Cristo, ti relasiontayo Kenkuana, ken ti ebangheliona.

  5. Kitaen iti Lucas 19:1–4; kitaen met iti Jacob 4:13 (a mangilawlawag a ti Espiritu “agsao maipapan kadagiti banag a kas iti kasasaadda ita, ken kadagiti banag a kas iti pagbalinandanto”) ken Doktrina ken Katulagan 93:24 (mangilawlawag iti kaipapanan ti kinapudno kas “pannakaammo kadagiti banag a kas iti kasasaadda ita, ken kasasaadda idi, ken iti kasasaadda iti masakbayan”).

  6. Kasta met a pinaregta ni President J. Reuben Clark ti panagadal iti “biag ti Mangisalakan kas maysa nga aktual a personalidad.” Inawisna dagiti dadduma nga adda kadagiti pakaammuan iti nasantuan a kasuratan maipapan iti biag ni Jesucristo, tapno padasenda ken “kumuyog iti Mangisalakan, makipagnaed kenkuana, bay-an nga isu ti agbalin nga aktual a tao, kagudua a nadiosan, siempre, ngem nupay kasta aggargaraw a kas iti panaggaraw ti maysa a tao kadagita nga aldaw.” Inkarina pay a ti kasta a panagkagumaan “mangtedto kenka iti kasta a pannirigan kenkuana, ti kasta a kinasinged kenkuana a kas iti panagkunak a magun-odmo iti awan sabali pay a wagas. … Ammuem no ania ti inaramidna, no ania ti napanunotna, no ania ti insurona. Aramiden kas iti inaramidna Agbiag a kas iti panagbiagna, agingga a kabaelantayo. Isu ti perpekto a tao” (Behold the Lamb of God [1962], 8,11). Para iti pannakaawat maipapan iti pateg ken rason iti panangadal ken ni Jesus iti konteksto ti pakasaritaan, kitaen iti N. T. Wright and Michael F. Bird, The New Testament in Its World (2019), 172–87.

  7. Joseph B. Wirthlin, “The Great Commandment,” 30.

  8. Lucas 1:37.

  9. Kas nayon iti masansan ken napaatiddog a panaglilinnawag iti Marcos 2:1–12 kadagiti misionario ti Czech/Slovak Mission, agyamanak pay kadagiti nasursurok a leksion a mangibilang iti daytoy a teksto kadagiti agtutubo a lallaki ken babbai ti klase ti panagsagana ti misionario iti Salt Lake Highland Stake ken dagiti lider ken miembro ti Salt Lake Pioneer YSA Stake.

  10. Kitaen iti Marcos 2:6–10.

  11. Marcos 2:11–12.

  12. Kitaen iti Bruce M. Metzger and Michael D. Coogan, eds., The Oxford Companion to the Bible (1993), 104; James Martin, Jesus: A Pilgrimage (2014), 183–84.

  13. Kitaen iti Marcos 1:21–45.

  14. Kitaen iti Marcos 2:1–2.

  15. Kitaen iti Marcos 2:2.

  16. Kitaen iti Metzger and Coogan, The Oxford Companion to the Bible, 104; William Barclay, The Gospel of Mark (2001), 53.

  17. Kitaen iti Barclay, The Gospel of Mark, 53; kitaen met iti Martin, Jesus: A Pilgrimage, 184.

  18. Kitaen iti Marcos 2:2, 4; kitaen met iti Barclay, The Gospel of Mark, 52–53. Ilawlawag ni Barclay a “ammo unay ti kaaduan ti biag idiay Palestina. Iti bigat naluktan ti ridaw ti balay ket mabalin a rummuar ken sumrek ti asino man nga agtarigagay. Saan a pulos a naiserra ti ridaw malaksid no adda inggagara a mangtarigagay iti kinapribado; ti silulukat a ridaw kaipapananna ti silulukat nga awis a sumrek ti amin. Kadagiti napakumbaba a pagtaengan a kas [iti adda iti maysa a nabigbig iti Marcos 2] sigurado a kasta, awan ti pagserkan; direkta a naglukat ti ridaw … iti kalsada. Isu nga iti saan a nagbayag, adda bunggoy a nangpunno iti balay agingga iti kapasidadna ket inserrada ti sementado a pagdalanan iti aglawlaw ti ridaw; ket sigagagarda amin a dimngeg iti nasken nga isao ni Jesus.”

  19. Marcos 2:3.

  20. Kitaen iti Medical Dictionary of Health Terms, “palsy,” health.harvard.edu.

  21. Kitaen iti Martin, Jesus: A Pilgrimage, 183–84.

  22. Marcos 2:4.

  23. Kitaen iti Marcos 2:4; kitaen met iti Julie M. Smith, The Gospel according to Mark (2018), 155–71.

  24. Kitaen iti Marcos 2:5–12.

  25. Marcos 2:5; nainayon ti panangyunay-unay.

  26. Mateo 9:8; kitaen met iti Marcos 2:12; Lucas 5:26.

  27. Doktrina ken Katulagan 62:3 ilawlawagna a dagiti katulongan ti Apo, “nagasat, ta naisurat iti langit ti imburayyo a pammaneknek … ket napakawankayon kadagiti basolyo.”

  28. Kitaen iti M. Russell Ballard, “Hope in Christ,” Liahona, Mayo 2021, 55–56. Kuna ni Presidente Ballard a napateg ti “pannakarikna iti pannakaibilang” agpadpada iti pisikal ken naespirituan a salun-at, ket mapaliiwna a “tunggal miembro kadagiti korum, organisasion, ward, ken staketayo addaan kadagiti sagut ken talento nga inted ti Dios a makatulong a mangbangon iti pagarianna ita.” Kitaen met iti David F. Holland, Moroni: A Brief Theological Introduction (2020), 61–65. Ilawlawag ni Holland ti Moroni 6 ken dagiti wagas a makatulong ti pannakipaset ken panagkakadua iti maysa a komunidad ti pammati a mangpasayaat iti kita ti personal a naespirituan a padas a mangibegkes kadatayo a nasingsinged iti Langit.

  29. Kitaen iti Dieter F. Uchtdorf, “Lift Where You Stand,” Liahona, Nob. 2008, 56. Ilawlawag ni Elder Uchtdorf nga “awan kadatayo ti makabael wenno nasken a mangtignay iti aramid ti Apo nga agmaymaysa. Ngem no agtakdertayo amin a nasinged iti lugar nga intuding ti Apo ken itag-ayna a pagtaktakderantayo, awan ti makalapped iti daytoy a nadiosan nga aramid iti panagpangato ken panagpasangona.” Kitaen met iti Hong Chi (Sam) Wong, “Rescue in Unity,” Liahona, Nob. 2014, 15. Agibasar ni Elder Wong iti Marcos 2:1–5 ken isurona a “tapno matulongantayo ti Mangisalakan, nasken nga agtitinnulongtayo iti panagkaykaysa ken panagtutunos. Napateg ti tunggal maysa, tunggal posision, ken tunggal takem wenno calling.”

  30. Oscar W. McConkie, iti Conference Report, Okt. 1952, 57.