Sapasap a Komperensia
Tured a Mangipakdaar iti Kinapudno
Oktubre 2022 sapasap a komperensia
11:26

Tured a Mangipakdaar iti Kinapudno

Ni Elder Denelson Silva

Ti Pitupulo

Apaman a maadaltayo ti kinapudno, ikkannatayo ti Apo iti gundaway a mangaramid no ania ti aramidenna no adda ditoy ita.

Idi 1982, lepleppasek ti associate digrik iti topography iti maysa a technical school.

Iti ngudo ti tawen, inawisnak ti maysa a kaklasek tapno agsaritakami. Malagipko a pinanawanmi ti dadduma a miembro ti klase ket napankami iti lugar iti abay ti sports court. Idi nakadanonkami sadiay, kinasaritanak maipapan kadagiti narelihiosuan a pammatina, ket dina laeng impakita kaniak ti maysa a libro, no di ket intedna pay ti libro kaniak. Kinapudnona, diak malagip amin dagiti balikas nga insaona, ngem malagipko unay dayta a kanito ken ti nariknak idi kinunana, “Kayatko nga ipaneknek kenka a pudno daytoy a libro, ken naisublin ti ebanghelio ni Jesucristo.”

Kalpasan ti panagsaritami, nagawidak, linukibko ti sumagmamano a panid ti libro, sa inkabilko daytoy iti estante. Gapu ta addakami iti ngudo ti tawen, ket dayta ti maudi a tawen iti digrik iti topography, diak talaga unay inkaso ti libro, wenno ti kaklasek a nangted kaniak iti daytoy. Mabalinyon a pugtuan ti nagan ti libro. Wen, daytoy ti Libro ni Mormon.

Kalpasan ti lima a bulan, immay dagiti misionario iti balayko; pumampanawdan idi sumangpetak manipud iti trabahok. Inawisko ida nga agsubli. Nagtugawkami iti bassit a patio iti sango ti balayko, ket sinuruandak.

Iti panagbirokko iti kinapudno, dinamagko kadakuada no ania a simbaan ti pudno ken kasano a masarakak daytoy. Insuro kaniak dagiti misionario a magun-odko dayta a sungbat para iti bagik. Addaanak iti dakkel a namnama ken tarigagay, inawatko ngarud ti karitda a mangbasa iti sumagmamano a kapitulo iti Libro ni Mormon. Nagkararagak a naimpusuan ken addaan iti pudno a panggep (kitaen iti Moroni 10:4–5). Nalawag ti sungbat iti saludsodko, ket mano nga aldaw kalpasanna—idi Mayo 1, 1983—nabuniagan ken nakumpirmaanak a miembro ti Ti Simbaan ni Jesucristo dagiti Santo iti Ud-udina nga Aldaw.

Ita, no panunotek ti panagsasaruno dagiti pasamak, nabatad a makitak no kasano ti pateg ti tured ti kaklasek idi nagpaneknek maipapan iti naisubli a kinapudno ket indatagna kaniak nga addaan pudno a pakakitaan ti Pannakaisubli ti ebanghelio ni Jesucristo, kas ti Libro ni Mormon. Dayta simple nga aramid, ngem aramid a nauneg ti kaipapananna kaniak, ti nangbuangay iti koneksionko kadagiti misionario idi maam-ammok ida.

Naidatag ti kinapudno kaniak, ken kalpasan ti panagbuniagko, nagbalinak a disipulo ni Jesucristo. Kadagiti simmaganad a tawen, ken iti tulong dagiti naisangsangayan a tattao kas kadagiti lider, mannursuro, gagayyem, ken babaen pay iti bukodko a panagadal, nasursurok nga idi inkeddengko ti agbalin a disipulo ni Jesucristo, inawatkon ti aramid a di laeng mangidepensa iti kinapudno, ngem mangipakdaar pay iti daytoy.

No umanamongtayo a mamati iti kinapudno ken suroten daytoy, ken no ikagumaantayo nga agbalin a pudno a disipulo ni Jesucristo, ditayo umawat iti sertipiko nga addaan pammasingked a ditayto agbiddut, a ditayto masulisog nga umadayo iti kinapudno, a ditayto madillaw, wenno ditayto mapasaran dagiti rigat. Ngem ti pannakaammo iti kinapudno ti mangisuro a no sumrektayo iti nailet ken akikid a dalan a mangisubli kadatayo iti sidong ti Nailangitan nga Ama, kanayonto latta nga adda wagas a paglisian kadagitoy a parikut (kitaen iti 1 Taga Corinto 10:13); kanayonto latta nga adda posibilidad a pagduaduaan dagiti duaduatayo sakbay a pagduaduaan ti pammatitayo (kitaen iti Dieter F. Uchtdorf, “Come, Join with Us,” Liahona, Nob. 2013, 21); ket kamaudiananna, maipanamnama kadatayo a ditayto agmaymaysa no lumasattayo iti rigat, ta sarungkaran ti Dios dagiti taona iti panawen dagiti panagsagabada (kitaen iti Mosiah 24:14

Apaman a maadaltayo ti kinapudno, ikkannatayo ti Apo iti gundaway a mangaramid no ania ti aramidenna no adda ditoy ita. Pudno, impakitana kadatayo dagiti pannursurona no ania ti masapul nga aramidentayo: “Mapankayo babaen ti bileg ti Espirituk, a mangikasaba iti ebangheliok, a sagdudua, babaen ti naganko, nga ingatoyo ti timekyo a kas iti aweng ti trumpeta, a mangipakdaar iti balikasko a kas kadagiti anghel ti Dios” (Doktrina ken Katulagan 42:6). Naidumduma ti gundaway a panagserbi iti mision dagiti agtutubotayo!

Pangngaasiyo, babbarito, dikay itantan ti panagsaganayo nga agserbi iti Apo kas misionario. No maipasangokayo kadagiti situasion a narigat ti mangikeddeng no mapankayo agserbi iti mision—kas iti panangisardeng iti panagadalyo, panagpakada iti nobiayo nga awan ti aniaman a pammatalged a makisinnarakkayto manen kenkuana, wenno nasken nga agikkatkayo iti napintas a trabaho— laglagipenyo ti pagwadan ti Mangisalakan. Bayat ti panagministrona, naipasango met Isuna iti rigat, agraman ti pammabalaw, pannakaidadanes, ken kangrunaanna ti napait a kopa ti pangsubbot a sakripisiona. Ngem iti amin a kasasaad tinungpalna ti pagayatan ti Amana ken dinaydayawna Isuna. (Kitaen iti Juan 5:30; 6:38–39; 3 Nephi 11:11; Doktrina ken Katulagan 19:18–19.)

Babbalasitang, awisendakayo, no tarigagayanyo ti agserbi iti bangkag ti Apo, ket bayat ti panangisaganayo iti bagbagiyo nga agserbi kas full-time a misionario, saankayto a mailaksid kadagiti isu met laeng a karit.

Kadagiti amin a mangikeddeng nga agserbi Kenkuana, ikarik kadakayo a lumabasto ti 24 wenno 18 a bulan a panagserbi iti mision a kas met laeng iti panaglabasda no addakayo iti balayyo, ngem naidumduma dagiti gundaway nga agur-uray kadagiti maikari nga agtutubo a lallaki ken babbai iti daytoy a Simbaan iti tay-ak ti mision. Di mabalin a di ikankano ti pribilehio a mangibagi iti Mangisalakan a ni Jesucristo ken iti Simbaanna. Di mailadawan a padpadas dagiti pannakipaset iti adu a kararag, mamin-adu a daras a panagpaneknek iti aldaw, panangadal iti nasantuan a kasuratan iti adu nga oras, ken pannakilangen kadagiti tao no nagtalinaedkayo iti balayyo. Mailatang ti isu met la a lebel ti padas para kadagiti agtutubo nga awagan ti Apo tapno agserbi kadagiti service mission. Awisendakayo ken kasapulandakayo. Diyo koma pabassiten ti kinapateg ti maysa a service mission, ta mangipaay pay dagiti service mission iti di mailadawan a padpadas. “Napateg dagiti kararua iti imatang ti Dios,” (Doktrina ken Katulagan 18:10), agraman ti pateg ti kararuayo.

Iti panagsubliyo manipud iti serbisioyo, nalabit a saanen nga agur-uray kadakayo ti nobio wenno nobiayo, ngem maadalyonto iti nasamsamay a wagas ti pannakisarita. Ad-adunto ti kaipapanan ti panagadalyo gapu iti panagserbiyo a kas misionario ken mangtulongto kadakayo nga agsagana para iti maysa a pagtrabahuan, ken kamaudiananna, maaddaankayto iti naan-anay a kasiguraduan a situtured a nangiwaragawag iti ebanghelio ti kappia, a mangpampaneknek iti naisubli a kinapudno.

Para kadakayo a naasawaan ken adda iti agduduma a tukad iti biag, kasapulandakayo unay iti trabaho ti Apo. Isaganayo ti bagbagiyo. Agbiagkayo a nasalun-at, a mangsapsapul iti temporal ken naespirituan a panagpannuray iti bagi, gapu ta dagiti gundaway a mangaramid iti aramiden koma ti Apo para kadagiti annakna ket saan a limitado iti maysa a ragup ti edad. Dimteng dagiti karagsakan a padasmi nga agassawa iti nabiit pay a tawtawen, bayat ti panagserbimi a kaduami dagiti espesial nga agassawa, nga agserbi iti espesial a luglugar, ken panagserbimi kadagiti espesial unay a tao.

Ti padasko iti ngudo ti digrik iti topography ti nangisuro kaniak a kanayon nga idepensami ti kinapudno no ipakdaarmi daytoy ken iti panangidepensa iti kinapudno ket maysa a proaktibo a banag. Ti panangidepensa iti kinapudno di koma pulos a maaramid iti agresibo a wagas ngem ketdi buyogen iti pudno nga interes a mangipateg, ken mangawis kadagiti tao a pagpanpaneknekantayo iti kinapudno, a mangpampanunot laeng iti temporal ken naespirituan a pagimbagan dagiti annak ti naayat a Nailangitan nga Ama (kitaen iti Mosiah 2:41

Iti sapasap a komperensia idi Oktubre 2021, insuro ni Presidente Russell M. Nelson, ti ay-ayatentayo a propeta, a maisupadi iti pampanunoten ti dadduma, pudno nga adda awagantayo nga umno ken biddut. Adda ti maawagan a naan-anay a kinapudno—ti agnanayon a kinapudno. (Kitaen iti “Pure Truth, Pure Doctrine, and Pure Revelation,” Liahona, Nob. 2021, 6.)

Isuronatayo dagiti nasantuan a kasuratan a ti “kinapudno ti pannakaammo kadagiti banag a kas iti kasasaadda ita, ken kasasaadda idi, ken iti kasasaadda iti masakbayan” (Doktrina ken Katulagan 93:24

Ti pannakaammo iti kinapudno ket saannatayo pagbalinen a nasaysayaat ngem iti dadduma, ngem ketdi isuronatayo iti aramidentayo nga agsubli iti imatang ti Dios.

No agtultuloykayo a natibker ken Cristo ken addaan iti tured a saan laeng a ti panangiwaragawag iti kinapudno ngem ti agbiag a maitunos iti kinapudno, masarakanyonto ti liwliwa ken talna bayat ti riribuk a masarangetyo kadagitoy nga aldaw.

Mabalin a maipababadatayo dagiti karit iti biag, ngem ammuen a no aramatentayo ti pammati ken Jesucristo, “saan nga agbayag dagiti rigat[tayo]” (Doktrina ken Katulagan 121:7) iti dakkel a sakup ti kinaagnanayon. Pangngaasiyo, dikay mangikeddeng no kaano ti pagpatinggaan dagiti rigat ken karityo. Agtalek iti Nailangitan nga Ama ken di tay sumuko, ta no sumukotayo, ditayto pulos ammo no kasano ti gibus ti panagdaliasattayo iti pagarian ti Dios.

Kumpet iti kinapudno, agadal manipud kadagiti pagtaudan ti kinapudno:

Paneknekak ni Jesucristo ken daytoy ti Simbaanna. Addaantayo iti sibibiag a propeta, ket kanayontayonto a marikna a nawayatayo no iwaragawagtayo a sitututred ti kinapudno. Iti nagan ni Jesucristo, amen.