Pagbalinen a Normal Kadatayo ti Naimbag nga Aramid

Ni Elder Rafael E. Pino

Ti Pitupulo

No natibker ken saantayo a maisin iti panagaramid iti naimbag, dagiti kaugaliantayo ti tumulongto kadatayo nga agtalinaed iti dana ti katulagan.

Kanayonto nga agyamanak ta gapu kadagiti annongek iti Simbaan nakapagnaedak iti nadumaduma a pagilian. Nakitami iti tunggal pagilian ti kasta unay a panagduduma ken naisangsangayan a tattao a nagduduma dagiti kannawidan ken tradisionda.

Addaantayo amin iti kannawidan ken tradision a personal, a naggapu iti pamiliatayo, wenno iti komunidadtayo, ket sapay koma ta itultuloytayo dagiti amin a maitunos iti prinsipio iti ebanghelio. Dagiti makapabileg a kannawidan ken tradision ket kasapulan iti panagreggettayo nga agtalinaed iti dana ti katulagan, ket dagiti makatubeng, nasken a laksidentayo.

Ti maysa a kannawidan ket maysa nga aramid a masansan wenno naipaugalin a panagpampanunot iti maysa a tao, kultura,wenno tradision. Masansan, a dagiti banag a mapanunottayo ken nakairuamantayon ti ibilangtayo a normal.

Palubosandak a mangiladawan daytoy: ni Patricia a patpatgek nga asawak, kaay-ayona nga inumen ti digo ti niog sananto kanen ti lasag ti niog. Bayat ti umuna a panagbisitami iti Puebla, Mexico, napankami iti lugar a nanggatanganmi iti niog. Kalpasan nga ininomna ti digo, indawat ti asawak kadakuada a maiwa-iwa ti lasag ti niog ket yegda a kanenna. Idi itedda daytoy, lumabaga ti kolornan. Nawarakiwakan daytoy iti sili! Nasam-it a niog a nasilian! Naidumduma daytoy kadakami. Ngem naammuanmi idi agangay, a dakami ken ti asawak ti naidumduma, a di nangan iti niog nga adda silina. Nupay kasta, idiay Mehiko, saan a naidumduma daytoy, normal lang daytoy.

Iti sabali pay a gundaway a pannanganmi a kadua dagiti sumagmamano a gagayyem idiay Brazil, indasarandakami iti abokado. Idi warakiwakanmi koma daytoyen iti asin, imbaga dagiti gagayyemmi, “Ania ti ar-aramidenyo? Nangikabilkamin iti asukar iti abokado!” Abokado a naasukaran! Naidumduma unay daytoy kadakami. Ngem naammuanmi a dakami ken ti asawak ti naidumduma, a saan a nangan iti abokado a naasukaran. Ngem idiay Brazil, normal a nawarakiwakan iti asukar ti abokado.

No ania ti normal iti sumagmamano mabalin a naidumduma daytoy iti dadduma, depende kadagiti kannawidan ken tradisionda.

Ania dagiti kannawidan ken tradision a normal iti biagtayo?

Imbaga ni Presidente Russell M. Nelson: “Masansan a mangngegtayo maipapan iti ‘baro a normal.’ No pudno nga akseptarenyo ti baro a normal, awisenkayo nga ad-adda nga iturongyo ti puso, panunot, ken kararuayo iti Nailangitan nga Amatayo ken iti Anakna a ni Jesucristo. Dayta ti pagbalinenyo a baro a normalyo” (“A New Normal,” Liahona, Nob. 2020, 118).

Para iti amin daytoy nga awis. Saan a napateg uray no nakurapay wenno nabaknangtayo, de adal wenno awanan adal, nataengan wenno ubing, nasalun-at wenno masaksakit. Awisennatayo a pagbalinen dagiti normal a banag iti biagtayo a mangtulong kadatayo nga agtalinaed iti dana ti katulagan.

Awan ti pagilian nga adda amin kadakuada ti nasayaat wenno pammadayaw. Ngarud, kas insuro da Pablo ken ni Propeta Joseph Smith:

“No adda nadalus, makaay-ayo, wenno addaan iti nasayaat a pakasaritaan wenno pakaidayawan, tun-oyenmi dagitoy a banag.” (Pagannurotan ti Pammati 1:13).

“No adda aniaman a kinadayaw, panunotenyo dagitoy a bambanag” (Taga Filipos 4:8).

Laglagipenyo a pammagbaga daytoy, saan laeng a komentario.

Kayatko a mangipaaytayo amin iti kanito tapno utoben dagiti kannawidantayo ken no kasano nga impluwensiaanda dagiti pamiliatayo.

Dagiti naisangsangayan a kababalin a nasken a normal kadagiti miembro iti Simbaan ket dagitoy uppat:

1. Bukod ken sangapamiliaan a panagadal iti nasantuan kasuratan. Tapno agbalin a napasurot iti Apo a ni Jesucristo, pagrebbengan ti tunggal tao iti panagadalna iti ebanghelio. Pagrebbengan dagiti nagannak iti panangisuro kadagiti annakda iti ebanghelio (kitaen iti Doktrina ken Katulagan 68:25; 93:40).

2. Bukod ken sangapamiliaan a panagkararag. Binilinnatayo ti Mangisalakan nga agkararag a kanayon (kitaen iti Doktrina ken Katulagan 19:38). Babaen iti panagkararag, makasaritatayo mismo ti Nailangitan nga Amatayo iti nagan ti Anakna a ni Jesucristo.

3. Linawas a dumar-ay kadagiti miting ti sakramento (kitaen iti 3 Nephi 18:1–12; Moroni 6:5–6). Aramidentayo a panglagip ken ni Jesucristo no makiranudtayo iti sakramento. Iti daytoy nga ordinansa, pabaruen dagiti miembro ti Simbaan ti katulaganda, no awatenda ti nagan ti Mangisalakan, no kanayon a laglagipenda, ken tungpalenda dagiti bilinna (kitaen iti Doktrina ken Katulagan 20:77, 79).

4. Masansan a pannakipaset iti aramid iti templo ken pakasaritaan ti pamilia. Daytoy nga aramid ti mamagkaykaysa ken mangilantip kadagiti pamilia iti agnanayon (kitaen iti Doktrina ken Katulagan 128:15).

Ania ti mariknatayo no mangngegtayo dagitoy uppat a banag? Pasetda kadi iti normal a panagbiagtayo?

Adu pay dagiti tradision a mabalin a paset iti kadawyan a sursurotentayo, a mangpalubos nga agballigi ti Dios iti biagtayo.

Kasano a mailasintayo dagiti normal a banag iti biagtayo ken iti pamiliatayo? Iti nasantuan a kasuratan, makitatayo ti dakkel a pagtuladan; iti Mosiah 5:15 kunana: “Ngarud, kayatko a tumibkerkayo ken saan a maisin, kanayon nga agaramid iti adu a naimbag.”

Ipatpategko dagitoy a balikas gapu ta ammotayo a dagiti banag nga agbalin a normal iti biagtayo ket dagiti ulit-ulitentayo. No natibkertayo ken saan a maisin iti panagaramid iti naimbag, maitunosto dagiti kannawidantayo kadagiti prinsipio iti ebanghelio, ken tulongandatayto nga agtalinaed iti dana ti katulagan.

Binalakadannatayo pay ni Presidente Nelson: “Akseptarenyo ti baro a normal babaen iti inaldaw a panagbabawi. Kalikagumanyo nga agbalin a natartarnaw iti panunot, sao, ken aramid. Agserbi iti dadduma. Maaddaan iti agnanayon a pannirigan. Aramidenyo a nasayaat dagiti takemyo. Ken no ania man dagiti pagrigatanyo, patpatgek a kakabsatko, agbiagkayo iti tunggal aldaw tapno ad-adda a nakasaganakayo a sumango iti Namarsuayo” (“A New Normal,” 118).

Saan a naidumduma daytoy itan kadakami iti asawak a ni Patricia, wenno no manganak iti niog a nasilian ken abokado a naasukaran—kinapudnona, kayatmi daytoy. Nupay, ti pannakaitan-ok ket maysa a napatpateg a banag a nespirituan ngem iti panagraman; maysa daytoy a pagsasaritaan a mainaig iti kinaagnanayon.

Ikarkararagko a babaen iti kadawyantayo mapadasantayonto ti “dinto pulos agressat a ragsak” a naikari kadagiti agtungtungpal iti bilin ti Dios (Mosiah 2:41) ket iti panagtultuloytayo, mabalintayonto a kunaen, “Ket napasamak a nagbiagkami iti wagas a naragsak” (2 Nephi 5:27).

Kakabsatko, paneknekak dagiti 15 a lallaki a kankanunongantayo a kas propeta, mammadto, ken mammaltiing, a pakairamanan ti patpatgentayo a propeta, ni Presidente Russell M. Nelson. Paneknekak a pudno ti Ti Simbaan ni Jesucristo dagiti Santo iti Ud-udina nga Aldaw. Paneknekak a nangnangruna ni Jesucristo, ti Mangisalakan ken Mannubbottayo, iti nagan ni Jesucristo, amen.