Panangkita nga Ad-adda ken ni Jesucristo iti Biagtayo
Awisennatayo ti Mangisalakan a mangkita iti biagtayo babaen Kenkuana, tapno makita ti ad-adu pay Kenkuana iti biagtayo.
Kakabsat, napakumbabaak nga agtakder iti sangoyo ita a bigat. Ibegkesko ti pusok iti pusoyo kas panagyaman a maummong, sadino man ti ayanyo iti intero a lubong, tapno dumngeg kadagiti mensahe manipud kadagiti propeta, apostol, mammadto, ken lider iti pagarian ti Dios. Piguratibo nga agbalintayo a kas iti tattao iti aldaw ni Ari Benjamin, a mangibangbangon iti toldatayo ken silulukat dagiti ruangantayo ken naiturong iti propeta ti Dios ditoy daga,1 ni Presidente Russell M. Nelson.
Malagipko pay a nakapsut idi ti panagkitak ken kanayon a kasapulak ti tulong dagiti reseta a lente tapno maatur ti panagkitak. No luktak dagiti matak iti tunggal agsapa, agparang a makariribuk unay ti lubong. Amin awan ti pokusna, di nalawag, ken naballikug. Uray ti patpatgek nga asawak mangipakita iti abstrak a ladawan ngem ti maay-ayat unay ken makaliwliwa a pudno a kinataona! Ti kasapulak, sakbay nga agaramidak iti rugi ti aldawko, ket ti panangusarko iti anteohosko tapno matulongannak a makaawat iti kaipapanan ti aglawlawko ken mangnanam iti nabnabiag a padas bayat a tulongandak iti unos ti aldawko.
Iti naglabas a tawtawen, nabigbigko nga iladawan daytoy nga ugali ti inaldaw a panagpannurayko iti dua a banag: umuna, ramit a tumulong tapno malawlawagan, maipokus, ken makita ti lubong a kas iti pudno a kasasaadna; ken maikadua, ti panagkasapulan iti tarabay nga agtultuloy nga iturongnak iti umno a direksion. Daytoy simple, nakaugalian nga aramid maipada kaniak ti napateg nga obserbasion maipapan iti relasiontayo iti Mangisalakantayo, ni Jesucristo.
Iti biagtayo a masansan a napnuan iti saludsud, danag, presion, ken gundaway, ti ayat ti Apotayo kadatayo kas indibidual ken natulagan nga annakna, ken dagiti pannursuro ken lintegna, ket magun-odan nga inaldaw a pamataudan a pagpannuraytayo tapno agbalintayo a “silaw nga agrimat, … mangmangted lawag iti mata[tayo ken] mangalibtak iti pannakaawat[tayo].”2 Bayat ti panangsapultayo kadagiti bendision ti Espiritu iti biagtayo, kabaelantayto, kas insuro ni Jacob, a makita “dagiti banag iti kinapudnoda, ken … kas iti pagbalinandanto.”3
Kas natulagan nga annak ti Dios, naidumduma a nabendisionantayo iti nawadwad nga abasto ti nadiosan a naituding a ramit a mangpadur-as iti pannakaawattayo. Dagiti sao ken pannursuro ni Jesucristo kas naisurat iti nasantuan a kasuratan ken dagiti mensahe dagiti napili a propetana, ken ti Espirituna a naawat iti inaldaw a kararag, masansan nga ipapan iti templo, ken ti linawas nga ordinansa ti sakramento ket makatulong a mangisubli iti kappia ken mangipaay iti kasapulan a sagut ti pannakaawat a mangyeg iti lawag ni Cristo ken pannakaawatna iti sulsuli ti biagtayo ken iti lubong a mabalin a nalidem. Ti Mangisalakan pay ti agbalin a kompas ken pilototayo bayat ti panangiturongtayo iti natalna ken naapres a danum ti biag. Mailawlawagna ti umno a dana a mangiturong kadatayo iti agnanayon a papanantayo. Ngarud, ania ti kayatna a makitatayo, ken sadino ti kayatna a papanantayo?
Insuro ti patpatgentayo a propeta a “nasken a maiturong ti pokustayo iti Mangisalakan ken iti ebangheliona” ken nasken nga “ikagumaantayo a kumita Kenkuana iti tunggal panunot.”4 Inkari met ni Presidente Nelson nga “awan ti mangawis iti Espiritu nga ad-adda ngem ti panangaturmo iti pokusmo ken ni Jesucristo. … Iturong ken iwanwannakayto iti bukodyo a biag no adda panawenyo Kenkuana iti biagyo—tunggal maysa ken inaldaw.”5 Gagayyem, agpada a ni Jesucristo ti panggep ti pokustayo ken ti panggep ti papanantayo. Tapno matulongannatayo nga agtalinaed a natalged ken agturong iti umiso a direksion, awisennatayo ti Mangisalakan a mangkita iti biagtayo babaen Kenkuana tapno makita ti ad-adu pay Kenkuana iti biagtayo. Ad-adu ti nasursurok maipapan daytoy naipangruna nga awis babaen ti panagadalko iti Daan a Tulag.
Naited ti linteg ni Moises kadagiti immuna nga Israelita a kas panagsagana nga ebanghelio, a naisangrat a mangisagana ti tattao para iti nangatngato a natulagan a relasion iti Dios babaen ken Jesucristo.6 Ti linteg, a nabaknang iti simbolismo a mangitudtudo kadagiti namati a “mangsegga ti yaay” ken Pannubbot ni Jesucristo,7 nairanta a tulonganna ti tattao ti Israel nga agpokus iti Mangisalakan babaen ti panangaramat iti pammati Kenkuana, ti sakripisiona, ken ti linteg ken bilbilinna iti biagda8—a nairanta a mangyeg kadakuada iti dakdakkel a pannakaawat iti Mannubbotda.
Kas iti kasasaadtayo ita, naawis ti nagkauna a tattao ti Dios a mangkita iti biagda babaen Kenkuana tapno makita ti ad-adu pay Kenkuana iti biagda. Ngem idi panawen ti ministro ti Mangisalakan, napukawen ti panagkita dagiti Israelita ken Cristo iti panagtulnogda, inwalinda Isuna ket innayonda iti linteg ti di autorisado nga ar-aramid nga awan maisuro a simbolismo a mangitudo iti pudno ken kakaisu a paggapuan ti pannakaisalakan ken pannakasubbotda—ni Jesucristo.9
Nagbalinen a nariribuk ken nalidem ti inaldaw a lubong dagiti Israelita. Dagiti annak ti Israel, iti daytoy nga estado, patienda a dana nga agturong iti bukod a pannakaisalakan dagiti aramid ken ritual ti linteg ken pinabassitda ti linteg ni Moises iti grupo dagiti protocol a naipaay a mangituray iti sibilian a biag.10 Daytoy ti nangkasapulan iti Mangisalakan a mangisubli iti pokus ken kinalawag iti ebangheliona.
Kamaudiananna adu kadagiti Israelita ti nangilaksid iti mensahena, uray pay agingga iti panangakusarna iti Mangisalakan—Isu a nangted iti linteg ken mangipakdaar nga Isu ti “linteg, ken ti silaw”11—ti panaglabsing iti daytoy. Ngem ni Jesus iti Sermonna iti Bantay, nagsao panggep iti linteg ni Moises impakdaarna, “Diyo panunoten nga immayak a mangdadael iti linteg dagiti propeta. Diak immay a mangdadael ngem mangtungpal.”12 Sa ti Mangisalakan, babaen ti agnanayon a Pannubbotna, ginibusanna dagiti kodigo, pagannurotan, ken seremonial nga aramid dagiti tao ti Israel iti dayta a panawen. Ti maudi a sakripisiona ti nangiturong iti panamagbaliw kadagiti daton a mapuoran iti panangipaaytayo iti “nasneban a puso ken agbabbabawi nga espiritu,”13 manipud iti ordinansa ti sakripisio iti ordinansa ti sakramento.
Kinuna ni Presidente M. Russell Ballard, a mangisursuro iti topiko, “No ar-arigen, nagbaliw ti sakripisio manipud iti daton agingga iti agidaton.”14 No yegtayo ti datontayo iti Apo, maawistayo a mangkita nga ad-adda ken Jesucristo, no napakumbabatayo nga ipasakuptayo ti pagayatantayo Kenkuana kas panangbigbig ken pannakaawat iti naan-anay a panagpasakupna iti pagayatan ti Ama. No agtalimudoktayo ken Jesucristo, mabigbigtayo ken maawatantayo nga Isu laeng ti pagtaudan ken wagas a pangawatan iti pammakawan ken pannakasubbot, uray pay iti agnanayon a biag ken pannakaitan-ok.
Kas nagkauna a pasurot ti ebanghelio, naipasangoak iti adu a nagtulnog iti panagbaliw iti ugali, kannawidan, ken pili kalpasan a nagkamengak iti Simbaan. Nagusiosoda maipapan iti “apay” ti makitkitada—no apay a pinilik ti agpabuniag ken agkameng ditoy kongregasion dagiti mamati, uray Ti Simbaan ni Jesucristo dagiti Santo iti Ud-udina nga Aldaw, no apay nga inikkatko dagiti kannawidan iti Sabbath, no apay a napudnoak nga agtungpal iti Nainsiriban a Balikas, no apay a basaek ti Libro ni Mormon, no apay a mamatiak ken agbiagak iti pannursuro dagiti propeta ken apostol ti agdama nga aldaw, no apay a dar-ayak ti linawas a miting ti Simbaan, no apay nga awisek ti dadduma nga “umay ken mangkita, umay ken tumulong, … umay ken agtalinaed,”15 ken “umay ken agkameng.”16
Iti dayta a panawen, nadamag dagita a saludsod, a nalawag, no dadduma makapabasol. Ngem iti pannakibalubalko iti panagsukimat ti tattao, naamirisko a ti panagsukisokda, kinapudnona, ti umuna nga awisko a mangala ken mangikabil iti maysa a paris ti naespirituan a lente a manglawlawag, mangipokus, ken mangpatibker iti panangtungpalko iti aramid ken pagrukodan ti ebanghelio. Ania ti paggapuan ti pammaneknekko? “Dagiti makinruar nga aramid” laeng kadi ti ar-aramidek a diak ipalubos dagita nga aramid a mainaig iti linteg ti Dios a “mangpabileg iti pammatik ken Cristo”17 wenno mangipakita iti pannakaawat a ni Jesucristo ti pagtaudan laeng ti bileg iti panagtungpalko?
Babaen ti panagkagumaanko a kumita ken Jesucristo iti tunggal panunot ken aramid, nalawlawagan ti matak, ken napadaras ti pannakaawatko a mangbigbig nga aw-awaganna ni Jesucristo nga “umasideg” Kenkuana.18 Manipud iti daytoy nasapa a panawen ti kinadisipulo iti kinaagtutubok, malagipko ti awis nga inted kaniak dagiti misionario a makikappeng kadakuada bayat ti panangisuroda iti ebanghelio iti grupo dagiti agtutubo a babbalasitang a kaedadko Maysa a sardam, bayat a nakatugawakami iti balay ti pamilia ti maysa kadagitoy a babbalasitang, ti nadungngo a saludsodda nga “apay a mamatiak” ti nangtudok iti pusok, ket pinalubosandak nga agpaneknek kadakuada a buyogen ti naun-uneg a pannakaawat iti pannirigan ti Apo maipapan iti naespirituan a motibo ti kinadisipulok, ket nangpatibker iti pammaneknekko nga agtultuloy.
Naadalko idin, kas ammok ita, a ti Mangisalakantayo, ni Jesucristo, iturongna dagiti sakatayo iti balay a paggigimongan iti linawas tapno makiraman iti sakramentona, iti balay ti Apo tapno mangaramid iti katulagan Kenkuana, iti nasantuan a kasuratan ken pannursuro dagiti propeta tapno agadal iti balikasna. Iturongna dagiti ngiwattayo a mangpaneknek Kenkuana, dagiti imatayo a mangitag-ay ken agserbi a kas iti panangitag-ay ken panagserbina, dagiti matatayo a mangkita iti lubong ken iti tunggal maysa a kas iti aramidenna—“kas iti kinapudnoda, ken … kas iti pagbalinandanto.”19 Ket no ipalubostayo nga iturongnatayo iti amin a banag, umawattayo iti pammaneknek nga “ipamatmat amin dagiti banag nga adda Dios,”20 gapu ta sadino a pangsapulantayo Kenkuana—masarakantayo Isuna21—iti tunggal aldaw. Paneknekak daytoy iti sagrado a nagan ni Jesucristo, amen.