Ti Agnanayon a Pagbatayan ti Ayat

Ni Elder Hugo Montoya

Ti Pitupulo

Pudno ti panagayat ti Amatayo iti Langit iti tunggal maysa kadagiti annakna. Adda latta Isuna a sidadaan a tumulong iti tunggal maysa.

Maiparangarang ti agnanayon a pagbatayan ti ayat babaen ti panagbiag iti dua a naindaklan a bilin: ayatem ti Dios iti amin a pusom, kararua, panunot, ken pigsam ket ayatem ti padam a tao a kas iti bagim.¹

Malagipko ti umuna a winter a panagnaedko ditoy Utah—niebe iti amin a lugar. Naggapuak iti Sonoran Desert, isu a nagustuak dagiti umuna nga aldaw, ngem kalpasan ti sumagmamano nga aldaw, naamirisko a nasken a bumangonak a nasapsapa tapno ikkatek ti niebe iti driveway.

Maysa nga agsapa, iti tengnga ti bagyo ti niebe, aglingling-etak, nga agpalpala iti niebe, ket nakitak ti kaarrubak a manglukat iti garahena iti ballasiw ti kalsada. In-inauna isuna ngem siak, isu a napanunotko a no malpaskonto ti ubrak mabalin a tulongak isuna. Pinigsaak ti bosesko, ket dinamagko, “Brother, masapulmo kadi ti tulong?”

Immisem ket kinunana, “Agyamanak, Elder Montoya.” Sa nangiruar iti snow blower iti garahena, pinaandarna ti makina, ket iti sumagmamano a minuto, naikkatna ti amin a niebe iti sango ti balayna. Kalpasanna bimmallasiw iti kalsada nga iggemna iti makinana ket dinamagnak, “Elder, kasapulam ti tulong?”

Siisemak a nagkuna, “Wen, agyamanak.”

Sidadaankami nga agtinnulong gapu ta patpatgenmi ti tunggal maysa, ket agbalin a kasapulak dagiti kasapulan ti kabsatko, ket ti kukuak agbalin a kukuana. Uray ania a lengguahe ti pagsasao ti kabsatko wenno ania a pagilian ti naggapuanna, aginnayatkami ta agkabsatkami, annak ti maymaysa nga Ama.

Idi naipakaammo ti ministering, kinuna ni Presidente Russel M. Nelson, “Ipatungpaltayonto ti nabarbaro, nasansantuan a wagas iti panangaywan ken panagserbi iti dadduma.”² Para kaniak, ti kaipapanan ti nasansantuan ket ti naperpersonal, naun-uneg, ad-adda a kas iti wagas ti Mangisalakan: “Agiinnayatkayo,”³ saggaysa.

Saan nga umdas a liklikan ti panagbalin a tubeng iti sabali; saan nga umdas ti panangkita iti agkasapulan iti kalsada ket labsam. Alaentayo ti gundaway a tulongan ti kaarrubatayo, nupay dayta ti umuna ken kakaisuna a gundaway a makiam-ammotayo kenkuana iti daytoy a biag.

Apay a ti panagayat iti Dios ti umuna a naindaklan a bilin?

Panagkunak gapu ta napateg Isuna kadatayo. Annaknatayo, kitaenna ti pagimbagantayo, agpannuraytayo Kenkuana, ken salaknibannatayo ti ayatna. Karaman iti planona ti kinawaya nga agpili; ngarud, makaaramidtayonto latta iti sumagmamano a biddut.

Palugodannatayo pay a masubok ken masulisog. Ngem nupay makaaramidtayo latta iti sumagmamano a biddut, wenno masulisogtayo, mangipaay ti plano iti Mangisalakan tapno masubbot ken makasublitayo iti imatang ti Dios.

Ti rigat iti biagtayo ket makapataud iti panagduadua maipapan iti pannakatungpal dagiti kari a naaramid kadatayo. Agtalekkayo koma iti Amatayo. Kanayon a tungpalenna dagiti karina, ket masursurotayo ti kayatna nga isuro kadatayo.

Uray no aramidentayo ti umno, mabalin nga agbaliw dagiti kasasaadtayo iti biag, manipud iti nasayaat agturong iti dakes, ti ragsak agbalin a liday. Sungbatan ti Dios dagiti kararagtayo kas naibatay iti awan patinggana nga asi ken ayatna, ken iti bukodna a panawen.

Nagmaga ti karayan a naginuman ni Elias.⁴
Natukkol ti landok a bai ni Nephi.⁵
Maysa nga ubing a lalaki ti biktima ti panangidumduma ken naikkat iti eskuelaan.
Natay ti ubing a nabayag nga ur-urayendan iti sumagmamano nga aldaw kalpasan a naiyanak.

Agbalbaliw ti kasasaad.

No agbaliw dagiti kasasaad manipud iti nasayaat ken positibo nga agturong iti dakes ken negatibo, makapagragsaktayonto latta gapu ta saan nga agpannuray ti ragsak kadagiti kasasaad no di ket ti kababalintayo kadagita a kasasaad. Kinuna ni Presidente Nelson, “Ti rag-o a mariknatayo ket bassit ti pakainaiganna iti kasasaad iti biagtayo ngem ti amin ket mainaig no ania ti pokus iti biagtayo.”⁶

Makapaguraytayo iti panagbalbaliw dagiti kasasaad iti bukodda, wenno mabalintayo ti mangsapul ken mangyeg kadagiti baro a kasasaad.

Napan ni Elias ken Zarefat, a nangtedan ti balo iti taraon ken danum kenkuana.⁷
Nagaramid ni Nephi iti kayo a bai ket naganup iti ayup a masida.⁸
Nakatugaw ti barito a dumdumngeg ken agsursurat iti igid ti tawa, ket mannursuro iti elementaria itan.
Dimmakkel ti pammati ti agassawa iti Mangisalakan a ni Jesucristo ken ti panagtalekda iti plano ti pannakaisalakan. Dakdakkel ti panagayatda iti kellaat a pimmusay nga anak ngem iti ladingitda.

No mangngegko dagiti saludsod a “Nailangitan nga Ama, talaga kadi nga addaka? Ken mangngegyo kadi ti sungbat iti kararag ti [tunggal] ubing?,”⁹ Kayatko a sungbatan, “adda Isuna, adda ita, ken kanayon nga adda Isuna para kadatayo. Siak ti anakna, Isu ti Amak, ket agsursuroak nga agbalin a nasayaat nga ama a kas Kenkuana.”

Kanayon nga ikarigatanmi nga agassawa a makadua dagiti annakmi iti ania man nga oras, iti ania man a kondision, ken iti ania man a pamuspusan. Naidumduma ti tunggal ubing; dakkel ti pategda iti Dios, ket ania man dagiti karit, basol, ken pagkapuyanda, ay-ayaten ida ti Dios, ken kasta met kadatayo.

Idi awatek daytoy nga awag kas maysa a General Authority, iti maudi nga aldaw sakbay ti panagbiahemi a mapan iti Salt Lake, adda amin dagiti annakko ken dagiti pamiliada iti pagtaenganmi para iti family home evening-mi, a ditoy ti nangipeksaanmi iti ayat ken panagyamanmi. Kalpasan ti lesson, nangtedak iti bendision ti priesthood iti tunggal maysa kadagiti annakko. Nakalua ti tunggal maysa. Kalpasan ti pammendision, impeksa ti inauna nga anakko a lalaki ti panagyamanna gapu iti dakkel a panagayatmi kadakuada manipud iti aldaw a pannakayanakda agingga iti dayta a kanito.

Bendisionanyo dagiti annakyo, 5 wenno 50 man ti tawenda. Kaduaenyo ida; sidadaankayo koma a tumulong kadakuada. Nupay ti panangipaay ket pagrebbengan a naipasdek babaen ti nadiosan a panggep, ditay koma liplipatan nga ibinglay ti naragsak a panawen kadagiti annaktayo.

Pudno ti panagayat ti Amatayo iti Langit iti tunggal maysa kadagiti annakna. Adda latta Isuna a sidadaan a tumulong iti tunggal maysa. Diak ammo no kasano nga aramidenna daytoy, ngem aramidenna. Isu ken ti Inauna nga Anakna maymaysada nga agtinnulong iti aramid ken gloria ti Ama, “a mangipatungpal iti saan nga ipapatay ken ti agnanayon a biag ti tao.”¹⁰ Imbaonda kadatayo ti Espiritu Santo a mangiwanwan, mangballaag, ken mangliwliwa kadatayo no kasapulan.

Binilinna ti Patpatgenna nga Anak a mangparsua iti daytoy napintas a daga. Binilinna da Adan ken Eva ken inikkanna ida iti karbengan nga agpili. Agibabaon Isuna kadagiti mensahero iti adun a tawen tapno maawattayo ti ayatna ken dagiti bilinna.

Adda Isuna iti Sagrado a Kakaywan a mangsungsungbat iti napasnek a saludsod ni agtutubo a Joseph ken mangaw-awag kenkuana iti naganna. Kinunana: “Daytoy ti Ay-ayatek nga Anakko. Dumngegka Kenkuana!”¹¹

Patiek a ti katan-okan a panangipakita iti panagayat kadatayo ti Dios ket napasamak iti Getsemani, a nagkararagan ti Anak ti sibibiag a Dios, “O Amak, no mabalin, daytoy a kopa lumabas koma kaniak: nupay kasta saan a kas iti pagayatak, no di ket kas iti pagayatam.”¹²

Nakitak a ti bassit a paset a pannakaawatko iti Pannubbot ni Jesucristo ti mangpadakkel iti panagayatko iti Ama ken Anakna, mangpabassit iti tarigagayko nga agbasol ken agsukir, ken mangpadakkel iti tarigagayko nga agbalin a nasaysayaat ken agaramid iti nasaysayaat.

Nagna ni Jesus nga awan panagbuteng ken awan panagduaduana nga agturong iti Getsemani, nagtalek iti Amana, ammona a nasken nga isu laeng ti mangpayat iti pagpespesan iti ubas. Inibturanna ti amin a saem ken pannakaibabain. Napabasol, nakedngan, ken nailansa iti krus. Bayat ti panagtutuok ken panagsagabana iti krus, impamaysa ni Jesus dagiti kasapulan ti inana ken ti ay-ayatenna a disipulona. Indatonna ti biagna.

Nagungar iti maikatlo nga aldaw. Awan nagyan iti tanem; agtakder Isuna iti makanawan ti Amana. Mangnamnamada a pilientayo a tungpalen dagiti katulagantayo ken agsubli iti imatangda. Daytoy maikadua a kasasaadtayo ket saan nga isu ti maudi a kasasaadtayo; ditay agindeg iti daytoy a pagtaengan iti daga ngem ketdi agnanayontayo a parsua nga agbibiag iti temporario a padpadas.

Ni Jesus ti Cristo, ti Anak ti sibibiag a Dios. Sibibiag Isuna, ket gapu ta sibibiag Isuna, agbiagto nga agnanayon ti amin nga annak ti Dios. Agyamantayo iti pangsubbot a sakripisiona, Sangsangkamaysatayo a makipagnaed Kadakuada. Iti nagan ni Jesucristo, amen.