Ad-adda nga Umasideg iti Mangisalakan
Iti panagkagumaantayo a mangammo ken mangayat iti Mangisalakan, isinatayo ti bagitayo manipud iti lubong babaen iti katulagan iti Dios, nga agbalintayo a naiduma, saan a gagangay, ken espesial, a saantayo nga isina ti bagitayo iti dadduma a sabali ti pammatida.
Patpatgek a kakabsatko, ita a sardam makisaritaak kadagiti napakumbaba ken napasnek a pasurot ni Jesucristo. Bayat a makitak ti kinaimbag ti biagyo ken ti pammatiyo iti Mangisalakantayo ditoy a pagilian ken kadagiti nasion iti intero a lubong, ad-adda nga ay-ayatenkayo amin.
Idi dandanin gibus ti panagserbina, kiniddaw dagiti disipulo ni Jesus Kenkuana nga ibagana kadakuada ti “pagilasinan [Ti Maikadua a Yaayna] ken ti panungpalan ti lubong.”1
Imbaga ni Jesus dagiti kasasaad nga umun-una ngem ti panagsublina ket nagngudo ti panangideklarana nga “Inton makitayo amin dagitoy a banag, maammuan[yonto] nga asidegen [ti panawen].”2
Iti naudi a sapasap a komperensia, dimngegak a naimbag iti balikas ni Presidente Henry B. Eyring: “Tunggal maysa kadatayo,” kinunana, “sadinotayo man, ammotayo nga agbibiagtayo iti kumarkaro ti peggadna a panawen. … Asino man ti addaan mata a makakita kadagiti pagilasinan ti panawen ken lapayag a makangngeg iti balikas dagiti propeta, ammona a dayta ket pudno.”3
Dinayaw ti Mangisalakan dagiti maingel a disipulona: “Nagasat dagiti matayo, ta makakitada: ken dagiti lapayagyo, ta makangngegda.”4 Sapay koma ta maited kadatayo daytoy a bendision bayat ti panagdengngegtayo a naimbag iti kadagiti balikas ti Apo babaen dagiti propetana ken dadduma pay ditoy a komperensia.
Trigo ken Ruruot
Inlawlawag ti Apo nga iti daytoy maudi a panawen sakbay ti panagsublina, ti “trigo,” nga iladawanna a kas “dagiti annak ti pagarian,”5 ket dumakkelto a kagiddan dagiti “ruot,” wenno dagidiay saan nga agayat iti Dios ken di agtungpal kadagiti bilinna. Isuda ti “aggiddan dumakkel, ”6 nga agabay.
Daytoyto ti lubongtayo agingga nga agsubli ti Mangisalakan, a buyogna ti kaaduan ti nasayaat ken kaaduan ti dakes iti amin a suli.7
Mabalin a dikay marikna no dadduma a kasla maysa a napigsa, nataengan a bulong ti trigo. Agan-anuskayo iti bagiyo! Kinuna ti Apo nga iraman ti trigo dagiti nalukneng a tadem nga agtubo.8 Datayo dagiti Santona iti Ud-udina nga Aldaw, ket nupay di pay nga amin a kayattayo a pagbalinan, agtarigagaytayo unay nga agbalin a pudno a disipulona.
Papigsaentayo ti Pammatitayo ken ni Jesucristo
Ammotayo a no umad-adu ti kinadakes iti lubong, ti naespirituan a panagbiagtayo, ken dagiti ay-ayatentayo, ket agkasapulan nga ad-adda a naan-anay a padakkelen, pabilgen, ken patibkerentayo ti ramramut ti pammatitayo ken ni Jesucristo. Binalakadannatayo ni Apostol Pablo a mairamut,9 maibatay, ken agtalinaed10 iti ayattayo iti Mangisalakan ken determinadotayo a sumurot Kenkuana. Ita ken dagiti aldaw iti masanguanan ket agkasapulan iti ad-adu a naipokus ken naipamaysa a panagkagumaan, a mangsalsaluad a maibusor kadagiti dibersion ken kinaawan panagannad.11
Ngem uray iti yaadu dagiti nailubongan nga impluensia iti aglawlawtayo, ditayo nasken nga agbuteng. Dinto pulos baybay-an ti Apo dagiti natulagan a taona. Adda pangsubad a bileg dagiti naespirituan a sagut ken nadiosan a panangiturong para kadagiti nalinteg.12 Daytoy nainayon a bendision ti naespirituan a bileg, nupay kasta, dina maited kadatayo gapu laeng ta pasettayo daytoy a kaputotan. Sumangbay daytoy bayat ti panangpapigsatayo iti pammatitayo ken ni Apo Jesucristo ken panangtungpal iti bilbilinna, bayat ti panangam-ammo ken panangayattayo Kenkuana. “Daytoy ti biag nga agnanayon,” inkararag ni Jesus, “tapno maammuandaka ti maymaysa a pudno a Dios, ken ni Jesucristo, nga imbaonmo.”13
Kas ammotayo unay, ti kaadda ti pammatitayo ken ni Jesucristo ken panagbalintayo a pudno a disipulona ket ad-adda pay ngem iti maminsan a pangngeddeng—ad-adda pay ngem iti maminsan a pasamak. Sagrado dayta, agtultuloy a proseso a dumakkel ken lumawa babaen dagiti panawen ti biagtayo, nga agtultuloy agingga nga agparintumengtayo iti sakaananna.
Iti panagdakkel ti trigo iti tengnga dagiti ruot iti lubong, kasano a mapauneg ken mapapigsatayo ti panagkumittayo iti Mangisalakan kadagiti masungad nga aldaw?
Adtoy ti tallo a kapanunotan:
Iraremtayo ti Bagitayo iti Biag ni Jesus
Umuna, mabalintayo a naan-anay nga irarem ti bagitayo iti biag ni Jesus, iti pannursurona, iti kinatan-okna, iti bilegna, ken ti pangsubbot a sakripisiona. Kinuna ti Apo, “Kitaendak iti tunggal panunot.”14 Ipalagip kadatayo ni Apostol Juan, “Ay-ayatentayo isuna, gapu ta immuna nga inayatnatayo.”15 Bayat ti nasaysayaat a panangpadastayo iti ayatna, ad-adda pay nga ay-ayatentayo ken, gagangay unay, nasaysayaat a surotentayo ti pagwadanna iti panagayat ken panangaywan kadagiti adda iti aglawlawtayo. Iti tunggal nalinteg a tignay nga agturong Kenkuana, makitatayo Isuna a nalawlawag.16 Agdayawtayo Kenkuana, ken ikarigatantayo iti babassit a wagastayo a mangtulad Kenkuana.17
Makitulagtayo iti Apo
Sumaruno, no nasaysayaat nga ammuen ken ayatentayo ti Mangisalakan, ad-adda a tarigagayantayo nga ikari Kenkuana iti kinasungdo ken panagtalektayo. Mangaramidtayo kadagiti katulagan Kenkuana. Irugitayo babaen kadagiti karitayo iti panagbuniag, ket pasingkedantayo dagitoy a kari ken dadduma pay bayat ti panagbabawitayo iti inaldaw, panagdawat iti pammakawan, ken sigagagar a mangpadpadaan iti yaawat iti sakramento iti tunggal lawas. Ikaritayo a “kanayon a laglagipen ken tungpalen dagiti bilinna.”18
No nakasaganatayo, awatentayo dagiti ordinansa ken katulagan ti templo. Iti pannakariknatayo iti impluensia ti kinaagnanayon kadagiti sagrado, naulimek a kanitotayo iti balay ti Apo, siraragsak a makitulagtayo iti Apo, siraragsak nga agaramidtayo kadagiti katulagan iti Dios ken papigsaentayo ti reggettayo a mangtungpal kadagitoy.
Ti panagaramid ken panagtungpal kadagiti katulagan ket mangpalugod ti ayat ti Mangisalakan a lumned a naun-uneg iti puspusotayo. Iti Liahona, iti daytoy a bulan, kinuna ni Presidente Russel M. Nelson: “Dagiti katulagan[tayo] ti mangiturongto kadatayo nga umas-asideg Kenkuana. … Saanto a baybay-an ti Dios ti relasionna kadagidiay nangbukel iti kasta a begkes Kenkuana.”19 Kas iti napintas a panangisao ni Pressidente Nelson itay bigat, “Babaen ti pannakaidaton ti tunggal baro a templo, umay ti nayon a nadiosan a bileg ditoy lubong tapno pabilgennatayo ken kontraenna dagiti kumarkaro a panagregget ti kabusor.”20
Makitatayo kadi no apay nga iturong ti Apo ti propetana a mangyasideg kadatayo kadagiti nasantuan a balay ti Apo ken palubosannatayo nga adda iti balayna a masansan?
Bayat ti iseserrektayo iti templo, nawayatayo kadagiti nainlubongan nga impluensia a mangparmek kadatayo bayat ti panangammotayo iti panggeptayo iti biag ken dagiti agnanayon a sagut a naidiaya kadatayo babaen ti Mangisalakantayo, ni Jesucristo.
Saluadan ti Sagut ti Espiritu Santo
Kamaudiananna, maikatlo a kapanunotak: Iti daytoy a sagrado a panagbirok, ipateg, salakniban, idepensa, ken naan-anay a salaknibantayo ti sagut ti Espiritu Santo. Agpada a nagsao ni Presidente M. Russell Ballard kasakbayanna ken ni Elder Kevin W. Pearson sumagmamano laeng a kanito ti napalabas maipapan iti naimpadtuan a ballaag ni Presidente Nelson nga ulitekto manen: “Saanto a posible ti agbiag iti naespirituan no awan ti mangiwanwan, mangiturong, mangliwliwa, ken kanayon nga impluensia ti Espiritu Santo.”21 Maysa daytoy a sagut a di magatadan. Aramidentayo ti amin a kabaelantayo a mangsalaknib iti inaldaw a padastayo tapno agtalinaed ti impluensia ti Espiritu Santo kadatayo. Silawtayo iti lubong, ket no kasapulan, situtulok a pilientayo ti agbalin a naiduma kadagiti dadduma. Dinamag ni Presidente Dallin H. Oaks itay nabiit kadagiti babbaro ken babbalasang: “Maitured[yo] kadi ti ‘agbalin a naiduma?‘ … [Nangnangruna] a napateg … dagiti pili nga ar-aramidenyo iti bukodyo a biag. … Agtultuloykayo kadi a mangsuppiat iti pagsusupadian iti lubong?”22
Pilien ti Agbalin a Naiduma iti Lubong
Iti nabiit pay a post iti social media, kiniddawko kadagiti padak a disipulo nga ibinglayda dagiti pili nga inaramidda a mangidawat kadakuada a kasapulanda ti agbalin a maiduma iti lubong. Ginasut a sungbat ti naawatko.23 Adtoy laeng ti sumagmamano:
Amanda: Maysaak a nars nga agtartrabaho iti lokal a pagbaludan. Ikagkagumaanak nga aywanan dagiti balud a kas iti aramiden ni Cristo.
Rachel: Maysaak a kumakanta iti opera, ket masansan a maibilang nga awan pategna nga isuotko ti ania man a kawes a maited kaniak, ania man ti kinadisente. [Gapu ta naendow-nak,] imbagak [kadagiti prodiuser] a kasapulan a [disente] ti kawes. Dida naragsak … ngem nakedkedda nga inaramid ti panagbalbaliw. Diak isukat ti talna nga aggapu iti panagtakder a kas saksi ni Cristo iti amin a panawen.
Chriss: Maysaak nga alkoholic (agpapaimbag), maikari iti templo, miembro ti Simbaan. Diak ilemmeng dagiti padpadasko iti adiksion ken manggun-od iti pammaneknek iti Pannubbot [ni Jesucristo].
Lauren: Agsursuratak iti maysa a skit a kaduak dagiti kaklasek iti haiskul. Kayatda a ti naulimek, reserbado a karakterko ket agsao iti dakes ken makasair a balikas. Intultuloydak a pinilit, ngem nagkedkedak ket di nagbaliw ti kapanunotak.
Adam: Adu a tattao ti saan a mamati kaniak no kunak a tungpalek ti linteg ti kinadalus ti dayaw ken piliek ti agkedked iti pornograpia. Dida maawatan ti pagimbagan ti rag-o ken talna ti panunot nga ipaayna kaniak.
Ella: Kameng ti LGBTQ community ni tatangko. Kanayon nga ikarigatak a pagtalinaeden a maibilang ti rikna ti dadduma a tattao bayat ti panagtakderko kas maysa a saksi ni Cristo ken panagbalinko a pudno iti no ania ti patiek.
Andrade: Inkeddengko nga itultuloy ti makimisa idi inkeddeng ti pamiliak a didan mapan.
Ken kamaudiananna, manipud ken ni Sherry: Dardar-ayanmi idi ti maysa a pasken idiay mansion ti gobernador. Rinugianda ti nagyawat iti champagne para iti maysa a “toast.” Impapilitko ti danum, nupay kinuna dagiti empleado a makasair dayta. In-toastmi ti gobernador, ket inngatok ti basok a danum! Saan a nasair ti gobernador.
Kinuna ni Presidente Nelson, “Wen, agbibiagkayo iti lubong, ngem addaankayo kadagiti naiduma unay a pagalagadan manipud iti lubong tapno matulongannakayo a mangliklik iti mantsa ti lubong.”24
Ni Anastasia, maysa nga agtutubo nga ina idiay Ukraine, ket adda iti ospital ta kalkalpasna nga impasngay ti maladaga a lalaki idi nangrugi dagiti panagbomba idiay Kyiv itay napalabas a Pebrero. Linuktan ti maysa a nars ti ridaw ti siled ti ospital ket kinunana iti naganat a timek, “Alaem ti maladaga, bungnem iti ules, ket sumrekka iti salas—itan!”
Idi agangay, nagsao ni Anastasia:
“Diak pulos impagarup a kasta ti kinarigat dagiti umuna nga aldawko, … ngem … ipamaysak … dagiti bendision ken milagro a nakitak. …
“Ita pay laeng, … mabalin a kasla imposible a pakawanen dagidiay nakaigapuan ti nakaad-adu a pannakadadael ken pannakadangran … , ngem kas maysa a disipulo ni Cristo, addaanak iti pammati a kabaelakto [ti mamakawan]. …
“Diak ammo amin a mapasamakto iti masakbayan … ngem ammok a ti panagtungpal kadagiti katulagantayo ket mangipalubos iti Espiritu nga agtultuloy a makaduanatayo, … a mangipalubos a makariknatayo iti rag-o ken namnama, … uray kadagiti narigat a panawen.”25
Ti Kari ti Biag nga Agnanayon ken Nailangitan a Gloria
Kakabsatko, naparaburannak a siwawadwad nga umawat iti ayat ti patpatgentayo a Mangisalakan, ni Jesucristo. Ammok nga Isu ket agbibiag ken mangiwanwan iti nasantuan nga aramidna. Awananak kadagiti naan-anay a balikas a mangyebkas iti ayatko Kenkuana.
Datayo amin dagiti “annak ti katulagan” nga agsaknap iti intero a daga kadagiti pagilian ken kultura iti tunggala kontinente, nga agbilang iti minilion, bayat ti panangur-uraytayo iti nadayag a panagsubli ti Apo ken Mangisalakantayo. Agsilnag a kas maysa a silaw kadagiti adda iti aglawlawtayo, sipupuot a sukogentayo dagiti tarigagay, pampanunot, pili, ken tignaytayo. Iti panagkagumaantayo a mangam-ammo ken mangayat iti Mangisalakan, isinatayo ti bagitayo manipud iti lubong babaen iti katulagan iti Dios, nga agbalintayo a naiduma, saan a gagangay, ken espesial, bayat ti panagdayawtayo Kenkuana ken dagiti pannursurona, a ditayo isina ti bagitayo iti dadduma a sabali ti pammatida.
Nakaskasdaaw a panagdaliasat ti panagbalin a trigo iti tengnga dagiti ruot, no dadduma naut-ot ti puso ngem mapakalma babaen ti panagmataengan ken panangipatalged iti pammatitayo. Bayat ti panangipalubosyo iti ayatyo iti Mangisalakan ken ti ayatna kadakayo a lumned a nauneg iti pusoyo, ikarik kadakayo ti nainayon a panagtalek, talna, ken rag-o iti panangsangoyo kadagiti karit ti biagyo. Ket ikari ti Mangisalakan kadatayo: “Ummongek[to] dagiti taok, maibatay iti pangngarig maipapan ti trigo ken dagiti ruot, tapno ti trigo mataginayon kadagiti pagurnongan a mangtagikua iti agnanayon a biag, ken makoronaan iti nailangitan a dayag.”26 Iti nagan ni Jesucristo, amen.