Agbalinkayo a Naan-anay Kenkuana
Maragpattayo laeng ti kinaan-anay babaen iti parabur ti Dios.
Addaan iti bileg ti Nailangitan nga Ama ken ti Mangisalakantayo a ni Jesucristo a mangisalakan ken mangbalbaliw kadatayo. Matulongandatayo nga agbalin a kas Kadakuada.
Sumagmamanon a awenen ti napalabas, nangrugi nga agproblema iti salun-at ti maysa kadagiti appokomi a ni Aaron. Kanayon a mabannog, addaan iti sugat, ken saan a nasalun-at ti langana. Kalpasan ti medikal a panangeksamen, naammuan nga adda nakaro nga aplastic anemia-na, a saanen nga agpataud ti pata ti tulangna iti nalabaga ken puraw a selula ti dara ken platelet. No di maagasan, saan nga agbalay ti darana a nasayaat wenno dina malabanan ti impeksion, isu nga uray no bassit lang a dunor wenno an-annayen ket agbalin a nakaro.
Adda tiempo a naawatna ti regular a panagpayalison iti platelet ken dara tapno masaluadan isuna iti peggad. Inlawlawag ti doktor a ti laeng agasna ket bone marrow transplant, ket tapno mangyeg iti kasayaatan a resulta masapul a maysa kadagiti kabsatna ti mangidonar. No mai-match ti maysa kadagiti kabsatna, makaispal-biag ti resulta ti transplant. Iti pannakaeksamen ti uppat a kakabsatna, nagbalin a perfect match ni Maxwell.
Ngem uray no adda pudno a donor match, mabalin nga adda komplikasion ti bone marrow transplant. Ti proseso ket kasapulan a madadael nga umuna dagiti selula iti pata ti tulangna babaen iti chemotherapy ken radiation sakbay a maawatna ti stem cell manipud iti pata ti tulang ti kabsatna a ni Maxwell. Gapu ta nakapuy ti resistensia ni Aaron, masapul a maisina isuna iti ospital iti sumagmamano a lawas ken sumagmamano a bulan iti balayda nga adda dagiti naipangruna a pagalagadan, pannakaiparit, ken panagagas.
Ti resulta ti transplant ket awaten koma ti bagi ni Aaron ti selula a maidonar ken in-inut ti panangpataud ti selula ni Maxwell kadagiti nalabaga ken puraw a selula ti dara ken platelet a kasapulan iti bagi ni Aaron. Pudno a makayeg iti panagbalbaliw iti kasasaad ti bagi ti naballigian a donor transplant. Nakakaskasdaaw nga inlawlawag ti doktor a no nakaaramid ni Aaron iti krimen ket adda nabati a darana iti lugar a nakapasamakan, mabalin a tiliwen ti pulis ti kabsatna a Maxwell. Ti makagapu ket ti dara ni Aaron a naggapu iti nai-transpalnt a selula ni Maxwell ken ti DNA-na, ket kastoyto ti kasasaadna iti unos ti biagna.
Gapu iti pannakaisalakan ni Aaron babaen iti dara ti kabsatna, adu dagiti nagtaud a kapanunotan maipapan iti pannubbot a dara ni Jesucristo ken ti epekto ti Pannubbotna kadatayo. Kayatko ti mangipamaysa ita iti manayon, mamagbalbaliw-iti-biag a mapasamak no ituloktayo nga agaramid ti Apo iti milagro kadatayo.1
Awan ti pannakabalin ni Aaron a mangparmek iti sakitna. Saan a makapataud ti bagina kadagiti selula ti dara a kasapulan tapno mataginayon ti biagna. Uray no ania ti aramidenna, saanna a maagasan ti pata ti tulangna. Kas ken ni Aaron a dina maagasan ti bagina, saantayo met a maisalakan ti bagbagitayo. Uray man no kasano ti kabaelan, sursuro, kinalaing wenno kapigsatayo, saantayo a madalusan dagiti basoltayo, mangpagbalin iti bagitayo nga imortal wenno mangitan-ok iti bagbagitayo. Posible laeng daytoy babaen iti Mangisalakan a ni Jesucristo ken ti awan patinggana a Pannubbotna. “Awan ti sabali a dalan wenno nagan a naited iti sirok ti langit a pakaisalakanan ti tao iti pagarian ti Dios.”2 Babaen iti pannubbot a dara ket madalusan ken mapasantotayo.3
Uray no saan a maagasan ni Aaron ti bagbagina, tapno agballigi ti transplant nasken nga aramidenna ti ibaga dagiti doktor—uray no narigat, narikut dagiti banag. Uray no ditayo maisalakan ti bukodtay a bagi, no agtalektayo iti pagayatan ti Apo ken agtungpal kadagiti katulagantayo, nakalukat ti dalan para iti pannakasubbottayo.4 Kas ti naisangsangayan a proseso a panagbalbaliw ti DNA iti selula ti dara ni Aaron, agbalbaliwto met dagiti pusotayo,5 maipakitatayo ti ladawanna iti langatayo,6 ken agbalintayo a baro a parsua ken ni Cristo.7
Impalagip ni Alma kadagiti tao iti Zarahemla dagiti napasurot iti naglabas a henerasion. Iti pannakisaritana iti amana, inlawlawag ni Alma a “babaen ti pammatina naaramid ti naindaklan a panagbalbaliw iti pusona.”8 Kalpasanna, sinaludsodna, “ Limmansad kadi iti pusoyo daytoy naisangsangayan a panagbalbaliw?”9 Saan a dagiti tao ti nangpabalbaliw kadagiti pusoda. Ti Apo ti nangaramid ti pudno a panagbalbaliwda. Nabatad daytoy ken ni Alma. Imbagana, “Adtoy, pinagbalbaliwna dagiti pusoda.”10 “Impakumbabada ti bagbagida ket nagtalekda iti pudno ken sibibiag a Dios … [ket] nagtulnogda agingga iti panungpalan … [ket] ngarud naisalakanda.”11 Sidadaan dagiti tao a nanglukat iti puspusoda ken nangpapigsa iti pammatida, ket binalbaliwan ngarud ti Apo dagiti pusoda. Anian a naindaklan a panagbalbaliw dayta. Panunotenyo ti nagdumaan iti biag ti dua a lallaki a nagnagan iti Alma sakbay ken kalpasan a nagbalbaliw dagiti pusoda.12
Annaknatayo ti Dios nga addaan iti nadayag a panungpalan. Mabalintayo nga agbalbaliw tapno agbalintayo a kas Kenkuana ken maaddaan iti “pakabuklan ti rag-o.”13 Iti sabali a bangir, kayat ni Satanas nga agbalintayo a marigrigat a kas kenkuana.14 Siwawayatayo nga agpili no asino ti surotentayo.15 No surotentayo ni Satanas, itedtayo kenkuana ti pannakabalin.16 No surotentayo ti Dios, itedna kadatayo ti pannakabalin.
Insuro ti Mangisalakan a “kasapulan nga agbalintayo a naan-anay.”17 Mabalin daytoy a kasla nakabutbuteng. Nalawag a makitkitak dagiti bukodko a pagkapuyan ken mabigbigko no kasano ti kaadayok iti kinaan-anay. Mabalin a mapanunottayo a kasapulan nga agbalintayo a naan-anay, ngem saan a posible dayta. Ti panangsurot kadagiti singasing dagiti libro a mangipapaay iti balakad iti lubong ket dina mayegto dayta. Maymaysa laeng a wagas ken nagan ti makaipaay iti kinaan-anay. Datayo ket “nagbalin a naan-anay babaen ni Jesus a mangibabaet iti baro a katulagan, a nangipatungpal daytoy naan-anay a pannubbot babaen ti panagsayasay ti bukodna a dara.”18 Maragpattayo laeng ti kinaan-anay babaen iti parabur ti Dios.
Mapanunotyo kadi no kasano ti karigat para iti apokomi a ni Aaron a masapul a maawatan ken aramidenna ti amin a medikal nga operasion iti pannaka-transplant-na? Ditay koma ipapan a nasken nga aramidentayo no ania ti maaramid laeng ti Mangisalakan iti namilagruan a proseso iti pannakaan-anaytayo.
Kas pananggibus ni Moroni iti kasuratanna, insurona, “Wen, umasidegkayo ken ni Cristo, ket agbalinkayo a naan-anay kenkuana, … ket no tallikudanyo ti amin a saan a nadiosan, ket ayatenyo ti Dios iti isu amin a kabaelan, panunot ken pigsayo, agpaay kadakayo ti paraburna, ket babaen ti paraburna agbalinkayo a naan-anay ken ni Cristo.”19 Anian a makaliwliwa ken nabileg a kinapudno! Umdas ti paraburna kaniak. Umdas ti paraburna kenka. Umdas ti paraburna kadagiti “agrigrigat ken madagdagsenan.”20
Kas iti pannakaagas ni Aaron, addanto latta panagduadua iti resultana. Kinapudnona, kasapulan ni Aaron ti maikadua a transplant no adda komplikasion ti umuna. Agyamananmi, a gapu iti naespirituan a panagbalbaliw ti puso, saankami a masdaaw no mapasamak dayta. No agbiagtayo a mayannurot iti pagayatanna, “ken naan-anay a panagtalek kenkuana a kas mannakabalin a mangisalakan,”21 100 porsiento a madalusantayo iti dara ti Mangisalakan ken agbalintayo a naan-anay Kenkuana. Isu ket “Dios ti kinapudno, ket saan a [maka]paglibak.”22
Awan duadua a kasapulan ti tiempo itoy a proseso iti panagbalbaliw ken saan a makumpleto no mataytayo, ngem pudno ti karina. Ngem no kasla mabayag pay ti pannakatungpal dagitoy a kari ti Dios, awatentayo latta dagiti karina, ket ammotayo a matungpalto dagitoy.23
Ti namilagruan a panagbalbaliw a salun-at ni Aaron ket nakaisangbay iti naindaklan a rag-o iti pamiliami. Panunotenyo ti naindaklan a rag-o iti langit no adda dagiti nabileg a panagbalbaliw iti kararuatayo.
Ay-ayatendatayo ti Nailangitan nga Ama ken ti Mangisalakantayo a ni Jesucristo, ken sipaparaburda a mangbalbaliw ken mangan-anay kadatayo. Kayatda nga aramiden daytoy. Dayta ti kangrunaan iti aramid ken gloriada.24 Paneknekak nga adda pannakabalinda a mangaramid iti daytoy no umasidegtayo Kadakuada a buyogen ti pammati. Iti nagan ni Jesucristo, amen.