Situtulokkayo Kadi Pay Laeng?
Ti kinatuloktayo a sumurot ken ni Jesucristo ket direkta a maitunos iti kaadu ti panawen nga ikumittayo nga addatayo kadagiti nasantuan a lugar.
Maysa a Domingo, bayat ti panagsaganak a makiranud iti sakramento kalpasan ti sumagmamano a lawas ti naidutok a pagrebbengak iti komperensia ti stake, adda napanunotko a makaay-ayo ken nabileg a kapanunotan.
Idi rugian ti priest a bendisionan ti tinapay, sipipinget a naitukit iti panunotko ken pusok dagiti balikas a namin-adu a nangngegko idin. “Ken paneknekanda kenka, O Dios, Agnanayon nga Ama, tapno siaayatda a mangawat iti nagan ti Anakmo, ken kanayon a laglagipenda ken tungpalenda dagiti bilin nga intedna kadakuada; tapno kanayon nga agtaeng kadakuada ti Espirituna.”1 Namin-ano a nagsaksitayo iti Dios a situtuloktayo?
Bayat ti panangutobko iti pateg dagita a sagrado a balikas, naikintal kaniak ti balikas a situtulok a diak pay pulos naaramid idi. Napno ti panunotko ken pusok kadagiti nasam-it ken sagrado a kapadasan, nga addaan ayat ken panagyaman iti pangsubbot a sakripisio ti Mangisalakan, ken iti napateg nga akemna iti plano ti pannakasubbot ti Ama para kaniak ken ti pamiliak. Kalpasanna, nangngeg ken nariknak dagiti mamagtignay a balikas ti kararag iti danum: “Tapno paneknekanda kenka … tapno kanayon a laglagipendaka.” 2 Naawatak a naimbag kadayta a kanito a nalablabes ngem dagiti nasayaat a panggep ti panangtungpalko kadagiti katulagan.
Saan a ritual ti relihion ti pannakiranud iti sakramento a mangipasimudaag iti pammalubostayo. Nabileg a palagip daytoy iti kinapudno ti awan patinggana a Pannubbot ti Mangisalakan ken ti panagkasapulan a kanayon a manglagip Kenkuana ken mangtungpal kadagiti bilinna. Napateg unay ti kinatulok tapno mangipamaysa iti Mangisalakan ta isu ti kangrunaan a mensahe ti dua a kaaduan a naadaw a nasantuan a kasuratan iti Simbaan: dagiti kararag iti sakramento. Ti pannakaawat iti kinapudno no ania ti situtulok unay nga ipaay ti Nailangitan nga Ama iti tunggal maysa kadatayo babaen ti Bugbugtong nga Anakna ti rumbeng a mangpataud ti naan-anay a reggettayo a kanayon a situtulok a kas subad.
Nabangon kadi a sititibker ti naespirituan a pundasiontayo ken ni Jesucristo?
No narabaw wenno parparawpaw ti naespirituan a pundasiontayo, mabalin nga agannayastayo nga ibatay ti kinatuloktayo iti maysa a sosial a panangamiris iti gastos-benepisio wenno maysa a personal a di kumbiniente nga indeks. Ket no awatentayo a buklen ti salaysay ti Simbaan ti kadaanan wenno saan nga umisu a napolitikaan a pagalagadan ti kagimongan, dagiti saan a realistiko a personal a restriksion, ken dagiti panagkumit iti panawen, ngarud agpapada nga adda depekto dagiti konklusiontayo maipapan iti kinatulok. Ditayo namnamaen a positibo nga agannayas ti pagbatayan ti kinatallugod iti mangimpluensia iti social media wenno managayat ti TikTok. Dagiti alagaden ti tattao ket manmano a maitunos iti nadiosan a kinapudno.
Ti Simbaan ket maysa a paguummongan a lugar dagiti saan a perpekto a tattao nga agayat ti Dios ken situtulok a sumurot ken ni Apo Jesucristo. Nairamut dayta a kinatulok iti kinapudno a ni Jesus ti Cristo, ti Anak ti sibibiag a Dios. Maipakaammo daytoy nadiosan a kinapudno babaen laeng ti bileg ti Espiritu Santo. Ngarud, direkta a maitunos ti kinatuloktayo iti kaadu ti panawen nga ikumittayo nga adda kadagiti nasantuan a lugar nga adda ti impluensia ti Espiritu Santo.
Nasayaat no mangbubostayo iti ad-adu a panawen iti addaan kaipapanan a panagsasarita a mangilawawag kadagiti pakaseknantayo iti maysa a naayat nga Ama idiay Langit ken basbassit a panawen a mangsapul kadagiti kapanunotan dagiti dadduma a timek. Mabalintayo pay a pilien a baliwan ti inaldaw a news feedtayo kadagiti balikas ni Cristo kadagiti nasantuan a kasuratan ken kadagiti naimpadtuan a balikas dagiti sibibiag a propetana.
Ti pateg nga ipaaytayo iti panangngilin ti aldaw ti Sabbath, panagbayad ti napudno nga apagkapullo, panangikut iti agdama a temple recommend, idadar-ay iti templo, ken panangdayaw kadagiti sagrado a katulagantayo iti templo ket dagitoy amin ti nabileg a mangipasimudaag iti kinatuloktayo ken pakakitaan ti panagkumittayo. Situtuloktayo kadi a mangaramid iti ad-adu pay ngem iti narabaw a panagkagumaan a mangpapigsa iti pammatitayo ken ni Cristo?
Naan-anay ti panagayat ti Nailangitan nga Ama kadatayo, ngem umay dayta nga ayat a buyogen ti naindaklan a namnama. Namnamaenna a situtuloktayo a mangikabil iti Mangisalakan a kangrunaan a sentro ti panagbiagtayo. Ti Mangisalakan ti naan-anay a pagwadantayo iti kinatulok nga agpasakup iti Ama iti amin a banag. Isu “ti dalan, ti kinapudno, ken ti biag.”3 Situtulok a sinubbotna dagiti basoltayo. Situtulok a mangpalag-an kadagiti dadagsentayo, mangpakalma kadagiti butengtayo, mangted kadatayo iti pigsa, ken mangyeg iti kappia ken pannakaawat iti puspusotayo iti panawen ti panagrigat ken panagladingit.
Ngem maysa a pagpilian ti pammati ken ni Jesucristo. “No saan[tayo] a mabalin a tarigagayan a nalablabes ngem mamati”4 kadagiti balikasna, addaantayo iti maysa a pangrugian wenno balbaliwan manen ti panagdaliasattayo iti pammati. Dagiti balikasna, no maimula iti puspusotayo kas maysa a bukel ken mataripato a naimbag, agramut, ket dumakkelto ti pammatitayo iti pammatalged ken agbalin a pagbatayan ti tignay ken bileg. Ti Libro ni Mormon ti kabilgan a pamataudantayo para iti panangpadakkel ken panangpasubli iti pammatitayo. Mangpapartak iti pammati ti kinatulok.
Ti mortalidad, babaen ti nadiosan a plano, ket saan a nalaka ken makaparmek no dadduma. Nupay kasta, “adda [tayo], tapno maaddaan[tayo] iti ragsak”!5 Mangisangbay iti manayon a rag-o ti mangipokus iti Mangisalakan ken dagiti sagrado a katulagantayo! Ti panggep ti mortalidad isu ti mapaneknekan ti kinatuloktayo. “Ti naindaklan nga aramid ti biag [ken ti gatad ti kinadisipulo] ket ti panangsursuro iti pagayatan ti Apo ket kalpasanna aramiden dayta.”6 Agturong ti pakabuklan ti rag-o ti pudno a kinadisipulo. Situtuloktayo kadi a mangbayad iti gatad ti kinadisipulo?
Saan a simple a checklist ti dana ti katulagan; proseso daytoy ti naespirtuan a panagdur-as ken panangpauneg iti panagkumit ken ni Apo Jesucristo. Ti mangbangon iti pammati ken panagtalek ken ni Cristo ti kangrunaan a panggep ti tunggal bilin, prinsipio, katulagan, ken ordinansa. Ti determinasiontayo nga isentro ti biagtayo ken ni Cristo, ngarud, masapul nga agtultuloy—awanan iti kondision, awanan iti kasasaad, wenno saan a narabaw. Ditayo kabaelan a mangala iti bakasion wenno aginanatayo mismo manipud iti kinatuloktayo nga “agtakder a saksi ti Dios iti amin a panawen ken amin a banag, ken iti amin a lugar.”7 Saan a nalaka ti kinadisipulo, gapu ta saan a magatadan ti pannakikadua ti Espiritu Santo.
Awan duadua a pampanunoten ti Apo ti aldawtayo idi insurona ti pangngarig maipapan kadagiti sangapulo a babbalasang. Kinunana kadagiti lima a masirib, isuda ti “nangala iti Nasantuan nga Espiritu a bagnosda, ken saanda a pinaallilaw,”8 idinto a “naiddep” dagiti pagsilawan dagiti maag gapu iti kinakurang ti lana.9 Nalabit dagiti balikas ni Nephi ti kasayaatan a mangiladawan kadagitoy sigud a napudno a kameng ti Simbaan: “Ket pagtalnaennanto dagiti dadduma, ket allilawennanto ida nga iturong iti nailubongan a talged, tapno kunadanto: Nasayaat amin iti Zion.”10
Ti nainlasagan a kinatalged isu ti panagsapul ken panagtalek kadagiti nailubongan a bambanag imbes a ni Cristo—iti sabali a pannao, panangkita babaen dagiti sekular a lente imbes a dagiti naespirituan a lente. Ikkannatayo ti Espiritu Santo iti kabaelan a mangkita “kadagiti banag a kas iti kinapudnoda, ken … kas iti pagbalinandanto.”11 Iti laeng “babaen ti bileg ti Espiritu Santo a [maammuantayo] ti kinapudno ti amin a banag”12 ken saan a paallilaw. Ikabiltayo ni Cristo iti sentro ti biagtayo ken ikaritayo ti kinatuloktayo nga agtungpal kadagiti bilinna saan a gapu ta bulsektayo ngem gapu ta makakitatayo.13
Kasanon dagiti maag a babbalasang? Apay a saanda a situtulok a mangbitbit iti pagikkan iti naespirituan a lana? Intantanda laeng kadi? Nalabit a tinagilag-anda unay gapu ta saan a maaramat daytoy wenno kasla saan a kasapulan? Ania man ti rason, naallilawda maipapan ti napateg nga akem ni Cristo. Daytoy ti kangrunaan a pangallilaw ni Satanas ken no apay a naiddep idi agangay dagiti pagsilawanda iti pammaneknek gapu iti kinakurang ti naespirituan a lana. Metapora iti panawentayo daytoy a pangngarig. Adu ti umadayo iti Mangisalakan ken kadagiti katulaganda a nabayagen sakbay a pumanawda iti Simbaanna.
Agbibiagtayo iti awan kapadana a panawen a nabayagen nga impadto dagiti nagkauna a propeta, ti aldaw nga agpungtot ni Satanas “iti puspuso dagiti annak ti tattao, ket gutugotenna ida a manggura iti banag a nasayaat.”14 Adu nga amang kadatayo ti agbibiag iti virtual a lubong a nalikmutan iti paglinglingayan ken mangmangted iti mensahe a maisuppiat iti nadiosan a pakabigbigan ken panamati ken ni Cristo.
Ti kabilgan a naespirituan nga impluensia iti biag ti maysa nga ubing ket ti nalinteg a pagwadan dagiti managayat a nagannak ken lelang ken lelong a sipupudno nga agtungpal kadagiti bukodda a sagrado a katulagan. Isuro dagiti naigagara a nagannak kadagiti annakda ti pammati ken ni Apo Jesucristo tapno isuda met “maammuan[da] ti pamuidanda a mangkita iti pakaugasan ti basbasolda.”15 Mangiturong iti naespirituan a pannakadangran ti matagtagilag-an ken saan nga agtultuloy a panagtungpal iti katulagan. Masansan a dakkel a pagpeggadan iti naespirituan a pannakadadael kadagiti annak ken appokotayo. Nagannak ken lelang ken lelong, situtuloktayo kadi pay laeng?
Imballaag ni Presidente Russel M. Nelson a “kadagiti umay nga aldaw, saanton a posible ti agbiag a naespirituan no awan ti pangiwanwan, pangiturong, pangliwliwa, ken agtultuloy nga impluensia ti Espiritu Santo.”16 Nalawag ken di mapagbiddutan daytoy a ballaag a mangsindi kadagiti pagsilawantayo ken mangpaadu kadagiti reserbatayo a naespirituan a lanatayo. Situtuloktayo kadi pay laeng a mangsurot kadagiti sibibiag a propeta? Ania ti lebel ti naespirituan a lana iti pagsilawanyo? Ania dagiti panagbalbaliw iti personal a biagyo a mangpabalin kadakayo tapno maaddaan a kanayon iti impluensia ti Espiritu Santo?
Ita, kas idi panawen ni Jesus, addanto dagiti agsubli, a dida kayat nga awaten ti gatad ti panagbalin a disipulo. Idinto nga umad-adu ti naulpit ken makagura a pammabalaw iti Simbaan ti Manangisalakan ken amin a sumurot Kenkuana, kasapulan iti kinadisipulotayo ti natultulok a panangilinteg ken panangpapigsa iti naespirituan a duritayo ken saan nga ipangag dagitoy.17
No nabangon a natibker ti naespirituan a pundasiontayo ken Jesucristo, saantayto a matnag ken saantayo a nasken nga agbuteng.
“Adtoy, kalikaguman ti Apo ti puso ken ti natallugod a panunot; ken ti natallugod ken natulnog manganto iti nasayaat iti daga ti Zion kadagitoy maudi nga aldaw.”18
Sapay koma ta kanayon a situtuloktayo. Iti sagrado a nagan ni Apo Jesucristo, amen.