Kinapintas iti Dapo: Ti Pangpaimbag a Dana ti Pannakapakawan
Tapno agbiag iti wagas a mangtedkayo iti kinapintas iti dapo ti biagyo ket aramid ti pammati a mangsurot iti Mangisalakan.
Iraman ti libro ti 1 Samuel ti di unay nalatak nga estoria ni David, ti masakbayan nga ari ti Israel, ken ti maysa a babai nga agnagan iti Abigail.
Kalpasan ti ipapatay ni Samuel, pinanawan ni David ken dagiti taona ni Ari Saul, a nanggadat iti biag ni David. Inaywananda dagiti arban ken adipen ti maysa a nabaknang a lalaki nga agnagan Nabal, a naulpit. Nangibaon ni David iti 10 a taona a mangsaludo ken Nabal ken agkiddaw iti kasapulan unay a taraon ken abasto.
Siinsulto a simmungbat ni Nabal iti kiddaw ni David ket pinapanawna dagiti taona nga awan bitbitda a taraon.
Gapu ta nasaktan, insagana ni David dagiti taona a sumango ken Nabal ken ti sangakabbalayanna, a kunkunana, “Insubbotnak ti dakes gapu iti naimbag.”1 Imbaga ti maysa nga adipen ken Abigail nga asawa ni Nabal maipapan iti dakes a panangtrato ni lakayna iti tattao ni David. Dagus nga inurnong ni Abigail dagiti kasapulan a taraon ken abasto ket napan bimmallaet.
Idi nasabat ni Abigail isuna, “nagruknoy iti sango ni David iti rupana, ket nagtamed iti daga,
“Ket nagruknoy iti sakana, ket kinunana, Siak, apok, adda koma kaniak daytoy a kinadakes. …
“Ita ngarud, … pinasardengnaka ti Apo nga umay mangibukbok iti dara, ken mangibales iti bagim babaen ti bukodmo nga ima. …
“… Ita daytoy a bendision nga inyeg ti adipenmo iti apok, maited koma pay kadagiti agtutubo a lallaki. …
“Dawatek kenka, pakawanem ti basol ti adipenmo. …
“Ket kinuna ni David ken Abigail, Bendito koma ni Jehova a Dios ti Israel a nangibaon kenka ita nga aldaw a sumabet kaniak:
“Ket bendito koma ti balakadmo, ken benditoka koma, a nanglapped kaniak ita nga aldaw nga umay a mangibukbok iti dara, ken saan a mangibales iti bagik babaen ti bukodko nga ima. …
“Isu nga inawat ni David ti imana ti inyegna kenkuana, ket kinunana kenkuana, Sumalogka a sitatalna iti balaymo; … Dimngegak iti timekmo, ket inawatko ti kinataom.”2
Apada a pimmanawda a sitatalna.
Iti daytoy a salaysay, makita ni Abigail kas nabileg a kita wenno simbolo ni Jesucristo.3 Babaen ti pangsubbot a sakripisiona, maruk-atannatayo iti basol ken dagsen ti nasaktan a puso ken ipaayannatayo iti abasto a kasapulantayo.4
No kasano a situtulok ni Abigail a mangawat iti basol ni Nabal iti bagina, kasta met ti Mangisalakan—iti di maawatan a wagas—inawatna Kenkuana ti basbasoltayo ken basbasol dagita nangdangran wenno nangsair kadatayo.5 Idiay Getsemani ken iti krus, inawatna dagitoy a basol. Nagaramid iti wagas a mawayawayaantayo ti managibales a puso. Dayta a “wagas” ket babaen ti panangpakawan—a maysa kadagiti karigatan a banag nga aramidentayo ken maysa kadagiti kadiosan a banag a mapasarantayo. Iti dana ti pammakawan, ti bileg ni Jesucristo a mangsubbot makapagayus iti biagtayo ken mangrugi a mangagas kadagiti nauneg a saem ti puso ken kararua.
Insuro ni President Russell M. Nelson nga idiayaannatayo ti Mangisalakan iti kabaelan a mamakawan:
“Babaen ti awan patinggana a Pannubbotna, mapakawanyo dagiti nangdangran kadakayo ken dagiti di pulos mangawat iti pagrebbengan iti kinaulpitda kadakayo.
“Gagangay a nalaka ti mamakawan iti maysa a sipupudno ken sipapakumbaba nga agdawat iti pammakawanyo. Ngem ikkannakayo ti Mangisalakan iti kabaelan a mangpakawan iti asino man a nangmaltrato kadakayo iti ania man a wagas. Sa dagiti makapasakit nga aramidda didan madadael ti kararuayo.”6
Ti panangyeg ni Abigail iti nawadwad a taraon ken abasto ket makaisuro kadatayo nga idiaya ti Mangisalakan kadagiti nadangran, ti sustento ken tulong a kasapulantayo tapno maagasan ken mapaimbag.7 Ditay nabaybay-an a mangtaming kadagiti pagbanagan ti aramid ti dadduma a datdatayo; malaingantayo met ken maikkan iti gundaway a maisalakan manipud iti dagsen ti nasaktan a puso ken ania man nga aramid a sumaruno.
Kinuna ti Apo, “Siak, ti Apo, pakawanekto ti pakawanek, ngem kadakayo nasken a pakawanenyo amin a tao.”8 Idawat ti Apo a mamakawantayo para iti bukod a pagimbagantayo.9 Ngem dina idawat nga aramidentayo daytoy nga awan tulong, ayat, ken pannakaawatna. Babaen kadagiti katulagantayo iti Apo, makaawat ti tunggal maysa kadatayo iti mangpatpatibker a bileg, pannarabay, ken tulong a kasapulantayo a mamakawan ken mapakawan.
Ammoyo koma a ti panangpakawan iti maysa a tao dina kayat a sawen nga ikabilyo ti bagiyo iti kasasaad nga agtultuloy a masaktankayo. “Maaramidtayo a pakawanen ti maysa a tao ken pariknaannatayo latta ti Espiritu nga umadayo kadakuada”10
Kas iti panangtulong ni Abigail ken David a di maaddaan iti “makasair a puso”11 ken umawat iti tulong a kasapulanna, isu a tulongannakayo ti Apo. Ay-ayatennakayo, ket sabtennakayo iti dalanyo “nga addaan mangag-agas iti payakna.”12 Tarigagayanna ti kappiayo.
Nasaksiak a mismo ti milagro ni Cristo a nangpaimbag iti nasaktan a pusok. Babaen ti pammalubos ti amak, ibinglayko a dimmakkelak iti taeng a diak kanayon marikna ti talged gapu iti emosional ken berbal a pannakamaltrato. Kadagidi tawen ti kinaagtutubok ken panagkabannuagko, kinagurak ti amak ken adda gura iti pusok iti dayta a sakit.
Iti panaglabas ti tawtawen ken iti panagkagumaanko a mangsarak iti kappia ken pannakapaimbag iti dayta a dana ti pammakawan, naamirisko a ti isu met laeng nga Anak ti Dios a nangsubbot iti basbasolko, isu met laeng ti Mannubbot a mangisalakanto met kadagiti nalaus a nangpasakit kaniak. Diak pudno a maawatan ti umuna a kinapudno a diak mamati iti maikadua.
Idi dimmakkel ti ayatko iti Mangisalakan, dimmakkel met ti tarigagayko a mangsukat iti sakit ken gura iti makaagas a balsamona. Daytoy ti proseso iti adu a tawen, agkasapulan ti tured, kinalaka a maaringan, panagpursigi ken panagsursuro nga agtalek iti nadiosan a bileg ti Mangisalakan a mangispal ken mangagas. Adda pay laeng aramidek, ngem awanen ti gura iti pusok. Naikannak iti “baro a puso”13—maysa a nakarikna iti nauneg ken manayon nga ayat ti Mangisalakan, a nagtalinaed iti sibayko, a siaannad ken siaanus a nangiturong kaniak iti nasaysayaat a lugar, a nakipagsangit kaniak, a nakaammo iti ladingitko.
Inikkannak ti Apo iti pangsupapak a bendision a kas met laeng idi nangyeg ni Abigail iti kasapulan ni David. Nagyeg kadagiti mannursuro iti biagko. Ket ti kasam-itan ken kangrunaan a mangbalbaliw iti amin ket ti relasionko iti Nailangitan nga Amak. Babaen Kenkuana, siyayaman a naammuak ti nadungngo, mangsalaknib, ken mangiwanwan nga ayat ti perpekto nga Ama.
Kinuna ni Elder Richard G. Scott: “Saanyo a mapunas ti naaramiden, ngem makapagpakawankayo.14 Ti pammakawan ti mangagas iti nakaro, pagpeggadan a sugat, ta palugodanna ti ayat ti Dios a mangparmek iti gura iti puso ken panunotyo. Dalusanna ti panunotmo iti tarigagay nga agibales. Daytoy iti lugar para iti pangdalus, pangagas, pangisubli iti ayat ti Apo”15
Naaddaan met ti amak iti namilagruan a panagbalbaliw ti pusona iti napalabas a tawtawen ket immasideg iti Apo—banag a diak koma ninamnama ditoy a biag. Sabali pay a pammaneknek kaniak ti naan-anay ken mangbalbaliw a bileg ni Jesucristo.
Ammok a kabaelanna nga agasan ti managbasol ken dagiti nagbasol. Isu ti Mangisalakan ken Mannubbot iti lubong, a nangted iti biagna tapno makapagbiagtayo manen. Kinunana: “Adda kaniak ti Espiritu ti Apo, ta pinulotannak a mangikasaba iti naimbag a damag kadagiti napanglaw; imbaonnak a mangagas iti nasair ti pusonamangikasaba iti pannakawayawaya dagiti balud, ken pannakakita manen dagiti bulsek, pannakaruk-at dagiti maparparigatan.”16
Iti amin a nasair ti pusoda, balud, nasugatan, ken nalabit nabulsek gapu iti pannakasair wenno basol, idiayana ti pannakaagas, pannakapaimbag, ken pannakawayawaya. Paneknekak a pudno ti pannakaagas ken panagimbag nga idiayana Ti panagoras dayta a pannakaagas ket agduduma iti tunggal tao ket ditay ikeddeng ti panagorasda. Napateg nga ipalubostayo ti bagitayo iti kasapulan a panawen tapno umimbag ken agbalintayo a naasi iti bagitayo iti proseso. Ti Mangisalakan kanayon a naasi ken mangikaso ken agtakder a nakasagana a mangted iti tulong a kasapulantayo.17
Iti dana ti pammakawan ken pannakaagas adda pili a di mangpatalinaed iti di nasalun-at a pagrukodan wenno relasion iti pamiliatayo wenno sabali a lugar. Iti amin nga adda iti uneg ti impluensiatayo, maidiayatayo ti kinaasi iti kinaranggas, ayat iti gura, kinadungngo iti kinaulpit, kinatalged iti rigat, ken talna iti panagsusupiat.
Ti panangted iti naipaidam kenka ket nabileg a paset ti nadiosan a pannakaagas a posible babaen ti pammati ken Jesucristo. Tapno agbiag iti wagas a mangtedkayo, kas kinuna ni Isaias, iti kinapintas iti dapo ti biagyo18 ket maysa nga aramid ti pammati a mangsurot iti katan-okan nga ulidan ti Mangisalakan a nagsagaba iti amin tapno matulonganna ti amin.
Nagbiag ni Jose a taga Egipto iti dapo. Ginura dagiti kakabsatna, liniputan, nailako a kas adipen, di umno a naibalud, ken nalipatan ti maysa a nangikari a tumulong. Ngem nagtalek iti Apo. “Kadua ti Apo ni Jose”19 ket inkonsagrarna dagiti pannubokna iti bukodna a bendision ken panagdur-as—ken iti pannakaisalakan ti pamiliana ken ti intero nga Egipto.
Idi naam-ammo ni Jose dagiti kakabsatna kas maysa a naindaklan a lider idiay Egipto, naiparangarang ti pammakawan ken napintas a panniriganna iti napintas a balikasna:
“Ita ngarud dikay agladingit wenno agpungtot iti bagbagiyo gapu ta inlakodak ditoy: ta imbaonnak ti Dios iti sanguananyo tapno mataginayon ti biag. …
“Ita, saan a sika ti nangibaon kaniak ditoy, no di ket ti Dios.”20
Babaen ti Mangisalakan, ti biag ni Jose nagbalin a “kinapintas iti dapo.”21
Kinuna ni Kevin J. Worthen, presidente ti BYU, a ti Dios “maaramidna a dumteng ti nasayaat … di laeng a manipud iti balligitayo no di ket manipud iti pannakapaaytayo ken ti dadduma a makaigapu iti saem kadatayo. Nasayaat ken nabileg ti Dios.”22
Paneknekak a ti kadakkelan nga ulidan ti ayat ken pammakawan ket ti Mangisalakantayo, ni Jesucristo, nga iti napait a panagsagaba kinunana, “Ama, pakawanem ida; ta dida ammo ti ar-aramidenda.”23
Ammok a tarigagayan ti Amatayo idiay Langit ti kinaimbag ken namnama para iti tunggal maysa nga annakna. Iti Jeremias mabasatayo, “Ta ammok dagiti pampanunotko kadakayo, kuna ti Apo, dagiti pampanunot ti talna.”24
Ni Jesucristo ti bukodyo a Mesias, ti naayat a Mannubbot ken Mangisalakanyo, nga ammona dagiti araraw ti pusoyo. Tarigagayanna ti pannakaagas ken ragsakyo. Ay-ayatennakayo. Makipagsangit kadakayo kadagiti ladingityo ken agrag-o a mangpaimbag kadakayo. Naimpusuan nga awatentayo koma ti naayat nga imana a kanayon a nakaunnat25 iti pannagnatayo iti makaagas a dana ti pammakawan ket daytoy ti ikararagko iti nagan ni Jesucristo, amen.