Panangbangon iti Biag a Naandur iti Kabusor
Ikararagko a maitultuloytayo a bangonen ti biagtayo a mangsurot kadagiti plano ken teknikal nga espesipikasion ti nadiosan a disenio nga insurat ti Nailangitan nga Amatayo.
Iti panaglabas dagiti tawen manipud iti daytoy napintas a pulpito iti Conference Center, nakaawatkami iti natan-ok a balakad, inspirasion, instruksion, ken paltiing. No dadduma, nagusar dagiti agsarita kadagiti panagidilig a nainaig iti tay-ak ti pannakaammo ken padasda a mangiladawan a nalawag ken nabileg ti maysa a prinsipio ti ebanghelio ni Jesucristo.
Iti kastoy, kas pagarigan, naadaltayo maipapan kadagiti eroplano ken panagtayab a ti bassit nga umuna nga isisiasi ti makaiturong kadatayo nga ad-adayo iti sigud a papanantayo.1 Kasta met iti daytoy a wagas, naadaltayo a ti panangidilig iti panagandar ti pusotayo iti nabileg a panagbalbaliw ti puso a kasapulan tapno masungbatan ti awis ti Apo a sumurot Kenkuana.2
Iti daytoy a gundaway, sipapakumbabaak a manginayon ti maysa a panangidilig a naparegta manipud iti tay-ak ti propesional a panagsaganak. Ibagbagak maipapan iti lubong ti civil engineering. Manipud idi rugi ti panagadalko iti unibersidad, inar-arapaapko ti aldaw a makompletok dagiti kasapulan tapno kualipikadoak a mangala iti klase a mangisuro kaniak nga agdisenio kadagiti pasdek ken dadduma pay nga istruktura a maibilang idi nga “anti-seismic.”
Dimteng kamaudiananna ti aldaw iti umuna a klasek iti daytoy a subject. Dagitoy ti immuna a balikas manipud iti propesor: “Sigurado a madanagankayo a mangirugi iti daytoy a kurso ken sursuruen ti agdisenio iti anti-seismic nga istruktura,” nga adu kadakami ti sigagagar a nagtung-ed. Kalpasanna kinuna ti propesor, “Ladingitek a mangibaga kadakayo a saan a posible daytoy, ta diak maisuro kadakayo no kasano ti agdisenio iti pasdek a di madadael ti ginggined. Awan serbina daytoy,” imbagana, “gapu ta mapasamakto latta dagiti ginggined, kayattayo man wenno saan.”
Sa innayonna, “Maisurokayo nga agdisenio kadagiti istruktura a naandur iti seismiko, istruktura a makaandur iti puersa nga aggapu iti ginggined, tapno agtalinaed a nakatakder ti istruktura a di agsagaba iti ania man a nakaro a dadael ket kalpasanna maituloyna nga idiaya ti serbisio gapu iti dayta nakaipasngayanna.”
Aramiden ti inheniero dagiti kalkulasion a mangipakita iti rukod, kalidad, ken pakabigbigan dagiti pundasion, adigi, bileg, kongkreto a tabla, ken dadduma pay nga elemento ti istruktura a madisenio. Agbalin dagitoy a resulta kadagiti plano ken teknikal nga espesipikasion, a nasken a nainget a suroten ti agipasdek tapno matungpal ti trabaho ket iti kasta matungpal ti panggep a nakadiseniuanna ken maibangbangon.
Nupay nasurok a 40 tawen ti napalabas sipud dayta umuna a klase iti seismic-resistant engineering, malagipko unay ti kanito a nangrugiak a makagun-od iti naun-uneg, naan-anay a pannakaawat iti kinapateg nga adda koma iti daytoy a konsepto kadagiti istruktura a diseniok iti masakbayan a propesionko. Saan laeng a dayta, no di ket napatpateg pay—a manayon nga adda dayta iti pannakabangon ti bukodko a biag ken kadagiti maimpluensiaak iti nasayaat.
Nabendisionantayo nga agtalek iti pannakaammo iti plano ti pannakaisalakan a pinarsua ti Nailangitan nga Amatayo, maaddaan iti naisubli nga ebanghelio ni Jesucristo, ken agpannuray iti naparegta a direksion dagiti sibibiag a propeta! Amin nga immuna buklenda dagiti nadiosan a nadisenio a “plano” ken “teknikal nga espesipikasion” a nalawag a maisurodatayo no kasano a bangonen ti naragsak a biag—biag a naandur iti basol, sulisog, ken iti panangraut ni Satanas, nga isu ti desperado a mangupay iti agnanayon a pagtungpalantayo a makadenna ti Nailangitan nga Amatayo ken dagiti ay-ayatentayo a pamilia.
Ti Mangisalakan Mismo, iti rugi ti panagserbina, “nabaybay-an a sulisogen ti diablo.”3 Ngem nagballigi ni Jesus manipud iti dayta a dakkel a pannubok. Kasano nga agserbi Kenkuana ti kababalin a kontra-Satanas wenno kontra-sulisog? Ti nangpaballigi ken Jesus kadagiti karigatan a kanito ket ti naespirituan a panagsaganana, a nangpalugod Kenkuana nga adda iti kasasaad a mangsupring kadagiti sulisog ti kabusor.
Ania ti sumagmamano a banag a nangtulong iti Mangisalakan nga agsagana para iti dayta a napateg a kanito?
Umuna, nagayuno iti 40 nga aldaw ken 40 a rabii, maysa a panagayuno a nabuyogan ti kanayon a panagkararag. Isu a nupay nakapuy iti bagina, napigsa unay ti espirituna. Nupay, ditayo makiddaw nga agayuno iti kasta a kapaut—ketdi iti 24 nga oras laeng ken maminsan iti makabulan—ti panagayuno mangyeg kadatayo iti naespirituan a pigsa ken isagananatayo a mangsupring kadagiti pannubok ditoy a biag.
Iti maikadua a lugar, iti salaysay dagiti sulisog a nakaipasanguan ti Mangisalakan, makitatayo a kanayon a sinungbatanna ni Satanas a sipapanunot iti nasantuan a kasuratan, nga inadawna dagitoy, ken aramatenna iti umno a kanito.
Idi sinulisog ni Satanas a pagbalinenna a tinapay dagiti bato tapno mapennekna ti bisinna manipud iti napaut a panagayunona, kinuna ti Apo kenkuana, “Naisurat, saan nga agbiag ti Tao babaen laeng iti tinapay, no di ket babaen iti tunggal sao a rummuar iti ngiwat ti Dios.”4 Kalpasanna, idi adda ti Apo iti pantok ti templo, pinadas ti diablo a sulisogen Isuna tapno ipakitana ti pannakabalinna, a simmungbat ti Apo nga addaan iti turay, “Naisurat manen, dimo sulisogen ti Apo a Diosmo.”5 Ket iti maikatlo a panangpadas ni Satanas, simmungbat ti Apo, “Naisurat, Agdaydayawka iti Apo a Diosmo, ket isu laeng ti pagserbiam.”6
Ti pasamak ti ginggined mangibati iti markana uray kadagiti istruktura nga umisu ti pannakadisenio ken pannakaaramidna—dagiti pagbanagan a kas iti nalabit a sumagmamano a bitak, natnag a muebles wenno bobida, ken naburak a tawtawa. Ngem daytoy nasayaat ti pannakadiseniona ken pannakaaramidna nga edipisio tungpalennanto ti panggepna a mangsalaknib kadagiti agnanaed ditoy, ket babaen ti pannakatarimaanna, mapasublina ti sigud a kasasaadna.
Iti umasping nga uso, dagiti pannakasaplit ti kabusor ti makaigapu iti “bitak” wenno bassit a dadael iti biagtayo, iti laksid ti panagkagumaantayo nga agbiag a maitunos iti naan-anay a nadiosan a disenio. Maiparangarang mismo dagitoy a “bitak” babaen ti panagladingit wenno panagbabawi gapu iti panagbiddut ken gapu iti di naan-anay a panagaramid, wenno gapu iti pannakarikna a saantayo a nasayaat a kas iti kayattayo a pagbalinan.
Ngem ti pudno a napateg ket sinurottayo dagiti nadisenio a plano ti Dios ken espesipikasion, kayatna a sawen, ti ebanghelio ni Jesucristo, agtaktakdertayo pay laeng. Saan a narakrak ti istruktura ti biagtayo gapu iti panagregget ti kabusor wenno gapu iti narigat a kasasaad a nasken a sanguentayo; imbes ketdi, nakasaganatayo nga umabante.
Ti rag-o a naikari iti nasantuan a kasuratan kas panggep ti kaaddatayo7 ket saan koma nga ipapan nga awanto dagiti rigat wenno ladingittayo, nga awanantayto iti “bitak” kas bunga dagiti sulisog, rigat, wenno manipud kadagiti pudno a pannubok ti biagtayo.
Daytoy a rag-o adda pakainaiganna iti pannirigan ni Nephi iti biag idi kinunana, “Ket adu dagiti nakitak a panagsagaba iti panaglabas dagiti aldawko, nupay kasta, naikkannak iti dakkel a parabur ti Apo iti amin nga aldawko.”8 Amin nga aldawna! Uray dagiti aldaw a nagsagaba ni Nephi bayat ti di pannakaawat ken panangilaksid dagiti kakabsatna, uray idi rinautda iti barko, uray iti aldaw a pimmusay ti amana, ni Lehi, uray idi nagbalin da Laman ken Lemuel a mortal a kabusor dagiti taona. Uray kadagidi narigat nga aldaw, narikna ni Nephi ti nalaus a pabor ti Apo.
Maaddaantayo iti talinaay a makaammo a di pulos ipalubos ti Apo a masulisogtayo iti labes ti kabaelantayo a supringen. Awisennatayo ni Alma nga “agsalukag ken agkararag a kanayon, tapno saan[tayo] a masulisog iti nalablabes ngem iti kabaelanyo, ket iti kasta iturongnatayo ti Nasantuan nga Espiritu, nga agbalin a napakumbaba, naemma, managpabus-oy, naanus, napnuan iti ayat ken managitured.”9
Maaramat met ti kastoy iti pannubok ti biag. Ipalagip kadatayo ni Ammon dagiti balikas ti Apo: “Inka … ket anusam dagiti rigatmo, ket itedkonto kadakayo ti balligi.”10
Kanayon nga ipaay ti Apo kadatayo ti tulong no maipasangotayo iti rigat, sulisog, di pannakaawat, pagkapuyan, ken uray pay ni patay. Kinunana, “Ket ita, pudno kunak kadakayo, ket ania man ti ibagak iti maysa ibagak iti amin, agragsakkayo, babassit nga ubbing; ta addaak iti tengngayo, ket saankayo a binaybay-an.”11 Iti kaano man dinatayonto baybay-an!
Ikararagko a maitultuloytayo a bangonen ti biagtayo a mangsurot kadagiti plano ken teknikal nga espesipikasion ti nadiosan a disenio nga insurat ti Amatayo ken nagun-od babaen ti Mangisalakantayo, ni Jesucristo. Iti kasta, gapu iti parabur a dumanon kadatayo babaen ti Pannubbot ti Mangisalakantayo, agballigitayto a mangbangon iti biag a naandur iti basol, naandur iti sulisog, ken mapapigsa a mangibtur kadagiti naliday, narigat a panawen iti biagtayo. Ket ad-adda pay, addatayto iti maysa a kasasaad a magun-odtayo amin a bendision a naikari babaen ti ayat ti Amatayo ken Mangisalakantayo. Iti nagan ni Jesucristo, amen.