Ania ti Pudno?
Ti Dios ti pagtaudan ti amin a kinapudno. Arakupen ti Simbaan ni Jesucristo dagiti Santo iti Ud-udina nga Aldaw ti amin a kinapudno nga ipaawat ti Dios kadagiti annakna.
Ay-ayatek a kakabsatko, agyamanak ti amin para iti daytoy makaparegta a sesion! Manipud iti komperensiatayo idi napan nga Abril, nasaksianmi ti adu a pasamak iti lubong, manipud iti makapaliday agingga iti natan-ok.
Maragsakankami kadagiti report maipapan iti dadakkel a komperensia dagiti agtutubo a maang-angay iti intero a lubong.1 Kadagitoy a komperensia, masursuro dagiti natan-ok nga agtutubotayo nga uray ania ti mapasamak iti biagda, agtaud iti Apo ti kadakkelan a pigsada.2
Maragsakankami ta ad-adu pay a templo ti maibangbangon iti intero a lubong. Babaen ti pannakaidaton ti tunggal baro a templo, umay ti nayon a nadiosan a bileg ditoy lubong tapno pabilgennatayo ken kontraenna dagiti kumarkaro a panagregget ti kabusor.
Buklen ti panagabuso ti impluensia ti kabusor. Nadagsen a basol daytoy.3 Kas Presidente ti Simbaan, patalgedak dagiti pannursuro ni Apo Jesucristo iti daytoy nga isyu. Ilawlawagko man: ania man a kita ti panagabuso iti babbai, ubbing, wenno asino man ket makarimon iti Apo. Agladingit Isuna ken agladingitak no adda madangran. Agleddaang Isuna, ken agleddaangtayo amin gapu iti tunggal tao a nabiktima iti ania man a kita ti panagabuso. Dagiti agaramid kadagitoy nakaam-amak a tignay saanda laeng nga agsungbat iti linteg ti tao ngem sanguendanto pay ti pungtot ti Mannakabalin-amin a Dios.
Iti adun a dekada, nagaramid ti Simbaan iti nasaknap nga addang a mangsaluad—nangnangruna—kadagiti ubbing iti pannakaabuso. Adu dagiti tulong iti website ti Simbaan. Awisenkayo nga adalen ida.4 Naaramid dagitoy a pangiwanwan a mangsaluad kadagiti inosente. Guyugoyek ti tunggal maysa kadatayo nga agalerto iti asino man a mabalin nga agpeggad a maabuso ken agtignaytayo a dagus tapno masaluadan ida. Saan nga ipalugod ti Mangisalakan ti panagabuso, ket kas disipulona, ditayo maaramid.
Adda sabali pay a makaburibor a taktika ti kabusor. Karaman dagita ti panangikagumaanna a manglibeg iti nagbaetan ti pudno ken palso. Ti panaglayus ti impormasion a magun-odan iti murdong ti ramaytayo, pagbalinenna nga ad-adda a narigat a maammuan no ania ti pudno.
Ipalagip daytoy a karit ti padasmi ken ni Sister Nelson idi bisitaenmi ti maysa a dignitario iti pagilian a manmano laeng a tao ti nakangngeg ken ni Jesucristo. Nabiit pay a masakit daytoy patpatgek a lumakay a gayyem. Imbagana kadakami a bayat ti adu nga aldawna iti iddana, masansan a kumita iti bobeda ket agsaludsod, “Ania ti pudno?”
Adu ditoy daga ita ti “mailiklik laeng iti kinapudno gapu ta dida ammo ti pangsapulanda.”5 Kayat ti dadduma a patientayo a relatibo ti kinapudno—a tunggal tao nasken nga ikeddengna a mismo no ania ti pudno. Ti kasta a pammati ket panagtarigagay laeng kadagiti sibibiddut a mangipagarup a didanto met agsungbat iti Dios.
Patpatgek a kakabsat, ti Dios ti pagtaudan ti amin a kinapudno. Arakupen ti Simbaan ni Jesucristo dagiti Santo iti Ud-udina nga Aldaw ti amin a kinapudno nga ipaawat ti Dios iti annakna, nasursuro man iti maysa a sientipiko a laboratorio wenno naawat babaen ti direkta a paltiing manipud Kenkuana.
Manipud iti daytoy a pulpito ita nga aldaw ken inton bigat, agtultuloyto a mangngegyo ti kinapudno. Isuratyo koma dagiti kapanunotan a mangawis iti imatangyo ken dagiti dumteng iti panunotyo ken agtalinaed iti pusoyo. Agkararag a dawatenyo iti Apo a pasingkedanna a pudno ti nangngegyo.
Ay-ayatenkayo, patpatgek a kakabsatko. Idawatko nga ipaayto daytoy a komperensia ti naespirituan a piesta a kalkalikagumanyo. Iti sagrado a nagan ni Jesucristo, amen.