Suroten ni Jesucristo nga Addaan Addang ti Pammati
Matulongannatayo ni Cristo ita kadagiti narigat a panawen. Inaramidna kadagiti immuna a piooner, ket aramidenna ita kadatayo amin.
Agyamanak, koro, iti panagkantayo iti “Faith in Every Footstep.” Naisurat ti musika ken balikas dayta a kanta idi 1996 ni Brother Newell Dayley1 kas panagsagana para iti selebrasion ti maika-150 nga anibersario ti isasangpet dagiti immuna a pioneer iti Salt Lake Valley idi 1847.
Nupay naisurat daytoy a kanta kas panagsagana iti dayta a selebrasion, mayaplikar ti mensahena iti intero a lubong.
Kanayon a magustuak ti koro:
Addaan pammati iti tunggal addang, surotentayo ni Cristo, ti Apo;
Ket napnuan namnama babaen ti nadalus nga ayatna, agkantatayo a sangkamaysa.2
Kakabsat, paneknekak a no surotentayo ni Jesucristo nga addaan addang ti pammati, adda namnama. Adda namnama ken ni Apo Jesucristo. Adda namnama iti amin ditoy a biag. Adda namnama a mangparmek iti bidduttayo, iti pagladingitantayo, iti panagkarigatantayo, iti pannuboktayo ken pakarikutantayo. Adda namnama iti panagbabawi ken pannakapakawan ken panangpakawan iti dadduma. Paneknekak nga adda namnama ken kappia ken Cristo. Matulongannatayo ita kadagiti narigat a panawen. Inaramidna kadagiti immuna a piooner, ket aramidenna ita kadatayo amin.
Daytoy a tawen ti maika-175 nga anibersario ti isasangpet dagiti immuna a pioneer iti Salt Lake Valley, a gapu ti panagutobko iti kapuonak, adda kadakuada ti nagna manipud Nauvoo agingga iti Salt Lake Valley. Adda lelong ken lelangko iti tumeng a nagna kadagiti tanap idi agtutuboda. Ni Henry Ballard agtawen iti 20;3 Ni Margaret McNeil agtawen iti 13;4 ken ni Joseph F. Smith, nga idi agangay nagbalin a maikanem a Presidente ti Simbaan, agtawen iti 9 idi simmangpet iti Salt Lake Valley.5
Naipasangoda kadagiti pannakaipaidam iti amin a kita kas iti nalam-ek a panawen, sakit, ken kinakurang ti umdas a taraon ken kawes. Kas pagarigan, idi simrek ni Henry Ballard iti Salt Lake Valley, nagrag-o a nakakita iti “Naikari a Daga” ngem nagbiag iti buteng amangan no adda makakita kenkuana gapu ta pigpigis unayen ti us-usarenna idi a kawes a saanen a makaabbong iti bagina. Naglemmeng iti likudan dagiti mula iti agmalem agingga a sumipnget. Sa napan iti maysa a balay ket nagpakaasi iti kawes tapno maituloyna ti panagdaliasatna ken birokenna dagiti dadakkelna. Nagyaman isuna iti Dios ta natalged a nakadanon iti masanguanan a pagtaenganna.6
Sinurot dagiti lelang ken lelongko iti tumeng ni Jesucristo nga addaan iti addang ti pammati iti amin a pannubokda. Agyamanak kadakuada ta dida pulos simmuko. Dagiti addang ti pammatida ti nangbendision kaniak ken kadagiti simmaruno a kaputotan, kas kadagiti addang ti pammatiyo ita ti mangbendisionto iti kaputotanyo.
Ti balikas a pioneer agpada a noun ken verb. Kas maysa a noun kayatna a sawen ti tao a maibilang iti umuna nga agsukisok wenno agindeg iti baro a teritorio. Kas maysa a verb, kayatna a sawen ti manglukat wenno mangisagana iti dalan a suroten ti dadduma.7
No panunotek dagiti pioneer a nangisagana iti dalan para iti dadduma, umuna a panunotek ni Propeta Joseph Smith. Pioneer ni Joseph gapu ta dagiti addangna iti pammati ti nangiturong kenkuana iti kakaywan a nagkararaganna ken nanglukat iti dalan tapno maaddaantayo iti pakabuklan ti ebanghelio ni Jesucristo. Ti pammati ni Joseph nga “agdawat iti Dios”8 iti dayta a bigat ti panagsusulbod idi 1820 ket nanglukat iti dalan para iti Pannakaisubli ti pakabuklan ti ebanghelio ni Jesucristo a karaman dagiti propeta ken apostol a naawagan nga agsebi manen iti daga.9 Ammok a propeta ti Dios ni Joseph Smith. Ammok nga inturong dagiti napammatian nga addangna nga agkararag iti Dios Ama ken ti Ay-ayatenna nga Anak, ni Jesucristo.
Dagiti addang ti pammati ni Propeta Joseph ti namagbalin kenkuana a ramit ti Apo iti panangyegna iti Libro ni Mormon, a sabali pay a tulag ni Jesucristo ken ti pangsubbot a paraburna.
Paneknekak a babaen ti pammati ken panagpursigi ni Joseph Smith iti pannakaipasangona ti nakaro a rigat ken suppiat, kinabaelanna ti agbalin a ramit kadagiti ima ti Apo iti panangipasdek manen iti Simbaan ni Jesucristo iti daga.
Iti naudi a sapasap a komperensia, insaritak no kasano a pinaraburannak ti serbisiok kas full-time missionary. Naparaburannak iti panangisurok maipapan iti nadayag a plano ti pannakaisalakan ti Nailangitan nga Amatayo, ti Umuna a Parmata ni Joseph Smith, ken ti patarusna iti Libro ni Mormon. Inwanwan dagitoy naisubli a sursuro ken doktrina dagiti addangko ti pammati iti panangisuro kadagiti naayat a dumngeg iti mensahe ti Pannakaisubli ti ebanghelio.
Dagiti misionariotayo ita ti modern-day pioneer gapu ta ibinglayda daytoy nadayag a mensahe kadagiti tao iti intero a lubong, iti kasta manglukat iti dalan tapno mangam-ammo Kenkuana ken ti Anakna, ni Jesucristo dagiti annak ti Nailangitan nga Amatayo. Ti panangawat iti ebanghelio ni Jesucristo ket manglukat iti dalan para iti tunggal maysa nga agsagana ken umawat kadagiti ordinansa ken dagiti bendision ti Simbaan ken ti templo.
Itay naglabas a sapasap a komperensia, pinasingkedan manen ni Presidente Russell M. Nelson “nga indawat ti Apo iti tunggal maikari, makabael a barito nga agsagana ken agserbi iti mision” ken “opsional ti mision ngem nabileg pay a gundaway” para kadagiti “agtutubo ken makabael a kakabsat a babbai.”10
Patpatgek a babbarito ken babbalasitang, tulongannakayto dagiti addangyo ti pammati a mangsurot iti awis ti Apo nga agmision—nga agbalin a modern-day pioneer—babaen ti pananglukat iti dalan kadagiti annak ti Dios a mangsarak ken agtalinaed iti dana ti katulagan nga agsubli iti nadayag nga imatangna.
Ni Presidente Nelson ti nagbalin a maysa a pioneer iti Simbaan. Kas maysa nga Apostol nagdaliasat ken nanglukat iti adu a pagilian para iti pannakaikasaba ti ebanghelio. Nabiit kalpasan ti panagbalinna a propeta ken Presidente ti Simbaan, indawatna kadatayo a “mangpadakkel iti naespirituan a kabaelantayo nga umawat iti paltiing.”11 Agtultuloy a suruannatayo a mangpapigsa kadagiti pammaneknektayo. Iti debosional dagiti young adult, kinunana:
“Idawatko kadakayo a gun-odenyo ti pammaneknekyo. Itrabaho daytoy. Tagikuaen daytoy. Aywanan daytoy. Taripatuen tapno dumakkel. …
“[Sa] siputanyo dagiti milagro a mapasamak iti biagyo.”12
Surruannatayo nga agbalin nga ad-adda a naespirituan nga agtalek iti bagi. Kinunana nga “iti umay nga aldaw, imposible ti agbiag a naespirituan no awan ti pangiwanwan, pangiturong, pangliwliwa, ken agtultuloy nga impluensia ti Espiritu Santo.”13
Paneknekak a propeta ti Dios ni Presidente Russell M. Nelson iti daga ita.
Ti Mangisalakantayo, ni Jesucristo ti kangrunaan a pioneer a mangisagana iti dalan. Pudno, Isu ti “dalan”14 a pakaipatungpalan ti pannakaisalakan tapnpo makapagbabawi ken, babaen ti pammati Kenkuana, makasublitayo iti Amatayo iti Langit.
Kinuna ni Jesus, “Siak ti dalan, ti kinapudno, ken ti biag: awan ti umay iti Ama, no di magna kaniak.”15 Inkarina a dinatayo baybay-an a di maliwliwa; Umayto kadagiti pannuboktayo.16 Inawisnatayo nga “umay [Kenkuana] nga addaan naan-anay a panggep ti puso, ken agasanna[tayo].”17
Paneknekak a ni Jesucristo ti Mangisalakan ken Mannubbottayo, ti Mangibabaettayo iti Ama. Linuktan ti Nailangitan nga Amatayo ti dalan nga agsubli Kenkuana baben ti panangsurot iti Ay-ayatenna nga Anak, ni Jesucristo, nga addaan napammatian nga addang.
Naipasango dagiti lelong ken lelangko iti tumeng iti adu a tubeng iti yaayda babaen iti wagon, handcart, ken pannagnada iti Salt Lake Valley. Maipasangotayo ket kadagiti karit iti panagdaliasattayo iti biag. Ditay agiduron iti handcarts wenno imaneho dagiti nakaluban a wagon iti nararangkis a bambantay ken nauneg a snowdrifts; ikarkarigatantayo kas iti inaramidda a naespirituan a mangparmek kadagiti sulisog ken karit ti aldawtayo. Adda lasatentayo a dalan; ken turturod—ken no dadduma bambantay—nga ulien. Nupay maiduma ti pannubok itan ngem iti pannubok dagiti immuna a pioneer, saanda a basbassit a karit kadatayo.
Napateg a surotentayo ti propeta ket pagtalinaedentayo a natibker dagiti sakatayo iti dana ti katulagan ti kinapudno, kas kadagiti immuna a pioneer.
Surotentayo ni Jesucristo nga addaan pammati iti tunggal addang. Nasken nga agserbitayo iti Apo ken agserbitayo iti tunggal maysa. Nasken a papigsaentayo ti bagitayo a naespirituan babaen ti panangtungpal ken panangdayaw kadagiti katulagantayo. Nasken a kanayon a mariknatayo ti kinaganat a mangtungpal kadagiti bilin. Gandaten ni Satanas a pabassiten ti panagkumittayo ken ayattayo iti Dios ken ni Apo Jesucristo. Laglagipen koma a no adda mapukaw iti dalanda, ditayto pulos mapukaw iti Mangisalakantayo. Iti bendision ti panagbabawi, makaasidegtayo Kenkuana. Tulongannatayto nga agsursuro, dumur-as, ken agbalbaliw no ikarigatantayo ti agtalinaed iti dana ti katulagan.
Sapay ta surotentayo dagiti addang ni Jesucristo ken, sipapammati iti tunggal addang, agpokustayo Kenkuana, a pagtalinaedentayo a natibker dagiti sakatayo iti dana ti katulagan, daytoy ti napakumbaba a kararagko iti nagan ni Jesucristo, amen.