Sapasap a Komperensia
Ni Jesucristo ti Pigsa dagiti Agtutubo
Oktubre 2022 sapasap a komperensia
14:11

Ni Jesucristo ti Pigsa dagiti Agtutubo

Ni Elder Dieter F. Uchtdorf

Ti Korum dagiti Sangapulo-ket-dua nga Apostol

Agtalekkayo ken ni Jesucristo. Iturongnakayto iti umno a dalan. Isu ti pigsayo.

Iti panagsaganak iti daytoy a mensahe ita, nariknak ti nabileg a parikna a balakadak dagiti agtutubo a babbai ken agtutubo a lallaki.

Makisarsaritaak met kadakayo a sigud nga agtutubo, uray kadakayo a talaga a di pulos makalagipen.

Ken makisaritaak iti amin a mangay-ayat kadagiti agtutubotayo ken mangayat nga agballigida iti biag.

Para kadagiti tumantanor a kaputotan, adda mensahek a nangnangruna para kadakayo manipud iti Mangisalakantayo, ni Jesucristo.

Ti Mensahe ti Mangisalakan Kadakayo

Patpatgek nga agtutubo a gagayyem, no adda ditoy ti Mangisalakan ita, ania ti ibagana koma kadakayo?

Mamatiak a rugianna babaen iti panangipeksana iti nauneg a panagayatna kadakayo. Mabalin nga isaritana daytoy babaen iti balikas, ngem nabusbuslonto ti panagayusna—nga iti laeng kaaddana—a saan a mapagbiddutan, a dumanon iti kaunggan ti pusoyo, a mangpumpunno iti sibubukel a kararuayo!

Ket gapu ta nakapuy ken saantayo amin a naan-anay, mabalin a maaddaankayo kadagiti pakaseknan iti panunotyo. Mabalin a malagipyo dagiti biddut a naaramidyo, dagiti panawen a nasulisogkayo, dagiti bambanag a saanyo koma inaramid—wenno tarigagayan nga inaramidyo koma a nasaysayaat.

Ammo ti Mangisalakan dayta, ket mamatiak nga ipanamnamana kadakayo babaen kadagiti insaona iti nasantuan a kasuratan:

“Dikayo agbuteng.”5

“Saankayo nga Agduadua.”2

“Agragsakkayo.”3

“Diyo koma riribuken ti puspusoyo.”4

Panagkunak ket saanna a pagpambar dagiti biddutyo. Dina tagibassiten dagitoy. Saan. Dawatenna nga agbabawikayo—a tallikudanyo dagiti basolyo, ket agbalbaliw, tapno mapakawannakayo. Palagipannakayo nga iti naglabas a 2,000 a tawen inawatna iti Bagina dagidiay a basbasol tapno makapagbabawikayo. Paset daytoy iti plano ti kinaragsak nga insagut kadatayo ti managayat a Nailangitan nga Amatayo.

Mabalin nga ibaga ni Jesus a dagiti katulaganyo Kenkuana—nga inaramidyo idi nabuniagankayo ken pabaruenyo no makiranudkayo iti sakramento—ket mangted kadakayo iti espesial a pannakinaig Kenkuana. Iladawan daytoy a pannakinaig kas iladawan ti nasantuan a kasuratan a kas panagtipon a maymaysa ta babaen ti tulongna, maibaklayyo ti ania man a dagensen.5

Mamatiak a ti Mangisalakan a ni Jesucristo kayatna a makita, marikna ken maammuanyo nga Isu ti pigsayo. A babaen iti tulongna, awan dagiti limitasion ti no ania a maipatungpalyo. Nga awan patinggana ti potensialyo. Kayatna a makitayo ti bagbagiyo iti wagas a panangkitana kadakayo. Ket naiduma la unay dayta iti wagas a panangkita ti lubong kadakayo.

Ipakdaar ti Mangisalakan, iti di mapagduaduaan a balikas, a dakayo ti annak a babbai ken lallaki ti Mannakabalin a Dios. Ti Nailangitan nga Amayo ti kadadayagan a nabiag iti sangalubongan, napnuan iti ayat, rag-o, kinatarnaw, kinasanto, lawag, parabur, ken kinapudno. Ket kayatna a tawidenyonto ti amin nga adda Kenkuana.6

Daytoy ti rason no apay nga addakayo ditoy daga—tapno agsursuro, dumakkel, ken dumur-as ken agbalin iti amin a banag a nangparsuaan kadakayo ti ti Amayo iti Langit.

Tapno mapasamak daytoy, impatulodna ni Jesucristo tapno agbalin a Mangisalakanyo. Daytoy ti panggep ti naindaklan a plano ti kinaragsak, ti Simbaanna, ti priesthoodna, dagiti nasantuan a kasuratan—amin dagitoy.

Dayta ti pagtungpalanyo. Dayta ti masakbayanyo. Dayta ti piliyo!

Ti Kinapudno ken dagiti Pili

Ti kapapatgan iti plano ti kinaragsak ti Dios ket ti pannakabalinyo nga agpili.7 Siempre, kayat ti Nailangitan nga Amayo a pilienyo ti agnanayon a rag-o a Kenkuana, ket tulongannakayto a mangragpat itidaytoy, ngem dina ipilit daytoy kadakayo.

Isu nga itulokna no pilienyo ti: Lawag wenno kasipngetan? Naimbag wenno dakes? Rag-o wenno ladingit? Biag nga agnanayon wenno naespirituan a pannakatay?8

Kasla lang nalaka ti pumili, di ngamin? Ngem no dadduma, ditoy lubong, kasla narikrikut daytoy ngem iti nasken koma a maaramid .

Ti narigat ket saantayo a kanayon a makita dagiti banag a nalawag uray man no kayattayo. Iyarig ni Apostol Pablo daytoy iti panangkita “a sikukudrep babaen ti maysa a sarming.”9 Adu dagiti pakatikawan iti lubong maipapan no ania ti umno ken bidduts. Maballikug ti kinapudno a mangaramid a kasla naimbag ti dakes, ken kasla dakes ti naimbag.10

Ngem no sipapasnek a sapulenyo ti kinapudno—agnanayon, saan nga agbalbaliw a kinapudno—agbalin a nalawlawag dagiti piliyo. Wen, addaankayo latta iti pannakasulisog ken pannakasubok. Mapasamakto latta dagiti dakes. Dagiti pakariribukan a banag. Dagiti nakalkaldaang a banag. Ngem kabaelanyo no ammoyo ti pudno a kinataoyo, no apay addakayo ditoy, ken no agtalekkayo iti Dios.

Pakasarakanyo ngarud iti kinapudno?

Linaon daytoy iti ebanghelio ni Jesucristo. Ken ti pakabuklan ti ebanghelio ket naisuro iti Ti Simbaan ni Jesucristo dagiti Santo iti Ud-udina nga Aldaw.

Kinuna ni Jesucristo, “Siak ti dalan, ti kinapudno, ken ti biag: awan ti umay iti Ama, no di magna kaniak.”11

No adda dagiti napateg a pagpilianyo, ni Jesucristo ken ti naisubli nga ebangheliona ti kasayaatan a pilien. No adda dagiti saludsodyo, ni Jesucristo ken ti naisubli nga ebangheliona ti kasayaatan a sungbat. No mariknayo a nakapsutkayo, ni Jesucristo ti pigsayo.

Papigsaenna dagiti nabannog ken dagiti awan gawayda, pawadwadenna ti pigsa.

Ngem dagiti aguray iti Apo mapabarodanto babaen ti pigsana.12

Para iti Pigsa dagiti Agtutubo

Tapno matulongandakayo a mangsapul iti Dalan ken pagbalinen ti doktrina ni Cristo a mangiwanwan nga impluensia iti biagyo, Ti Simbaan ni Jesucristo dagiti Santo iti Ud-udina nga Aldaw ket nangisagana iti baro a resource, maysa a napabaro a bersion ti Para iti Pigsa dagiti Agtutubo.

Ti 2011 a bersion ti Para iti Pigsa dagiti Agtutubo

Iti nasurok a 50 a tawen, ti Para iti Pigsa dagiti Agtutubo ti nabayagen a pangiwanwan para kadagiti agtutubo a Santo iti Ud-udina nga Aldaw. Adda latta kopia iti bulsak, ket ibinglayko kadagiti tao nga interesado a mangammo maipapan kadagiti pagrukodantayo. Napabaro ken napapigsa daytoy tapno ad-adda a makatulong kadagiti karit ken sulisog iti panawentayo. Magun-odan ti baro a bersion ti For the Strength of Youth iti online iti 50 a nadumaduma a pagsasao ken magun-odanto met a maimaldit. Agbalinto a napateg a tulong para iti panagpili iti biagyo. Awatenyo koma daytoy kas bukodyo ken ibinglayyo daytoy kadagiti gagayyemyo.

Ti 2022 a bersion ti Para iti Pigsa dagiti Agtutubo

Daytoy baro a bersion ti Para iti Pigsa dagiti Agtutubo ket naikkan iti subtitulo a Maysa a Pangiwanwan iti Panagpili.

Kayatko nga ilawlawag, a ti kasayaatan a pangiwanwan iti panagpili ket ni Jesucristo. Ni Jesucristo ti pigsa dagiti agtutubo.

Isu a ti panggep ti Para iti Pigsa dagiti Agtutubo ket tapno iturongdakayo Kenkuana. Isuronakayo kadagiti agnanayon a kinapudno ti naisubli nga ebangheliona—dagiti kinapudno maipapan iti kinasiasinoyo, no asino Isuna, ken no ania ti maipatungpalyo babaen iti pigsana. Isuronakayo no kasano ti agaramid kadagiti nalinteg a pili a naibatay kadagiti agnanayon a kinapudno.13

Napateg pay a maamuanyo no ania ti saan nga aramiden iti Para iti Pigsa dagiti Agtutubo Saan daytoy nga agaramid kadagiti pangngeddeng para kadakayo. Dinakayo ikkan iti sungbat a “wen” wenno “saan” iti tunggal panagpili a maipasasango kadakayo. Ti Para iti Pigsa dagiti Agtutubo ket nakapokus iti pundasion para kadagiti piliyo. Nakapokus daytoy kadagiti ik-ikkan pateg, prinsipio, ken doktrina imbes iti tunggal naipangruna nga ugali.

Ti Apo, babaen kadagiti propetana, kanayon nga iwanwanwannatayo iti dayta a turongen. Ipakpakaasina kadatayo a “papigsaen[tayo] ti naespirituan a kabaelantayo nga umawat iti paltiing.”14 Aw-awisennatayo a “dumngeg Kenkuana.”15 Aw-awagannatayo a sumurot Kenkuana iti nangatngato ken nasansantuan a wagas.16 Ket masursurotayo ti kasta met lang a wagas iti linawas iti Umaykayo, Sumurot Kaniak.

Mamatiak a maikkannakayo ti pangiwanwan iti atiddog a listaan kadagiti kawes a saanyo a nasken nga usaren, dagiti balikas a nasken a diyo isawang, ken dagiti sine a nasken a diyo buyaen. Ngem talaga kadi a makatulong dayta iti sangalubongan a simbaan? Ti kasta ngata a wagas pudno a maisagananakayo iti tungpal biag a kas iti panagbiag ni Cristo?

Imbaga ni Joseph Smith, “Isurok kadakuada dagiti pudno a prinsipio, ket iturayanda ti bagida.”17

Ket kinuna ni Ari Benjamin iti tattaona iti Libro ni Mormon, “saanko a maibaga kadakayo ti amin a banag a mabalin a pagbasolanyo; agsipud ta adda dagiti nadumaduma a dalan ken pamuspusan, nga adu unay ket diak ida mabilang.”18

Intultuloy ni Ari Benjamin, “Ngem daytoy laeng ti makunak kadakayo, … annadanyo ti bagbagiyo, ken ti pampanunotyo, ken ti sasaoyo, ken ti aramidyo, ken tungpalenyo dagiti bilin ti Dios, ken agtultuloykayo iti pammati … iti Apotayo, agpapan pay iti kamaudianan ti biagyo.”19

Ti Mangisalakan a ni Jesucristo

Dakes kadi ti maaddaan kadagiti pagannurotan? Siempre saan. Masapultayo amin dagitoy iti inaldaw. Ngem biddut nga ipamaysatayo laeng dagiti pagannurotan imbes nga ipamaysatayo ti Mangisalakan. Nasken a maammuanyo dagiti apay ken kasano ken kalpasanna ibilangyo dagiti pagbanagan dagiti piliyo. Masapul nga agtalekkayo ken ni Jesucristo. Iturongnakayto iti umno a dalan. Isu ti pigsayo.20

Ti Bileg ti Pudno a Doktrina

Ti Para iti Pigsa dagiti Agtutubo situtured nga ipakdaarna ti doktrina ni Jesucristo. Situtured nga awisennakayo nga agpili a nakabasar iti doktrina ni Cristo. Ken situtured iti panangiladawanna kadagiti bendision nga inkari ni Jesucristo kadagiti mangsurot iti Dalanna.21

Insuro ni President Russell M. Nelson: “No dagiti kaindaklan a tarigagayyo ket mangbay-an nga agballigi ti Dios [iti biagyo], … agbalin a nalaklaka dagiti adu a pangngeddeng. … Adu dagiti isyu a saanen a napateg! Ammoyo no kasano ti kasayaatan a panangurnosyo iti bagiyo. Ammoyo no ania ti buyaen ken basaenyo, no sadino ti pagbubosan iti orasyo, ken no asino ti pakipulapolanyo. Ammoyo no ania ti kayatyo nga ipatungpal. Ammoyo iti kita ti tao a kayatyo … a pagbalinan.”22

Nangatngato a Pagalagadan

Nangato dagiti pagalagadan ni Jesucristo para kadagiti pasurotna. Ket ti awis a sipapasnek a gun-oden ti pagayatanna ken agbiag iti kinapudnona ti agbalin a kangangatuan a pagalagadan!

Masapul a saan lang a nakabasar dagiti napateg a temporal ken naespirituan a pili iti bukod a pagayatan wenno no ania ti nagin-awa wenno nalatak.23 Ti Apo saanna nga ibagbaga, “Aramidenyo ti ania man ti kayatyo.”

Ibagbagana ti, “Bay-an nga agballigi ti Dios.”

Ibagbagana ti, “Umaykayo, Sumurot Kaniak.”24

Ibagbagana ti, “Agbiag iti nasansantuan, nangatngato, natataengan a wagas.”

Ibagbagana ti, “Tungpalenyo dagiti bilinko.”

Ni Jesucristo ti naan-anay a pagwdantayo, ket ikagumaantayo iti amin a pigsa ti kararuatayo a sumurot Kenkuana.

Patpatgek a gagayyem, ulitek manen, no adda ti Mangisalakan ita, iyebkasna ti awan patinggana nga ayatna kadakayo, ti naan-anay a panagtalekna kadakayo. Ibagana kadakayo a maaramidyo daytoy. Kabaelanyo ti agibangon iti narag-o, naragsak a biag gapu ta ni Jesucristo ti pigsayo. Masarakanyo ti panagtalek iti bagi, talna, talged, ragsak, ken pannakaibilang ita ken iti agnanayoin, gapu ta masarakanyo amin dagita ken ni Jesucristo, iti ebangheliona, ken iti Simbaanna.

Iti daytoy iburayko ti nasged a pammaneknekko kas mays nga Apostol ti Apo a ni Jesucristo ket ibatik kadakayo ti naimpusuan a bendision iti dakkel a panagyamanko ken panagayatko kadakayo, iti nagan ni Jesucristo, amen.

Dagiti Nagadawan

  1. Lucas 5:10; 8:50; 12:7; Doktrina ken Katulagan 38:15; 50:41; 98:1.

  2. Doktrina ken Katulagan 6:36.

  3. Mateo 14:27; Juan 16:33; Doktrina ken Katulagan 61:36; 68:6; 78:18.

  4. Juan 14:1, 27.

  5. Kitaen iti Mateo 11:28–30.

  6. Kitaen iti Doktrina ken Katulagan 84:38.

  7. Mabalinyo a kunaen a ti plano ti Ama ket nadisenio a mangpalubos kadakayo a mangiyebkas kadagiti tarigagayyo babaen kadagiti piliyo, tapno maawatyo ti pakabuklan a pagbanagan iti no ania ti tarigagayyo. Kas insuro ni Elder Dale G. Renlund, “Ti panggep a tun-oyen ti Amatayo iti Langit iti panagbalin a nagannak ket ti saan a panangpaaramid kadagiti annakna ti umno; daytoy ket pagpilienna ida nga agaramid iti umno ken iti kamaudiananna agbalin a kas Kenkuana” (“Choose You This Day,” Liahona, Nob. 2018, 104).

  8. Kitaen iti 2 Nephi 2:26–27.

  9. 1 Taga Corinto 13:12.

  10. Kitaen iti Isaias 5:20.

  11. Juan 14:6.

  12. Kitaen iti Isaias 40:29–31.

  13. Kas Latter-day Saints, masansan a maam-ammodatayo no ania ti aramidentayo ken ditay mabalin nga aramiden—dagiti kababalintayo. Nasayaat daytoy, ngem nasaysayaat koma no maam-ammodatayo no ania ti ammotayo (dagiti kinapudno a makagapu kadagiti kababalintayo) ken no para siasino dagitoy a maamuantayo (ti Mangisalakan—ken no kasano a ti panagayattayo Kenkuana ket mangparegta kadagiti ugalitayo).

  14. Russell M. Nelson, “Revelation for the Church, Revelation for Our Lives,” Liahona, Mayo 2018, 96.

  15. Kitaen iti Russell M. Nelson, “Hear Him,” Liahona, Mayo 2020, 88–92.

  16. Ti principle-based approach iti baro a Para iti Pigsa dagiti Agtutubo a pangiwanwan ket maitunos iti dadduma pay nga inisiatibo nga impaay ti Simbaan ti Mangisalakan, agraman ti Preach My Gospel, ministering, ti kurikulum a nakasentro iti pagtaengan nga Umaykayo, Sumurot Kaniak , ti Children and Youth program, Panangisuro iti Wagas ti Mangisalakan, ken ti kabarbaro a General Handbook. Nalawag a pappapigsaen ti Apo ti naespirituan a kabaelantayo. Ipakpakitana ti napapigsa a panagatalek kadagiti natulagan a tattaona iti ud-udina nga aldaw.

  17. Teachings of Presidents of the Church: Joseph Smith (2007), 197.

  18. Mosiah 4:29. Daytoy dagiti inar-aramid dagidi Fariseo idi panawen ni Jesus. Gapu ti reggetda a mangpasardeng kadagiti tattao a manglabsing kadagiti linteg, ginupgopda iti adu a gasut a pagannurotan a naibasar iti pannakaawatda kadagiti sagrado a kasuratan. Ti biddut dagiti Fariseo ket ti ammoda maisalakanda kadagiti pagannurotanda. Ngarud, idi nagparang ti Mangisalakan, saanda a nabigbig Isuna.

  19. Mosiah 4:30; nainayon ti panangyunay-unay.

  20. Maysa pay a rason a kasapulan ti principle-based approach ita a panawen ket ti umad-adu a panagduduma iti kultura iti Simbaan ti Apo. Awan patinggana ken sapasap dagiti prinsipio. Dagiti nalawag a pagannurotan wenno pannakayaplikar kadagitoy a prinsipio ket maipatungpal a nasayaat iti dadduma a lugar ngem saan iti dadduma. Ti mamagkaykaysa kadatayo ket ni Jesucristo ken dagiti agnanayon a kinapudno nga insurona, uray no dagiti nalawag a pannakayaplikar agbaliw iti panaglabas ti panawen ken iti adu a kultura. Isu a ti parikut iti panangilista kadagiti maaramid ken saan a maaramid ket saan a praktikal ken narigat nga itultuloy. Ti parikut pay ket baliwanna ti pokustayo manipud iti pudno a Pagtaudan iti pigsatayo, ti Mangisalakantayo, a ni Jesucristo.

  21. Iti napalabas nga adu a tawen, insarita ni Presidente Boyd K. Packer dagitoy nabileg a balikas: “Ti panagadal iti pudno a doktrina, balbaliiwanna dagiti ugali ken kababalin. Ti panagadal kadagiti doktrina ti ebanghelio ket mangpasayaatto iti ugali nga al-alisto ngem iti panagadal iti ugali tapno mapasayaatto ti ugali” (“Do Not Fear,” Liahona, Mayo 2004, 79).

    Insuro ni President Ezra Taft Benson ti kapadana a kinapudno: “Agtrabaho ti Apo manipud iti uneg nga agturong iti ruar. Agtrabaho ti lubong manipud iti ruar nga agturong iti uneg. … Sukogen ti lubong ti ugali ti tao, ngem mabalbaliwan ni Cristo ti nakaisigudan ti tao” (“Born of God,” Ensign, Nob. 1985, 6).

    Idi nakita ni propeta Alma iti Libro ni Mormon ti dakes iti lubong a pagbibiaganna, nagkamang iti balikas ti Apo gapu ta ammona a “nabilbileg nga amang ti ibungana iti panunot dagiti tao ngem iti espada, wenno ania man a banag, a napasamak kadakuada—ngarud napanunot ni Alma a mainugot laeng a nasken a padasenda ti saguday ti balikas ti Dios” (Alma 31:5).

  22. Russell M. Nelson, “Let God Prevail,” Liahona, Nob. 2020, 94. Impakita ni Presidente Nelson daytoy a pamay-an idi insurona kadatayo no kasano ti panangngilin iti aldaw ti Sabbath: “Idi ubingak, inadalko ti aramid dagiti dadduma a namagtitipon kadagiti listaan ti bambanag nga aramiden ken saan nga aramiden iti Sabbath. Agingga iti saan a nabayag a nasursurok manipud kadagiti nasantuan a kasuratan a ti galadko ken ugalik iti Sabbath ti mangbukel iti maysa a pagilasinan ti nagbaetak ken ti Nailangitan nga Amak. Iti dayta a pannakaawat, saankon a kasapulan dagiti listaan ti aramiden ken saan nga aramiden. No nasken nga agaramidak iti maysaa pangngeddeng no ti maysa nga aktibidad maitutop man wenno saan para iti aldaw ti Sabbath, simple laeng a saludsodek nokua iti bagik, ‘Ania a pagilasinan ti kayatko nga ited iti Dios?’ Dayta a saludsod ti nangaramid a nalawag dagiti pilik maipapan iti aldaw ti Sabbath” (“The Sabbath Is a Delight,” Liahona,Mayo 2015, 130).

  23. Insuro ni Elder David A. Bednar a “dagiti pagbatayan ti kinalinteg … makatulong kadatayo a mangkita iti labes dagiti personal a pagayatan ken ti managimbubukod a tarigagaytayo babaen iti panangipaay iti napateg a pannirigan iti agnanayon a kinapudno bayat ti intay idadaliasat kadagiti nadumaduma a pasamak, pakarigatan, pangngeddeng ken padas iti mortalidad” (“The Principles of My Gospel,” Liahona, Mayo 2021, 123–24).

  24. Lucas 18:22.