“The Organization of the Church of Jesus Christ,” Liahona, Oct. 2023.
ຂ່າວສານປະຈຳເດືອນ Liahona, ເດືອນຕຸລາ 2023
ອົງການຈັດຕັ້ງຂອງສາດສະໜາຈັກຂອງພຣະເຢຊູຄຣິດ
The Lord Jesus Christ [ອົງພຣະເຢຊູຄຣິດເຈົ້າ], ໂດຍ ແດວ ພາສັນ
ພຣະເຢຊູຄຣິດເປັນປະມຸກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ພຣະອົງດົນໃຈເຫລົ່າສາດສະດາ ແລະ ອັກຄະສາວົກໃຫ້ນຳພາສາດສະໜາຈັກໃນທຸກວັນນີ້, ດັ່ງທີ່ພຣະອົງໄດ້ກະທຳໃນສະໄໝພຣະຄຳພີໃໝ່. ພວກເພິ່ນໄດ້ຮັບຄວາມຊ່ວຍເຫລືອຈາກຜູ້ນຳສາດສະໜາຈັກຄົນອື່ນໆ.
ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ແມ່ນສາດສະໜາຈັກຂອງພຣະຜູ້ຊ່ວຍໃຫ້ລອດ. ມັນໄດ້ “ຖືກສ້າງຂຶ້ນເທິງຮາກຖານ ຊຶ່ງພວກອັກຄະສາວົກ ແລະ [ສາດສະດາ] ໄດ້ວາງລົງແລ້ວ ພຣະເຢຊູຄຣິດເອງຊົງເປັນຫີນເສົາເອກ” (ເອເຟໂຊ 2:20). ນີ້ໝາຍຄວາມວ່າ ພຣະອົງເປັນສ່ວນສຳຄັນທີ່ສຸດຂອງຮາກຖານ. ພຣະອົງນຳພາສາດສະໜາຈັກຜ່ານທາງສາດສະດາ ແລະ ອັກຄະສາວົກທີ່ພຣະອົງໄດ້ເລືອກໃຫ້ເປັນຜູ້ນຳ.
ຝ່າຍປະທານສູງສຸດ
ປະທານຂອງສາດສະໜາຈັກ ແມ່ນສາດສະດາຂອງພຣະເຈົ້າເທິງແຜ່ນດິນໂລກໃນທຸກວັນນີ້. ເພິ່ນເປັນອັກຄະສາວົກອາວຸໂສ ແລະ ເປັນຄົນດຽວໃນແຜ່ນດິນໂລກທີ່ຮັບການເປີດເຜີຍໃນການນຳພາສາດສະໜາຈັກທັງໝົດ. ພຣະຜູ້ເປັນເຈົ້າດົນໃຈເພິ່ນໃຫ້ຮູ້ວ່າ ເພິ່ນຄວນເອີ້ນອັກຄະສາວົກສອງຄົນຄົນໃດໃຫ້ຮັບໃຊ້ເປັນທີ່ປຶກສາຂອງເພິ່ນ. ພວກເພິ່ນປະກອບເປັນຝ່າຍປະທານສູງສຸດ. ທັງສາມທ່ານເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ.
ກຸ່ມອັກຄະສາວົກສິບສອງ
ສະມາຊິກຂອງກຸ່ມອັກຄະສາວົກສິບສອງກໍເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍເຊັ່ນກັນ. ພວກເພິ່ນໄດ້ຖືກເອີ້ນໃຫ້ເປັນພະຍານພິເສດຂອງພຣະເຢຊູຄຣິດ. ພວກເພິ່ນເດີນທາງໄປທົ່ວໂລກເພື່ອສິດສອນ ແລະ ເປັນພະຍານເຖິງພຣະອົງ. (ເບິ່ງ ຄຳສອນ ແລະ ພັນທະສັນຍາ 107:23, 33.)
ກຸ່ມສາວົກເຈັດສິບ
ສະມາຊິກຂອງກຸ່ມສາວົກເຈັດສິບກໍໄດ້ຖືກເອີ້ນໃຫ້ເປັນພະຍານເຖິງພຣະເຢຊູຄຣິດເຊັ່ນກັນ (ເບິ່ງ ຄຳສອນ ແລະ ພັນທະສັນຍາ 107:25). ພວກເພິ່ນຊ່ວຍກຸ່ມອັກຄະສາວົກສິບສອງສິດສອນພຣະກິດຕິຄຸນ ແລະ ສ້າງສາດສະໜາຈັກທົ່ວໂລກ.
ຮູບຖ່າຍ ໂດຍ ມາຈິໂກະ ໂຮຣິອິ
ຜູ້ນໍາທ້ອງຖິ່ນ
ຝ່າຍປະທານສະເຕກ ຫລື ຝ່າຍປະທານທ້ອງຖິ່ນ, ຝ່າຍອະທິການ ຫລື ຝ່າຍປະທານສາຂາ, ແລະ ຝ່າຍປະທານກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະຂອງທ່ານ ກໍໄດ້ຖືກເອີ້ນໂດຍພຣະເຈົ້າເຊັ່ນກັນ. ພວກເພິ່ນສາມາດຊ່ວຍທ່ານໃຫ້ຮຽນຮູ້ ແລະ ດຳລົງຊີວິດຕາມພຣະກິດຕິຄຸນ. ທ່ານສາມາດຮຽນຮູ້ກ່ຽວກັບການເອີ້ນບາງຢ່າງເຫລົ່ານີ້ ໃນບົດຄວາມ ພື້ນຖານພຣະກິດຕິຄຸນ ເດືອນມີນາ 2022, “ການຮັບໃຊ້ໃນການເອີ້ນຂອງສາດສະໜາຈັກ.”
© 2023 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, October 2023. Language. 19048 331