Binulan a Mensahe ti Liahona , Nobiembre 2023

Panunoten ti Celestial!

Ni Presidente Russell M. Nelson

Presidente ti Ti Simbaan ni Jesucristo dagiti Santo iti Ud-udina nga Aldaw

Russell M. Nelson

Dagiti piliyo ti mangikeddengto no sadinonto ti pagnaedanyo iti kinaagnanayon, ti kita ti bagi a pagungaranyonto, ken kadagiti kadennayonto nga agbiag iti kinaagnanayon.

Patpatgek a kakabsatko, agyamanak unay a makasaritakayo ita nga aldaw. Iti edadko, tunggal baro nga aldaw ket mangyeg kadagiti nakaskasdaaw ken makakarit a sorpresa. Tallo a lawas ti napalabas, nasugatak dagiti piskel ti bukotko. Gapuna, idinto a nakaitedak iti nasurok a 100 a mensahe iti sapasap a komperensia a nakatakderak, ita nga aldaw napanunotko nga aramidek daytoy a nakatugawak. Ikararagko a sapay ta idanonto ti Espiritu ti mensahek iti puspusoyo ita nga aldaw.

Nabiit pay a rinambakak iti maika-99 a kasangayko ket ita mangrugrugi ti maika-100 a tawen ti panagbiagko. Masansan a madamag kaniak ti sekreto ti napaut a panagbiag. Kastoy koma ti napimpintas a saludsod “Ania ti nasursurok iti dumani maysa a siglo a panagbiag?”

Kurang ti oras tapno masungbatak a naan-anay dayta a saludsod, ngem sapay ta maibinglayko ti maysa kadagiti kapatgan a leksion a nasursurok.

Nasursurok a ti plano ti Nailangitan nga Ama kadatayo ket naisangsangayan, a ti ar-aramidentayo iti daytoy a biag ket talaga a napateg, ken ti Pannubbot ti Mangisalakan ti gapu tapno agbalin a posible iti plano ti Amatayo.¹

Bayat ti panangibturko iti nakaro a saem a pinataud ti nabiit pay a pannakadangranko, nariknak ti naun-uneg pay a panagyaman ken ni Jesucristo ken ti saan maawatan a sagut ti Pannubbotna. Panunotenyo daytoy! Sinagaba ti Mangisalakan “dagiti saem ken rigat ken sulisog iti tunggal kita”² tapno mabalinnatayo a liwliwaen, agasan, isalakan kadagiti panawen ti panagkasapulan.³ Inladawan ni Jesucristo ti padasna idiay Getsemani ken idiay Calvario: “A dayta a panagsagaba ti nangipaay kaniak, uray pay ti Dios, ti kaindaklan iti amin, nga aggarigenggen gapu iti saem, ken agdara iti tunggal teterreman.”⁴ Gapu iti pannakadangranko ti nakaigapuan ti maulit-ulit a panangutobko maipapan iti “kinatan-ok ti Maysa a Nasantuan ti Israel.”⁵ Iti panagpalaingko, imparangarang ti Apo ti nadiosan a pannakabalinna iti natalna ken saan a mapagduaduaan a wagwagas.

Part of a worldwide series of photographs taken in connection with General Conference. September 30 - October 1, 2023. Pictures were taken in Peru.

Peru

Gapu iti awan patinggana a Pannubbot ni Jesucristo, ket naan-anay a plano ti plano ti Nailangitan nga Amatayo! Ti pannakaawat iti naisangsangayan a plano ti Dios ti mangikkat iti misterio manipud iti biag ken ti panagduadua manipud iti masakbayantayo. Daytoy ti mangipalubos kadatayo a pumili no kasano ti panagbiagtayto ditoy daga ken no sadino ti pagnaedantayto iti agnanayon. Ti awan pakaibatayanna a kapanunotan a nasken a “mangan, uminum, ken agragsaktayo, ta inton bigat mataytayo; ket nasayaatto dayta kadatayo”⁶ ket maysa kadagiti awan pategna a kinaulbod iti lubong.

Adtoy ti napintas a damag ti plano ti Dios: dagiti mismo a banag a mangaramidto iti mortal a biagyo iti kasayaatan a magun-od daytoy ket ti isu met laeng a banag a mamagbalbaliw iti biagyo iti amin a kinaagnanayon iti kasayaatan a panagbalbaliw daytoy ! Ita, tapno matulongannakayo a maikari kadagiti nawadwad a bendision nga adda iti Nailangitan nga Ama para kadakayo, awisenkayo a mangsanay iti “panangpanunot a celestial”!⁷ Ti panagpampanunot a celestial kaipapananna ti naespirituan a panagpanunot. Naammuantayo manipud ken ni propeta Jacob iti Libro ni Mormon a “ti panagbalin a naespirituan iti panagpampanunot ket agnanayon a biag.”⁸

Part of a worldwide series of photographs taken in connection with General Conference. September 30 - October 1, 2023. Pictures were taken in Utah.

United States

Ti mortalidad ket maysa a klase a mangisuro kadatayo a mangpili kadagiti banag a kadakkelan ti pategna iti kinaagnanayon. Nakaad-adu a tattao ti agbibiag a kasla awanen ti sabali a biag no di daytoy laeng. Nupay kasta, dagiti piliyo ti mangikeddengto iti tallo a banag: no sadinonto ti pagnaedanyo iti amin a kinaagnanayon, ti kita ti bagi nga addanto kadakayo intono agungarkayo, ken dagiti tao a makadennayonto iti kinaagnanayon. Isu a panunotenyo ti celestial!

Iti umuna a mensahek kas Presidente ti Simbaan, inallukoykayo a mangirugi nga agpanunot iti adda iti ungto. Kayatna a sawen daytoy ti panangaramidyo iti celestial a pagarian nga agnanayon a panggepyo a tun-oyen ket kalpasanna panunotenyo a nasayaat no sadinonto ti pangipanan kadakayo ti tunggal pangngeddengyo ditoy daga iti sumaruno a lubong.⁹

Nalawag nga insuro ti Apo a dagiti laeng lallaki ken babbai a napaglantip kas agassawa iti templo, ken agtungpal kadagiti katulaganda, ket agdedennanto iti kinaagnanayon. Kinunana, “Amin a katulagan, kontrata, piansa, pagrebbengan, sapata, kari, maaramidan, am-ammo, kagimongan, wenno inanamaen, a saan a naaramid ken naiserrek ken pinatalgedan ti Nasantuan nga Espiritu ti kari … aggibus no matayen dagiti tao.”¹⁰

No kasta, no ditayo masirib a pumili nga agbiag kadagiti linteg ti telestial itan, pilpilientayo a mapagungar nga addaan iti telestial a bagi. Pilpilientayo a ditayo makadenna dagiti pamiliatayo iti agnanayon.

Ngarud, patpatgek a kakabsatko, kasano ken sadino ken asino ti kayatyo a makadenna iti agnanayon? Agpilikayo.¹¹

No agpilikayo, awisenkayo a mangpanunot iti nalablabes pay—maysa nga agnanayon a pannirigan. Yun-unayo ni Jesucristo, gapu ta ti agnanayon a biagyo ket agpannuray iti pammatiyo Kenkuana ken iti Pannubbotna.¹² Agpannuray pay daytoy iti panagtulnogyo kadagiti lintegna. Ti panagtulnog ti manglukat iti dalan para iti naragsak a biag para kadakayo ita ken maysa a dakkel, agnanayon a gunggona iti masakbayan.

No maipasangokayo iti maysa a dilema, panunotenyo ti celestial! No subokennakayo ti sulisog, panunotenyo ti celestial! No upayennakayo ti biag wenno dagiti ay-ayatenyo, panunotenyo ti celestial! No matay a nasapa ti maysa a tao, panunotenyo ti celestial! No agsagaba gapu iti napaut a sakit ti maysa a tao, panunotenyo ti celestial! No adda iti panunotyo dagiti pakariribukan ti biag, panunotenyo ti celestial. No agpapalaingkayo manipud iti aksidente wenno pannakadangran, kas kaniak ita, panunotenyo ti celestial!

No ipamaysayo iti panagpanunot iti celestial, namnamaenyo a maipasangokayo iti oposision.¹³ Pinulpullo a tawenen ti napalabas, maysa a propesional a katrabahuak ti nangbabalaw kaniak gapu iti kaadda ti “adu unay a templo” kaniak, ket nasurok a maysa a superbisor ti nangdusa kaniak gapu iti pammatik. Nupay kasta, kombinsidoak iti panagpanunot iti celestial ti nangparang-ay iti karerak.

No panunotenyo ti celestial, in-inutto nga agbalbaliw ti pusoyo. Kayatyonto ti agkararag nga ad-adda a masansan ken napudpudno. Idawatko a saan koma a puro panagkiddaw ti adda iti kararagyo. Ti pannirigan ti Apo ti ad-adda a mangrimbaw iti mortal a pagsiribanyo. Ti sungbatna kadagiti kararagyo ket mabalin a mamagsiddaaw kadakayo ken tulongannakayto nga agpanunot iti celestial.

Panunotenyo ti sungbat ti Apo ken ni Joseph Smith idi nagpakaasi iti pannakagin-awa iti Liberty Jail. Insuro ti Apo ti Propeta a ti saan a makatao a pananakatratona ket mangted kenkuana iti padas ken agpaay iti pagimbaganna.¹⁴ No agituredka,” inkari ti Apo, “itan-oknakanto ti Dios iti ngato.”¹⁵ Isursuro idi ti Apo ni Joseph nga agpanunot iti celestial ken mangpanunot iti agnanayon a gunggona imbes nga agtalimudok kadagiti nakaro a rigat ti aldaw. Dagiti kararagtayo ket mabalin —ken nasken nga agbalin a—naragsak a pannakiuman iti Nailangitan nga Amatayo.

No celestial ti panagpampanunotyo, tarigagayanyo ti mangliklik iti ania man a banag a mangtakaw iti karbenganyo nga agpili. Ania man nga adiksion—daytoy man ket panagay-ayam, panagsugal, utang, droga, arak, pungtot, pornograpia, sekso, wenno uray pay ti taraon—ket makasair iti Dios. Apay? Ngamin, agbalin a diosyo ti obsesionyo. Mangnamnamakayo iti daytoy imbes koma Kenkuana para iti pannakalinglingay. No marigatankayo iti adiksion, dawatenyo ti naespirituan ken propesional a tulong a kasapulanyo. Diyo koma ipalubos a ti obsesion ti mangtakaw iti wayawayayo a mangsurot iti nakaskasdaaw a plano ti Dios.

Ti panagpanunot iti celestial ket makatulongto pay kadakayo nga agtulnog iti linteg ti kinadalus iti dayaw. Manmano a banag ti naparpartak a mangparikutto iti biagmo ngem ti panangsalungasing iti daytoy nadiosan a linteg. Para kadagiti nakitulagen iti Dios, ti imoralidad ket maysa kadagiti kapartakan a wagas tapno mapukaw ti pammaneknekyo.

Adu kadagiti saan nga agsarday a pannulisog ti kabusor ti mangiraman ti panaglabsing iti kinadalus iti dayaw. Ti bileg a mangpartuat iti biag ket maysa a pribilehio ti kinadiosan a pangipalugodan ti Nailangitan nga Ama nga aramaten dagiti mortal nga annakna. Gapuna, nangipasdek ti Dios kadagiti nalawag a pagannurotan iti pannakausar daytoy sibibiag, nadiosan a bileg. Ti pisikal a kinadekket ket para laeng iti maysa a lalaki ken maysa a babai a nakikallaysa iti tunggal maysa.

Kaaduan iti lubong ti saan a mamati iti daytoy, ngem ti opinion ti publiko ket saan nga isu ti mangeddeng iti kinapudno. Impakdaar ti Apo nga awan ti narugit a tao a makagun-odto iti celestial a pagarian. Gapuna no agaramidkayo kadagiti pangngeddeng maipanggep iti moralidad, agpanunotkayo koma iti celestial. Ket no nagbalinkayo a narugit, ipakaasik kadakayo nga agbabawikayo. Umasidegkayo ken ni Cristo ket awatenyo ti karina iti naan-anay a pannakapakawan no naan-anay nga agbabawikayo kadagiti basolyo.¹⁶

Three young children sit together and watch a session of conference together. Part of a worldwide series of photographs taken in connection with General Conference. September 30 - October 1, 2023. Pictures were taken in Denmark.

Denmark

Kas iti panagpanunotyo iti celestial, makitayonto dagiti pannubok ken oposision nga adda maysa a baro a pannirigan. No batikusen ti maysa nga ay-ayatenyo ti kinapudno, agpanunotkayo iti celestial, ken diyo pagduaduaan ti pammaneknekyo . Impadto ni Apostol Pablo nga “iti ud-udina a panawen dagiti dadduma umadayodanto iti pammati, nga ipangagda dagiti manangallilaw nga espiritu, ken doktrina dagiti sairo.”¹⁷

Awan patinggana dagiti panangallilaw ti kabusor. Agsaganakayo koma. Dikayo kaano man agpabalakad kadagiti saan a mamati. Agsapulkayo iti pannarabay manipud kadagiti timek a mapagtalkanyo—manipud kadagiti propeta, mammadto, ken mammaltiing ken manipud kadagiti arasaas ti Espiritu Santo, a “mangipakitanto kadakayo ti amin a banag no ania ti nasken nga aramidenyo.”¹⁸ Aramidenyo koma ti naespirituan nga aramid a mangpadakkel iti kabaelanyo nga umawat iti bukod a paltiing.¹⁹

No panunotenyo ti celestial, dumakkelto ti pammatiyo. Idi maysaak nga agtutubo nga intern, $15 ti matgedak iti binulan. Maysa a rabii, dinamag ti asawak a ni Dantzel no agbaybayadak iti apagkapullo iti dayta sangkabassit a matgedan. Diak agbaybayad. Dagus a nagbabawi-ak ket rinugiak a binayadan ti nayon a $1.50 a binulan nga apagkapullo.

Adda kadi nagbaliw iti Simbaan gapu ta ninayonanmi ti apagkapullomi? Siempre awan. Nupay kasta, ti panagbalinko a full-tithe payer ti namagbalbaliw kaniak. Ditoy a naammuak a ti panagbayad iti apagkapullo ket maipapan amin iti pammati, saan nga iti kuarta. Idi nagbalinak a full-tithe payer, nangrugin a naglukat dagiti tawa ti langit para kaniak. Mamatiak a naikkannak iti adu a gundaway iti propesionko gapu iti napudno a panagbayadmi iti apagkapullo.²⁰

Ti panagbayad iti apagkapullo ket agkasapulan iti pammati, ken daytoy pay ti mangpatibker iti pammati iti Dios ken iti Ay-ayatenna nga Anak.

Ti panangpili nga agbiag a nalinteg iti baet dagiti nailubongan ken napolitikaan nga aglawlaw ket mangpatibker iti pammati.

Ti panangbubos iti ad-adu pay nga oras iti templo ket mangpatibker iti pammati. Ken ti panagserbi ken panagdaydayawyo iti templo ti mangtulongto kadakayo nga agpanunot iti celestial. Ti templo ket maysa a balay ti paltiing. Sadiay a maipakita kadakayo no kasano ti dumur-as nga agturong iti celestial a biag. Sadiay nga ad-adda a mayasidegkayo iti Mangisalakan ken maikkankayo iti dakdakkel a pigsa iti pannakabalinna. Sadiay a maiwanwankayo iti panangrisut kadagiti parikut iti biagyo, uray pay dagiti makaddadanag unay a parikutyo.

Dagiti ordinansa ken katulagan ti templo ket agnanayon ti kinapategda. Itultuloytayo ti mangbangon iti ad-adu pay a templo tapno agbalin dagitoy a sagrado a posibilidad a maysa a realidad iti biag ti tunggal maysa kadakayo. Agyamankami a mangipakaammo kadagiti planomi a mangbangon iti templo iti tunggal maysa kadagiti sumaganad a 20 a lokasion:

• Savai’i, Samoa

• Cancún, Mexico

• Piura, Peru

• Huancayo, Peru

• Viña del Mar, Chile

• Goiânia, Brazil

• João Pessoa, Brazil

• Calabar, Nigeria

• Cape Coast, Ghana

• Luanda, Angola

• Mbuji-Mayi, Democratic Republic of the Congo

• Laoag, Philippines

• Osaka, Japan

• Kahului, Maui, Hawaii

• Fairbanks, Alaska

• Vancouver, Washington

• Colorado Springs, Colorado

• Tulsa, Oklahoma

• Roanoke, Virginia

• Ulaanbaatar, Mongolia

Bilbilinennatayo ti Apo a mangbangon kadagitoy a templo tapno matulongannatayo nga agpanunot iti celestial. Sibibiag ti Dios. Ni Jesus ti Cristo. Naisublin ti Simbaanna tapno mangbendision iti amin nga annak ti Dios. Paneknekak iti sagrado a nagan ni Jesucristo, amen.

© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, November 2023. Language. 19050 864

Dagiti Nagadawan

1. Kitaen iti Juan 3:38.

2. Alma 7:11.

3. Kitaen iti Alma 7:12.

4. Doktrina ken Katulagan 19:18.

5. 2 Nephi 9:40.

6. 2 Nephi 28:7.

7. Mabalin a mapaneknekan a nalaklaka ti agbabawi ken dumur-as iti naespirituan ditoy, idinto a makikaysa ti espiritutayo iti bagitayo, ngem iti sumaruno a lubong iti nagbaetan ti panawen intono matay ken agungartayo. Kas iti insuro ni Amulek kadagiti kimmayakay a Zoramite, “Daytoy a biag ti panawen a panagsagana ti tao a sumabat iti Dios” (kitaen iti Alma 34:32–35).

8. 2 Nephi 9:39.

9. Kitaen iti Mosiah 4:30, a nangbalakan ni Ari Benjamin kadagiti taona, “No saanyo nga annadan ti bagbagiyo, ken ti pampanunotyo, ken ti sasaoyo, ken ti aramidyo, ken tungpalen dagiti bilin ti Dios, ken panagtultuloyyo iti pammati … , masapul a mapukawkayo.”

10. Doktrina ken Katulagan 132:7; nainayon ti panangyunay-unay.

11. Siempre, saan a mabalin a baliwan ti karbengan a panagpiliyo ti karbengan a panagpili ti sabali ken dagiti pagbanagan ti kakuyogna. Desperadoak idi a mailantip kadagiti dadakkelko. Nupay kasta, nasken idi nga agurayak agingga a pinilida ti nagpa-endow idi agtawenda iti nasurok a 80. Kalpasanna nailantipda kas agassawa, ket nailantipkami nga annak kadakuada.

12. Maulit-ulit a paneknekan dagiti nasantuan a kasuratan a posible laeng ti sagut ti agnanayon a biag babaen kadagiti merito, asi, ken parabur ni Mangisalakan a ni Jesucristo (kitaen, kas pagarigan, iti Moroni 7:41; kitaen met iti 2 Nephi 2:6–8, 27).

13. Kitaen iti 2 Nephi 2:11.

14. Kitaen iti Doktrina ken Katulagan 122:7.

15. Doktrina ken Katulagan 121:8.

16. Kitaen iti Isaias 1: 16–8; Doktrina ken Katulagan 58: 42–43.

17. 1 Timoteo 4:1. Ituloy ti sumaruno a bersikulo, “Ti panagsao ket ulbod iti panaginsisingpet; a napuoran ti konsiensiada iti napudot a landok” (bersikulo 2). Impakdaar ni Pablo nga amin nga “agbiag a nadiosan ken Cristo Jesus agsagabadanto iti pannakaidadanes” (2 Timoteo 3:12).

18. 2 Nephi 32:5; nainayon ti panangyunay-unay. “No agdawatkayo,” mabalintayo nga “umawat iti paltiing iti kada paltiing, pagsiriban iti kada pagsiriban” (Doktrina ken Katulagan 42:61).

19. Kitaen iti Russell M. Nelson, “Revelation for the Church, Revelation for Our Lives,” Ensign wenno Liahona, Mayo 2018, 96.

20. Saan nga ipasimudaag daytoy ti relasion ti pakaigapuan ken epekto. Dagiti dadduma a di pulos agbayad iti apagkapullo ket makagun-od kadagiti propesional a gundaway, idinto ta dagiti dadduma nga agbayad iti apagkapullo ket saan a makagun-od. Ti kari ket maluktanto dagiti tawa ti langit iti agbaybayad iti apagkapullo. Agduduma ti kasasaad dagiti bendision.