Binulan a Mensahe ti Liahona , Mayo 2023
Dagiti Pagarian ti Langit
Dagiti naadaw a sao
Madagascar
Isuro ti naipalgak a doktrina ti naisubli a Simbaan ni Jesucristo dagiti Santo iti Ud-udina nga Aldaw nga amin nga annak ti Dios—nga addaan kadagiti eksepsion a limitado unay tapno ibilang ditoy—ket agtawidto iti kamaudiananna iti maysa kadagiti tallo a pagarian ti gloria, uray ti kabassitan a “mangrimbaw iti amin a pannakaawat” [Doktrina ken Katulagan 76:89]. …
Maysa pay a naidumduma a doktrina ken kannawidan ti naisubli a Simbaan ket dagiti naipalgak a bilin ken katulagan a mangidiaya iti amin nga annak ti Dios ti sagrado a pribilehio ti pannakaikari iti kangatuan a tukad ti gloria iti celestial a pagarian. Dayta a kangatuan a pagtungpalan—ti pannakaitan-ok iti celestial a pagarian—isu ti pokus ti Ti Simbaan ni Jesucristo dagiti Santo iti Ud-udina nga Aldaw. …
… Iti “celestial” a gloria adda tallo a tukad, a ti kangatuan ket ti pannakaitan-ok iti celestial a pagarian. …
Ti plano ti Dios, a nabangon iti agnanayon a kinapudno, ket agkasapulan a mabalin a magun-od ti pannakaitan-ok laeng babaen ti kinapudno kadagiti katulagan ti agnanayon a kallaysa ti maysa a lalaki ken maysa a babai iti nasantuan a templo, nga iti kamaudianan sidadaan a magun-odto ti kallaysa kadagiti amin a napudno. …
Ti Maudi a Panangukom ket saan laeng a panangamiris iti kadagupan dagiti naimbag ken dakes nga aramid—no ania ti naaramidtayo. Maibatay daytoy iti maudi nga epekto dagiti tignay ken panunottayo—no ania ti nagbalinantayo. Maikaritayo iti biag nga agnanayon babaen ti proseso ti pannakapasurot. …
Gapu ken ni Jesucristo ken ti Pannubbotna, no agkurangtayo iti daytoy a biag, mabalintayo ti agbabawi ken makikadua manen iti dana ti katulagan a mangiturong iti tarigagayan ti Nailangitan nga Amatayo para kadatayo.
© 2023 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, November 2023. Language. 19025 864