Dagiti Pagarian ti Gloria
Addaantayo iti naayat a Nailangitan nga Ama a makakita nga umawattayo iti tunggal bendision ken pagimbagan nga ipalubos dagiti bukodtayo a tarigagay ken pili.
Masansan a maisaludsod kadagiti miembro ti Ti Simbaan ni Jesucristo dagiti Santo iti Ud-udina nga Aldaw, “Kasano a maiduma ti simbaanyo iti dadduma a simbaan a Kristiano? Karaman kadagiti sungbat nga itedtayo ket ti pakabuklan ti doktrina ni Jesucristo. Kangrunaan iti dayta a doktrina ket ti kinapudno nga ay-ayaten ti Amatayo idiay Langit amin nga Annakna isu a kayatna nga agbiagtayo amin iti pagarian ti gloria iti agnanayon. Maysa pay, kayatna a makipagnaedtayo Kenkuana ken iti Anakna, ni Jesucristo iti agnanayon. Intedna kadatayo dagiti pannursuro ken gundaway a mangaramid kadagiti pili a mangipanamnama kadatayo iti pangtungpalan ken ti biag a pilientayo.
I.
Manipud iti moderno a paltiing ammotayo a ti ultimo a pagtungpalan ti amin nga agbiag ditoy daga ket saan a kurang a kapanunotan ti langit kadagiti nalinteg ken agnanayon a panagsagaba ti impierno iti dadduma. Ti naayat a plano ti Dios para kadagiti annakna iramanna daytoy a kinapudno nga insuro ti Mangisalakantayo, ni Jesucristo: “Iti balay ni Amak adu dagiti mansion.”1
ti naipalgak a doktrina ti naisubli a Simbaan ni Jesucristo Dagiti Santo iti Ud-udina nga Aldaw isurona nga amin nga annak ti Dios—malaksid kadagiti limitado unay tapno maibilang ditoy—ket agtawidto iti kamaudiananna iti maysa kadagiti tallo a pagarian ti gloria, uray ti kabassitan kadagitoy ket “rimbawanna ti amin a pannakaawat.”2 Kalpasan ti panawen a panagsagaba dagiti nasukir gapu kadagiti basolda, a ti panagsagaba ti mangisagana kadakuada para iti sumaruno, agungarto amin ket agtultuloyda iti Maudi a Panangukom ni Apo Jesucristo. Sadiay, ti naayat a Mangisalakantayo, a, naisuro kadatayo, “idaydayawna ti Ama, ken isalakanna amin nga aramid dagiti imana,”3 ibaonnanto amin dagiti annak ti Dios iti maysa kadagitoy a pagarian ti gloria a maibatay iti tarigagay a naparangarang babaen dagiti pilida.
Maysa pay a naidumduma a doktrina ken kannawidan ti naisubli a Simbaan ket dagiti naipalgak a bilin ken katulagan a mangidiaya iti amin nga annak ti Dios ti sagrado a pribilehio ti pannakaikari iti kangatuan a tukad ti gloria iti celestial a pagarian. Dayta a kangatuan a pagtungpalan—ti pannakaitan-ok iti celestial a pagarian—isu ti pokus ti Ti Simbaan ni Jesucristo dagiti Santo iti Ud-udina nga Aldaw.
Iti moderno a paltiing, addaan dagiti Santo iti Ud-udina nga Aldaw itoy naidumduma a pannakaawat iti plano ti Dios iti ragsak para iti annakna. Mangrugi dayta a plano iti biagtayo kas espiritu sakbay a nayanaktayo, ken ipalgakna ti panggep ken kasasaad ti napili a panagdaliasattayo iti biag ken ti tinarigagayantayo a pagtungpalan kalpasanna.
II.
Ammotayo iti moderno a paltiing nga “adda naited a linteg iti amin a pagarian”4 ken ti pagarian ti gloria nga awatentayo iti Maudi a Panangukom ket maikeddeng babaen kadagiti linteg a pilientayo a suroten iti panagdaliasattayo iti biag. Iti babaen dayta naayat a plano, adu dagiti pagarian—adu a mansion—tapno tawidento ti amin nga annak ti Dios ti pagarian a ti gloriana ket sinanam-ay a “makapagtalinaedda” kadagiti lintegna.
No iladawantayo iti kinatao ken kasapulan ti tunggal maysa iti tallo a pagarian iti plano ti Ama, mangrugitayo iti kangatuan, nga isu ti pokus dagiti nadiosan a bilin ken ordinansa nga impalgak ti Dios babaen ti Ti Simbaan ni Jesucristo dagiti Santo iti Ud-udina nga Aldaw. Iti “celestial” a gloria5 adda tallo a tukad,6 a ti kangatuan ket ti pannakaitan-ok iti celestial a pagarian. Daytoy ti pagnaedan dagidiay “immawat iti pakabuklanna, ken ti gloriana,” ngarud, “didiosda, uray dagiti annak a lallaki [ken babbai] ti Dios”7 ken “agtaengda iti sanguanan ti Dios ken ti Cristona iti agnanayon.”8 Babaen ti paltiing, impalgak ti Dios dagiti agnanayon a linteg, ordinansa, ken katulagan a nasken a matungpal tapno mapadur-as dagiti nadiosan a kababalin a kasapulan tapno matungpal daytoy nadiosan a potensial. Daytoy ti pokus ti Ti Simbaan ni Jesucristo dagiti Santo iti Ud-udina nga Aldaw ta panggep daytoy naisubli a Simbaan ti mangisagana iti annak ti Dios para iti pannakaisalakan iti celestial a gloria ken, nangnangruna pay, iti pannakaitan-ok iti kangatuan a tukadna.
Ti plano ti Dios, a naibatay iti agnanayon a kinapudno, idawatna a magun-od ti pannakaitan-ok laeng babaen ti kinapudno iti katulagan ti agnanayon a kallaysa ti lalaki ken babai iti nasantuan a templo,9 nga iti kamaudianan ti kallaysa magun-odto ti amin a napudno. Dayta ti gapuna nga isurotayo a “ti katatao [gender] ket maysa a napateg a talugading iti pakabigbigan ken panggep ti tao sakbay daytoy a biag, agdama a biag, ken agnanayon.”10
Maysa a naidumduma a napateg a pannursuro a tumulong kadatayo nga agsagana iti pannakaitan-ok ket ti 1995 a waragawag maipapan iti pamilia.11 Dagiti waragawagna ti manglawlawag kadagiti kasapulan a mangisagana kadatayo a makipagindeg iti Dios Ama ken ti Anakna, ni Jesucristo. Dagiti saan a naan-anay a makaawat iti naayat a plano ti Ama para iti annakna ket maibilangda daytoy a waragawag ti kaamaan a di agbalbaliw nga annuroten. Iti kasupadina, patalgedanmi a ti waragawag ti kaamaan, a naibatay iti di mabaliwan a doktrina, ket mangilawlawag iti mortal a relasion ti kaamaan a pakapasamakan ti kapatgan a paset ti agnanayon a panagdur-astayo.
Iladawan ni Apostol Pablo ti tallo a tukad ti gloria, nga inyarigna ida kadagiti gloria ti init, bulan, ken bituen.12 Inaganna ti kangatuan a “celestial” ken ti maikadua a “terrestrial.”13 Saanna nga inaganan ti kababaan, ngem innayon ti maysa a paltiing ken Joseph Smith ti naganna: “telestial.”14 Iladawan pay dayta a paltiing ti kababalin dagiti tao a maituding iti tunggal maysa kadagitoy a pagarian ti gloria. Dagiti saan a mangpili “a mangtungpal iti linteg ti maysa a celestial a pagarian”15 agtawiddanto iti sabali a pagarian ti gloria, a nababbaba ngem iti celestial ngem maibagay iti linteg a pinilida ken sinanam-ay a “makapagtalinaedda.” Dayta sao nga agtalinaed, gagangay unay iti scriptures, kaipapananna ti natalged a pannakaipuesto.16 Kas pagarigan, dagiti adda iti terrestial a pagarian—maidilig iti nalatak a konsepto ti langit—“isuda ti umawat iti imatang ti Anak, ngem saan a ti pakabuklan ti Ama.”17 Isuda dagiti “nadayaw a tattao ditoy daga, a nabulsek gapu iti kinasikap dagiti tao,”18 ngem “saanda a natured iti pammaneknek ni Jesus.”19
Ti mangipalgak a panangiladawan kadagiti naituding iti kababaan kadagiti pagarian ti gloria, ti telestial, ket “ti saan a makapagtalinaed iti terrestial a gloria.”20 Iladawanna dagiti mangilaksid iti Mangisalakan ken saan a nagtungpal iti nadiosan a beddeng iti ugalida. Daytoy ti pagarian a pagnaedan dagiti nadangkes, kalpasan ti panagsagabada iti basbasolda. Dagitoy ti mangiladawan iti moderno a paltiing a “dagiti saan nga immawat iti ebanghelio ni Cristo, wenno ti pammaneknek ni Jesus. …
“Dagitoy dagiti ulbod, ken mangkukulam, ken mannakiabig, ken mannakikamalala, ken asino man nga agayat ken agulbod.”21
Iti panagsaritana iti tallo a pagarian ti gloria nga addaan parmata kas propeta, insurat ni Presidente Russell M. Nelson: “Ti mortal a biag ket dumani saan a nanosegundo no idilig iti kinaagnanayon. Ngem nagpateg a nanosegundo dayta! Ibilang no kasano nga aramiden daytoy: Bayat daytoy mortal a biag mangpilika no ania dagiti linteg a tungpalem—dagiti adda iti celestial a pagarian, wenno iti terrestrial, wenno iti telestial—ket, ngarud, ania a pagarian ti celestial a pagnaedamto iti agnanayon. Anian a plano! Daytoy ti plano a naan-anay a mangdayaw iti karbengam nga agpili.”22
III.
Insuro ni Apostol Pablo a naited dagiti pannursuro ken bilin ti Apo tapno maragpattayo amin “ti rukod ti katayag ti pakabuklan ni Cristo.”23 Ad-adu nga amang ti kasapulan dayta a proseso ngem ti pananggun-od iti pannakaammo. Saan pay ketdi nga umdas ti makombinsi iti ebanghelio; nasken nga agtignaytayo tapno mapasurottayo iti daytoy. Maisupadi iti dadduma a panangasaba, a mangisuro kadatayo nga ammuen ti maysa a banag, karitennatayo ti ebanghelio ni Jesucristo nga agbalin a maysa a banag.
Kadagiti kasta a pannursuro maibagatayo a ti Maudi a Panangukom ket saan laeng a panangamiris iti dagup ti naimbag ken dakes nga aramid—no ania ti naaramidtayo. Maibatay daytoy iti maudi nga epekto dagiti tignay ken panunottayo—no ania ti nagbalinantayo. Maikaritayo iti biag nga agnanayon babaen ti proseso ti pannakapasurot. Kas nausar ditoy, daytoy a sao nga adu ti kaipapananna ipasimudaagna ti nauneg a panagbalbaliw ti nakaparsuaan. Saan nga umdas iti asino man a basta agaramid iti tignay. Dagiti bilin, ordinansa, ken katulagan ti ebanghelio ket saan a listaan dagiti deposito a kasapulan a maaramid iti maysa a kuenta iti langit. Ti ebanghelio ni Jesucristo ti plano a mangipakita kadatayo no kasano ti agbalin a kas iti kayat ti Nailangitan nga Amatayo a pagbalinantayo.24
IV.
Gapu ken ni Jesucristo ken ti Pannubbotna, no agkurangtayo iti daytoy a biag, mabalintayo ti agbabawi ken makikadua manen iti dana ti katulagan a mangiturong iti tarigagayan ti Nailangitan nga Amatayo para kadatayo.
Isuro ti Libro ni Mormon a “ditoy a biag ti panawen nga agsagana[tayo] a sumabat iti Dios.”25 Ngem dayta mapannubok a limitasion iti “daytoy a biag” ket naikkan iti mangnamnama a konteksto (iuray agingga iti mano a tukad para iti dadduma a tao) babaen ti impalgak ti Apo ken ni Presidente Joseph F. Smith, a nairekord itan iti Doktrina ken Katulagan benneg 138. “Nakitak,” insurat ti propeta, “a dagiti matalek a panglakayen iti daytoy a dispensasion, inton pumanawda iti mortal a biag, itultuloyda ti panagbannogda iti panangikasaba iti ebanghelio ti panagbabawi ken pannakasubbot, babaen ti daton ti Bugbugtong nga Anak ti Dios, kadagiti adda iti sipnget ken babaen ti pannakaadipen ti basol iti naindaklan a lubong ti espiritu dagiti natay.
“Masubbotto dagiti natay nga agbabawi, babaen ti panagtungpal kadagiti ordinansa iti balay ti Dios,
“Ket kalpasan a mabayadanda ti dusa dagiti salungasingda, ken mabugguanda a nadalus, umawatdanto iti gunggona a maitunos kadagiti aramidda, ta agtawidda iti pannakaisalakan.”26
Mainayon pay, ammotayo a ti Milenium, ti sangaribu a tawen a sumaruno iti Maikadua a Yaay ti Mangisalakan, ket agbalinto a panawen a mangannong kadagiti kasapulan nga ordinansa para kadagiti saan a nakaawat kadagitoy iti mortal a biagda.27
Adu ti ditay ammo maipapan iti tallo a kangrunaan a panawen iti plano ti pannakaisalakan ken ti pagkakanaiganda iti tunggal maysa: (1) ti lubong dagiti espiritu sakbay daytoy a biag, (2) mortalidad, ken (3) ti sumaruno a biag. Ngem ammotayo dagitoy agnanayon a kinapudno: “Ti pannakaisalakan ket pakaseknan ti maysa a tao, ngem ti pannakaitan-ok ket pakaseknan ti pamilia.”28 Addaantayo iti naayat a Nailangitan nga Ama a makakita nga umawattayo iti tunggal bendision ken pagimbagan nga ipalubos dagiti bukodtayo a tarigagay ken pili. Ammotayo met nga awan ti pilitenna iti nailantip a relasion a maikontra iti pagayatanna. Masigurado dagiti bendision ti nailantip a relasion iti amin nga agtungpal iti katulaganda ngem saan babaen ti panangpilit iti nailantip a relasion iti sabali a tao a di maikari wenno di kayat.
Patpatgek a kakabsatko, paneknekak ti kinapudno dagitoy a banag. Paneknekak ni Apotayo a Jesucristo, “ti nangirugi ken nangileppas iti pammatitayo,”29 a ti Pannubbotna, iti babaen ti plano ti Amatayo sadi Langit, aramidenna a posible ti amin, iti nagan ni Jesucristo, amen.