Para iti Pagimbagan dagiti Kaputotanyo
Dikayo agbalin a nakapuy a silpo daytoy napintas a pamungo ti pammati nga inrugiyo, wenno inawatyo, kas tawid. Napigsakayo koma.
Sumagmamanon a tawen ti naglabas, idi agserserbiak iti South America Northwest Area ken agnanaedak idiay Lima, Peru, adda napintas a padasko a kayatko nga isarita kadakayo.
Napasamak daytoy idi agawidak kalpasan ti busy assignment-ko iti udi ti lawas. Kalpasan a nakumpletok ti proseso ti imigrasion iti airport, naam-ammok ti maysa a mannakigayyem a taksi driver nga agur-uray kaniak iti gagangay a taxi service-mi. Pinasakaynak iti luganna, ket nagtugawak iti likud tapno agrelaks ken ag-enjoy iti naulimek a biahe nga agawid. Kalpasan a nagmaneho iti sumagmamano a bloke, nakaawat ti drayber iti phone call ti superbisorna, a nangibaga kenkuana a sabali ti nagluganak a taksi. Adda sabali a lugan a naireserba kaniak, ket kiniddaw ti superbisor nga isublinak iti airport no kayatko a sukatan ti lugan. Imbagak kenkuana a saanen a nasken, ket makapagtuloykami. Kalpasan ti sumagmano a minuto a panagulimek, kinitanak iti sarming iti likud ket dinamagna, “Mormonka, saan kadi?”
Bueno, kalpasan dayta mangaw-awis a saludsod, ammok a nalpasen ti naulimek a kanitok. Diak makedkedan ti agsukisok no sadino nga iturongnakami ti saludsodna.
Naammuak nga Omar ti naganna, Maria Teresa ti nagan ti asawana, ken dua ti annakda—ni Carolina, edad 14, ken Rodrigo, edad 10. Maysa a miembro ti Simbaan ni Omar manipud pay idi ubing. Aktibo ti pamiliana, ngem iti maysa a punto, nagsardeng a nakimisa dagiti dadakkelna. Nagbalin a naan-anay nga inactive ni Omar idi 15 ti tawenna. Agtawen isuna idin ti 40.
Iti dayta a kanito naamirisko a diak simmakay iti sabali a taksi. Saan a naiparparna daytoy! Imbagak kenkuana no asinoak ken linuganak ti taksina gapu ta aw-awagan isuna ti Apo nga agsubli iti ikubna.
Nagsaritaanmi maipapan iti panawen idi aktibo a miembro ti Simbaan isuna ken ti pamiliana. Adda makaay-ayo a lagipna kadagiti nasam-it a kanito ti family-home-evening, ken dadduma a kanta ti Primary. Kinantana ti dadduma a balikas ti “Anaknak ti Dios.”1
Kalpasan a naalak ti adresna, numero ti telepono, ken pammalubos nga ited daytoy iti bishopna, imbagak nga ipamuspusak ti mapan iti chapel iti umuna nga aldaw a panagsublina iti simbaan. Nalpasmi ti biahemi manipud airport agingga iti balayko, kasta met ti ababa a daliasatmi iti napalabasna, ket nagsinakami.
Sumagmamano a lawas kalpasanna tinawagannak ti bishopna, a nangibaga a makimisa ni Omar iti maysa a Domingo. Imbagak kenkuana nga addaakto idiay. Dayta a Domingo, adda ni Omar idiay kaduana ti barona. Saan pay nga interesado ti asawa ken balasangna. Sumagmamano a bulan kalpasanna, tinawagannak manen ti bishopna, tapno ibagana a buniagan ni Omar ti asawana ken dua nga annakna, ket inawisnak nga adda sadiay. Adtoy ti ladawan dayta a Domingo a nakakumpirmaanda a miembro ti Simbaan.
Iti dayta a Domingo, imbagak ken Omar ken ti pamiliana a no nakasaganada, iti makatawen mapadayawanak a mangannong iti pannakailantipda iti Templo ti Lima Peru. Adtoy ti ladawan dayta nakallalagip a kanito para kadakami amin, a naala kalpasan ti makatawen.
Apay nga isaritak daytoy a padas kadakayo? Isaritak daytoy para iti dua a panggep.
Umuna, mangtaming kadagiti nasisingpet a miembro nga iti dadduma a gapu nagkayakayda iti naisubli nga ebanghelio ni Jesucristo. Maikadua, mangtaming pay kadagiti makiramraman a miembro ita a nalabit a saanda a napudno kadagiti katulaganda a kas iti rumbeng koma. Iti agpada a kaso, maapektuan dagiti kaputotan nga agur-uray kadakuada, ket agpeggad dagiti bendision ken kari a nailatang kadagiti kaputotanda.
Mangrugitayo iti umuna a senario, dagiti nasingpet a miembro a pimmanaw iti dana ti katulagan, kas iti napasamak iti gayyemko a Peruvian a ni Omar. Idi damagek kenkuana no apay nga inkeddengna ti agsubli, kinunana a gapu ta nariknada iti asawana a naragragsak dagiti annakda iti ebanghelio ni Jesucristo. Nariknana a panawenen nga agsubli iti simbaan para kadagiti annakda.
Nakalidliday no makasabattayo iti saan nga aktibo a miembro wenno saan a miembro ti Simbaan nga iti maysa a panawen naaddaanda iti ebanghelio iti pamiliada ngem napukawda daytoy gapu iti pangngeddeng dagiti nagannak wenno appongda nga agkayakay iti Simbaan. Mabalin nga adda epekto dayta a pangngeddeng iti kaputotanda iti agnanayon!
Nalapdan dagiti annak ken appokoda iti pannakasalaknib ken kadagiti bendision ti ebanghelio ni Jesucristo iti biagda. Ad-adda pay a makapaliday, napukawdan dagiti kari ti agnanayon a pamilia nga adda idin kadakuada. Ti pangngeddeng ti maysa ket nangapekto iti sibubukel a pamungo dagiti an-annabo. Nadadael ti maysa a tawid ti pammati.
Nupay kasta, kas ammotayo, mabalin a tarimnen ti ania man a nadadael babaen ken ni Jesucristo. Gapu iti daytoy, ibilangyo daytoy nga awis ni Presidente Russell M. Nelson: “Ita, no insardengyon ti nagna iti dana, awisenkayo iti amin a namnama iti pusok nga agsublikayo koma. Ania man dagiti pakaseknanyo, ania man dagiti pannubokyo, adda lugar para kadakayo ditoy, ti Simbaan ti Apo. Mabendisionankayto ken dagiti saan pay a nayanak a kaputotanyo babaen kadagiti aramidyo itan nga agsubli iti dana ti katulagan.”2
Ita, tamingentayo ti maikadua a senario, dagiti makiramraman a miembro ita a nalabit saanda a napudno a kas iti rumbeng. Kas iti panangapekto dagiti pangngeddeng iti napalabas kadagiti realidad ita, apektuan dagiti pangngeddeng ita ti masakbayantayo ken dagiti miembro ti pamiliatayo.
Insuro ni Presidente Dallin H. Oaks:
“Allukoyennatayo ti naisubli nga ebanghelio ni Jesucristo a mangpanunot iti masakbayan. … Isurona dagiti napateg nga ideya iti masakbayan a mangtarabay iti tignaytayo ita.
“Iti kasupadina, am-ammotayo amin dagiti tao a maseknan laeng iti agdama: agbubos ita, agragsak ita, ken saan nga agdanag iti masakbayan.
“… No mangngeddengtayo iti agdama, nasken a kanayon a saludsodentayo, ‘Sadino ti turongento daytoy?’”3 Dagiti kadi agdama a pangngeddengtayo iturongdatayo iti rag-o ita ken agnanayon, wenno iturongdatayo kadi iti ladingit ken lulua?
Mapanunot ti dadduma, “Di nasken a makimisatayo iti Domingo,” wenno “Agbayadtayto iti apagkapullo no sumayaat dagiti banag,” wenno “Diakto suportaran dagiti lider ti Simbaan iti daytoy a banag.”
“Ngem,” kunada, “ammomi a pudno ti Simbaan, ket ditayto pulos panawan ti ebanghelio ni Jesucristo.”
Dagiti agpampanunot iti kastoy dida maamiris ti negatibo nga epekto daytoy “nabaaw (lukewarm)” a kita ti kinamiembro nga addanto iti biagda ken iti biag ti kaputotanda. Mabalin nga agtalinaed nga actibo dagiti nagannak, ngem dakkel ti peggad a mapukaw dagiti annakda—ditoy a biag ken iti agnanayon.
Maipanggep dagiti saanto nga agtawid iti celestial a gloria a kadua ti pamiliada, kuna ti Apo, “Dagitoy dagiti saan a natured iti pammaneknek ni Jesus; gapuna, saanda a magun-od ti korona iti pagarian ti Diostayo.”4 Dayta kadi ti kayattayo iti bagitayo wenno kadagiti annaktayo? Di kadi nasken a naturturedtayo ken nababaaw para iti pagimbagantayo ken pagimbagan ti kaputotantayo?
Insarita met ni Presidente M. Russell Ballard ti kasta met la a pakaseknan:
“Para iti dadduma, agtultuloy a narigat ti awis ni Cristo a mamati ken agtalinaed. … Marigatan a maawatan ti dadduma a disipulo ti nalawag nga annuroten wenno sursuro ti Simbaan. Adda pakaseknan ti dadduma iti pakasaritaantayo wenno iti pagkurangan ti sumagmamano a miembro ken leader, napalabas ken agdama. …
“…Ti pangngeddeng a ‘saanen a makipagna’ kadagiti miembro ti Simbaan ken napili a lider ti Apo ket addaanto iti napaut nga epekto a di kanayon a makita itan.”5
Anian a nakalkaldaang a tawid nga ipasa—ken ania a gapu? Ania man dayta, di umdas nga ilaksid ti negatibo a naespirituan nga epekto a pataudenna kadagiti agur-uray a kaputotan.
Patpatgek a kakabsatko, no mapaspasaranyo ti maysa kadagitoy dua a situasion a dinakamatko iti mensahek, usigenyo koma manen ti aramidyo. Ammoyo nga adda plano kadatayo ditoy a biag. Ammoyo a mabalin nga agnanayon dagiti pamilia. Apay nga ipapeggadyo ti bukodyo? Dikayo agbalin a nakapuy a silpo daytoy napintas a pamungo ti pammati nga inrugiyo, wenno inawatyo, kas tawid. Napigsakayo koma. Aramidenyon, ket matulongannakayo ti Apo.
Manipud iti kaunggak, awisenkayo a mangpanunot daytoy, kumita ken mangamiris “no sadino ti turongen daytoy,” ken, no kasapulan, agbalinkayo a natured a mangbaliw manen iti dalanyo para iti pagimbagan ti kaputotanyo. Iti nagan ni Jesucristo, amen.