Agpakumbaba nga Umawat ken Sumurot
Ti kinapakumbaba ket naidawat a kasapulan iti panagsaganatayo nga agsubli iti sidong ti Dios.
Iti maikalima a kapitulo ti Alma, naited ti pagamirisan a saludsod: “Maibagayo kadi, no mataykayo iti daytoy a kanito, iti bagbagiyo, a naan-anay ti kinapakumbabayo?”1 Ipasimudaag dayta a saludsod a ti kinapakumbaba ti naidawat a kasapulan iti panagsaganatayo nga agsubli iti sidong ti Dios.
Kayattayo amin a panunoten nga umdas ti kinapakumbabatayo, ngem ti padpadas iti biag ti mangpaamiris kadatayo a ti natural, natangig a lalaki ken babao ti masansan nga adda iti kaunggantayo.
Adu a tawenen ti naglabas, idi agyan pay laeng iti pagtaengan ti dua a balasangmi, inkeddengko nga ipakita kadakuada ken ti asawak ti business unit nga imatmatonak iti kompania a pagtrabahuak.
Ti pudno a panggepko ket ipakita kadakuada ti lugar a, saan a kas iti taengmi, pangaramidan ti tunggal maysa iti paaramidko kadakuada a didak pagduaduaan. Idi sumangpetmi iti akinsango a ruangan, a gagangay nga automatic a maluktan no umasideg ti luganko, nasdaawak ta di naglukat itoy a gundaway. Ketdi, immasideg iti kotse ti maysa a security guard a diak pay pulos nakita idi ket kiniddawna ti company IDk.
Imbagak kenkuana a diak kasapulan ti ID nga agmaneho a mapan iti property nga usarek ti luganko sa napannakkel a sinaludsodko kenkuana: “Ammom kadi no asino ti kasarsaritam?”
A nangsungbatanna, “Bueno, gapu ta awan ti ipakitam a company ID, diak maammuan to asinona, ken bayat ti kaaddak ditoy a gate dika mapalugodan a sumrek nga awan ti husto a pakabigbigan.”
Napanunotko ti kumita iti rearview mirror, tapno kitaek ti reaksion dagiti annakko a babbai iti dayta, ngem ammok a magusgustuanda ti tunggal segundo iti dayta a kanito! Agwingwinging ti asawak iti abayko gapu iti dina pananganamong iti tignayko. Maudi a resort-ko ti agdispensar iti guardia ket kunak a naladingitak unay gapu iti madi a panangtratok kenkuana. “Napakawankan,” kinunana, “ngem gapu ta awananka iti company ID dika makastrek ita!”
Siinnayad a nagmanehoak a nagsubli ngarud iti pagtaengan tapno alaek ti IDk, a nalabit a naadalko daytoy napateg a leksion: no pilientayo ti saan nga agpakumbaba, maibabaintayo iti udina.
Iti Proverbios makitatayo, “Ti tangsit ti tao mangibabanto kenkuana: ngem ti napakumbaba ti espirituna maragpatnanto ti dayaw.”2 Tapno mapadur-as ti pakumbaba, nasken a maawatantayo ti kaipapananna iti konteksto ti ebanghelio.
Matikaw ti dadduma a tao iti panagpakumbaba iti dadduma a banag, kas pagarigan, iti panagbalin a napanglaw. Ngem adu dagiti napanglaw ken natangig ken adu met dagiti nabaknang ken napakumbabada. Dagiti managbabain unay wenno nababa ti panagraemda iti bagida ket addaanda iti makinruar a langa ti kinapakumbaba ngem iti kaungganda napnuanda iti kinatangig no dadduma.
Ania ti kinapakumbaba? Segun iti Preach My Gospel, daytoy ti “kinatulok nga agpasakup iti pagayatan ti Apo. … Daytoy ti panagbalin a teachable. … [Daytoy ti] napateg a catalyst iti naespirituan a panagdur-as.”3
Adu dagiti gundaway a pangpatonarantayo amin iti daytoy a kababalin a kas ken Cristo. Kayatko a sukisoken nga umuna no kasano ti kinapakumbabatayo, wenno ti nasken, iti panangsurot iti balakad ti propetatayo. Maited ti ababa a quiz iti tunggal maysa kadatayo:
-
Dakamtentayo kadi ti naan-anay a nagan ti Simbaan iti amin a pannakilangentayo? Kinuna ni Presidente Nelson, “Ti mangikkat iti nagan ti Apo manipud iti Simbaan ti Apo ket dakkel a balligi ni Satanas.”4
-
Bay-antayo kadi ti Dios nga agballigi iti biagtayo babaen ti panangawat iti nalawag nga awis ti propeta? “Ita awagak dagiti miembro iti amin a lugar a mangyuna iti panangiwaksi iti ugali ken aramid ti panangidumduma.”5.
-
Parparmekentayo kadi ti lubong, nga ad-adda nga agtalektayo iti doktrina ni Cristo ngem dagiti pilosopia ti tao, kas insuro ti propetatayo?”6
-
Mamagkappiatayo kadi a mangisasao iti positibo a banag ken maipapan iti tattao? Insuro kadatayo ni Presidente Nelson idi napan a sapasap a komperensia ti sumaganad: “No adda ania man a naimbag, makaay-ayo, wenno nasayaat ti damag wenno maidaydayaw a maibagatayo maipapan iti sabali a tao—iti man sangona wenno iti likudanna—dayta koma ti pagalagadantayo iti pannakisarita.”7
Dagitoy ti simple ngem nabileg a pangiturong. Laglagipen, nasken nga adda aramiden ti amin a tao ni Moises tapno maagasan ket kumitada iti gambang nga uleg nga intag-ayna.8 Ngem “gapu iti kinagagangay ti dalan, wenno iti kinawayana, adu ti naungaw.”9
Ditoy a komperensia nangngegtayon ken mangngegtayto ti di agkupas a balakad dagiti propeta ken apostoltayo. Daytoy ti perpekto a gundaway a mapadur-as ti kinapakumbaba ken bay-an parmeken dagiti opiniontayo ti napigpigsa pay a kombiksion nga agsao ti Apo babaen kadagitoy napili a lider.
Kangrunaanna, no patanoren ti pakumbaba, maawatan ken awatentayo koma a ditayo kabaelan a parmeken ti karittayo wenno maragpat ti naan-anay a potensialtayo babaen ti panagkagumaantayo laeng. Ibaganto dagiti motivational speaker, mannurat, coach ken influencer iti intero a lubong, nangruna kadagiti digital platform nga agpannuray ti amin a banag kadatayo ken ti tignaytayo. Mamati ti lubong iti takiag ti lasag.
Ngem babaen ti naisubli nga ebanghelio nasursurotayo nga agpannuray unay iti kinaparabur ti Nailangitan nga Ama ken ti Pannubbot ni Mangisalakantayo a ni Jesucristo, “ta ammotayo a maisalakantayo babaen ti parabur, kalpasan ti amin nga aramidtayo.”10 Dayta’t gapuna a napateg unay ti agaramid ken agtungpal iti katulagan iti Dios, ta daytoy ti mangted kadatayo iti naan-anay a pannakagun-od iti makaagas, makabael, ken mangan-anay a bileg ni Jesucristo babaen ti Pannubbotna.
Ti idadar-ay iti linawas a miting ti sakramento ken masansan a panagdayaw iti templo tapno makiraman iti ordinansa ken umawat ken mangpabaro iti katulagan ket maysa a tanda a bigbigentayo ti panagpannuraytayo iti Nailangitan nga Ama ken Mangisalakantayo a ni Jesucristo. Dayta ti mangawis iti bilegda iti biagtayo a tumulong iti amin a parikuttayo ken kangrunaanna matungpal ti panggep ti nakaparsuaantayo.
Di pay nabayag nasubok manen ti lebel ti pakumbabak ken pannakaawatko iti panagpannurayko iti Apo. Addaak iti taksi a mapan iti airport tapno kamakamek ti ababa a flight iti lugar nga adda narigat unay situasion a risuten. Ti drayber ti taksi, a saan a miembro ti Simbaan, kinitanak iti sarming ket kinunana, “Makitak a madi ti riknam ita nga aldaw!”
“Maibagam kadi?” Dinamagko.
“Siempre,” kinunana. Kalpasanna kinunana ti maysa a banag a kastoy, “Adda gayam negatibo unay nga aura iti aglawlawmo!”
Inlawlawagko kenkuana nga adda narigat a situasionko a sanguen idi kalpasanna dinamagnak, “Inaramidmo kadin ti amin a kabaelam a mangrisut iti daytoy?”
Insungbatko nga inaramidko ti amin a kabaelak.
Kalpasanna kinunana ti maysa a banag a diak kaano man nalipatan: “Gapuna agtalekka iti Dios, ket agsayaatto ti amin a banag.”
Ipudnok a nasulisogak a nagsaludsod kenkuana, “Ammom no asino ti kasasaom?” “Ngem diak inaramid! Impakumbabak ketdi ti bagik iti kararag iti sango ti Apo iti dayta maysa nga oras a panagtayab, a dumawdawat iti tulong ti Dios. Idi pumanawak iti eroplano, naammuak a naurnosen ti narigat a situasion a risuten ken saanen a kasapulan uray ti kaaddak.
Kakabsat, nalawag ken nagin-awa ti bilin, awis, ken kari ti Apo: “Agpakumbabaka; ket kibinennakanto nga iturong ti Apo a Diosmo, ket itdennanto kenka ti sungbat dagiti kararagmo.”11
Agpakumbabatayo koma a mangsurot iti balakad dagiti propetatayo ken ti Dios ken ni Jesucristo laeng ti makapagbalbaliw kadatayo—babaen dagiti ordinansa ken katulagan a naawat iti Simbaanna—iti kasayaatan a bersion ti bagitayo ditoy a biag ken, iti maysa nga aldaw, aramidennatayo a naan-anay ken ni Cristo. Iti nagan ni Jesucristo, amen.