Anianto La Ketdin a Rag-oyo
Awisenkayo itan nga itugotyo dagiti pannakaammo ken kapadasanyo, agraman dagiti nabayagen a mararaem a pammaneknekyo, ket mapankayo agserbi iti mision.
Patpatgek a kakabsatko, ti pampanunotek ita ket maipapan iti panaguummong ti Israel, nga inawagan ni Presidente Russell M. Nelson a “kapatgan a mapaspasamak ditoy daga ita. Awanen ti sabali pay a maidasig iti kinadakkelna, awanen ti sabali pay a maidasig iti kinapategna, awanen ti sabali pay a maidasig iti kinatan-okna.”1
Ti panaguummong ti kangrunaan a panangbigbig a “napateg dagiti kararua iti imatang ti Dios.”2 Kasta laeng ti kasimplena. Um-ummongentayo dagiti annak ti Dios kadagitoy maudi nga aldaw tapno maaddaanda iti “nabileg a bendision a maibukbok kadagiti uloda”3 ken dagiti kari “dagiti kinabaknang ti kinaagnanayon.”4 Ngarud, tapno maummong ti Israel kasapulantayo dagiti misionario—ad-adu ngem dagiti agserserbi.5 Ita nga aldaw, makisaritaak kadagiti adu nga aduan kapadasan a senior iti Simbaan a mabalin nga agserbi kas misionario. Kasapulannakayo ti Apo. Kasapulandakayo idiay New York ken Chicago, Australia ken Africa, Thailand ken Mexico, ken sadino man iti nagbaetan.
Palubosandak nga agsubli iti tawen a 2015. Maysaak idi a kabbaro a naawagan iti Korum dagiti Sangapulo-ket-Dua nga Apostol. Maysa kadagiti pagrebbenganmi kas Apostol ket ti panangdutok kadagiti misionario iti tay-ak ti pagserbianda. Kas maysa a Pitopulo, nakiramanak idi iti dayta a proseso,6 ngem itan, kas maysa nga Apostol, nariknak ti naan-anay a kadagsen ti annongek. Nangrugiak babaen ti nainkararagan a panangikabilko iti adu a bilang ti agtutubo nga elder ken sister, a saggaysa, kadagiti mision iti intero a lubong. Simmaruno a kinitak ti bilang dagiti senior couple. Adda 10 iti listaan. Saan unay nga adu. Nasdaawak, dinamagko iti katrabahuak iti Missionary Department, “Mano ti kasapulantayo iti daytoy a lawas a mangpunno kadagiti kiddaw?”
Insungbatna ti, “300.”
Nagtalinaed kaniak dayta makapaupay a kanito: 10 nga agassawa a mangpunno iti 300 a kiddaw.
Inallukoy ni Presidente Russell M. Nelson dagiti agassawa nga “agparintumengda ket agsaludsodda iti Nailangitan nga Ama no husto ti panawen a panagserbida iti mision.”7 Kadagiti amin a kualipikasion, imbagana, “ti tarigagay nga agserbi ti kapatgan.”8
Kas kinuna ti nasantuan a kasuratan, “Ngarud, no adda tarigagayyo nga agserbi iti Dios maawagankayo nga agtrabaho.”9 Dayta a trabaho ket maipapan iti linteg ti panagani. Mabasatayo iti libro ni Juan, “Ti agmula ken ti agani makapaggiddanda nga agrag-o.”10
Nakitak ti pannakatungpal ti linteg ti panagani iti bukodko a pamilia.
Sumagmamano a tawen ti napalabas, idi binisitak ti pamiliak, kiniddawnak ti bishop a maudi nga agsarita iti serbisio ti sacrament.11 Bayat ti panagbabak manipud iti entablado, immasideg kaniak ti maysa a babai a kaduana ti pito nga annakna ket inyam-ammona ti bagina kas Sister Rebecca Guzman.
Dinamagna, “Elder Rasband, am-ammom kadi da Rulon ken Verda Rasband?”
Naragsakanak ket insungbatko, “Isuda ti nagannak kaniak.”
Makitayo no sadino ti pagturongan daytoy. Babaen ti pammalubos ni Rebecca, a kaduana ita ti pamiliana iti Conference Center, iburayko ti pakasaritaan ti pamiliana.12
Agserserbi idi dagiti nagannakko, da Elder Rulon ken Sister Verda Rasband, kas senior couple iti Florida Fort Lauderdale Mission.13 Agprosposelaytda ken babaen ti nadiosan a panangiwanwan, nagtuktokda iti ruangan ti pagtaengan ni Rebecca. Tin-edyer laeng isuna idi ket magusgustuanna ti dumngeg iti musika dagiti Osmond, nangruna iti gayyemko a ni Donny—nga adda met ditoy ita.14 Nangngegna dagiti interbyuda iti media ket naammuanna a miembroda ti Ti Simbaan ni Jesucristo dagiti Santo iti Ud-udina nga Aldaw. Mariknana nga adda maysa a banag a naidumduma kadakuada, ket impagarupna a mabalin a gapu iti relihionda, isu a dua a tawen a nagsukisok ni Rebecca kadagiti pammati ti Simbaan iti biblioteka ti eskuelaan. Gapuna, idi adda nasayaat nga agassawa a nangtuktok iti ridaw ti pamiliana ket inyam-ammoda ti bagbagida kas misionario dagiti Santo iti Ud-udina nga Aldaw, nasdaaw isuna.
“Imbaga kaniak ni nanangko a pagtalawek ida,” insurat ni Rebecca, “ngem nariknak a ‘Saan.’ Kinitak dagiti rupada ket nariknak ti kasta unay a kinabara ken ayat. Dayta a lagip ket mangyeg pay laeng iti lulua kadagiti matak ken napalaus a rikna iti pusok.”15
Inawis ida ni Rebecca a sumrek, ket nangibinglay dagiti nagannakko a misionario iti mensahe kenkuana, iti dua nga adingna a babbai, ken iti inana, iti laksid ti panagkedkedna.
Inladawan kaniak ni Rebecca: “Nagsayaat nga agpada dagiti nagannakmo a nangilawlawag iti ania man a saludsodmi. Malagipko pay laeng dagiti rupada a kasla adda lawag a nanglikmut kadakuada. Kanayon nga arakupenmi ni nanangmo no pumanaw ket siniguradona a kanayon a marikna ni nanangko ti liwliwa ken panagraem. Kanayon a maragsakan ken naregta ni tatangmo bayat ti panangisurona kadakami maipapan ken ni Jesucristo. Pinadasna nga iraman ni tatangko kadagiti panaglilinnawag ket idi agangay, naallukoyna daytoy. Maysa a chef ni tatangko iti lokal a country club ket nagluto kadagiti pangrabii para iti dadakkelmo, agraman ti paborito ni tatangmo, ti key lime pie.”16
Idi kiniddaw da Elder ken Sister Rasband ken ni Rebecca ken ti pamiliana a basaenda ti Libro ni Mormon, inaramid ni Rebecca daytoy iti las-ud ti lima nga aldaw. Kayatna ti mabuniagan a dagus, ngem saan a nakasagana ti dadduma pay a miembro ti pamiliana. Kalpasan ti uppat a bulan, inpilit ni Rebecca a mabuniagan ken makikappeng iti pudno a Simbaan. Nalagipna, “Ammok a pudno unay daytoy ken awan pulos panagduaduak.”17 Idi Abril 5, 1979, binuniagan dagiti misionario ni Rebecca nga agtawen iti 19, ni nanangna, ken ti dua a kakabsatna a babbai. Saksi ni tatangko iti panagbuniag.
Idi naam-ammok ni Rebecca ken ti pamiliana iti simbaan, nagretratokami iti pamiliana. Inyawidko daytoy iti nataenganen a nanangko ket inyasidegna daytoy iti pusona. Ket kinunana kaniak, “Ronnie, daytoy ti maysa kadagiti kararagsakan nga aldaw iti biagko.”
Ti sungbat ni nanangko ti mangiturong itoy a saludsod kadagiti seniortayo: “Ania ti ar-aramidenyo iti daytoy a paset ti biagyo?” Adu dagiti wagas a maaramid dagiti senior missionary a di kabaelan ti asino man. Maysakayo a naisangsangayan a puersa nga agaramid iti kinaimbag, nga aduan kapadasan iti Simbaan, ken nakasagana a mangparegta ken mangisalakan kadagiti annak ti Dios.
Mabalin a pampanunoten ti dadduma kadakayo: “Ngem kasano ngay ti panangpanaw kadagiti appoko? Maikapiskami kadagiti napateg a pasamak iti pamilia, panagkasangay, gagayyem, ken uray pay dagiti tarakenmi.” No dinamagko koma ken ni nanangko no apay a napanda ken Tatang iti mision, ammok a kinunana koma: “Adda appokok. Kayatko a maammuanda a nagserbikami ken ni tatangmo iti tay-ak ti mision, kayatmi ti agbalin a pagwadan dagiti sumarsaruno a kaputotanmi, ket nabendisionankami, nabendisionankami unay.”
Bayat ti panagbisitak kadagiti mision iti intero a lubong, nakitak ti naisangsangayan a panagserbi ti adu a senior missionary-tayo. Nabatad a naragsakda nga agar-aramid iti “pagayatan ti Apo” ken maipapan iti “aramid ti Apo.”18
Para iti dadduma, ken namnamaenmi a rinibu kadakayo, a ti panagserbi iti full-time mission iti sabali a suli ti lubong ket isunto ti umisu a lugar.19 Para iti sabali, mabalin a nasaysayaat ti panagserbi iti Church-service mission iti lugar a pagnanaedan. Gapu iti parikut ti salun-at ken dadduma pay a kasasaad, adda dagiti saan a makapagserbi. Maawatanmi dagita a kasasaad, ket namnamaek a masarakanyo dagiti wagas a panangsuportayo kadagiti agserserbi. Surotenyo ti balakad ti propeta ket agkararagkayo a mangammo no ania ti kayat ti Apo nga aramidenyo.
Dagiti tay-ak ti mision iti intero a lubong ket agpakpakaasida iti tulongyo. Kinuna ni Presidente Nelson maipapan kadagiti senior missionary-tayo, “Ubbingda iti espiritu, masirib, ken situtulokda nga agtrabaho.”20
Iti tay-ak ti mision, adu ti gundawayyo a makapagserbi: mabalin nga agserbikayo iti opisina ti mision wenno templo, mangpapigsa kadagiti agtutubo a misionario, pabilgenyo dagiti babassit a branch, agtrabaho iti family history center wenno historic sites, mangisuro iti institute, mangipaay iti humanitarian service, makipagtrabaho kadagiti agtutubo ken nataengan, tumulong iti employment centers wenno kadagiti talon ti Simbaan. Dagiti partikular a wagas ti panagserbi, ti kasayaatan a maibagay kadakayo, no sadino ti pakasapulan kadakayo, ken no kasano a makapagsaganakayo ket masarakan iti website a “Senior Missionary.”21 Mabalinyo pay ti makisarita iti bishop wenno branch presidentyo.
Adu ti naawagakon nga agassawa nga agserbi ken nakitak no kasano a pinnunno ti Silaw ni Cristo dagiti langada.22 Iti panagsublida, inladawanda ti yaasidegda iti Apo ken iti maysa ken maysa, a nariknada a naibukbok kadakuada ti Espiritu ti Apo, ken ammoda a dakkel ti naaramidanda.23 Siasino ti di mayat iti dayta?
Ti maysa a mision ket mabalin nga isu ti kasayaatan a paset ti biag ti agassawa. Ti nasayaat a paulo ket “Kasapulannakto ti Apok.”24 Mabalin nga addakayo iti di pamiliar a lugar; nupay kasta, ipariknanto ti bileg ti Espiritu a kasla addakayo iti pagtaenganyo.
Dagiti dadakkelko, ken pinullo a ribu a nagsubli a misionario nga agassawa ti nagpaneknek iti rag-o a nasarakanda iti aramid ti misionario. Kinuna ti Apo iti nasantuan a kasuratan, “Ket no pudno a kasapulan ti panagtrabahoyo iti unos ti panagbiagyo a mangyararaw kadagitoy a tao iti panagbabawi, ket yegyo, uray no maysa la a kararua kaniak, anianton a rag-oyo iti sibayna iti pagarian ti Amak!”25
Inted ni Isaias kadatayo ti daniw a panangiladawan no ania ti kaipapanan ti panagserbi iti “tay-ak” ti mision. Ibaga kadatayo ti nasantuan a kasuratan a “ti tay-ak isu ti lubong.”26 Insurat daytoy naindaklan a nagkauna a propeta, “Ta rumuarkayto nga addaan iti rag-o, ken maiturong a sitatalna: dagiti bambantay ken turturod pumgaakdanto iti sanguananyo nga agkankantada; ken amin a kaykayo iti talon pagsipatendanto dagiti im-imada.”27 Dagiti bantay, turod, talon, ken kaykayo, a mayarig kadagiti mission president, bishop, district lider, miembro, ken dagiti agsapsapul iti kinapudno ngem “dida ammo ti pangsapulanda iti daytoy.”28 Isudanto ti mangpaneknek a baliwan dagiti senior missionary ti mismo a buya ti daga babaen ti pammaneknekda iti Mangisalakan ken Mannubbottayo a ni Jesucristo.
Kas maysa nga Apostol ni Apo Jesucristo, dawatek nga agserbikayo a kas misionario iti panangummong ti Israel ket nalabit nga agserbikayo manen. Kasapulandakayo—kasapulandakayo. Agyamankami kadakayo a senior gapu kadagiti biag nga indauluanyo ken kadagiti pagwadanyo iti pagtaengan, ward, ken stake-yo. Awisenkayo itan nga itugotyo dagiti pannakaammo ken kapadasanyo, agraman dagiti nabayagen a mararaem a pammaneknekyo, ket mapankayo agserbi iti mision. Ikarkararagko nga inton sumaruno a mangdutokak kadagiti senior couple, ginasut kadakayo ti sigagagar nga agur-urayto iti awagyo.
Ikarik met a bayat ti panagserbiyo, mariknayonto ti ayat ti Apo iti biagyo, maam-ammoyonto Isuna, ket maam-ammonakayonto, ket “anianto la ketdin a rag-oyo.”29 Ti napasnek a panagserbiyo ken ni Jesucristo ti mangparegta ken mangbendision iti pamiliayo, dagiti appokoyo, ken appokoyo iti tumeng. “Talna, ken ayat umadudanto koma”30 iti biagda ken iti masungad nga adu a tawen. Ikarik dayta. Iti nagan ni Jesucristo, amen.