Apagkapullo: Pananglukat Kadagiti Tawa ti Langit
Dagiti tawa ti langit silulukat iti adu a wagas. Agtalekka iti panawen ti Apo; kanayon a sumangbay dagiti bendision.
Bayat ti kaaddak iti South America, imbinglay kaniak ni brother Roger Parra a taga-Venezuela ti sumaganad a padas:
“Idi 2019, madi nasayaat ti epektona iti Venezuela dagiti parikut a nakaigapuan ti pannakapukaw ti koriente iti lima nga aldaw.
“Nagari ti riribuk ken anarkia kadagiti kalsada, ket adu a desperado a tattao ti awanan ti umdas a taraon.
“Rinugian ti dadduma ti nangsamsam kadagiti negosio ti taraon, a dinadaelda ti amin a masarakanda.
“Kas agtagikua iti bassit a panaderia, madanaganak unay iti negosiomi. Inkeddeng ti pamiliami nga ited ti amin a taraon iti panaderiami kadagiti agkasapulan.
“Iti maysa a nasipnget a rabii, adda riribuk iti amin a lugar. Ti laeng pakaseknak ket ti kinatalged ti patpatgek nga asawa ken annakko.
“Iti parbangon napanak iti panaderiami. Nakalkaldaang ta tunggal asideg a negosio ti taraon ket dinadael dagiti mannanakaw, ngem nasdaawak unay ta saan a nadadael ti panaderiami. Awan ti nadadael. Sipapakumbaba a nagyamanak iti Nailangitan nga Amak.
“Idi nagawidak, imbagak iti pamiliak ti bendision ken pannalaknib ti Dios.
“Nagyamanda amin.
“Ti inauna nga anakko, a ni Rogelio, nga agtawen laeng iti sangapulo-ket-dua, kinunana, ‘Papa! Ammok no apay a nasalakniban ti pagtagilakuantayo. Kanayon nga agbaybayadkayo ken Mama iti apagkapullo.’”
Kinuna ni Brother Parra: “Ti sao ni Malakias ti simrek iti panunotko. ‘Ket ungtakto ti manangalun-on maipuon kadakayo, ket isu dinanto dadaelenen dagiti bungbunga ti dagayo.’ [Malakias 3:11]. Nagparintumengkami ket nagyamankami iti Nailangitan nga Amatayo gapu iti milagrona.”1
Padasendak Ita Babaen Ditoy
Ti amin nga adda kadatayo ken ti amin a kinasiasinotayo ket naggapu iti Dios. Kas disipulo ni Cristo, situtuloktayo a mangibinglay kadagiti adda iti aglawlawtayo.
Iti amin nga ited ti Apo kadatayo, kiniddawna nga isublitayo Kenkuana ken iti pagarianna ditoy daga ti 10 a porsiento iti irarang-aytayo. Inkarina kadatayo a no napudnotayo iti panangtedtayo iti apagkapullo, “luktannanto … dagiti tawtawa ti langit, ket ibuyatna … ti bendision, nga awanto ti lugar a makalaon nga umawat.”2 Inkarina a salaknibannatayo manipud iti dakes.3 Dagitoy a kari ket sigurado unay,4 kas kinuna ti Apo, “Ket padasendak ita iti daytoy,”5 maysa a ragup ti balikas a di masarakan iti uray ania a paset iti nasantuan a kasuratan ngem iti adawenna ti balikas ni Malakias.
Aglukat dagiti tawa ti langit iti adu a wagas. Sumagmamano ti temporal, ngem adu ti naespirituan. Sumagmamano ti saan a madmadlaw ken nalaka a maliwayan. Agtalekka iti panawen ti Apo; kanayon a sumangbay dagiti bendision.
Agladingittayo kadagiti marigrigtan tapno maaddaanda kadagiti kasapulan iti biag. Iti nabiit pay nagidonar ti Simbaan iti 54 milion a US a doliar tapno maipaay ti tulong kadagiti mabikbiktima nga ubbing ken inna iti intero a lubong.6 Ket babaen kadagiti daton manipud iti binulan a panagayunoyo, tumultulong dagiti bishop-tayo iti kada lawas kadagiti rinibu a temporario nga agkasapulan iti taraon, kawes, ken pagdagusan. Ti laeng permanente a solusion iti kinapanglaw iti daytoy a lubong ket ti ebanghelio ni Jesucristo.7
Maysa a Banag ti Pammati
Impakdaar ni Apostol Pablo a ti sirib ti tao ket maawatanna dagiti banag ti tao ngem marigatan a mangtarus kadagiti banag ti Dios.8 Saritaen ti lubong ti apagkapullo mainaig iti kuartatayo, ngem ti sagrado a linteg ti apagkapullo ti kangrunaan nga agpannuray ket ti pammatitayo. Ti panagbalin a napudno iti apagkapullotayo ti maysa a wagas a maipakitatayo a situtuloktayo a mangyun-una iti Apo, a nangatngato ngem iti bukodtayo a pakaseknan ken pagimbagan. Ikarik kadakayo a no agtalekkayo iti Apo, sumarunonto dagiti bendision ti langit.
Imbaga ni Jesus nga ited “ken Cesar ti kukua ni Cesar; ket iti Dios, ti kukua ti Dios.”9 Kiniddaw ti nagungar a Mangisalakan kadagiti Nephite nga isuratda iti rekordda dagiti karina a masarakan iti Malakias.10 Iti aldawtayo, pinasingkedan manen ti Apo ti nadiosan a linteg ti apagkapullo, nga impakdaarna: “Daytoyto ti pangrugian ti pannangted dagiti taok iti apagkapullo. Ket agbayaddanto iti maysa nga apagkapullo ti amin a matgedanda iti tinawen; ket daytoyton ti masurot a paglintegan iti agnanayon.”11
Nalawag nga imbilin ti Apo no kasano ti pannakaiwaras ti apagkapullo, imbagana, “Yegyo ti amin nga apagkapullo, iti kamalig,”12 kayatna a sawen, iyegyo dagiti apagkapullo iti naisubli a pagarianna, Ti Simbaan ni Jesucristo dagiti Santo iti Ud-udina nga Aldaw.13 Imbilinna a ti panangusar kadagitoy a sagrado nga apagkapullo ket ti sipapasnek a panangibilang ti maysa a konseho ti Umuna a Panguluen, ti Korum dagiti Sangapulo-ket-dua nga Apostol, ti Presiding Bishopric, “ken ti bukodko a timek kadakuada, kinuna ti Apo.”14
Dagiti Sagrado a Pondo ti Apo
Dagitoy a sagrado a pondo ket saan a kukua dagiti lider ti Simbaan. Kukua ida ti Apo. Ammo dagiti katulonganna ti sagrado a kasasaad ti panagaywanda.
Insalaysay ni Presidente Gordon B. Hinckley daytoy a padasna: “Idi ubingak pay, adda saludsodko ken ni tatangko … maipapan iti pannakagastos dagiti pondo ti Simbaan. Impalagipna kaniak a ti inted ti Dios nga obligasionko ket ti panangtedko iti apagkapullo ken daton. No aramidek dayta, [kinuna ni tatangko,] no ania ti intedko saankon a kukua. Kukua daytoy ti Apo a nangikonsagrarak iti daytoy.” Innayon ni tatangna: “No ania ti aramiden dagiti autoridad ti Simbaan iti daytoy ket saanmo a nasken a pakaseknan [Gordon]. Isuda ti aggsungbat iti Apo, nga agkiddawto iti panangilawlawag wenno panangikalintegan kadagiti aramidda.”15
Mariknami unay ti kadagsen ti panagbalin nga “agsungbat iti Apo.”
Dagiti Nawadwad nga Apagkapullo ken Datonyo
Manipud kadagiti nawadwad nga apagkapullo ken daton nga inkonsagraryo iti Apo, idi napan a tawen nasurok a maysa a bilion a doliar ti US ti nausar a nangbendision kadagiti agkasapulan.16
Iti napateg a rebbengentayo a mangidanon iti naisubli nga ebanghelio iti intero a lubong, addaantayo iti nasuroken a 71,000 a misionario nga agserserbi iti 414 a mision.17 Gapu kadagiti apagkapullo ken datonyo, makapagserbi dagiti misionario, ania man ti kasasaad ti pinansial ti pamiliada.
Umad-adu ti bilang dagiti templo a mabangbangon iti intero a lubong. Iti agdama, 177 a templo ti maus-usaren, 59 ti madama a maar-aramid wenno mapabpabaro, ken 79 pay ti maplano ken madisenio.18 Ti apagkapulloyo ti mangipaay kadagiti bendision ti templo kadagiti lugar a ti laeng Apo ti makaammo.
Adda nasurok a 30,000 a kongregasion a nakaibangonan ti rinibu a kapilia ken dadduma pay a pasilidad iti 195 a pagilian ken teritorio.19 Gapu iti napudno nga apagkapulloyo, maipaspasdek ti Simbaan kadagiti adayo a lugar a mabalin a diyonto pulos masarungkaran kadagiti nalinteg a Santo a mabalin a diyonto pulos maam-ammo.
Iti agdama, adda lima nga institusion ti nangatngato nga edukasion ti isponsoran ti Simbaan.20 Dagitoy ket agserserbi iti nasurok a 145,000 nga estudiante. Sangagasut ket sangapulo a ribu a klase ti maisursuro iti kada lawas kadagiti seminary ken institute-tayo.21
Dagitoy a bendision ken adu pay ti kaaduan a naggapu kadagiti agtutubo ken nataengan iti amin a kasasaad ti ekonomia nga agbaybayad iti napudno nga apagkapullo.
Ti naespirituan a bileg ti nadiosan a linteg ti apagkapullo ket saan a matukod babaen ti kaadu ti kuarta a naited, ta agpada a binilin ti Apo dagiti nabaknang ken napanglaw a mangted iti 10 a porsiento ti matgedanda.22 Ti bileg ket agtaud iti panagtalektayo iti Apo.23
Ti nayon a kinawadwad ti Apo a naidanon babaen iti apagkapulloyo ti nangpapigsa kadagiti reserba ti Simbaan, a mangted kadagiti gundaway a mangitandudo iti trabaho ti Apo iti labes ti aniaman a mapasarantayo pay. Ammo amin ti Apo, ket inton agangay, makitatayo a matungpal dagiti sagrado a panggepna.24
Adu a Wagas a Magun-odan dagiti Bendision
Adu a wagas a magun-odan dagiti bendision ti apagkapullo. Idi 1998 kinuyogko idi ni Elder Henry B. Eyring a nagatendar iti dakkel a miting ti Simbaan iti Utah a pagaammo itan kas Silicon Slopes, maysa a komunidad nga addaan iti dakkel nga irarang-ay iti teknolohia. Panawen idi dayta ti umad-adu a kinarang-ay, ket binallaagan ni Elder Eyring dagiti Santo maipapan iti panangidiligda iti adda kadakuada iti sabsabali ken panagtarigagayda iti ad-adu pay. Kankanayonkonto a malagip ti karina, a no agbayadda iti napudno nga apagkapullo, bumassit ti tarigagayda a maaddaan iti ad-adu a sanikua. Iti las-ud ti dua a tawen, napartak ti panagpababa ti pateg dagiti kompania, ken paggastuan a mainaig iti teknolohia. Adu ti naawanan iti panggedan, ket narigatan dagiti kompania iti daytoy a tiempo ti panagbalbaliw ti pinansial. Nabendisionan dagiti nangsurot iti balakad ni Presidente Eyring.
Ti karina ti nangipalagip kaniak iti sabali pay a padas. Naam-ammok ti 12-anios a ni Charlotte Hlimi iti asideg ti Carcassonne, Francia, idi 1990 bayat ti panagserbik kas mission president. Dagiti Hlimi ket maysa a napudno a pamilia nga agnanaed iti apartment nga addaan iti walo nga annak. Adda ladawanda ti Mangisalakan ken ti propeta iti diding. Iti interbiu para iti patriarkal a bendisionna, dinamagko ken ni Charlotte no nagbayad iti napudno nga apagkapullo. Insungbatna, “Wen, Presidente Andersen. Insuro kaniak ni nanangko nga adda dagiti temporal a bendision ken naespirituan a bendision a resulta ti panagbayad iti apagkapullotayo. Insuro kaniak ni nanangko a no kanayon nga agbayadkami iti apagkapullo, awanen ti tarigagayanmin. Ken Presidente Andersen, adda amin a kasapulanmin.”
Iti panangtedna ti pammalubos nga ibinglayko ti pakasaritaanna, ni Charlotte nga agtawen 45 itan, ken nailantip iti templo, imbagana: “Ti pammaneknekko maipapan iti apagkapullo ket pudno unay idi, ket ad-adda pay a nabileg itan. Agyamanak unay iti daytoy a bilin. Bayat nga agbibiagak iti dayta agtultuloy a mabendisionanak iti nawadwad.”25
Iti maysa nga aldaw, agpatingganto iti naindagaan a panagdaliasattayo. Duapulo ket lima a tawenen ti napalabas, sumagmamano nga aldaw sakbay a natay iti kanser ti katugangak a ni Martha Williams, nakaawat iti bassit a tseke iti koreo. Dagus a kiniddawna iti asawak a ni Kathy ti tseke a librona tapno bayadanna ti apagkapullona. Gapu ta nakapuy ni nanangna ket dina kabaelanen ti agsurat, dinamag ni Kathy no mabalinna nga isurat ti tseke para kenkuana. Insungbat ni nanangna, “Saan, Kathy. Kayatko nga aramiden dayta a mismo.” Siuulimek nga imbagana, “Kayatko ti agbalin a nalinteg iti imatang ti Apo.” Maysa kadagiti maudi nga inaramid ni Kathy para ken ni nanangna ti panangited iti sobrena ti apagkapullo iti bishopna.
Napateg nga Aramid ti Dios
Kakabsatko, Ti Simbaan ni Jesucristo dagiti Santo iti Ud-udina nga Aldaw ket “nawayawayaan manipud iti kasipngetan,”26 a mangyeg kadagiti naisangsangayan a bendision iti intero a daga. Addanto dagiti mangparegta kadatayo nga agtultuloy ken adda dagiti saan. Napanunotko dagiti sasao ni masirib a Gamaliel, idi nangngegna dagiti milagro da Apostol Pedro ken Juan, pinakdaaranna ti konseho idiay Jerusalem:
“Dikay biangan dagitoy a tattao: ta no … daytoy nga aramid aggapu kadagiti tao, marbanto:
“Ngem no aggapu iti Dios, dikayto mabalin a rebbaen ida; di la ket … a sumupringkayo iti Dios.”27
Dakayo ken siak ket paset ti napateg nga aramid ti Dios ditoy daga. Saanto a mapaay daytoy no di ket agtultuloy iti intero a lubong, a mangisagana iti dalan para iti panagsubli ti Mangisalakan. Paneknekak dagiti balikas ni Presidente Russell M. Nelson: “Kadagiti umay nga aldaw, makitatayto dagiti kadakkelan a pannakaiparangarang ti bileg ti Mangisalakan a naimatanganen ti lubong. Manipud ita ken agingga iti oras a panagsublina …, itednanto dagiti saan a mabilang a pribilehio, bendision, ken milagro kadagiti napudno.”28
Daytoy ti pammaneknekko. Ni Jesus ti Cristo. Daytoy ti nasantuan nga aramidna. Umayto manen. Iti nagan ni Jesucristo, amen.