Agkakabsat a Lallaki ken Babbai ken ni Cristo
Sapay koma ta ad-adda a matagiragsaktayo ti naespirituan a panagkakabsattayo ken ipategtayo dagiti nagduduma a kababalin ken nadumaduma a sagut nga adda kadatayo amin.
Patpatgek a gagayyemko, addaantayo kadagiti napipintas a sesion ti komperensia ita nga aldaw. Nariknatayo amin ti Espiritu ti Apo ken ti ayatna babaen kadagiti napipintas a mensahe nga imbinglay dagiti lidertayo. Naparaburanak kas maudi nga agsarita kadakayo ita a rabii iti daytoy a sesion. Ikarkararagko a ti Espiritu ti Apo agtultuloy koma nga adda kadatayo bayat ti panagrag-otayo a sangsangkamaysa kas pudno nga agkakabsat a lallaki ken babbai ken ni Cristo.
Impakdaar ti patpatgentayo a propeta, ni Presidente Russel M. Nelson: “Iti agdama awagak dagiti miembro iti amin a lugar a mangyuna iti panangiwaksi kadagiti ugali ken tignay maipapan iti panangidumduma wenno prehuiso. Ipakaasik kadakayo nga itandudoyo ti respeto iti amin nga annak ti Dios.”1 Kas maysa a sangalubongan ken agtultuloy a dumakdakkel a Simbaan, ti panangsurot iti daytoy nga awis ti propetatayo ket kasapulan para iti pannakaibangon ti pagarian ti Mangisalakan iti tunggal nasion iti lubong.
Isuro ti ebanghelio ni Jesucristo a datayo amin ti espiritu nga annak ti nailangitan a nagannak a pudno a mangipatpateg kadatayo2 ken nagbiagtayo kas maysa a pamilia iti imatang ti Dios sakbay a nayanaktayo ditoy daga. Isuro pay ti ebanghelio a naparsuatayo amin iti ladawan ken kaasping ti Dios.3 Gapuna, agpapadatayo iti imatangna,4 isu nga “iti maymaysa a tao inaramidna a pagtaudan dagiti amin a nasion dagiti tao.”5 Gapuna, addaantayo amin iti nadiosan a kababalin, tawid, ken potensial, gapu ta adda “maysa a Dios ken Ama dagiti isu-amin, isu a panguluen dagiti isu-amin, ken adda kadatayo amin.”6
Kas disipulo ni Cristo, maawistayo a mangpapigsa iti pammati, ken ayattayo, kadagiti naespirituan a kakabsattayo babaen ti pudno a panagrereppeng ti puspusotayo iti panagkaykaysa ken ayat, ania man ti nagdudumaantayo, iti kasta, mapadur-as ti abilidadtayo a mangitandudo iti panagraem iti dignidad ti amin nga annak ti Dios.7
Saan kadi a dayta ti eksakto a kasasaad a napasaran dagiti tattao ni Nephi iti dandani dua a siglo kalpasan ti panagserbi ni Cristo kadakuada?
“Ket pudno awanen ti naragragsak a tao kadagiti amin a tao a pinarsua ti Dios. …
“Wenno adda Lamanite, wenno uray ania a kita ti -ite; ngem nagsangsangkamaysada, dagiti annak ni Cristo, ken agtawid iti pagarian ti Dios.
“Ket anian a naggasatda!”8
Inyunay-unay pay ni Presidente Nelson ti kinapateg ti panangisaknap iti dignidad ken panagraem iti padatayo a tao idi kinunana: “Awisennatayo amin ti Namarsua a mangiwaksi iti panangidumduma iti ania man a grupo dagiti annak ti Dios. Siasino man kadatayo nga addaan panangidumduma iti sabali a puli ket masapul nga agbabawi! … Rumbeng nga aramiden ti ania man a kabaelantayo kadagiti sakup ti impluensiatayo a mangtaginayon iti dignidad ken panagraem a maikari iti tunggal anak a lalaki ken babai ti Dios.”9 Iti kinapudnona, tapno mabigbig ti dignidad ti tao kasapulan a maawatan nga umuna ti panagraem iti panagdudumatayo.10
Gapu iti sagrado a mamagkaykaysa kadatayo iti Dios kas annakna, daytoy naimpadtuan a panangiturong nga inted ni Presidente Nelson ket awan duadua a napateg nga addang iti panangbangon kadagiti rangtay ti pannakaawat imbes a mangparnuay kadagiti pader ti panangidumduma ken panaglalasin.11 Nupay kasta, kas impakdaar ni Pablo kadagiti taga Efeso, nasken a bigbigentayo a tapno magun-od daytoy a panggep, kasapulan ti indibidual ken nagkaykaysa a panagregget a tignay a buyogen ti kinaemma, kinapakumbaba, kinaalumamay, ken naunday a panagiturediti maysa ken maysa.12
Adda estoria maipapan iti maysa a Judio a rabbi mangtagtagiragsak iti isisingising ti init a kaduana ti dua a gagayyemna. Dinamagna kadakuada, “Kasano a maammuanyo no nalpasen ti rabii ken mangrugin ti baro nga aldaw?”
Insungbat ti maysa kadakuada, “No makitam ti daya ket mailasinmo ti karnero manipud iti kalding.”
Insungbat met ti maysa, “No makitam iti law-ang ket mailasinmo ti kayo nga olibo iti kayo nga igos.”
Kalpasanna, insublatda a dinamag iti masirib a rabbi ti isu met la a saludsod. Kalpasan ti napaut a panagutob, insungbatna, “No makitam ti babai wenno lalaki iti daya ket makunam, ‘Isu ti kabsatko a babai; isu ti kabsatko a lalaki.’”13
Patpatgek a gagayyem, ipasiguradok kadakayo a ti lawag ti baro nga aldaw ad-adda nga agsilnag iti biagtayo no kitaen ken tratuentayo dagiti padatayo a tao nga addaan panagraem ken dignidad ken kas pudno a kakabsat ken ni Cristo.
Bayat ti naindagaan a panagserbina, naan-anay nga impagwadan ni Jesus daytoy a prinsipyo bayat “a namagpagna a nagar-aramid ti naimbag”14 iti amin a tattao, a mangaw-awis kadakuada nga umasideg Kenkuana ken makiranud iti kinaimbagna, ania man ti nagtaudanda, kasasaadda iti biag, wenno kulturada. Nagserbi, nangagas, ken kanayon nga inasikasona dagiti kasapulan ti amin, nangnangruna dagidi iti dayta a panawen ket maibilangda a naiduma, nalalais, wenno nailaksid. Ket awan ti indaddadumana, ngem trinatona ida iti kinalinteg ken ayat gapu ta imbilangna ida kas kakabsatna, annak ti maymaysa nga Ama.15
Maysa kadagiti nakallalagip nga okasion idi napasamak daytoy ket idi nagdaliasat ti Mangisalakan idiay Galilea, a pinanggepna ti nagna iti dalan a lumasat idiay Samaria.16 Kalpasanna inkeddeng ni Jesus ti nagtugaw iti abay ti bubon ni Jacob tapno aginana. Bayat ti kaadda sadiay, immasideg ti maysa a Samaritana a babai tapno agsakdo iti danum. Gapu ta ammona ti amin, kinuna ni Jesus kenkuana, “Ikkannak iti inumen.”17
Nasdaaw daytoy a babai ta maysa a Judio ti nangkiddaw iti tulong iti Samaritana ket inyebkasna ti siddaawna, “Kasano a sika, idinto a Judioka, dumawatka kaniak ti inumen, idinto a babai-ak a taga Samaria? ta awan ti panangikankano dagiti Judio kadagiti taga Samaria.”18
Ngem ni Jesus, a nangbaybay-a kadagiti nabayagen a tradision ti panaggiginnura iti nagbaetan dagiti Samaritano ken Judio, ket siaayat a nagserbi iti daytoy a babai, a nangtulong kenkuana a mangipaawat no asino a talaga Isuna—nga, isu ti Mesias, a mangibaga iti amin a banag ken ti yaayna a namnamaenna.19 Ti epekto dayta a nadungngo a panagministro ti nakaigapuan ti panagtaray ti babai iti siudad tapno ipakaammona kadagiti tao ti napasamak, a kunkunana, “Saan ngata nga isu ti Cristo?”20
Napalalo ti asik kadagidiay namaltrato, nalalais, wenno indadanes dagiti awanan rikna ken di mannakaawat a tao, gapu ta iti unos ti panagbiagko, nakitak a mismo ti saem a sagsagabaen dagiti naimbag a tao gapu iti pannakahusga wenno pannakailaksidda ta naiduma ti panagsasao, itsura, wenno panagbiagda. Mariknak met ti pudno a panagladingit para kadagidiay nasipnget ti pampanunotda, limitado ti panangibilangda, ken natangken ti pusoda gapu ta patienda a nababbaba dagiti naiduma kadakuada. Ti limitado a panangibilangda kadagiti sabali ket talaga a manglapped iti kabaelanda a mangkita ti kinasiasinoda kas annak ti Dios.
Kas impadto dagiti propeta, agbibiagtayon kadagiti napeggad nga aldaw nga agturong iti Maikadua a Yaay ti Mangisalakan.21 Ti lubong a sapasap ket nasinasina gapu kadagiti nakaro a pannakabingaybingay a pinarnuay ti puli, politika, ken sosioekonomia. No dadduma dagita a pannakabingaybingay ti agresulta iti panakaimpluensia dagiti pampanunot ken panagtigtignay ti tattao mainaig iti padada a tao. Gapu iti daytoy, gagangay a makita dagiti tao a mangiladawan iti panagpampanunot, panagtigtignay, ken panagsao iti dadduma a kultura, puli, ken etniko kas nababbaba, nga agus-usar iti di umisu, biddut, ken masansan a sarkastiko a kapanunotan a mangpataud iti panangumsi, di panangikankano, di panagraem, ken panangidumduma kadakuada. Dagita a kababalin ket nagtaud iti panagpannakkel, kinapalangguad, apal, ken imon, dagiti nainlasagan a kababalin,22 a naan-anay a maisupiat kadagiti kababalin a kas ken Cristo. Saan a maitutop daytoy a kababalin kadagiti mangikagkagumaan nga agbalin a pudno a disipulona.23 Kinapudnona, patpatgek a kakabsatko, awan ti lugar dagiti manangidumduma a kapanunotan wenno aramid iti komunidad dagiti Santo.
Kas annak ti katulagan, makatulongtayo a mangikkat itoy a kababalin babaen ti panangkita kadagiti nalawag a pagdudumaan nga adda kadatayo iti wagas a panangkita ti Mangisalakan24 ken maibatay iti pagpapadaantayo—ti nadiosan a kinasiasino ken panagkakabsattayo. Kanayonanna, ikagumaantayo a panunoten a makita ti bagitayo a mayanninaw kadagiti arapaap, namnama, ladingit, ken sakit ti kaarrubatayo. Agpapadatayo amin nga agdaldaliasat kas annak ti Dios, agpapada iti imperpekto a kasasaadtayo ken iti abilidadtayo a dumur-as. Maawistayo a makipagna a sangkamaysa, a sitatalna, a napno ti pusotayo iti ayat para iti Dios ken iti amin a tattao—wenno, kas kinuna ni Abraham Lincoln, “dikayo agpungtot iti asino man; ngem manangngaasikayo iti amin.”25
Nautobyo kadin no kasano a maipakita ti prinsipio a panagraem iti dignidad ti tao ken panagpapada ti tao babaen iti simple a panagkawkawestayo iti balay ti Apo? Umaytayo amin iti templo a nagkaykaysa iti maymaysa a panggep ken napnuan tarigagay nga agbalin a natarnaw ken nasantuan iti imatangna. Kas nakawesantayo iti puraw, awatennatayo mismo ti Apo kas ipatpategna nga annak, lallaki ken babbai ti Dios, kaputotan ni Cristo.26 Naparaburantayo a mangannong kadagiti isu met la nga ordinansa, agaramid kadagiti isu met laeng a katulagan, mangikumit iti bagitayo nga agbiag iti nangatngato ken nasansantuan a panagbiag, ken umawat kadagiti isu met laeng nga agnanayon a kari. Gapu ta agkaykaysatayo iti panggep, makitatayo ti maysa ken maysa iti baro a wagas, ket iti panagkaykaysatayo, rambakantayo dagiti nagdudumaantayo kas nadiosan nga annak ti Dios.
Itay nabiit pay, timmulongak a nangiturong kadagiti dignitario ken opisial ti gobierno iti open house ti Brasília Brazil Temple. Nagsardengkami ken ti bise presidente ti Brazil iti lugar a pagsukatan, ket nagsaritaanmi ti puraw a kawes nga ikawes ti tunggal maysa iti uneg ti templo. Inlawlawagko kenkuana a daytoy sangalubongan a panagusar iti puraw a kawes isimbolona a datayo amin ket agpapada iti Dios, iti templo, ti kinasiasinotayo ket saan a bise presidente ti maysa a pagilian wenno lider ti simbaan no di ket ti agnanayon a kinasiasinotayo kas annak ti managayat a Nailangitan nga Ama.
Agayus ti Karayan Iguaçú manipud iti makin-abagatan a Brazil ket agbuyat iti patad a mangbukel iti sistema ti dissuor a pagaammo iti intero a lubong nga Iguaçú Falls—maysa kadagiti kapipintasan ken makapasiddaaw a pinarsua ti Dios ditoy daga, a maibilang a maysa kadagiti pito a pagsidsiddaawan ti lubong. Ti nakaad-adu a danum ket agayus iti maymaysa a karayan sa agsinada, a mangbukel iti ginasut nga awan kaaspingna a pagay-ayusan ti danum. Iti metapora a panagsao, daytoy nakaskasdaaw a sistema ti dissuor ti mangyanninaw iti pamilia ti Dios ditoy daga, nga agpapada ti naespirituan a nagtaudan ken kasasaadtayo, a naggapu iti nadiosan a tawid ken panagkikinnabsattayo. Nupay kasta, agduduma ti kultura, puli, ken nasionalidadtayo, nga addaan agduduma a kapanunotan, kapadasan, ken rikna. Iti laksid daytoy, dumur-astayo kas annak ti Dios ken agkakabsat ken ni Cristo, a di mapukaw ti nadiosan a koneksiontayo, ken mamagbalin kadatayo a naisangsangayan a tattao ken maysa a maipatpateg a komunidad.27
Patpatgek a kakabsatko, sapay koma ta maitunostayo ti puso ken panunottayo iti pannakaammo ken pammaneknek nga agpapadatayo amin iti imatang ti Dios, a naan-anay a naparaburantayo ti isu met laeng nga agnanayon a potensial ken tawid. Sapay koma ta ad-adda a matagiragsaktayo ti naespirituan a panagkakabsattayo ken ipategtayo dagiti nagduduma a kababalin ken nadumaduma a sagut nga adda kadatayo amin. No kasta ti aramidentayo, ikarik nga agayustayto iti bukodtayo a wagas, kas iti danum ti Iguaçú Falls, a di mapukaw ti nadiosan a koneksion a mangbigbig kadatayo kas naisangsangayan a tattao, “dagiti annak ni Cristo, ken agtawid iti pagarian ti Dios.”28
Paneknekak a bayat ti panagtultuloytayo nga agdaliasat iti daytoy a wagas iti mortal a biagtayo, mangrugi ti baro nga aldaw iti baro a lawag a mangsilnag iti biagtayo ken manglawag kadagiti nakaskasdaaw a gundaway tapno ad-adda nga ipateg, ken naan-anay a mabendisionantayo, babaen iti panagduduma a pinarsua ti Dios kadagiti annakna.29 Sigurado nga agbalintayo a ramramit kadagiti imana a mangitandudo iti panagraem ken dignidad kadagiti amin nga annakna a lallaki ken babbai. Sibibiag ti Dios. Ni Jesus ti Mangisalakan ti lubong. Ni Presidente Nelson ti propeta ti Dios iti panawentayo. Paneknekak dagitoy a kinapudno iti sagrado a nagan ni Jesucristo, amen.