Ti Bileg ni Jesucristo iti Biagtayo iti Inaldaw
Ti pagtaudan ti pigsatayo ket ti pammati ken ni Jesucristo no kalikagumanntayo ti umasideg Kenkuana iti inaldaw.
Patpatgek a kakabsat, daytoy ti Ti Simbaan ni Jesucristo Dagiti Santo iti Ud-udina nga Aldaw. Anian a rag-o ti agtitipon kas Simbaanna. Agyamanak a pinalagipannatayo ni Presidente Russell M. Nelson a masansan a mangusar iti umno a nagan ti Simbaan ti Apo tapno malagiptayo a Simbaanna daytoy ken surotentayo dagiti pannursurona.
Kinuna ni Presidente Nelson: “Kadagiti umay nga aldaw, makitatayto dagiti kaindaklanan a pannakaiparangarang ti bileg ti Mangisalakan a naimatanganen ti lubong. … Mangtedto iti adu a pribilehio, bendision, ken milagro kadagiti napudno.”1
Maysa kadagiti kadakkelan a pribilehio ken gundawaymi iti asawak, ni Renee, ket ti makipagkita kadagiti Santo a pagserserbianmi. Mangngegmi dagiti estoriada, masaksianmi dagiti pukawda, mairanudkami ti ladingitda, ken agrag-okami iti balligida. Nasaksiantayo ti adu a bendision ken milagro nga inted ti Mangisalakan kadagiti napudno. Naam-ammotayo dagiti tao a naglasat iti imposible, a nagsagaba iti di mautob.
Nakitatayo ti pannakaiparangarang ti bileg ti Mangisalakan iti maysa a balo a napukawan iti asawana iti kaaddada iti trabaho ti Apo idiay Bolivia.2 Nakitami daytoy iti maysa a balasitang idiay Argentina a naiduron iti sirok ti tren ket napukawna ti sakana, gapu laeng ta adda mayat a mangtakaw iti selponna.3 Ket iti agsolsolo nga amana, a masapulna itan a piduten dagiti pedaso ken papigsaenna ti balasangna kalpasan ti kasta a di mailawlawag nga aramid ti kinaulpit. Nakitami daytoy kadagiti pamilia a napukawan iti pagtaengan ken sanikuada bayat ti uram idiay Chile dua laeng nga aldaw sakbay ti Paskua idi 2022.4 Nakitami daytoy kadagiti agsagsagaba kalpasan ti nasaem a diborsio ken dagiti inosente a biktima ti abuso.
Ania ti mangpabileg kadakuada a lumasat kadagiti narigat a banag? Ania ti mangted nayon a pigsa nga agtultuloy no kasla napukawen ti amin?
Natakuatak a ti pagtaudan dayta a pigsa ket ti pammati ken Jesucristo bayat ti panagkalikagumtayo nga umasideg Kenkuana iti inaldaw.
Insuro ni propeta Jacob, “Ket immay ditoy lubong tapno isalakanna ti amin a tao no dumngegda iti timekna; ta adtoy, inturedna ti rigat ti amin a tao, wen, ti rigat ti amin a sibibiag a naparsua, lallaki, babbai, ken ubbing a padapada, a kameng ti kaamaan ni Adan.”5
No dadduma, ti kaadda ti pammati ken Jesucristo mabalin a kasla banag nga imposible, dumani di maragpat. Mapanunottayo a ti yaasideg ken Cristo agkasapulan iti pigsa, bileg, ken kinaperpekto nga awan kadatayo, ken awanatayo laeng iti pigsa nga aramiden daytoy. Ngem naadalko kadagitoy amin a tao a ti pammati ken Jesucristo ti mangpapigsa kadatayo iti rugi ti panagdaliasattayo. No dadduma mapanunottayo, “Nasken nga aturek ti biagko sakbay nga umayak ken Jesus,” ngem kinapudnona umaytayo ken ni Jesus a mangatur iti biagtayo babaen Kenkuana.
Ditayo umasideg ken ni Jesus gapu ta perpektotayo. Umaytayo Kenkuana gapu ta nagkurangtayo ken makapagbalintayo a “perpekto” Kenkuana.6
Kasano a rugiantayo nga usaren ti bassit a pammati iti inaldaw? Para kaniak mangrugi iti bigat: No makariingak, imbes a kitaek ti teleponok, agkararagak. Uray simple a kararag. Kalpasanna agbasaak iti nasantuan a kasuratan. Tulongannak daytoy iti linawas a katulagak nga aramidek no makiranudak iti sakramento a “kanayon a laglagipen isuna.”7 No rugiak ti aldawko babaen ti kararag ken nasantuan a kasuratan, “malagipko Isuna” no kitaek ti teleponok. “Malagipko Isuna” no kasaritak ti asawak ken dagiti annakko, no adda problemak ken makisupiat, ken ikagumaak a sanguen ida a kas iti kayat ni Jesus.
No “malagipko Isuna,” mariknak ti tarigagay nga agbalbaliw, agbabawi. Masarakak ti pagtaudan ti pigsa nga agtungpal kadagiti katulagak, ket mariknak ti impluensia ti Espiritu Santo iti biagko “ken agtungpal iti bilinna [kaniak]; tapno kanayon nga adda kaniak ti Espirituna.”8 Tulongannak nga agibtur agingga iti udina.9 Wenno uray laeng iti gibus ti aldaw! Ken kadagiti aldaw a maliwayak ti manglagip Kenkuana iti agmalem, adda latta idiay, a mangipatpateg ken mangibagbaga kaniak, nga OK laeng; mabalinmo a padasen manen inton bigat.”
Nupay ditayo perpekto iti pananglagip Kenkuana, di pulos nangliway ti Nailangitan nga Amatayo a manglagip kadatayo.
Maysa kadagiti biddut a masansan nga aramidentayo ket ti pagarup a ti panagtungpal iti katulagan, wenno dagiti kari nga aramidentayo iti Dios, uray kaskasano ket transaksion nga aramidentayo Kenkuana: Agtulnogak, ken salaknibannak iti dakes a mapasamak kaniak. Bayadak ti apagkapullok ket diakto mapukaw ti trabahok wenno saan a mauram ti balayko. Ngem no di mapasamak dagiti banag a ninamnamatayo, ipukkawtayo iti Apo, “Awan kadi ania man kenka a mapukawak?”10
Saan laeng a transaksion dagiti katulagantayo; makapagbalbaliwda.11 Babaen kadagiti katulagak umawatak iti mangpasanto, mangpapigsa a bileg ni Jesucristo, a mangpalugod nga agbalinak a baro a tao, a mangpakawan iti kasla di mapakawan, a mangparmek iti imposible. Ti pananglagip ken ni Jesucristo a kanayon ket nabileg; papigsaennak nga “agtungpal iti bilinna nga intedna [kaniak].”12 Tulongannak daytoy nga agbalin a nasingsingpet, umisem nga awan ti gapu, agbalin a maysa a mamagkapia,13 mangliklik iti susik, ken bay-ak ti Dios nga agballigi iti biagko.14
No ti saemtayo wenno saem ti maysa nga ay-ayatentayo ket nakaro unay a ditayon maibturan, ti pananglagip ken Jesucristo ken umasideg Kenkuana ket mangpalag-an iti dadagsen, mangpalukneng iti puso, ken mangep-ep iti saem. Daytoy ti bileg a nangpabalin iti maysa nga ama iti labes ti gagangay a kabaelanna a mangtulong iti balasangna iti saem ti bagi ken riknana iti pannakapukaw ti sakana.
Idi simmarungkar ni Elder Soares iti Argentina idi napan a Hunio ket dinamagna ken Flavia maipapan iti nasaem nga aksidentena, insungbatna, “Napasarak ti riribuk, kinapait, pungtot, ken gura idi [napasamak daytoy]. Nakatulong kaniak ti diak panagdamag, ‘apay a siak?’ no di ket ‘para iti ania?’ … Daytoy ti maysa a banag nga ad-adda a nangyasideg kaniak iti dadduma ken iti Apo. … Imbes a yadayok ti bagik Kenkuana, nasken a kumpetak Kenkuana.”15
Insuro ni Presidente Nelson: “Ti gunggona iti panangtungpal kadagiti katulagan iti Dios ket bileg a naggapu iti langit—bileg a mangpapigsa kadatayo a mangsaranget kadagiti pannubok, sulisog, ken leddaangtayo. … Gapuna, maikari dagiti agtungpal iti katulagan iti naisangayan a kita ti inana.”16 Daytoy ti kita ti talna ken inana a nakitak iti mata ti balo, iti baet ti ladingit a nariknana iti inaldaw gapu iti iliwna ti asawana.
Saritaen ti Baro a Tulag ti maysa a panawen idi adda ni Jesus ken dagiti disipulona iti maysa a barko:
“Ket dimteng ti dakkel a bagyo ket sumaplit dagiti dalluyon iti barko. …
Ket isu … naturog idi a sipupungan: ket riniingda ket kunada kenkuana, Mannursuro, awan kadi ti ania man kenka no mapukawtayo?
“Ket idi a nakariing, tinubngarna ti angin ket kinunana iti baybay: Agulimekka, agtalnaka. …
“Ket kinunana kadakuada, Apay a mabutengkayo unay? kasano nga awan pammatiyo?”17
Kanayon a naintrigaak iti daytoy nga estoria. Ninamnama kadi ti Apo nga usarenda ti pammatida a mangpakalma iti bagyo? Mangtubngar iti angin? Ti pammati ken ni Jesucristo ket rikna ti talna a mangsaranget iti bagyo, nga ammotayo a ditayo mapukaw gapu ta Isu ti kaduatayo iti barko.
Kastoy ti kita ti pammati a nakitami idi sinarungkaranmi dagiti pamilia kalpasan ti uram idiay Chile. Napuoran dagiti balayda iti daga; napukawda ti amin a banag. Kaskasdi nga idi magmagnakami iti sigud a pagtaenganda ken ibagbagada kadakami dagiti padasda, nariknami a nakatakderkami iti nasantuan a daga. Kinuna ti maysa a kabsat a babai iti asawak, “Idi nakitak a maur-uram dagiti asideg a balbalay, naaddaanak iti impresion a mauram ti balaymi, a mapukawmi ti amin. Imbes a maupayak, napasarak ti rikna ti saan a mailadawan a talna. Uray kaskasano nariknak nga agbalinto nga OK ti amin.” Ti panagtalek iti Dios ken panagtungpal iti katulagantayo Kenkuana ti mangpabileg iti kinakapuytayo ken mangliwliwa iti leddaangtayo.
Agyamanak iti gundaway a nasken a makaam-ammomi ken Renee ti mano kadagitoy naisangsangayan a Santo, gapu iti adu a pagwadanda iti pammati, pigsa, ken panagpursigi. Para kadagiti estoria ti pangladingit ken pannakaupay a nalabit a dinto maikabil iti front page ti maysa a pagiwarnak wenno ag-viral. Para kadagiti ladawan a di naala kadagiti lua a nagarubos ken kararag a naidaton kalpasan ti pannakapukaw wenno nasaem a panagdiborsio, ken kadagiti paskil a di naaramid gapu iti buteng, liday, ken saem nga agbalin a maibturanen gapu iti pammatida ken Jesucristo ken ti Pannubbotna. Dagitoy a tao ti mangpapigsa iti pammatik, ket gapu iti dayta agyamanak unay.
Ammok a daytoy ti Simbaan ni Jesucristo. Ammok a nakasagana Isuna nga isagutannatayo iti bilegna no umaytayo Kenkuana iti inaldaw. Iti nagan ni Jesucristo, amen.