Am-ammo ken Ay-ayatennakayo ti Dios

Ni Elder Alan T. Phillips

Ti Pitupulo

Maipapan amin kadakayo ti plano ti Dios iti ragsak. Dakayo ti napateg nga anakna ken dakkel ti pategyo.

Innem a tawen ti napalabas agbibiahe ti pamiliami iti rabii iti ruar laeng ti siudad ti Oxford. Kas masansan a mapaspasamak iti babassit nga ubbing, kasapulan a nagsardengkami a nakasarak iti service station nga adda tiendaan ken pangananna. Siaannad a rimmuarkami iti kotse, binisitami dagiti service, sa nagsublikami iti kotse, a nagtultuloy iti panagbiahe.

Kinse minuto kalpasanna, dinamag ti inauna a barok: “Yanna ni Jasper?” Kanayon nga agtugaw ni Jasper iti likud ti kotse. Impapanmi a naturog daytoy wenno naglemmeng wenno agay-ayam ti trick kadakami.

Idi immasideg tapno kitaen ti kabsatna ti likud ti kotse, natakuatanmi nga awan ti baromi nga agtawen iti lima. Nagdanagkami amangan ta dakes ti napasamak. Idi agsublikami iti service station, impakaasimi iti Nailangitan nga Ama a masaluadan koma ni Jasper. Tinawaganmi ti polisia ket impakaammomi ti situasion.

Idi simmangpetkami a madandanagan, nasurok nga 40 minuto kalpasanna, nakitami ti dua a lugan ti polisia iti car park. Adda ni Jasper iti uneg ti maysa a lugan a mangipispis-it iti buttons. Diakto pulos malipatan ti rag-o a nariknami idi makaduami manen.

Adu kadagiti pangngarig ti Mangisalakan ti mangipamaysa iti panaguummong, panangisubli, wenno panagpasnek a mangsapul iti dayta naiwaras wenno napukaw. Maibilang ditoy dagiti pangngarig ti napukaw a karnero, napukaw a sensilio, ken napukaw nga anak a lalaki.¹

Bayat ti panangpanunotko iti daytoy a pasamak ken ni Jasper iti panaglabas dagiti tawen, pinampanunotko ti nadiosan a pakabigbigan ken kinapateg dagiti annak ti Dios, ti makasubbot a bileg ni Jesucristo, ken ti naan-anay nga ayat ti Ama idiay Langit, a makaam-ammo kadatayo. Sapay ta paneknekak dagitoy a kinapudno ita.

1. Annak ti Dios

Mapannubok ti biag. Marikna ti adu a tao ti pannakaupay, agmaymaysa, naisina, wenno nabannog. No narigat dagiti bambanag, mabalin a mariknatayo a nayaw-awan wenno nabatitayo. Ti pannakaammo nga annaknatayo amin ti Dios ken miembro ti agnanayon a pamiliana ket mangisubli iti rikna ti pannakaikameng ken panggep.²

Imbinglay ni Presidente M. Russel Ballard: “Adda maysa a napateg a pakabigbigantayo ita ken agnanayon. … Dayta ket kanayon nga anaknakayo a lalaki ken babai ti Dios. … Iti pannakaawat itoy a kinapudno—ken awaten daytoy—ket makapagbalbaliw-biag.”³

Diyo mapagbiddutan wenno tagibassiten ti pategyo iti Amayo iti Langit. Saankayo naigagara a segunda a bunga ti nakaparsuaan, ulila, wenno resulta ti material ken panawen ken gundaway. No adda disenio adda maysa a designer.

Adda kaipapanan ken panggep ti biag. Ti agtultuloy a Pannakaisubli ti ebanghelio ni Jesucristo mangyeg iti lawag ken pannakaawat iti nadiosan a pakabigbiganyo. Maipatpategkayo nga anak ti Nailangitan nga Ama. Maipapan kadakayo dagiti amin a pangngarig ken pannursuro. Ipatpategnakayo unay ti Dios ta imbaonna ti Anakna a mangagas, mangispal, ken mangsubbot kadakayo.⁴

Nabigbig ni Jesucristo ti nadiosan a kababalin ken agnanayon a pateg ti tunggal tao.⁵ Inlawlawagna no kasano a ti dua a dakkel a bilin nga ayaten ti Dios ken ayaten ti kaarrubatayo ket pundasion ti amin a bilin ti Dios.⁶ Maysa a nadiosan a pagrebbengantayo ti mangaywan kadagiti agkasapulan.⁷ Kas disipulo ni Jesucristo, “makipagbaklaytayo iti imet ti tunggal maysa, … makipagladingit kadagiti agladladingit … , ken, manglinglingay kadagiti makasapul iti pannakalinglingay.”⁸

Ti relihion saan laeng maipapan ti relasiontayo iti Dios, maipapan pay daytoy iti relasiontayo iti tunggal maysa. Inlawlawag ni Elder Jeffrey R. Holland a ti English word a religion naggapu iti Latin word religarekayatna a sawen ti “ibegkes” wenno, nalitliteral, “uliten nga ibegkes.” Ngarud, “ti pudno a relihion isu ti begkes a mangisilpo kadatayo iti Dios ken iti tunggal maysa.”⁹

Pudno a napateg no kasano ti panagtritrinnatotayo. Isuro ni Presidente Russell M. Nelson, “Nalawag ti mensahe ti Mangisalakan: Dagiti pudno a disipulona ti mangbangon, mangitag-ay, mangallukoy, manggutugot, ken mangparegta.”¹⁰ Napatpateg daytoy no marikna dagiti pada nga agdaldaliasat a nayaw-awan, agmaymaysa, nalipatan, wenno naikkatda.

Ditayo nasken ti kumita iti adayo a mangsapul iti tattao a marigrigatan. Marugiantayo babaen ti panangtulong iti tao iti pamiliatayo, kongregasion, wenno puroktayo. Mapabang-artayo ti sagabaen ti 700 milion a tao nga agbibiag iti nakaro a kinapanglaw¹¹ wenno ti 100 milion a tao a puersado a napagtalaw gapu iti pannakaidadanes, panagsususik, ken kinaranggas.¹² Ni Jesucristo ti perpekto a pagwadan ti panangaywan iti agkasapulan—dagiti mabisin, ganggannaet, masakit, napanglaw, naibalud. Trabahotayo ti trabahona.

Isuro ni Elder Gerrit W. Gong a “masansan a masarakantayo a sangkamaysa ti biahetayo iti Dios.”¹³ Ngarud, dagiti wardtayo koma ti pagkamangan ti amin nga annak ti Dios. Ditayo kadi nagaget a makimisa wenno aktibotayo a mangparnuay kadagiti purok a panggepda ti agdayaw, manglagip ken ni Cristo, ken agserbi iti tunggal maysa?¹⁴ Maipangagtayo ti balakad ni Presidente Nelson a manghusga iti basbassit, agayat iti ad-adu, ken mangted iti natarnaw nga ayat ni Jesucristo babaen dagiti sao ken aramidtayo.¹⁵

Ti Pangsubbot a Bileg ni Jesucristo

Ti Pannubbot ni Jesucristo ti kangatuan a pangyebkas iti ayat ti Nailangitan nga Amatayo para kadagiti annakna.¹⁶ Ti balikas a pannubbot iladawanna ti “panagtipon” dagiti naisina wenno nagsina.

Mision ti Mangisalakantayo ti mangipaay iti maysa a dalan nga agsubli iti Nailangitan nga Ama ken bang-ar iti panagdaliasat. Ammo ti Mangisalakan babaen ti padasna no kasano a tulongannatayo kadagiti karit ti biag.¹⁷ Dikayo agbiddut: Ni Cristo ti mangispal ken mangagas kadagiti kararuatayo.

No aramatentayo ti pammati, tulongannatayo nga agtultuloy kadagiti rigat. Ituloyna nga ipaay ti naayat ken naasi nga awisna:

“Umaykayo kaniak, dakayo amin nga agrigrigat ken madagdagsenan, ta paginanaenkayto.

“Alaenyo ti sangolko kadakayo, ket agsursurokayo kaniak; … ket makasarakkayto iti inana a maipaay iti kararuayo.”¹⁸

Nabileg ti metapora iti sangol. Kas inlawlawag ni Presidente Howard W. Hunter: “Ti sangol ket maysa nga alikamen a mangpalugod a maisilpo ti ‘pigsa’ ti maikadua nga ayup ken maikuyog ti panagregget ti maysa nga ayup, a mangibinglay ken mangkissay iti nadagsen a [trabaho a maileppas]. Ti imet a nakaro wenno nalabit imposible nga ibturan ti maysa ket mabalin a patas ken komportable nga awiten ti dua a nagsinggalut iti gagangay a sangol.”¹⁹

Insuro ni Presidente Nelson: “Umaykayo ken Cristo a maisangol Kenkuana ken iti bilegna, tapno saankayo nga agmaymaysa a mangguyod iti awit ti biag. Guyguyodenyo ti awit ti biag a naisangol iti Mangisalakan ken Mannubbot ti lubong.”²⁰

Kasano a maisangol wenno maibegkestayo iti Mangisalakan? Ilawlawag ni Elder David A. Bednar:

“Ti panagaramid ken panagtungpal kadagiti sagrado a katulagan isangolnatayo ken ni Apo Jesucristo. Kinapudnona, ayabannatayo ti Mangisalakan nga agpannuray ken makipaguyod Kenkuana. ….

“Saantayo ken saan a nasken nga agmaymaysatayo.”²¹

Iti asino man a madagsenan, napukaw, matikaw: Diyo nasken nga aramiden daytoy nga agmaymaysa.²² Babaen ti Pannubbot ni Cristo ken dagiti ordinansana, maisangol ken maibegkeskayo Kenkuana. Siaayat nga ipaayna ti pigsa ken pannakaagas a kasapulanyo iti panagdaliasat nga agur-uray. Isu latta ti pagkamangan manipd kadagiti bagyotayo.²³

III. Ayat ti Nailangitan nga Ama

Para iti rekord, managpakatawa, nadungngo, nalaing, ken naariwawa ni Jasper. Ngem kukuak ti tulbek daytoy nga estoria. Isu ti anakko, ket ad-adda nga ay-ayatek ngem iti ammonanto. No kastoy ti rikna ti imperpekto, naindagaan nga ama maipapan iti anakna, mailadawanyo kadi no kasano ti rikna kadakayo ti naan-anay, naitan-ok, naayat a Nailangitan nga Ama?

Kadagiti patpatgek a gagayyem ti tumantanor a kaputotan, Gen Z ken Gen Alpha: Ammoyo koma a kasapulan ti pammati ti aramid.²⁴ Agbibiagtayo iti panawen a , para iti adu, “mamati laeng no makita.” Mapannubok ti pammati ken agkasapulan iti pili. Ngem masungbatan dagiti kararag.²⁵ Ken marikna dagiti sungbat.²⁶ Adda kadagiti kapudnuan a banag iti biag ti di makita; marikna, am-ammo, ken mapadasanda. Napudnoda unay.

Kayat ni Jesucristo a maam-ammoyo ken maaddaan iti relasion iti Amayo idiay Langit.²⁷ Insurona, “Asino a tao kadakayo, nga addaan iti anak a lalaki, ket agtaktakderto, ket agkuna, Ama, luktam ti balaymo tapno makastrekak ken makipangrabii-ak kenka, dinanto kunaen, Sumrekka, anakko; ta kukuam ti kukuak, ket kukuak ti kukuam?”²⁸ Mapanunotyo kadi ti naperpersonal, naay-ayat, a ladawan ti Dios nga Agnanayon nga Ama?

Anaknakayo. No mariknayo a napukawkayo, no adda saludsodyo wenno kurang ti siribyo, no makilablabankayo iti kasasaadyo wenno iti naespirituan a panagsusupiat, inkayo Kenkuana. Agkararagkayo Kenkuana iti liwliwa, sungbat, ken direksion. Ania man ti kasapulan ken sadinokayo man, Ibukbokyo ti pusoyo iti Nailangitan nga Amayo. Para iti dadduma, masurotyo ti awis ni Presidente Nelson ken damagen “no pudno nga adda idiay—no am-ammonakayo. Damagenyo Kenkuana no ksano ti riknana kadakayo. Ket kalpasanna dumngegkayo.”²⁹

Patpatgek a kakabsat:

Am-ammuenyo ti Amayo iti Langit. Naan-anay ken naayat Isuna.
Ammuenyo no asino ni Jesucristo.³⁰ Isu ti Mangisalakan ken Mannubbottayo. Ibegkesyo ti bagiyo ken dagiti patpatgenyo Kenkuana.
Ken ammona no asinokayo. Ammona ti pudno a nadiosan a pakabigbiganyo. Maipapan amin kadakayo ti plano ti Dios iti ragsak. Dakayo ti napateg nga anakna ken dakkel ti pategyo. Am-ammo ken ay-ayatennakayo.

Paneknekak dagitoy simple ngem pundasion ti kinapudno iti nagan ni Jesucristo, amen.