“Kapitulo 3: Adalen ken Isuro ti Ebanghelio ni Jesucristo,” Ikasaba ti Ebangheliok: Maysa a Pangiwanwan iti Panangibinglay iti Ebanghelio ni Jesucristo (2023)
“Adalen ken Isuro ti Ebanghelio ni Jesucristo,” Ikasaba ti Ebangheliok
Kapitulo 3
Adalen ken Isuro ti Ebanghelio ni Jesucristo
Dagiti adalen iti daytoy a kapitulo ket naglaon kadagiti napapateg a doktrina, pagbatayan, ken bilbilin ti ebanghelio ni Jesucristo. Dagitoy nga adalen dagiti imbilin kenka dagiti sibibiag a propeta ken apostol tapno sursuruem ken isurom. Naipaayda ditoy tapno matulongam dagiti dadduma a maawatanda a nalawag ti doktrina ni Cristo.
Ti umuna a benneg iti daytoy a kapitulo ket ti awis nga agbuniag. Ti nabati a paset ti kapitulo ket buklen dagiti sumaganad nga uppat nga adalen:
Adalem dagiti nasantuan a kasuratan ken ipategmo ti doktrina iti tunggal adalen. Bayat ti panangaramidmo, paneknekanto ti Espiritu dagiti kinapudno nga ad-adalem. Tulongannakanto a mangammo no ania ti isaom ken aramidem a mangtulong kadagiti dadduma nga umawat iti saksi ti kinapudno. (Kitaen iti Doktrina ken Katulagan 84:85.)
Ad-adda a maam-ammonto dagiti tao ti Mangisalakan bayat ti panangaramidda no ania ti inyawisna kadakuada nga aramidenda. Mangted kadagiti awis iti tunggal adalen, ken tulongam dagiti tao a mangtungpal kadagiti panagkumitda. Bayat ti panagtungpal dagiti tao kadagiti panagkumit, mangrugida nga agbiag iti ebanghelio ni Jesucristo ken agsaganada nga agaramid kadagiti katulagan iti Dios.
Isuro amin nga adalen sakbay ken kalpasan ti panagbuniag. Idauluan dagiti full-time a misionario ti panangisuro kadagiti adalen iti agpada a gundaway. Makipaset dagiti misionario ti ward wenno dadduma pay a miembro no mabalin. Kitaen kadagiti kapitulo 10 ken 13 para iti impormasion maipapan iti panangiraman kadagiti miembro iti panangisuro.
Agsagana a Mangisuro
Bayat ti panagsaganam a mangisuro, irebyum ti impormasion para iti tunggal tao iti Preach My Gospel app. Mangaramid iti maysa a plano ti adalen a maibatay kadagiti kasapulan ti tao. Ibilangmo no ania ti nasken nga ammuen ken mariknana bayat ti isasarungkarmo a mangisuro. Padakkelento ti Espiritu dagiti panagkagumaam bayat ti panangipaaymo iti panawen nga agsagana ken agplano.
Adtoy ti sumagmamano a saludsod para kenka ken ti kompanionmo a sikakararag nga ibilangmo bayat ti panagsaganam a mangisuro.
-
Ania ti awis nga ipaayta tapno matulongan ti tao a mangbangon iti pammati ken Cristo ken dumur-as? Dagiti awis ket no kasano a matulongam dagiti tao nga agbabawi ken makapadas iti “bileg ti Mannubbot” (Helaman 5:11). Panunotem ti panagdur-as, kasasaad, ken kasapulan ti tao. Kalpasanna, iraman ti maysa wenno ad-adu pay nga awis iti planom nga adalen.
-
Ania a doktrina ken pagbatayan ti makatulong iti tao a mangpatalinaed iti panagkumit nga inyawistayo kenkuana nga aramidenna? Sikararag nga ikeddeng no ania a doktrina ken pagbatayan ti makatulong kadagiti tao a makaawat no apay a napateg ti panangtungpal iti panagkumitda para kadakuada ken iti Apo.
-
Kasano a matulonganta ti tao a makasursurona iti doktrina? Tapno makapagsagana a mangisuro iti doktrina, urnosen ken gupgopen no anianto ti isurom babaen ti panangusar kadagiti adalen 1–4. Ammuen dagiti saludsod, nasantuan a kasuratan, pagarigan, ken maitutop a media a makatulong iti tao a makaawat no ania ti isursurom. Kitaen iti kapitulo 10 para iti impormasion maipapan iti no kasano ti panangpasayaat iti panangisurom.
-
Ania dagiti bendision nga inkari ti Dios para iti panangawat ken panangtungpal kadagiti panagkumit? Bayat ti panagadalmo iti doktrina, ilasinmo dagiti naikari a bendision ti Dios. Bayat ti panangisurom, ikarim dagiti bendision ken mangiburay iti pammaneknek maipapan kadagitoy.
-
Siasino dagiti miembro a mabalin a makiraman? Iti linawas a miting ti koordinasion, ikeddeng no siasino dagiti miembro a makatulong kenka a mangisuro ken mangsuporta iti tao. Sakbay ti adalen, pagsasaritaan ti pannakiramanda. Kitaen iti kapitulo 10.
-
Ania ti maaramidanta a makatulong kadagiti tao nga agtungpal kadagiti panagkumitda kalpasan a pumanawta? I-follow up babaen ti panangaramid iti ababa nga inaldaw a kontak tapno matulongan dagiti tao a mangtungpal kadagiti panagkumitda. Agbirok kadagiti wagas a mangiraman kadagiti miembro iti panangtulong kadagiti sursuruam a mangtungpal kadagiti panagkumitda. Mabalin a karaman daytoy a kontak ti panagbasa iti maysa a kapitulo manipud iti Libro ni Mormon wenno dadduma pay a nasantuan a kasuratan. No saan nga agtungtungpal ti maysa a tao iti sigud a panagkumitna, mabalin a nasaysayaat no tumulong iti dayta sakbay ti panangted iti maysa a sabali. Kitaen iti kapitulo 11.
-
Kasano a nasaysayaat a matulongantayo ida iti sumaruno a gundaway? Kalpasan ti tunggal kasasaad ti panangisuro, amirisen ti padas dagiti tao a sursuruam. Dumakdakkel kadi ti pammatida ken ni Cristo? Marikriknada kadi ti Espiritu? Agbabbabawida ken agar-aramid ken agtungtungpalda kadi kadagiti panagkumit? Agkarkararagda kadi, agad-adal iti Libro ni Mormon, ken makimismisada? Agaramidkayo kadagiti plano a mangtulong kadakuada.
Mangisuro Manipud iti Pusom no Matarabay ti Espiritu
Iti pannakisaoda kadagiti amin nga elder ken sister, kinuna ti Umuna a Panguluen ken ti Korum dagiti Sangapulo-ket-dua nga Apostol:
“Ti panggeptayo ket mangisuro iti mensahe ti naisubli nga ebanghelio iti kasta a wagas a mangpalugod iti Espiritu tapno mangiturong iti agpada a misionario ken dagiti pasursuruan. Napateg a sursuruen dagiti konsepto [dagiti adalen], ngem saan a nasken a maisuro dagitoy babaen ti nayulo a panangidatag. Nasken a marikna ti misionario a nawaya a mangusar kadagiti bukodna a balikas no iparikna ti Espiritu. Saan a nasken nga yulona ti isaona, ngem ketdi agsao nga aggapu iti pusona kadagiti bukodna a balikas. Mabalin a saannna a suroten ti urnos dagiti adalen, a mangted iti nakaparegtaanna nga aramiden, a maibatay iti interes ken kasapulan ti [tao]. Iti panagsaona iti bukodna a kumbiksion ken kadagiti bukodna a balikas nasken nga iburayna ti pammaneknek maipapan iti kinapudno dagiti isursurona.”
Mangisuro ken Mangawis segun kadagiti Kasapulan ti Indibidual
Addaanka iti kabaelan a mangibagay a mangisuro kadagiti adalen iti ania man a wagas a makatulong kadagiti tao nga agsagana a naan-anay a makapagsagana para iti panagbuniag ken kumpirmasion. No ania nga adalen ti isurom, no kaano nga isurom daytoy, ken no mano ti oras a bubosem iti daytoy ket kasayaatan a maikeddeng babaen kadagiti kasapulan dagiti tao a sursuruam ken ti pangiwanwan ti Espiritu. Kas pagarigan, no mangisursuro kadagiti tao nga awanan iti Kristiano a nagtaudanda, mabalinmo a rugian babaen ti panangtulong kadakuada a mangpadur-as iti dakdakkel a koneksion iti Nailangitan nga Ama ken pannakaawat iti planona (kitaen iti “Teaching People Who Do Not Have a Christian Background” iti kapitulo 10).
Bay-am nga iturongnaka ti Espiritu no ania dagiti awis nga ipaay ken no kaano nga ipaay dagitoy. Ti umno nga awis iti umno a gundaway ket makagutugot kadagiti tao nga agaramid kadagiti banag a mangpabileg iti pammatida. Dagitoy a tignay ti makaiturong iti nabileg a panagbalbaliw ti puso (kitaen iti Mosiah 5:2; Alma 5:12–14).
Mangisuro kadagiti adalen a simple, nalawag, ken ababa. Gagangay a, ti isasarungkar a panangisuro ket saan koma nga at-atiddog ngem 30 a minuto, ken mabalinmo a suruan ti maysa a tao iti uray 5 a minuto.
Gagangay a kasapulamto ti adu a miting tapno maisuro dagiti pagbatayan iti maysa nga adalen. Masansan nga ad-adda a maawatan dagiti tao ti mensahem no mangisuroka kadagiti ababa nga adalen, masansan a mangisuro, ken mangisuro iti babassit a paset ti material.
Panagadal iti Nasantuan a Kasuratan
Ania ti naibilin kenka nga isurom?
Apay a napateg nga adalen ti doktrina kadagiti lesson?