“Kapitulo 3: Ti Awis a Mabuniagan ken Makumpirmaan,” Ikasaba ti Ebangheliok: Maysa a Pangiwanwan iti Panangibinglay iti Ebanghelio ni Jesucristo (2023)
“Ti Awis a Mabuniagan ken Makumpirmaan,” Ikasaba ti Ebangheliok
Kapitulo 3
Ti Awis a Mabuniagan ken Makumpirmaan
Pundasion a Mainaig iti Doktrina
Annaknatayo amin ti Nailangitan nga Ama. Immaytayo ditoy daga tapno maaddaantayo iti gundaway nga agsursuro, dumur-as, ken agbalin nga ad-adda a kas Kenkuana tapno makasublitayo iti imatangna (kitaen iti Moises 1:39). Saantayo makapagbalin a kas Kenkuana wenno makasubli Kenkuana no awan ti nadiosan a tulongna. Imbaon ti Nailangitan nga Amatayo ti Anakna, ni Jesucristo, a mangsubbot kadatayo ken mangwarwar kadagiti pamungo ni patay (kitaen iti 3 Nephi 27:13–22).
Magun-odtayo ti pangsubbot a bileg ni Cristo babaen iti panangaramat iti pammati Kenkuana a mangiturong iti panagbabawi, pannakabuniag, panangawat iti sagut ti Espiritu Santo babaen ti kumpirmasion, ken panagibtur agingga iti panungpalan. Ti panagtungpal iti katulagan ti panagbuniag ti umuna nga addang iti panangibegkes iti bagbagitayo iti Dios tapno ti Espiritu Santo ket dalusan, papigsaen, ken balbaliwanna ti kinataotayo para iti nasaysayaat. Maawagan iti naespirituan a pannakayanak manen ti panangpadas iti daytoy a pangpasanto nga impluensia. (Kitaen iti 2 Nephi 31:7, 13–14, 20–21; Mosiah 5:1–7; 18; 27:24; 3 Nephi 27:20; Juan 3:5.)
Mangrugi ti naespirituan a pannakayanak manen no mabuniagantayo babaen ti danum ken ti Espiritu. Ti panagbuniag ket maysa a naragsak ken mangnamnama nga ordinansa. No mabuniagantayo nga addaan napakumbaba a puso ken agbabbabawi nga espiritu, mangrugi tayo manen iti biag babaen ti mangkankanunong a bileg ti Dios. Kalpasan a mabuniagan ken makumpirmaantayo, makapagtultuloytayo a mapapigsa babaen ti sikakari a pannakiranudtayo iti sakramento. (Kitaen iti 2 Nephi 31:13; Mosiah 18:7–16; Moroni 6:2; Doktrina ken Katulagan 20:37.)
Panangted iti Awis
Bayat ti panagriknam nga iwanwannaka ti Espiritu, awisem dagiti tao nga agpabuniag ken agpakumpirma. Mabalin a mapasamak daytoy bayat ti ania man nga adalen.
Isuro ti doktrina ti panagbuniag ken tulongan dagiti tao a makaawat iti doktrina ni Cristo (kitaen iti adalen 3). Isuro ti maipapan iti kinapateg ken rag-o ti katulagan ti panagbuniag, ti panangawat iti pannakapakawan dagiti basol, ken ti panangawat iti sagut ti Espiritu Santo babaen ti kumpirmasion.
Isagana dagiti tao para iti awis iti panagbuniag babaen ti panangsigurado a maawatanda ti insuroyo ken ti katulagan nga aramidendanto. Ti katulagan ti panagbuniag ket ti sumaganad:
-
Agbalin a natallugod nga umawat iti bagitayo ti nagan ni Jesucristo.
-
Agtungpal kadagiti bilin ti Dios
-
Agserbi iti Dios ken iti dadduma.
-
Agibtur agingga iti panungpalan. (Kitaen iti adalen 4.)
Mabalinyo nga ibinglay dagiti sumaganad:
“No mabuniagantayo, ‘agsaksitayo iti sango ti [Dios] iti pannakitulag kenkuana, nga agpaay[tayo] kenkuana ken salimetmetan dagiti bilinna. No aramidentayo daytoy a katulagan, ikarina a ‘nabusbuslon ti panangiburayna iti Espirituna [kadatayo].” (Mosiah 18:10).”
Nasken a masinunuo ken direkta ti awisyo a mabuniagan. Mabalinyo nga isao:
“Surotemto kadi ti pagwadan ni Jesucristo babaen ti panagpabuniag babaen iti maysa a tao a naordenan a mangannong iti daytoy nga ordinansa? Tulongandakanto nga agsagana para iti panagbuniag. Mamatikami a makapagsaganaka inton [petsa]. Agsaganakanto kadi a mabuniagan iti dayta a petsa?”
Kas iti ania man nga awis nga itedmo, ikarim dagiti naindaklan a bendision nga awatento dagiti tao bayat ti panangawatda iti awis nga agpabuniag ken panagtungpalda kadagiti nainaig a katulagan. Ibinglayyo ti pammaneknekyo maipapan kadagitoy a bendision.
Isuroyo a ti panagbuniag ken kumpirmasion ket saan a maudi a pagtungpalan. Ketdi, dagitoy ti maysa a punto iti dana ti pannakapasurot a mangyeg iti namnama, rag-o, ken bileg ti Dios nga ad-adda a naan-anay iti biag ti maysa a tao (kitaen iti Mosiah 27:25–26). Kalpasan ti pannakabuniag ken pannakakumpirma dagiti tao, mabalinda a padaanan ti pannakapasanto babaen ti Espiritu bayat ti panagdur-asda iti dana ti katulagan.
No mabalin, awisenyo dagiti sursuruanyo a dumar-ay iti serbisio ti panagbuniag ken iti miting ti sakramento kabayatan ti pannakakumpirma ti maysa a tao.
Dagiti Kapanunotan para iti Awis a Mabuniagan
Ibilang ti panangbasa iti pakaammuan iti nasantuan a kasuratan maipapan iti pannakabuniag ni Jesus (kitaen iti Mateo 3:13–17). Mabalinyo pay nga ipabuya ti Bible video a mangiladladawan iti panagbuniag ti Mangisalakan wenno ti Book of Mormon video a dagiti disipulo ti Mangisalakan a mangbumbuniag.
Mabalinyo pay a basaen ti pakaammuan ni Nephi maipapan iti panagbuniag ni Jesus (kitaen iti 2 Nephi 31:4–12). Ti panangbasa kadagiti pakaammuan maipapan iti panagbuniag ni Jesucristo ket mabalin a mangpabileg kadagiti masursuruan.
Panagadal iti Nasantuan a Kasuratan
Adalen dagiti sumaganad a nasantuan a kasuratan:
Mangisuratkayo iti pakagupgopan dagiti nasursuroyo.