Ayatem ti Kaarrubam
Ti kinamanangngaasi ket maysa a galad ni Cristo. Resulta daytoy ti panagayat ti maysa a tao iti sabsabali ken awan ti limitasionna.
Ita a bigat awisenkayo a kaduaendak iti panagdaliasat idiay Africa. Dikayto makakita kadagiti leon, zebra, wenno elepante, ngem nalabit, inton malpas ti panagdaliasat, makitayo no kasano a rinibu a miembro Ti Simbaan ni Jesucristo dagiti Santo iti Ud-udina nga Aldaw ti agresponde iti maikadua a dakkel a bilin ni Cristo nga “ayatem ti kaarrubam” (Marcos 12:31).
Panunotenyo biit ti nalabaga a daga iti away ti Africa. Makitayo manipud iti namaga ken natikag a daga a saan a nagtudo iti uray ania man iti adu a tawtawen. Dagiti sumagmamano a baka a bumallasiw iti dalanyo ket nakukuttong ken iturturong ida ti maysa a naabungotan iti kubrekama a pastor ti Karamajong a nakasandalias, agtartaray a mangnamnama a makasarak iti mula ken danum.
Bayat ti panagdaliasatyo iti narangkis ken nabato a kalsada, makitayo ti sumagmamano a grupo dagiti napintas nga ubbing ket masdaawkayo no apay a saanda nga ageskuela. Umis-isem ken agpaypayapay dagiti ubbing, ket agpayapaykayo nga aglulua ken umis-isem. Siam a pulo ket dua a porsiento dagiti ubbing a makitayo iti panagdaliasat ti agbibiag iti kinapanglaw ket agsennaay ti pusoyo gapu iti panagleddaang.
Iti sanguanan, makitayo ti ina nga agaw-awit iti naannad ti pannakatimbengna a lima a galon (19 L) a pagkargaan ti danum ken sabali pay iti imana. Isu ti mangibagi iti tunggal dua a sangakabbalayan iti daytoy a lugar a pagpagnaan dagiti babbai, ubbing ken nataengan, iti nasurok a 30 minuto nga agapan ken agawid, iti inaldaw, iti paggapuan ti danum para iti pamiliada. Ti ladingit ti maglapunos kenka.
Dua nga oras ti naglabas ket makadanonkan iti nasulinek, nalinong a lugar. Saan a pasdek wenno tolda ti pagmimitingan ngem iti sirok ti dadakkel a kayo a paglinongan manipud iti nabara nga init. Ditoy a lugar, madlawyo nga awan ti agay-ayus a danum, awan koriente, awan ti flush toilet. Kitaenyo ti aglawlaw ket ammoyo a karamankayo kadagiti tao nga agayat iti Dios, ken dagus a mariknayo ti ayat ti Dios kadakuada. Naguummongda tapno umawat iti tulong ken namnama, ket simmangpetkayo a mangiranud iti dayta.
Kasta ti panagdaliasatmi ken ni Sister Ardern, a kaduami da Sister Camille Johnson, Presidente ti General Relief Society-tayo ken ni Doug nga asawana, ken Sister Sharon Eubank, direktor ti Humanitarian Services ti Simbaan, bayat ti panagbiahemi idiay Uganda, maysa a pagilian ti 47 milion a tattao iti Africa Central Area ti Simbaan. Iti dayta nga aldaw, iti sirok dagiti kayo, binisitami ti maysa a community health project a nagkakaduaan a pinunduan ti Church Humanitarian Services, ti UNICEF, ken ti Ministry of Health ti gobierno ti Uganda. Dagitoy ti mapagtalkan nga organisasion, a siaannad a napili tapno masigurado a nainsiriban a maus-usar dagiti naidonar a pondo dagiti miembro ti Simbaan a maipaay a pangtulong iti tao.
Nupay makapaladingit ti pannakakita kadagiti malnourish nga ubbing ken dagiti epekto ti tuberculosis, malaria, ken di agsarday a panagtakki, ad-adda a ninamnamami ti nasaysayaat a masakbayan dagidiay naam-ammomi.
Dimteng dayta a namnama babaen iti asi dagiti miembro ti Simbaan iti sangalubongan a mangidonar iti panawen ken kuarta iti aramid ti Simbaan a tumulong iti tattao. Idi makitak a matulongan ken maitag-ay dagiti masakit ken marigatan, nagtamedak kas panagyaman. Iti dayta a kanito, ad-adda a naawatak ti kayat a sawen ti Ari dagiti ar-ari, a nagkuna:
“Umaykayo, dakayo a binendisionan ti Amak, tawidenyo ti pagarian a naisagana kadakayo … :
“Ta nabisinanak ket inikkandak iti makan: nawawak ket inikkandak iti mainom: gangannaetak ket pinastrekdak” (Mateo 25:34–35).
Ti kiddaw ti Mangisalakantayo ket “kasta koma ti panaglawag ti silawyo iti sanguanan dagiti tao, tapno makitada dagiti naimbag nga aramidyo, ket dayawenda koma ni Amayo nga adda sadi langit” (Mateo 5:16; kitaen met dagiti bersikulo 14–15). Iti dayta adayo a suli ti daga, dagiti naimbag nga aramidyo ti nangraniag iti biag ken nangpalag-an iti imet dagiti tao nga agkasapulan iti tulong, ket napadayawan ti Dios.
Iti dayta napudnot ken natapok nga aldaw, nangngegyo koma dagiti kararagda nga agdaydayaw ken agyamyaman iti Dios. Kayatda nga isaok kadakayo ti katutubo a pagsasaoda a Karamajong, “Alakara.” Agyamankami.
Ti panagdaliasatmi ti nangipalagip kaniak iti pangngarig ti naimbag a Samaritano, a nagdaliasat iti natapok a dalan, saan a kas iti immuna nga inladawanko, maysa a dalan manipuditi Jerusalem a napan iti Jerico. Isuro kadatayo daytoy managserbi a Samaritano ti kaipapanan ti “ayatem ti kaarrubam.”
Nakitana “ti maysa a tao … [a] natulisan ket sinamsamda ti amin nga adda kenkuana ken ginagarada ti sugat ket pinanawanda a nganngani matay” (Lucas 10:30). Ti Samaritano ket “natignay ti asina” (Lucas 10:33).
Ti kinamanangngaasi ket maysa a kababalin ni Cristo. Bunga daytoy ti ayat iti dadduma ken awan ti ammona a beddeng. Ni Jesus, ti Mangisalakan iti lubong, ti pagwadan ti kinamanangngaasi. Idi mabasatayo a “nagsangit ni Jesus” (Juan 11:35), saksitayo, kas kada Maria ken Marta, iti asina, a nakaigapu Kenkuana a nagsennaay ti espirituna ken nariribukan (kitaen iti Juan 11:33). Iti maysa a pagarigan ti Libro ni Mormon iti kinamanangngaasi ni Cristo, nagparang ni Jesus iti kaaduan ket kinunana:
“Adda kadi kadakayo ti lugpi, wenno bulsek, … umel, wenno marigatan iti uray ania a kita? Yasidegyo ida ta agasak, gapu ta adda asik kadakayo. …
“… Ket inagasanna ida a saggaysa” (3 Nephi 17:7, 9).
Iti laksid ti amin a reggettayo, ditayo mapaimbag ti amin, ngem makaaramidtayo amin iti dakkel a panagbalbaliw iti biag ti maysa a tao. Maysa laeng nga ubing, ubing a lalaki, ti nangidaton iti lima a tinapay ken dua nga ikan ti nangpakan iti lima ribu. Mabalin nga isaludsodtayo iti datontayo, kas iti inaramid ni Andres a disipulo kadagiti tinapay ken ikan, “Aniada, dagitoy, iti kastoy a kaadu ti tao?” (Juan 6:9). Ipasiguradok kadakayo: nga umdasen nga ited wenno aramidenyo ti kabaelanyo ken ipalubosyo a papigsaen ni Cristo ti reggetyo.
Itoy a gundaway, awisennatayo ni Elder Jeffrey R. Holland, “nabaknang wenno napanglaw, … nga ‘aramiden ti kabaelantayo’ no agkasapulan ti dadduma.” Pinaneknekanna, kas met kaniak, a ti Dios “tulongan ken iwanwannakayo kadagiti naasi nga aramidyo kas disipulo” (“Are We Not All Beggars?” Liahona, Nob. 2014, 41).
Iti dayta adayo a lugar, iti dayta a nakallalagip nga aldaw, paneknekak idi ken paneknekak ita kas saksi iti makaliwliwa ken mangbalbaliw-biag a pannakipagrikna dagiti miembro ti Simbaan, nabaknang man wenno napanglaw.
Agtultuloy ti pangngarig maipapan iti naimbag a Samaritano bayat a “binedbedanna dagiti sugat [ti lalaki] … ket tinarakenna” (Lucas 10:34). Masarakantayo dagiti panagregget ti panagsaranay ti Simbaantayo iti napardas a panagtulong iti natural a didigra ken panangbedbed iti umad-adu a sugat ti lubong iti sakit, bisin, ipapatay dagiti maladaga, malnutrision, pannakayakar, kenmasansan a di makita a sugat ti pannakaupay, ken kinaawan namnama.
Nangala ti Samaritano ti “dua a denario, ket intedna iti agpadpadagus, ket kinunana kenkuana: Taripatuem” (Lucas 10:35). Kas maysa a simbaan, agyamantayo a makitinnulong iti dadduma a “host” wenno organisasion a kas iti Catholic Relief Services, UNICEF, ken Red Cross/Red Crescent, tapno tumulong kadagiti aramidtayo a pangsaranay iti tao. Agyamankami iti “dua a denario” wenno dua a euro, dua a piso, wenno dua a shillingyo a mangpalag-an iti dadagsen nga ib-ibturan ti nagadu a tattao iti sangalubongan. Mabalin a diyo maammuan no asino dagiti umawat iti panawen, doliar, ken kuartayo, ngem saan nga agkasapulan ti asi a kaam-ammotayo ida, kasapulanna laeng nga ayatentayo ida.
Agyamankami, Presidente Russell M. Nelson, iti panangipalagipmo kadakami a “no ayatentayo ti Dios iti amin a pusotayo, iturongna dagiti pusotayo iti pagimbagan dagiti dadduma” (“The Second Great Commandment,” Liahona, Nob. 2019, 97) Paneknekak a maaddaantayo iti ad-adu pay a rag-o, talna, pakumbaba, ken ayat no sungbatantayo iti awag ni Presidente Nelson nga iturongtayo dagiti pusotayo iti pagimbagan dagiti dadduma ken ti kiddaw ni Joseph Smith a “pakanen ti mabisin, kawesan ti lamolamo, ipaay ti kasapulan ti balo a babai, punasen ti lua ti ulila, [ken] liwliwaen dagiti marigrigat, ditoy man Simbaan, wenno iti uray ania a simbaan, sadino man, [a masarakantayo] ida” (“Editor’s Reply to a Letter from Richard Savary,” Times and Seasons, Mar. 15, 1842, 732).
Amin dagita a bulan a naglabas, nasarakanmi dagiti mabisin ken marigrigat iti namaga ken natapok a tanap ket saksikami iti panagpakpakaasida iti tulong. Iti bukodmi a wagas, nagsennaay ti pusomi ken nariribukankami (kitaen iti Juan 11:33), ngem napalag-an dagita a rikna idi nakitami iti pannakipagrikna dagiti miembro ti Simbaan nga agtartrabaho bayat ti pannakataraon dagiti mabisin, panangtulong kadagiti balo a babbai, naliwliwa dagiti marigrigat ket napunas dagiti luada.
Kanayon a maseknantayo koma iti pagimbagan dagiti dadduma ken ipakitatayo iti sao ken aramid a “siaayat a makipagbaklaytayo iti imet ti tunggal maysa, tapno lumag-anda” (Mosiah 18:8), a “mamagtipon kadagiti naldaangan” (Doktrina ken Katulagan138:42), ken mangtungpal iti maikadua a naindaklan a bilin ni Cristo nga “ayatem ti kaarrubam” (Marcos 12:31). Iti nagan ni Jesucristo, amen.